మొదటి పేతురు 4:1-19
4 క్రీస్తు మనిషిగా ఉన్నప్పుడు బాధలు అనుభవించాడు, కాబట్టి మీరు కూడా క్రీస్తులా ఆలోచించడానికి సిద్ధమవ్వండి;* ఎందుకంటే బాధలు అనుభవించే వ్యక్తి పాపం చేయడం మానేశాడని చూపిస్తాడు.+
2 ఇకపై మనుషుల కోరికల ప్రకారం కాకుండా+ దేవుని ఇష్టప్రకారం జీవించాలని+ అతను అలా మానేస్తాడు.
3 గతంలో మీరు లెక్కలేనట్టు* ప్రవర్తిస్తూ, అదుపులేని వాంఛలు తీర్చుకుంటూ, అతిగా తాగుతూ, విచ్చలవిడి విందులు* చేసుకుంటూ, తాగుబోతుల విందుల్లో పాల్గొంటూ, అసహ్యమైన* విగ్రహపూజలు చేస్తూ లోక ప్రజల ఇష్టప్రకారం జీవించారు.+ అవన్నీ చేయడానికి గతంలో మీరు వెచ్చించిన సమయం చాలు.
4 మీరు ఇక తమతో కలిసి చెడ్డపనులు చేయట్లేదని వాళ్లు ఆశ్చర్యపోతున్నారు, అందుకే మీ గురించి చెడుగా మాట్లాడుతున్నారు.+
5 కానీ వాళ్లు క్రీస్తుకు జవాబు చెప్పాల్సి ఉంటుంది. ఆయన బ్రతికున్నవాళ్లకు, మృతులకు తీర్పు తీర్చడానికి సిద్ధంగా ఉన్నాడు.+
6 నిజానికి, ఇందుకే మృతులకు* కూడా మంచివార్త ప్రకటించబడింది.+ వాళ్లకు మనుషుల దృష్టిలో శరీర ప్రకారం తీర్పు జరిగినా, వాళ్లు దేవుని దృష్టిలో పవిత్రశక్తికి అనుగుణంగా జీవించాలని అలా ప్రకటించబడింది.
7 అయితే అన్నిటి అంతం దగ్గరపడింది. కాబట్టి మంచి వివేచన కలిగివుండండి,+ ప్రార్థించడానికి ఎప్పుడూ సిద్ధంగా* ఉండండి.+
8 అన్నిటికన్నా ముఖ్యంగా, ఒకరి మీద ఒకరు ప్రగాఢమైన ప్రేమ కలిగివుండండి.+ ఎందుకంటే ప్రేమ చాలా పాపాల్ని కప్పుతుంది.+
9 గొణుక్కోకుండా ఒకరికొకరు ఆతిథ్యం ఇచ్చుకుంటూ ఉండండి.+
10 మీరు పొందినంత మేరకు మీలో ప్రతీ ఒక్కరు మీ వరాన్ని ఒకరికొకరు పరిచారం చేసుకోవడానికి ఉపయోగించండి. వివిధ రకాలుగా చూపించబడే దేవుని అపారదయకు+ మంచి గృహనిర్వాహకులుగా ఉంటూ అలా చేయండి.
11 ఎవరికైనా మాట్లాడే సామర్థ్యం ఉంటే, అతను దేవుని సందేశాల్ని చెప్తున్నట్టు మాట్లాడాలి; ఎవరైనా పరిచారం చేస్తే, అతను దేవుడిచ్చే బలం మీద ఆధారపడుతున్నట్టు ఆ పని చేయాలి;+ అప్పుడు యేసుక్రీస్తు ద్వారా దేవుడు అన్ని విషయాల్లో మహిమపర్చబడతాడు.+ యుగయుగాలు మహిమ, బలం దేవునికే చెందుతాయి. ఆమేన్‌.
12 ప్రియ సహోదరులారా, మీరు అనుభవిస్తున్న అగ్నిలాంటి కష్టాల్ని* చూసి, మీకు ఏదో వింత జరుగుతున్నట్టు ఆశ్చర్యపోకండి.+
13 బదులుగా, క్రీస్తు పడిన బాధల్లో మీరు పాలుపంచుకుంటున్నారనే+ విషయాన్ని బట్టి సంతోషిస్తూ ఉండండి.+ దానివల్ల మీరు, ఆయన మహిమ బయల్పర్చబడినప్పుడు ఇంకా ఎక్కువగా ఆనందించగలుగుతారు.+
14 మీరు క్రీస్తు పేరు కోసం నిందలు* ఎదుర్కొంటుంటే, మీరు సంతోషంగా ఉంటారు.+ ఎందుకంటే దేవుని మహిమగల పవిత్రశక్తి మీ మీద ఉంది.
15 అయితే, మీలో ఎవ్వరూ హంతకుడిగా గానీ, దొంగగా గానీ, తప్పుచేసిన వాడిగా గానీ, ఇతరుల విషయాల్లో జోక్యం చేసుకునే వాడిగా గానీ బాధలు అనుభవించకూడదు.+
16 కానీ ఎవరైనా క్రైస్తవుడిగా ఉన్నందుకు బాధలు అనుభవిస్తే అతను సిగ్గుపడకూడదు;+ బదులుగా, ఆ పేరుకు తగ్గట్టు జీవిస్తూ దేవుణ్ణి మహిమపరుస్తూ ఉండాలి.
17 ఎందుకంటే, తీర్పు దేవుని ఇంటి+ దగ్గర మొదలయ్యే సమయం* వచ్చేసింది. అది మనతోనే మొదలౌతుందంటే,+ దేవుని మంచివార్తకు లోబడనివాళ్ల గతి ఏంటి?+
18 “రక్షణ పొందడానికి నీతిమంతుడే కష్టపడాల్సి ఉందంటే, ఇక భక్తిహీనుడి పరిస్థితి, పాపి పరిస్థితి ఏంటి?”+
19 కాబట్టి దేవుని ఇష్టాన్ని నెరవేరుస్తున్నందుకు బాధలు పడుతున్నవాళ్లు, మంచి చేస్తూ నమ్మకమైన సృష్టికర్తకు తమను తాము అప్పగించుకుంటూ ఉండాలి.
అధస్సూచీలు
^ లేదా “అలాంటి మనోవైఖరిని ఆయుధంగా ధరించండి.”
^ లేదా “అల్లరి విందులు.”
^ లేదా “అక్రమమైన.”
^ అంటే, తప్పుల వల్ల, పాపాల వల్ల చనిపోయిన స్థితిలో ఉన్నవాళ్లకు అని అర్థం. ఎఫెసీయులు 2:1 చూడండి.
^ లేదా “అప్రమత్తంగా; మెలకువగా.”
^ లేదా “పరీక్షల్ని.”
^ లేదా “అవమానాలు.”
^ లేదా “నిర్ణయించబడిన సమయం.”
