Jakobo 4:1-17
4 Ino ncinzi cileta nkondo akulwana akati kanu? Sena tazizwi kuzisusi zyanu zyanyama izilwana mulindinywe?*+
2 Mulalombozya pele tamujisi. Mulajaya alimwi mulanyonokela, pele mulaalilwa kujana. Mulazwangana alimwi akulwana.+ Tamujisi akaambo kakuti tamulombi kuli Leza.
3 Nomulomba, tamupegwi pe akaambo kakuti mulalomba kamujisi makanze mabi, kutegwa muzibelesye kuzuzikizya zisusi zyanu zyanyama.
4 Nobasimamambe,* sena tamuzyi kuti kuba acilongwe anyika nkuba sinkondonyina a Leza? Aboobo, kufwumbwa uuyanda kuba mulongwe wanyika ulipa kuba sinkondonyina a Leza.+
5 Naa sena muyeeya kuti lugwalo lwaamba buyo kakunyina kaambo noluti: “Imuuya uuli mulindiswe ujisi cilengwa cakuyandisisya kuba amunyono”?+
6 Nokuba boobo, iluzyalo ndwapa Leza ndupati. Aboobo lugwalo lwaamba kuti: “Leza ulabakazya ibalisumpula,+ pele ulabafwida luzyalo aabo ibalicesya.”+
7 Aboobo, amulibombye kuli Leza;+ pele amumukazye Diabolosi+ eelyo ulamutija.+
8 Amuswene kuli Leza, eelyo awalo ulaswena kulindinywe.+ Amusanzye maanza aanu nywebo nobasizibi,+ akusalazya myoyo yanu+ nywebo nobasimyoyo yobilo.
9 Amuungumane, moomoke akulila.+ Kuseka kwanu kusanduke kuba koomoka, akukondwa kwanu kusanduke kuba kuusa.
10 Amulicesye mumeso aa Jehova,*+ eelyo walo uyoomusumpula.+
11 Amuleke kuvwiyana, bakwesu.+ Kufwumbwa uuvwiya imunyina naa uubeteka imunyina uubaula mulawo alimwi ubeteka mulawo. Lino ikuti naa yebo kobeteka mulawo nkokuti tociti zyaamba mulawo, pele uli mubetesi.
12 Kuli buyo Sikupa Mulawo a Mubetesi omwe,+ ooyo uukonzya kufwutula akunyonyoona.+ Pele ino nduwe ni yebo oobeteka mweenzinyoko?+
13 Lino amuswiilile nywebo nomwaamba kuti: “Sunu naa juunza tuyakuunka kumunzi uuli boobu aboobu alimwi tuyookkala ooko mwaka omwe, tukacite makwebo akujana mpindu,”+
14 kakuli tamuzyi mbobunoobede buumi bwanu juunza.+ Nkaambo muli sikunku uulibonya buyo kwakaindi kaniini mpoonya ulazimaana.+
15 Muciindi caboobo, mweelede kwaamba kuti: “Ikuti Jehova* kayanda,+ tuyoopona akucita ceeci aceeci.”
16 Pele lino mulakukkomanina kulidunda kwanu. Ikulidunda kuli boobu koonse nkubi.
17 Aboobo, ikuti umwi kazyi mbokucitwa cintu cibotu pele taciciti, muntu ooyu ucita cibi.+
Bupanduluzi buyungizyidwe
^ Mu Chigiriki, “muzizo zyanu.”
^ Naa “Nywebo nomutasyomeki.”
^ Amubone Makani Aayungizyidwe A5.
^ Amubone Makani Aayungizyidwe A5.
