Baefeso 4:1-32
4 Aboobo mebo ndemwaange+ mu Mwami, ndimulomba kuti kamweenda munzila yeendelana+ abwiite mbomwakaitilwa,
2 cakulicesya cakumaninina+ akubomba moyo, cakukkazika myoyo,+ akweengelelana caluyando.+
3 Kamusoleka camoyo woonse kuzumanana alukamantano lwamuuya mucaanzyo caluumuno.+
4 Kuli mubili omwe,+ amuuya omwe,+ mbubonya mbomwakaitwa kubulangizi bomwe+ bwabwiite bwanu;
5 Mwami omwe,+ lusyomo lomwe, lubbapatizyo lomwe;
6 Leza omwe alimwi uuli ngo Usyi waboonse, ooyo uubainda boonse, uubeleka kwiinda muli boonse alimwi uuli muli boonse.
7 Lino umwi aumwi wesu wakapegwa luzyalo lwa Leza kweelana ambwaakaceeleka Kristo eeco cipego citabbadelwi.+
8 Nkaambo lwaamba kuti: “Naakatanta kujulu wakabwezelezya baange; wakapa zipego mubantu.”+
9 Ino lino ijwi lyakuti “wakatanta,” lipandulula nzi? Lipandulula kuti wakaliselukide ansi, nkokuti anyika.
10 Ngoonya ooyo wakaselukide ngonguwe wakatanta kujulu+ kwiindilila majulu oonse,+ kutegwa azuzikizye zintu zyoonse.
11 Lino mbungano wakaipa bamwi kuti babe baapostolo,+ bamwi kuti babe basinsimi,+ bamwi kuti babe bakambausi,*+ bamwi kuti babe beembezi abamayi,+
12 kutegwa kabalulamika* basalali, bacite mulimo wakugwasya bamwi, bayake mubili wa Kristo,+
13 kusikila toonse tukakamantane mulusyomo amuluzyibo lwini-lwini lwa Mwana wa Leza, tukabe bantu bapati,*+ tukasike aciimo cizulide ica Kristo.
14 Aboobo tatweelede kuzumanana kuba mbuli bana basyoonto, ibaibaulwa amayuwe akupepululwa amuwo uuli woonse wanjiisyo zyabantu ziindene-indene kwiinda mulweeno lwabo,+ kwiinda mubucenjezu bwabantu bwakubelesya nzila zyakubeja.
15 Pele katwaamba zyamasimpe, caluyando atukomene muzintu zyoonse mukutobela yooyo uuli ngomutwe wesu, Kristo.+
16 Kuzwa kulinguwe mubili woonse+ uliswaanganizyidwe kabotu-kabotu akubelekela antoomwe kwiinda munswaanganino ziindene-indene zyalo zizuzikizya mulimo uuyandika. Cizo cimwi acimwi nocibeleka kabotu, eeci cipa kuti mubili ukomene mbwaanga ulaliyaka wini muluyando.+
17 Aboobo, makani ngondaamba akucitila bumboni mu Mwami ngakuti, mutazumanani ikweenda mbuli mbobeenda bamasi+ ibatobela mizeezo yabo iitagwasyi.*+
18 Bali mumudima mumizeezo yabo alimwi balizandukide kubuumi buzwa kuli Leza akaambo kakutazyiba ikuli mulimbabo akuyuma kwamyoyo yabo.
19 Mbokunga tabacijisi nsoni naaba aniini mubukkale bwabo, balyaaba kubukkale busesemya*+ kuti bacite busofwaazi bwamusyobo uuli woonse cabulyato.
20 Pele nywebo kunyina nomwakaiya kuti Kristo uli boobu.
21 Aaya masimpe kufwumbwa kuti mwakamumvwa alimwi akuti mwakayiisyigwa kwiinda mulinguwe, kweelana akasimpe kali muli Jesu.
22 Mwakayiisyigwa kuti mweelede kusamununa buntu bwanu bwakaindi+ oobo bweendelana abukkale bwanu bwakaindi, bwalo busofwaazyigwa azisusi zyambubo zyalweeno.+
23 Alimwi mweelede kuzumanana kubukulusya mizeezo iimweendelezya lyoonse,*+
24 akusama buntu bupya+ ibwakalengwa kweelana akuyanda kwa Leza mubululami bwini-bwini alimwi amukusyomeka.
25 Aboobo, mbwaanga lino mwacileka kubeja, umwi aumwi wanu aambe zyamasimpe kumweenzinyina,+ nkaambo tuli zizo zyamubili omwe.+
26 Amunyeme, pele mutabisyi pe;+ mutabbizyi zuba kamunyemede;+
27 mutamupi coolwe Diabolosi.*+
28 Ooyo uubba atabbi limbi pe, muciindi cakubba abeleke mulimo canguzu, acite mulimo mubotu amaanzaakwe,+ kutegwa abe acintu cakupa yooyo uubulide.+
29 Kutazwi jwi libolede neliba lyomwe mukanwa lyanu,+ pele buyo ijwi lili kabotu kukuyaka bamwi kweelana abukkale aciindi eeco, kutegwa libe jwi likonzya kubagwasya aabo baswiilila.+
30 Alimwi mutanoopi muuya uusalala wa Leza kuusa,+ ooyo ngomwakagantwa+ mane kusikila kubuzuba bwakwaangununwa kwanu kwiinda mucinunuzyo.+
31 Amuzisowe zintu zyoonse eezyi, kulutila,+ bukali, kunyema, kubwenta alimwi amajwi aakusampaula+ antoomwe abubi buli boonse.+
32 Pele amufwidilane luzyalo, mube amoyo mutete walubomba,+ akulekelelana camoyo woonse mbubonya awalo Leza muli Kristo mbwaakamulekelela camoyo woonse.+
Bupanduluzi buyungizyidwe
^ Naa “bakambausi bamakani mabotu.”
^ Naa “bayiisye.”
^ Naa “basimide.”
^ Naa “yabuyo.”
^ Naa “kubukkale bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Naa “muuya weendelezya mbomuyeeya.” Mu Chigiriki, “muuya wamizeezo yanu.”
^ Naa “mutamupi busena Diabolosi.”
