Ino Caamba Nzi Kuba Muntu Uubikkila Maano Kuzintu Zyakumuuya?

AMULIZYE

Bwiinguzi bwamu Bbaibbele

Muntu uubikkila maano kuzintu zyakumuuya naa uusimide kumuuya ulayanda kapati kukkomanisya Leza alimwi ulamwiiya mbwayeeya. Muntu uuli boobu ulasolekesya kupona kweelana azyeelelo zya Leza alimwi ulabutobela busolozi bwamuuya uusalala. a—Baroma 8:5; Baefeso 5:1.

Kanji-kanji, Bbaibbele lilatugwasya kumvwisya makani aaya kwiinda mukwaamba kwiindana kuliko akati kamuntu uusimide kumuuya autasimide. Mucikozyanyo, mukwiimpana amuntu uusimide kumuuya, “muntu uusololelwa azisusi zyanyama tatambuli zintu zyamuuya wa Leza,” naa njiisyo zyakwe. (1 Bakorinto 2:14-16) Mukwiimpana abantu babikkila maano kuzintu zyakumuuya, bantu basololelwa azisusi zyanyama bajisi ‘munyono alimwi tabamvwani’ abamwi muciindi cakuba baabi alimwi basiluumuno. (1 Bakorinto 3:1-3) Kumane aabo babejekezya bamwi akwaandaanya balongwe baambwa kuti bajisi “zilengwa zyabunyama, ibatabikkili maano kuzintu zyakumuuya.”—Juda 19; Tusimpi 16:28. b

Mucibalo eeci tulalanga-langa makani aatobela:

Ino muuya wakuyanda kubikkila maano kuzintu zyakumuuya uzwa kuli?

Tulizyi kuti tuyandika zintu zyakumuuya akaambo kakuti tulengedwe mucinkozya ca Leza. (Matalikilo 1:27) Aboobo, tacigambyi kuti bantu banji balayandisya kuba aluzyibo lwazintu nzyobatakonzyi kujata naa kubona.

Ncizyalwa buya kutondezya bube mbuli mbwajisi Jehova c Leza. Mucikozyanyo luumuno, luse, alimwi akutasalulula. (Jakobo 3:17) Kunze lyaboobo, Leza ulabapa muuya uusalala aabo basolekesya kumvwida milawo yakwe.—Milimo 5:32.

Nkaambo nzi kubikkila maano kuzintu zyakumuuya ncokuyandika?

Kubikkila maano kuzintu zyakumuuya kusololela ‘kubuumi aluumuno.’ (Baroma 8:6) Zintu eezyi nzipego zibotu kapati kuzwa kuli Leza.

Buumi: Leza usyomezya kuyoobapa buumi butamani bantu babikkila maano kuzintu zyakumuuya.—Johane 17:3; Bagalatiya 6:8.
Luumuno: Oolu nduumuno a Leza. Aabo ibabikkila buyo maano kuzintu zyakumubili mbaasinkondonyina a Leza. (Baroma 8:7) Pele, Leza ulabalumbula aabo basolekesya kubikkila maano kuzintu zyakumuuya kwiinda mukubapa “luumuno lwa Leza oolo lwiinda maano oonse.” (Bafilipi 4:6, 7) Luumuno oolu lwamumizeezo lubapa kukkomana mubuumi.—Matayo 5:3.

Ino inga ndaba buti muntu uusimide kumuuya?

Amwiiye akumvwida milawo ya Leza. Mulakonzya kucita oobo kwiinda mukubala Bbaibbele, lyalo ilijisi mizeezo ya Leza yakalembwa abantu “ibakasololelwa amuuya uusalala.” (2 Petro 1:21) Nzyomwiiya ziyoomugwasya kukomba Leza “mumuuya amukasimpe,” alimwi munakusololelwa amuuya uusalala kweelana akuyanda kwa Leza.—Johane 4:24.
Amupailile lugwasyo lwa Leza. (Luka 11:13) Leza uyoomugwasya kuba abube butondezya kuti mulisimide kumuuya. (Bagalatiya 5:22, 23) Alimwi uyoomupa busongo bwakucikonzya kuzunda buyumuyumu mubuumi.—Jakobo 1:5.
Kamuyanzana abantu basimide kumuuya. Bayoomukulwaizya kubikkila maano kuzintu zyakumuuya. (Baroma 1:11, 12) Mukwiimpana, kuyanzana abantu bajisi mizeezo iiteendelani aya Leza balakonzya kumunyonganya kumuuya.—Jakobo 4:4.

Sena bukombi bulayandika kutegwa ndibe muntu uusimide kumuuya?

Kuzulilwa buyo kucikombelo cimwi tacipi muntu kuti asime kumuuya. Bbaibbele lyaamba kuti: “Ikuti muntu uuli woonse kayeeya kuti mukombi wa Leza, pele taujati mulaka wakwe, weena moyo wakwe mwini, alimwi bukombi bwakwe mbwabuyo.”—Jakobo 1:26.

Nokuba boobo, Bbaibbele litondezya kuti bantu bayandisya zintu zyakumuuya balamukomba Leza munzila njakkomanina. Balizyi kuti kuli buyo “muuya omwe,” nkokuti muuya uusalala. Muuya ooyu ubapa kukomba Leza ‘amubili omwe,’ nkokuti mbunga yabantu bakamantene ‘bazumanana alukamantano lwamuuya mucaanzyo caluumuno.’—Baefeso 4:1-4.

Makani aakubeja kujatikizya kusima kumuuya

Makani aakubeja: Kusima kumuuya cibikkilizya bukkale buli boonse bupa kuti muntu alimvwe kukkutila naa kulimvwa kuti zyoonse zili kabotu.

Makani aamasimpe: Bbaibbele lyaamba muntu uusimide kumuuya kuti muntu uusololelwa amizeezo ya Leza mubuumi bwakwe. Talyaambi muntu uutayandi kusololelwa a Leza. Bantu basimide kumuuya balakkutila akaambo kakuzyiba kuti Jehova Mulengi wabo alimwi balapona kweelana amakanze aakwe.—Intembauzyo 100:3.

Makani aakubeja: Muntu ulakonzya kusima kumuuya kuti kaliimya zintu nzyayandisya alimwi akulipenzya mwini.

Makani aamasimpe: Kupenzya mubili ‘nkukomba kwakulipangila,’ alimwi nkuyeeya kwanyama. (Bakolose 2:18, 23) Bbaibbele lyaamba kuti buumi bwakukkomanisya Leza buleta lukkomano kutali macise.—Tusimpi 10:22.

Makani aakubeja: Kusyoma mizimo naa zilenge zili kubusena bwamyuuya kupa kuti muntu asime kumuuya.

Makani aamasimpe: Nzila imwi yakusyoma mizimo, nkusyoma kuti myuuya yabafwide ilakonzya kubandika abantu bacipona. Pele Bbaibbele liyiisya kuti bafwide tabazyi cintu cili coonse. (Mukambausi 9:5) Kusyoma mizimo mubwini nkubandika azilenge zyamuuya izyakamuzangila Leza. Kulamunyemya Leza alimwi kupa kuti muntu katabikkili maano kuzintu zyakumuuya.—Levitiko 20:6; Deuteronomo 18:11, 12.

Makani aakubeja: Zilenge zyoonse myuuya.

Makani aamasimpe: Zintu zyoonse nzyaakalenga Leza zilamulemeka. (Intembauzyo 145:10; Baroma 1:20) Nokuba boobo, zilikke zilenge zya Leza zijisi busongo nzyezikonzya kuba acilongwe anguwe. Mukwiimpana, banyama tabayeeyi alimwi tabakonzyi kuba acilongwe a Leza. Micito yabo yeendelezyegwa azintu zyakumubili nzyobayanda. (2 Petro 2:12) Aboobo, Bbaibbele lyaamba bantu batabikkili maano kuzintu zyakumuuya kuti balayeeya akucita zintu mbuli banyama.—Jakobo 3:15; Juda 19.

a Mabala aakasandululwa kuti “muuya” mumwaambo wakusaanguna akajisi muzeezo “wakuyoya.” Alimwi alakonzya kwaamba cintu citalibonyi pele ceenda naa kunyanyaala. Bbaibbele lyaamba Leza kuti Muuya. Muntu uubikkila maano kuzintu zyakumuuya ulasololelwa akuyanda kwa Leza alimwi amuuya wakwe uusalala.

b Mu Bbaibbele, mabala aakuti “basololelwa azisusi zyanyama,” aamba bantu ibayeeya naa kucita zintu kwiinda mukusololelwa amibili yabo, alimwi tabazilemeki zyeelelo zya Leza.

c Jehova ndezina lya Leza kweelana ambokutondezyedwe mu Bbaibbele.—Intembauzyo 83:18.