Johane 4:1-54
4 Lino Mwami naakazyiba kuti ba Farisi bakamvwa kuti Jesu wakali kugwasya bantu banji kuba basikwiiya akubbapatizya+ kwiinda Johane—
2 nokuba kuti Jesu kumugama kunyina naakabbapatizya pele basikwiiya bakwe mbabakali kubbapatizya—
3 wakazwa mu Judaya akuunka ku Galilaya alimwi.
4 Pele kwakali kuyandika kuti ainde mu Samariya.
5 Aboobo wakasika mumunzi waku Samariya uutegwa Sukari, munsi-munsi amuunda ooyo Jakobo ngwaakapede Josefa mwanaakwe.+
6 Alimwi aawo mpaakali mugoti wa Jakobo.+ Lino Jesu kakatede akaambo kalweendo, wakalikkede amugoti ooyo. Ciindi cakali afwaafwi kusika aawoola lyacisambomwe.*
7 Imukaintu umwi waku Samariya wakaboola kuzooteka maanzi. Jesu wakati kulinguwe: “Kondipa maanzi aakunywa.”
8 (Nkaambo basikwiiya bakwe bakaunkide mumunzi kuyakuula cakulya.)
9 Aboobo mukaintu muna Samariya ooyo wakati kulinguwe: “Ino caba buti kuti yebo, nokuba kuti uli mu Juda undilomba maanzi aakunywa, kakuli mebo ndili mukaintu muna Samariya?” (Nkaambo ba Juda tabalyatani aba Samariya.)+
10 Mukwiingula, Jesu wakati kulinguwe: “Ikuti noolicizyi cipego citabbadelwi ca Leza+ ayooyo uukwaambila kuti, ‘Kondipa maanzi aakunywa,’ noomulomba eelyo walo naakupa maanzi aapa buumi.”+
11 Mukaintu wakati kulinguwe: “Omwami, tojisi acakutesya maanzi alimwi mugoti mulamfwu. Aboobo ino ulaajana kuli maanzi aayo aapa buumi?
12 Sena uli mupati kwiinda taateesu Jakobo iwakatupa mugoti ooyu alimwi walo antoomwe abana bakwe aŋombe zyakwe ibakali kunywa maanzi kuzwa mulinguwo?”
13 Jesu mukwiingula wakati kulinguwe: “Muntu woonse uunywa maanzi aaya uyoofwa nyota alimwi.
14 Kufwumbwa uunywa maanzi ngondiyoomupa takafwi limbi nyota naaceya,+ pele maanzi ngondiyoomupa ayooba kasensa kamaanzi aabbobboma akupa buumi butamani mulinguwe.”+
15 Mukaintu ooyo wakati kulinguwe: “Omwami, kondipa maanzi aayo kutegwa kanditacifwi nyota alimwi kanditabooli lyoonse kubusena oobu kuzooteka maanzi.”
16 Jesu wakati kulinguwe: “Koya ukaite mulumaako muboole okuno.”
17 Mukaintu wakavwiila kuti: “Tandijisi mulumi pe.” Jesu wakati kulinguwe: “Waingula kabotu kuti, ‘Tandijisi mulumi pe.’
18 Nkaambo wakalijisi balumi bosanwe, pele mwaalumi ooyo ngoli limwi tali mulumaako. Eeci ncowaamba ncamasimpe.”
19 Mukaintu ooyo wakati kulinguwe: “Omwami, ndabona kuti uli musinsimi.+
20 Bamatata bakali kukombela mucilundu eeci, pele nywebo mwaamba kuti mu Jerusalemu mobeelede kukombela bantu.”+
21 Jesu wakati kulinguwe: “Kondisyoma omukaintu kuti, ciyoosika ciindi nywebo nomutakakombi Taata mucilundu eeci nomuba mu Jerusalemu.
22 Nywebo mukomba ncomutazyi;+ pele swebo tukomba ncotuzyi nkaambo lufwutuko lutalikila kuba Juda.+
23 Nokuba boobo, ciindi ciyoosika alimwi ncencico cino, eelyo bakombi bakasimpe nobayookomba Taata mumuuya amukasimpe, nkaambo mubwini bantu bali boobu mbayandaula Taata kuti bamukombe.+
24 Leza Muuya,+ alimwi aabo bamukomba beelede kumukomba mumuuya amukasimpe.”+
25 Mukaintu ooyo wakati kulinguwe: “Ndilizyi kuti Mesiya ulaboola, ooyo uutegwa Kristo. Aakusika ooyo, uyootwaambila zintu zyoonse caantangalala.”
26 Jesu wakati kulinguwe: “Mebo nendaambaula anduwe ndendime nguwe.”+
27 Lino aciindi eeci basikwiiya bakwe bakasika, eelyo bakagambwa akaambo kakuti wakali kwaambaula amukaintu. Pele kunyina iwakabuzya kuti: “Ncinzi ncoyanda?” naa kuti, “Nkaambo nzi ncoambaula anguwe?”
28 Aboobo mukaintu ooyo wakasiya nongo yakwe yamaanzi akuunka mumunzi waakwaambila bantu kuti:
29 “Kamuboola mubone muntu iwandaambila zintu zyoonse nzindakacita. Sena ooyu inga katali ngo Kristo?”
30 Bakazwa mumunzi akuunka nkwaakabede.
31 Ciindi eeci nciconya basikwiiya bakali kumukombelezya kuti: “Rabbi,+ kolya.”
32 Pele wakabaambila kuti: “Ndijisi cakulya ncendilya eeco ncomutazyi.”
33 Aboobo basikwiiya bakabuzyanya balaamba: “Sena kuli umwi iwamuletela cakulya cili coonse?”
34 Jesu wakabaambila kuti: “Cakulya cangu nkucita kuyanda kwayooyo wakandituma+ alimwi akumanizya mulimo wakwe.+
35 Sena tamwaambi kuti kuceede myezi yone kuti kutebula kutalike? Amubone! Ndimwaambila kuti: Amuwaale meso aanu mubone myuunda, nkaambo yayuma kale kuti itebulwe.+ Lino
36 sikutebula utambula bulumbu alimwi uyobolola micelo yakubuumi butamani, kutegwa sikuminza asikutebula bakakkomanine antoomwe.+
37 Nkaambo mumakani aaya, nkamasimpe kaambyo kakuti: Umwi ngusikuminza eelyo umbi ngusikutebula.
38 Ndakamutuma kuyootebula nzyomwatakabelekela. Ibamwi bakabeleka eelyo nywebo mwajanina mpawo mpindu kumulimo ngobakabeleka.”
39 Lino ba Samariya banji ibakazwa mumunzi ooyo bakamusyoma akaambo kamajwi aamukaintu iwakapa bumboni kuti: “Wandaambila zintu zyoonse nzindakacita.”+
40 Aboobo ba Samariya nobakaboola kulinguwe, bakamulomba kuti akkale ambabo, eelyo wakakkala ooko mazuba obilo.
41 Akaambo kaceeci, ibamwi banji bakasyoma akaambo kazintu nzyaakaamba,
42 eelyo bakaambila mukaintu ooyo kuti: “Tatucisyomi akaambo buyo kamajwi aako; nkaambo twalimvwida tobeni, alimwi tulizyi kuti mubwini muntu ooyu mufwutuli wanyika.”+
43 Nokwakainda mazuba obilo wakazwa ooko akuya ku Galilaya.
44 Pele Jesu lwakwe wakapa bumboni bwakuti mucisi cokwabo musinsimi talemekwi.+
45 Aboobo, naakasika mu Galilaya, bana Galilaya bakamutambula akaambo kakuti bakazibona zintu zyoonse nzyaakacita mu Jerusalemu kupobwe,+ nkaambo abalo bakaluunkide kupobwe.+
46 Mpoonya wakasika alimwi ku Kana waku Galilaya, ooko nkwaakasandwide maanzi kuba waini.+ Lino kwakali muntu umwi walupati-pati mubwami iwakajisi mwana musankwa iwakali kuciswa ku Kapernauma.
47 Mwaalumi ooyu naakamvwa kuti Jesu wazwa ku Judaya akuboola mu Galilaya, wakaunka kulinguwe akumulomba kuti aboole aponye mwanaakwe musankwa, nkaambo wakalicisidwe calufwu.
48 Pele Jesu wakati kulinguwe: “Nywebo nobantu tamusyomi naaceya ccita mane mwabona zitondezyo azintu zigambya.”+
49 Muntu ooyu walupati-pati mubwami wakati kulinguwe: “O Mwami, atweende natanafwa mwanaangu.”
50 Jesu wakati kulinguwe: “Koya buyo; mwanaako wapona kale.”+ Mwaalumi ooyu wakaasyoma majwi ngaakamwaambila Jesu, eelyo wakaunka.
51 Pele kacili munzila bazike bakwe bakamuyaanya akumwaambila kuti mwanaakwe mulombe wakali muumi.*
52 Aboobo wakababuzya ciindi naakapona. Eelyo bakamwaambila kuti: “Ijilo awoola lyaciloba* mubili wakwe wakaleka kupya.”
53 Aboobo bausyi bakazyiba kuti nceciindi nciconya Jesu naakabaambila kuti: “Mwanaako wapona.”+ Eelyo balo abamuŋanda yabo boonse bakasyoma.
54 Eeci cakali citondezyo cabili+ Jesu ncaakacita naakazwa ku Judaya akuboola mu Galilaya.
Bupanduluzi buyungizyidwe
^ Nkokuti, cakuma 12 koloko.
^ Naa “wakayumya.”
^ Nkokuti, cakuma 1 koloko yamasyikati.
