Intembauzyo 104:1-35
104 Anditembaule Jehova.+
O Jehova Leza wangu, yebo uli mupati kapati.+
Usamide bulemu abweebesi.+
2 Koonse-koonse uvwumbidwe mumuni+ mbubonya mbuli cisani;Utandabula majulu mbubonya mbuli tente.+
3 Ngonguwe uusimpa misemu yamaanda aakwe aamujulu mumaanzi aali kujulu,+Uucita makumbi kuba nkalaki yakwe,+Weenda atala aamababa aamuwo.+
4 Upa kuti bangelo bakwe babe myuuya,Ibabelesi bakwe kuba mulilo uumpa cakumaninina.+
5 Wakkazikizya nyika antalisyo zyanjiyo ziyumu;+Kunyina noiyoogwisyigwa* abusena bwanjiyo lyoonse alyoonse, mane kukabe kutamani.+
6 Yebo wakaivwumba maanzi malamfwu mbuli kuti waivwumba cisani.+
Maanzi akaliimvwi atala aamalundu.
7 Akatija akaambo kakunyemenwa anduwe;+Akatija kaayoowede kapati akaambo kakundindima kwamuzumo wako
8 —Malundu akasumpuka+ aalo makkuti akayaansi—Kubusena mbookaabambila.
9 Wakaabikkila munyinza ngwaateelede kusotoka,+Kutegwa atakaivwumbi limbi nyika.
10 Ulatuma tusensa twamaanzi mumakkuti;*Maanzi alakunka akati kamalundu.
11 Banyama boonse bamusyokwe balaanywa;Mbongolo zyamusyokwe zilamana nyota yanzizyo.
12 Bayuni bauluka mujulu balalyookezya atala aamaanzi;Balalila mumitabi yazisamu zifwefwema.
13 Walo ulatilaila malundu kuzwa mumaanda aakwe aamujulu.+
Nyika ilakkuta micelo iizwa kumilimo yako.+
14 Nguupa kuti kumene bwizu mbozilya ŋombeAzisyumani nzyobabelesya bantu,+Kutegwa cakulya cimene munyika
15 Awaini uukkomanisya moyo wamuntu,+Mafwuta aabotezya busyu bwamuntu,Alimwi acinkwa icipa kuti moyo wamuntu ube anguzu.+
16 Masamu aa Jehova akkuta,Masamu aakkedari aaku Lebano ngaakasimpa,
17 Oomo bayuni mobayakila ziteente.
Tongola+ ulakkala muzisamu zyamulombe.
18 Malundu malamfwu ngampongo zyamumalundu;+Mandomba ngamayubilo aabacibila.+
19 Wakapanga mwezi kuti kube ziindi zibikkidwe;Zuba lilicizyi kabotu ciindi cakubbila.+
20 Yebo ulaleta mudima, eelyo aba masiku,+Ciindi banyama boonse bamusyokwe nobeendeenda.
21 Basyuumbwa bacili bana-bana bavwulumina banyama bakulya+Akuyandaula cakulya cabo kuli Leza.+
22 Izuba nolipasula,Balaleka eelyo balalala muziyubilo zyabo.
23 Muntu ulaunka kumulimo wakwe,Akubeleka mane kusikila kumangolezya.
24 Eelo kaka minji kapati milimo yako, O Jehova!+
Yoonse buyo wakaicita cabusongo.+
Nyika izwide zintu nzyookalenga.
25 Ndoluya lwizi, eelo kaka ndulamfwu alimwi ndupati kapati!Mulindulo muli zilenge zyuumi zyeendeenda zitakonzyi kubalwa, ziniini alimwi azipati.+
26 Mato aleenda mulindulo,Alimwi a Leviyatani,*+ ooyo ngookapanga kuti kasobana mulindulo.
27 Zyoonse buyo zilanga kulinduweKuti uzipe cakulya canzizyo aciindi ceelede.+
28 Ncozipa zilabweza.+
Novwungulula janza lyako, zilakkuta zintu zibotu.+
29 Ciindi nosisa busyu bwako, zilanyongana.
Ikuti naa wazinyanga muuya ngozijisi, zilafwa akujokela kubulongo.+
30 Ikuti naa watuma muuya wako, zilalengwa,+Alimwi ulabukulusya nyika.*
31 Bulemu bwa Jehova bunooliko lyoonse mane kukabe kutamani.
Jehova unakwiikkomanina milimo yakwe.+
32 Ulailanga nyika, eelyo ilakankama;Ulaampa malundu, eelyo alasuka busi.+
33 Ndinakwiimbila Jehova+ mubuumi bwangu boonse;Ndinakwiimba nyimbo zyakutembaula Leza wangu kufwumbwa kuti kandili muumi.+
34 Mizeezo yangu aimukkomanisye.*
Ndinookondwa muli Jehova.
35 Basizibi bayooloba munyika,Abalo babi tabakabiko limbi pe.+
Anditembaule Jehova. Amumutembaule Ja!*
Bupanduluzi buyungizyidwe
^ Naa “noiyoozungaanizyigwa.”
^ Naa “mutulonga.”
^ Amubone Bupanduluzi Bwamabala.
^ Mu Chihebrayo, “busyu bwanyika.”
^ Naa ambweni, “Andizinzibale kuyeeya zintu zibotu kujatikizya nguwe.”
^ Naa “Aleluya!” “Ja” nkufwiinsyigwa kwazina lyakuti Jehova.
