2 Petro 2:1-22
2 Pele alimwi kwakali basinsimi bakubeja akati kabantu aabo, mbubonya alimwi mbokuyooba bamayi bakubeja akati kanu.+ Cakusisikizya aaba bayooleta tukamu tunyonyoona alimwi mane bayoomukaka mukamwini wakabaula,+ akuliletela lunyonyooko cakufwambaana.
2 Kuyungizya waawo, ibanji bayootobela bukkale bwabo busesemya,*+ eelyo akaambo kabantu aaba nzila yakasimpe iyoosampaulwa.+
3 Alimwi, cabulyato bayoomulida masuku amutwe kwiinda mukubelesya majwi aakuunina. Pele lubeta lwabo ndobakabikkilwa kaindi+ talukoomuka kusika, alimwi lunyonyooko lwabo talooni.+
4 Masimpe Leza tanaakabaleka buyo kakunyina kubasubula bangelo ibakabisya,+ pele wakabawaala mu Tatarasi,*+ wakabaanga anketani* zyamudima uusiya mbi kutegwa balindile lubeta.+
5 Alimwi tanaakaileka buyo kakunyina kwiisubula nyika iilya yakaindi,+ pele wakamufwutula Nowa, imukambausi wabululami,+ antoomwe abamwi ibali ciloba+ naakaleta zambangulwe kunyika eeyo yabantu basampaula Leza.+
6 Kwiinda mukupa kuti minzi ya Sodoma a Gomora inyonyooke akusyaala buyo mulota,+ wakaibeteka kutegwa cibe citondezyo cazintu ziyoobacitikila bantu basampaula Leza.+
7 Wakamuvwuna Loti imululami,+ iwakakatazyidwe kapati abukkale busesemya* bwabantu babi—
8 nkaambo buzuba abuzuba, muntu uulya uululeme wakali kupenga kapati mumoyo wakwe uululeme akaambo kamicito mibi njaakali kubona akumvwa naakali kukkala akati kabo.
9 Aboobo, Jehova* ulizyi ikuvwuna bantu bamubelekela cakulyaaba kuzwa mumasunko,+ akuyobola bantu bataluleme kuti bakanyonyoonwe mubuzuba bwalubeta,+
10 ikwaambisya aabo ibakanzide kusofwaazya mubili wanyama wabamwi+ alimwi ibanyansya beendelezi.+
Cakulidunda alimwi akutanyoneka, tabayoowi pe kusampaula baabo balemekwa,
11 kakuli bangelo nokuba kuti mbayumu kapati alimwi balaanguzu zinji, akaambo kakulemeka* Jehova* tababajanini mulandu cakubasampaula.+
12 Pele bantu aaba mbubonya mbuli banyama batayeeyi ibazyalilwa kuti kabajatwa akunyonyoonwa, basampaula zintu nzyobatazyi.+ Bayoonyonyoonwa abukkale bwabo buletela lunyonyooko,
13 eelyo batambula bulumbu bwamapenzi akaambo kamicito yabo mibi.
Cilabakkomanisya kupona buumi bwabutaka,+ nociba ciindi casyikati. Aaba bantu ntubala atumpenda, ibabotelwa kapati anjiisyo zyabo zyalweeno nibalya andinywe mumapobwe.+
14 Meso aabo azwide bumambe+ alimwi tabakonzyi kuleka kubisya, alimwi boongelezya bantu batakkalikene. Balaamoyo uuyiisyidwe busyaacivwulemwangu. Mbana basinganizyidwe.
15 Akaambo kakusiya nzila iiluleme, aaba beenwa. Batobela nzila ya Balamu,+ mwana wa Beori, ooyo wakayanda bulumbu bujanwa mukubisya,+
16 pele iwakasinswa akaambo kakutacita cintu ciluzi.+ Imunyama uutaambauli uunyamuna ntundu wakaambaula ajwi lyamuntu ikulesya makanze aabufwubafwuba aamusinsimi ooyu.+
17 Aaba bantu ntusensa tunyina maanzi, alimwi asikunku uupepululwa aguwo pati, alimwi aaba bayobwedwe mudima uusiya mbi.+
18 Baamba majwi aakulitukumuna aabuyo. Kwiinda mukukwelelezya bamwi azisusi zyanyama+ alimwi amicito yabo iisesemya* boongelezya bantu ibatija baabo ibacita zintu zitaluleme.+
19 Nokuba kuti basyomezya bamwi lwaanguluko, balo beni mbazike bakubola;+ nkaambo ikuti umwi wazundwa aumbi, uba muzike wakwe.*+
20 Masimpe, ikuti naa musyule lyakutija busofwaazi bwamunyika+ kwiinda muluzyibo lwini-lwini lwa Mwami a Mufwutuli Jesu Kristo, balinjizya alimwi muzintu nzimunya eezyi akuzundwa, ibukkale bwabo bwamamanino bulaindila kubija kwiinda bwakusaanguna.+
21 Nicakainda kubota nobatakaizyiba bwini-bwini nzila yabululami kwiinda kuti musyule lyakwiizyiba bafwutatile mulawo uusalala ngobakapegwa.+
22 Cabacitikila icaamba kaambyo kamasimpe kakuti: “Imubwa wapilukila kumalusi aakwe mwini, alimwi angulube yasanzyidwe yapilukila kukwaalabana muntimba.”+
Bupanduluzi buyungizyidwe
^ Naa “bukkale bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Amubone Bupanduluzi Bwamabala.
^ Naa ambweni, “wakababikka muzilindi.”
^ Naa “abukkale bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Amubone Makani Aayungizyidwe A5.
^ Naa “kumbele lya.”
^ Amubone Makani Aayungizyidwe A5.
^ Naa “abukkale bwabo bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Naa “ikuti umwi wazundwa acintu cimwi, uba muzike wancico.”
