Akusuye Nkulunkulu lobangela tehlakalo temvelo letentekako lamuhla, kodvwa unendzaba nebantfu letibatsintsako. Tehlakalo temvelo tiphakatsi kwetintfo letibangela kuhlupheka letitawucedvwa nguMbuso waNkulunkulu. Kwanyalo, Nkulunkulu ubaniketa indvudvuto labo labehlelwe tehlakalo temvelo.​—2 KubaseKhorinte 1:3.

•  Yini lesicinisekisa kutsi tehlakalo temvelo atisiso sijeziso saNkulunkulu?

•  Tehlakalo temvelo tiluphawu lwekutsi siphila emalangeni ekugcina yini?

•  Nkulunkulu ubasita njani bantfu labehlelwe tehlakalo temvelo?

•  Timiso teliBhayibheli tingasisita yini kutsi sihlale sikulungele kugadla kwesehlakalo?

•  Emavesi eliBhayibheli langadvudvuta bantfu labehlelwe tehlakalo temvelo

 Tehlakalo temvelo letenteka lamuhla atifani nendlela Nkulunkulu bekasebentisa ngayo emandla emvelo kuze akhiphe sehlulelo.

•   Tehlakalo temvelo tiyakhubata tiphindze tibulale ngekungakhetsi. Ngalokwehlukile, Nkulunkulu bekasebentisa emandla emvelo kuze abhubhise kuphela bantfu lababi. Ngekwesibonelo, Nkulunkulu nakabhubhisa emadolobha asendvulo iSodoma neGomora, wasindzisa Loti nemadvodzakati akhe lamabili. (Genesisi 19:29, 30) Nkulunkulu wahlola tinhlitiyo tebantfu bangaleso sikhatsi futsi wabhubhisa kuphela labo labatfola bababi.​—Genesisi 18:23-32; 1 Samuweli 16:7.

•   Tehlakalo temvelo tivame kugadla kungakalindzeleki. Ngakulonye luhlangotsi,Nkulunkulu wabecwayisa lababi ngaphambi kwekutsi asebentise emandla emvelo kuze ababhubhise. Bantfu labatilalela letecwayisa babanelitfuba lekusindza.​—Genesisi 7:1-5; Matewu 24:38, 39.

•   Ngelizinga lelitsite, tincumo kanye netento tebantfu tibangele tehlakalo temvelo. Kanjani? Ngekunukubeta umhlaba nangekwakha etindzaweni letinematfuba ekutamatama kwemhlaba, tikhukhula, kanye netimo letibi telitulu. (Sembulo 11:18) Akukafanele sisole Nkulunkulu ngemiphumela lemibi yekukhetsa kwebantfu.​—Taga 19:3.

 Yebo, Tiphrofetho teliBhayibheli titsi kutawubakhona tehlakalo ‘ekupheleni kwalelive’ noma ‘emalangeni ekugcina.’ (Matewu 24:3; 2 Thimothi 3:1) Ngekwesibonelo akhuluma ngesikhatsi setfu Jesu watsi: “Kuyawuba khona indlala nekutamatama kwemhlaba etindzaweni letehlukahlukene.” (Matewu 24:7) Madvutane, Nkulunkulu utawucedza tonkhe tintfo letibangela buhlungu nekuhlupheka lokufaka ekhatsi tehlakalo temvelo. Sembulo 21:3, 4.

•   Nkulunkulu ubadvudvuta asebentisa liVi lakhe, liBhayibheli. LiBhayibheli lisicinisekisa kutsi Nkulunkulu unendzaba natsi futsi uyabuva buhlungu nasihlupheka. (Isaya 63:9; 1 Phetro 5:6, 7) Liphindze lisitjele nangesetsembiso sakhe sesikhatsi lapho tehlakalo temvelo tingeke tisaba khona.​— Emavesi eliBhayibheli ekusita labo labasindze esehlakalweni semvelo.

•   Nkulunkulu usebentisa tikhonti takhe kutsi tisite labo labehlelwe tehlakalo temvelo. Nkulunkulu usebentisa tikhonti takhe letisemhlabeni kutsi tilingise sibonelo saJesu. Kwabiketelwa kutsi Jesu abetawudvudvuta “labatinhlitiyo tabo tidzabukile” kanye ‘nabo bonkhe labalilako.’ (Isaya 61:1, 2) Tikhonti taNkulunkulu tilwela kwenta lokufanako.​—Johane 13:15.

   Nkulunkulu usebentisa tikhonti takhe kutsi tisite labo labehlelwe tehlakalo temvelo.​—Imisebenti 11:28-30; Galathiya 6:10.

 Yebo. LiBhayibheli alisiyo incwadzi lekhuluma ngekulungela tehlakalo, kodvwa licuketse timiso letingasisita etimeni letinjalo. Ngekwesibonelo:

•   Hlala ukulungele kugadla kwetinhlekelele. LiBhayibheli litsi: “Umuntfu lohlakaniphile ingoti uyibona iseta, bese uyayibalekela,” (Taga 22:3) Sisuke senta kahle nasitsatsa sinyatselo sekuhlela tintfo kusenesikhatsi kuze silungele kugadla kwenhlekelele. Loko kuhlela kufaka ekhatsi kulungisa sikhwama setimo letiphutfumako kanye nekucoca ngendzawo yekuhlangana njengemndeni nakugadla inhlekelele.

•   Kuphila kubaluleke kwedlula tintfo lonato. LiBhayibheli liyavuma: “Ngobe asiletsanga lutfo eveni, futsi kute lesitawuhamba nako.” (1 Thimothi 6:7, 8) Kute sisindze enhlekeleleni kufanele sihlale sikulungele kushiya imiti yetfu kanye netintfo lesinato. Senta kahle kukhumbula kutsi kuphila kwetfu kubaluleke kwendlula tintfo lesinato.​—Matewu 6:25.