Intembauzyo 36:1-12
Kumweendelezi wanyimbo. Intembauzyo yamubelesi wa Jehova, Davida.
36 Cibi cilaambaula mukati kamoyo wamuntu mubi;Mumeso aakwe kunyina cintu cimupa kuyoowa Leza.+
2 Nkaambo ulalilumbaizya kapati mwiniCakuti taboni akusulaika cibi cakwe.+
3 Majwi aazwa kumulomo wakwe mabi alimwi ngalweeno;Takwe maano aakucita zintu zibotu.
4 Noliba leelyo nali abulo bwakwe ukanza kucita zintu zibi.
Uli munzila iitali kabotu;Tacikaki cibi pe.
5 O Jehova, luyando lwako lutamani lulisikide kujulu,+Kusyomeka kwako kusikide kumakumbi.
6 Bululami bwako buli mbuli zilundu zipati;*+Lubeta lwako luli mbuli maanzi manji malamfwu.+
O Jehova, muntu amunyama ulabavwuna.*+
7 Eelo kaka taluliboteli luyando lwako lutamani, O Leza!+
Mucimvwule camababa aako,Mobayuba bana babantu.+
8 Balanywa akukkuta bulotwe* bwamuŋanda yako,+Alimwi ubapa kunywa mumulonga wazintu zyako zibotu kapati.+
9 Yebo ndonduwe kasensa kabuumi;+Kwiinda mumumuni wako tulakonzya kubona mumuni.+
10 Kozumanana kutondezya luyando lwako lutamani kulibaabo bakuzyi,+Abululami bwako kuli baabo baluleme mumoyo.+
11 Utalekeli kuulu kwabantu balisumpula kuti kundilyataukeNaa kulekela janza lyabantu babi kuti linditande.
12 Amubone nkobawida basimucita zibi;Bawisyilwa ansi alimwi tabakonzyi kunyamuka.+
Bupanduluzi buyungizyidwe
^ Mu Chihebrayo, “mbuli zilundu zya Leza.”
^ Naa “ulabafwutula.”
^ Mu Chihebrayo, “mafwuta.”
