Kulandzisa KwaJohane 13:1-38
13 Jesu wati usengakefiki umkhosi weliPhasika kutsi besesifikile sikhatsi+ sakhe sekutsi ahambe emhlabeni abuyele kuBabe wakhe.+ Njengobe bekabatsandzile labo lababakhe, wabatsandza kwaze kwaba sekugcineni.+
2 Develi besekavele akufakile enhlitiyweni yaJudasi Skariyothi,+ indvodzana yaSimoni kutsi atsengise Jesu. Ngesikhatsi kuchubeka sidlo sakusihlwa,+
3 Jesu bekati kutsi Babe wakhe ubeke tonkhe tintfo etandleni takhe, nekutsi yena bekavela kuNkulunkulu futsi abuyela kuye,+
4 ngako wasukuma etafuleni wakhumula ingubo yakhe yangetulu. Wase utsatsa lithawula, walibopha elukhalo.+
5 Ngemuva kwaloko watsela emanti endishini wageza tinyawo tebafundzi bakhe, futsi watesula ngalelithawula lebekalibophe elukhalo.
6 Wefika kuSimoni Phetro, futsi Simoni Phetro watsi: “Hawu Nkhosi, wena utawugeza tinyawo tami?”
7 Jesu wamphendvula watsi: “Kwanyalo awukucondzi loko lengikwentako, kodvwa utakucondza ngemuva kwesikhatsi.”
8 Phetro watsi kuye: “Ngeke utigeze tinyawo tami.” Jesu watsi: “Nangabe ngingatigezi tinyawo takho,+ kute intfo lotayihlanganyela nami.”
9 Simoni Phetro watsi kuye: “Nkhosi, ungangigezi tinyawo kuphela, kodvwa ngigeze netandla kanye nenhloko.”
10 Jesu watsi: “Loyo logezile akadzingi lutfo lolunye ngaphandle kwekugeza tinyawo, ngobe umtimba wakhe wonkhe usuke uhlantekile. Nine nihlantekile, kodvwa anikahlanteki nonkhe.”
11 Loku wakusho ngobe bekamati loyo lotamtsengisa.+ Kungako atsi: “Anikahlanteki nonkhe.”
12 Nakacedza kubageza tinyawo, futsi sekayigcokile nengubo yakhe yangetulu, waphindze wahlala etafuleni, watsi kubo: “Niyakucondza yini loku lengikwente kini?
13 Nine ningibita ngekutsi: ‘Mfundzisi,’ nangekutsi: ‘Nkhosi,’ futsi nisuke nicinisile ngobe nginguloko.+
14 Ngako-ke nangabe mine nanobe ngiyiNkhosi neMfundzisi, nginigeze tinyawo,+ nani kufanele* nigezane tinyawo.+
15 Ngobe nginentele sibonelo, kuze nani nente njengobe ngentile.+
16 Ngicinisile, ngicinisile ngitsi kini: Sisebenti singephansi kwenkhosi yaso, naloyo lotfunyiwe akasimkhulu kunaloyo lomtfumile.
17 Niyajabula nanitati letintfo futsi nitenta.+
18 Angikhulumi ngani nonkhe, ngobe ngiyabati labo lengibakhetsile. Kodvwa kufanele ugcwaliseke umbhalo lotsi:+ ‘Loyo lobekadla nami sinkhwa, sewungijikele.’*+
19 Nginitjela loku nyalo kusengakenteki, kuze kutsi nasekwenteka nikholwe kutsi nginguye.+
20 Ngicinisile, ngicinisile ngitsi kini: Lowemukela nobe ngubani lengimtfumile, uyangemukela nami.+ Nalongemukelako, wemukela Loyo longitfumile.”+
21 Ngemuva kwekusho letintfo, Jesu weva buhlungu kakhulu, wase utsi: “Ngicinisile, ngicinisile ngitsi kini: Lomunye wenu utangitsengisa.”+
22 Bafundzi bakhe babukana bodvwa, badidekile kutsi ngubani lona lakhuluma ngaye.+
23 Bekunemfundzi lobekahleti edvute* naJesu, futsi Jesu bekamtsandza.+
24 Ngako Simoni Phetro wakhweba lomfundzi watsi: “Sitjele, ngubani lona lakhuluma ngaye.”
25 Lomfundzi wasondzela kuJesu watsi: “Nkhosi, ngubani?”+
26 Jesu wamphendvula watsi: “Nguloyo lengitamnika lucetu lwesinkhwa lengitalwenya esitjeni.”+ Nasekasenyile lesinkhwa, wasitsatsa wasinika Judasi, indvodzana yaSimoni Skariyothi.
27 Ngemuva kwekutsi Judasi sekalutsetse lolucetu lwesinkhwa, Sathane wangena kuye.+ Ngako Jesu watsi kuye: “Loko lokwentako kwente masinyane.”
28 Kodvwa kute ngisho namunye kulabo lebebahleti etafuleni lowati kutsi Jesu bekakusholani loku.
29 Labanye bebacabanga kutsi njengobe Judasi bekaphatsa libhokisi lemali,+ Jesu bekatsi kuye: “Ubotsenga tintfo lesitatidzinga ngemkhosi,” nobe bekatsi akatsatse imali ayiphe labeswele.
30 Ngako nasekalutfolile lolucetu lwesinkhwa, waphuma ngekushesha, futsi besekusebusuku.+
31 Nasekaphumile Judasi, Jesu watsi: “Nyalo iNdvodzana yemuntfu iyakhatinyuliswa,+ naNkulunkulu uyakhatinyuliswa ngayo.
32 Nkulunkulu nguye lotayikhatimulisa,+ futsi loko utakwenta ngekushesha.
33 Bantfwana labatsandzekako, mine nginani sikhashana. Nitangifuna, futsi nyalo ngikusho kini loko lengakutjela emaJuda, nangitsi: ‘Lapho ngiya khona ngeke nifike.’+
34 Ngininika umtsetfo lomusha, wekutsi nitsandzane; njengobe nje nami nginitsandzile,+ nani tsandzanani.+
35 Nangabe nitsandzana, bonkhe batawukwati kutsi nibafundzi bami.”+
36 Simoni Phetro watsi kuye: “Nkhosi, uyaphi?” Jesu watsi: “Lapho ngiya khona ngeke ukhone kungilandzela nyalo, kodvwa utangilandzela ngemuva kwesikhatsi.”+
37 Phetro watsi kuye: “Nkhosi, kungani ngingeke ngikhone kukulandzela nyalo? Ngitawunikela ngekuphila kwami ngenca yakho.”+
38 Jesu watsi: “Utsi utawunikela ngekuphila kwakho ngenca yami? Ngicinisile, ngicinisile ngitsi kuwe: Kutawutsi nakukhala lichudze, utawube sewungiphike katsatfu.”+
Imibhalo lengentansi
^ Nobe “nibophekile kutsi.”
^ NgesiGriki kutsi, “ungiphakamisele sitsendze sakhe.”
^ NgesiGriki kutsi, “esifubeni.”
