Baefeso 5:1-33
5 Aboobo, amwiiye Leza,+ mbomuli bana bayandwa,
2 alimwi amuzumanane kweenda muluyando,+ mbubonya awalo Kristo mbwaakatuyanda*+ akulyaaba akaambo kandiswe* kali cituuzyo acipaizyo cijisi bweema bubotu kuli Leza.+
3 Bwaamu* abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe,+ mbubonya mbokweelede kubantu basalali;+
4 alimwi kutabi bukkale buusya nsoni naa makani aabufwubafwuba naa kwaamba masesya aajatikizya zintu zitondwa,+ izintu ziteelede, pele mweelede buyo kulumba.+
5 Nkaambo mulicizyi eeci, inzya mulizyi kabotu-kabotu kuti kunyina sibwaamu*+ naa muntu uusofweede naa syaacivwulemwangu,+ icaamba kuba sikukomba mituni, uujisi lukono luli loonse mu Bwami bwa Kristo abwa Leza.+
6 Kutabi muntu uumweena amajwi aabuyo, nkaambo akaambo kazintu eezyi bukali bwa Leza buyoobasikila bantu batamvwi.
7 Aboobo mutanikuyanzani ambabo pe;
8 nkaambo cimwi ciindi mwakali mudima, pele lino muli mumuni+ akaambo kakuyanzana a Mwami.+ Amuzumanane kweenda kamuli bana bamumuni,
9 nkaambo micelo yamumuni misyobo yoonse yabubotu, bululami alimwi akasimpe.+
10 Lyoonse kamusaanguna kusinizya naa ncomucita cilatambulika+ ku Mwami;
11 alimwi amuleke kutola lubazu mumilimo yabuyo yamudima;+ muciindi caboobo, kamwiitondezya kuti njabuyo.
12 Nkaambo zintu nzyobacita cakusisikizya zyuusya nsoni nokuba kuzyaamba.
13 Lino zintu zyoonse zibikkwa antangalala zilayubununwa amumuni, nkaambo zyoonse iziyubununwa mumuni.
14 Aboobo kwaambwa kuti: “Sinsimuka, yebo noona, alimwi buka kuzwa kubafwu,+ eelyo Kristo ulamunika alinduwe.”+
15 Aboobo amucenjele kapati, mutanikweendi mbuli bafwubafwuba pe, pele mbuli bantu basongo,
16 kamucibelesya kabotu ciindi coonse ncomujisi,*+ nkaambo mazuba aaya mabi.
17 Akaambo kaceeci, amuleke kufwubaala, pele amuzumanane kumvwisya ncayanda Jehova.*+
18 Alimwi mutakolwi waini pe,+ nkaambo kukolwa kupa butaka,* pele amuzumanane kuzuzyigwa muuya.
19 Nomwaambauzyanya, kamubandika majwi aantembauzyo, kamutembaula Leza anyimbo zyakumuuya, kamwiimba+ akulizizya Jehova*+ nyimbo+ mumyoyo yanu,
20 lyoonse kamulumba+ Leza wesu alimwi Taateesu kujatikizya zintu zyoonse muzina lya Mwami wesu Jesu Kristo.+
21 Kamulibombya umwi aumwi kumweenzinyina+ akaambo kakuyoowa Kristo.
22 Bakaintu kabalibombya kubalumi babo+ mbuli mbobacita ku Mwami,
23 nkaambo mulumi ngomutwe wamukaintu wakwe+ mbubonya Kristo mbwali mutwe wambungano,+ mbwaanga ngomufwutuli wamubili ooyu.
24 Mubwini, mbubonya mbungano mboilibombya kuli Kristo, abalo bakaintu beelede kulibombya kubalumi babo muzintu zyoonse.
25 Nobalumi, amuzumanane kubayanda bakaintu banu,+ mbubonya awalo Kristo mbwaakayanda mbungano akulyaaba akaambo kanjiyo,+
26 kuti aisalazye. Wakaisalazya kwiinda mukwiisanzya amaanzi aajwi lya Leza,+
27 kutegwa mbungano eeyo ibote mumeso aakwe, kaitakwe kabala naa kankwinya niciba cintu cimbi cili boobo,+ pele kuti kaisalala alimwi kainyina kampenda nokaba komwe.+
28 Munzila njiyona eeyi balumi abalo beelede kuyanda bakaintu babo mbuli mbobayanda mibili yabo beni. Mwaalumi uuyanda mukaintu wakwe ulaliyanda mwini,
29 nkaambo kunyina muntu wakasulide kale mubili wakwe mwini, pele ulausanina akuubamba kabotu, mbubonya Kristo mbwacitila mbungano,
30 nkaambo tuli zizo zyamubili wakwe.+
31 “Akaambo kaceeci mwaalumi uyoosiya bausyi abanyina akukakatila kumukaintu* wakwe, eelyo aaba bobilo bayooba mubili omwe.”+
32 Aaya maseseke aa Leza+ mapati. Lino ndaamba makani aajatikizya Kristo ambungano.+
33 Nokuba boobo, umwi aumwi wanu weelede kuyanda mukaintu wakwe+ mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.+
Bupanduluzi buyungizyidwe
^ Naa ambweni, “mbwaakamuyanda.”
^ Naa ambweni, “kandinywe.”
^ Naa “Koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Amubone Bupanduluzi Bwamabala, “Koonana ikutali kwamumulawo.”
^ Mu Chigiriki, “kamulyuulila ciindi cibikkidwe.”
^ Amubone Makani Aayungizyidwe A5.
^ Naa “kutamvwa.”
^ Amubone Makani Aayungizyidwe A5.
^ Naa “akukkalilila amukaintu.”
