Jakobo 1:1-27
1 Ndime Jakobo,+ imuzike wa Leza alimwi awa Mwami Jesu Kristo, nendilembela misyobo iili 12 iimwaikide koonse-koonse kuti:
Kamupona kabotu!
2 Amukondwe bakwesu, nomusikilwa masunko aaindene-indene,+
3 mbwaanga mulizyi kuti ikuti lusyomo lwanu lwasunkwa munzila eeyi lupa kuliyumya.+
4 Pele kuliyumya amukulekele kuti kumanizye mulimo wankuko, ikutegwa mulondoke akuzulila mumbazu zyoonse, mutabi acintu cili coonse ncomubula.+
5 Aboobo, ikuti muntu umwi akati kanu kabulizyide busongo,+ azumanane kumulomba Leza nkaambo boonse ulabapa cabuuya alimwi kakunyina kubasampaula,*+ eelyo buyoopegwa kulinguwe.+
6 Pele azumanane kulomba mulusyomo,+ ikutali kudooneka naaceya pe,+ nkaambo ooyo uudooneka uli mbuli mayuwe aamulwizi aatontwa amuwo akutonkaikwa.
7 Mubwini, imuntu ooyo teelede kulangila kutambula cintu cili coonse kuzwa kuli Jehova;*
8 ngusimyoyo yobilo,+ alimwi takkalikene munzila zyakwe zyoonse.
9 Pele imukwesu mucete akondwe* akaambo kakusumpulwa kwakwe,+
10 alimwi ooyo muvwubi akkomane akaambo kakucesyegwa kwakwe,+ nkaambo muntu muvwubi uyooloba mbuli duba lyazimena ansi.
11 Nkaambo mbubonya izuba mbolizwa akupya kwandilyo akuyumya izimena ansi, eelyo imaluba-luba aanzizyo alaloka alimwi ibweebesi bwangawo bulamana, awalo muvwubi uyooloba muzintu nzyayandaula.+
12 Ulikkomene muntu ooyo uuzumanana kuliyumya mumasunko,+ nkaambo ikuti naa Leza wamukkomanina uyootambula musini wabuumi,+ ooyo Jehova* ngwaakasyomezya baabo ibazumanana kumuyanda.+
13 Ciindi muntu nasunkwa, ataambi kuti: “Ndili mukusunkwa a Leza.” Nkaambo kunyina muntu uunga wasunka Leza azintu zibyaabi alimwi walo mwini tasunki muntu uuli woonse azintu zibyaabi.
14 Pele umwi aumwi ulasunkwa kwiinda mukoongelezyegwa akucegwa azisusi zyakwe mwini.+
15 Lino zisusi eezyo zyamita, zizyala cibi; mpoonya cibi eeco cacitwa, cileta lufwu.+
16 Muteenwi pe, bakwesu nomuyandwa.
17 Cipego cibotu cili coonse alimwi acipego cilondokede cili coonse zizwa kujulu,+ zilaseluka kuzwa kuli Taata wamimuni+ yakujulu ooyo uutasanduki naa kucinca mbuli zimvwule zicinca-cinca.+
18 Nguwakayanda kutuzyala ajwi lyakasimpe,+ ikutegwa tube micelo imwi yakusaanguna akati kazilenge zyakwe.+
19 Bakwesu nomuyandwa, amuzyibe kaambo aaka: Muntu woonse weelede kufwambaana kuswiilila, kumuka kwaambaula,+ kumuka kukalala,+
20 nkaambo bukali bwamuntu tabuleti bululami bwa Leza.+
21 Aboobo amugusye busofwaazi boonse alimwi abubi buli boonse,*+ eelyo cakulibombya amuzumine kusyangwa kwajwi mulindinywe eelyo ilikonzya kumufwutula nywebo.*
22 Pele, amube basikucita caamba jwi lya Leza,+ ikutali basikumvwa buyo pe, ibalyeena akuyeeya kutaluzi.
23 Nkaambo ikuti naa muntu ngusikumvwa buyo jwi, ikutali sikucita ncolyaamba,+ ooyu uli mbuli muntu uulanga busyu bwakwe mucimbonimboni.
24 Nkaambo ulalilanga, eelyo amana kulilanga ulaunka alimwi ndilyonya eelyo ulaluba mbwalibonya.
25 Pele ooyo uulangisisya mumulawo uulondokede+ uuleta lwaanguluko alimwi uuzumanana mulinguwo, waba sikucita mulimo ikutali sikumvwa buyo uuluba; aboobo unookkomene muzintu nzyacita.+
26 Ikuti muntu uuli woonse kayeeya kuti mukombi wa Leza, pele taujati mulaka wakwe,+ weena moyo wakwe mwini, alimwi bukombi bwakwe mbwabuyo.
27 Ibukombi busalala alimwi butasofweede mumeso aa Leza wesu alimwi Taata mboobu: ikulanganya bamucaala+ abamukabafwu+ mumapenzi aabo,+ alimwi akulibamba katutakwe kabala kali koonse kamunyika.+
Bupanduluzi buyungizyidwe
^ Naa “kubajanina kaambo.”
^ Amubone Makani Aayungizyidwe A5.
^ Mu Chigiriki, “alidunde.”
^ Amubone Makani Aayungizyidwe A5.
^ Naa ambweni, “abubi ibutalivwulili.”
^ Naa “buumi bwanu.”
