Taga 19:1-29
19 Kuncono kuba luphuya kodvwa ube ucotfo+Kunekutsi ube silima futsi ukhulume emanga.+
2 Akusikahle kutsi umuntfu abe bete lwati,+Futsi umuntfu lowenta tintfo ngemawala uyona.
3 Umuntfu ugwegwisa indlela yakhe ngebulima bakhe,Bese inhlitiyo yakhe itfukutselela Jehova.
4 Injinga inebangani labanyenti,Kodvwa lophuyile utawulahlwa nangumngani wakhe lokuphela kwakhe.+
5 Fakazi longaketsembeki utawujeziswa,+Futsi loyo lohlale akhuluma emanga angeke aphunyule.+
6 Bantfu labanyenti bafuna kutsandvwa sikhulu,*Futsi bonkhe bantfu babangani bemuntfu lophana tipho.
7 Nangabe umuntfu enyanywa ngibo bonkhe bomnakabo ngenca yebuphuya bakhe;+Nakanjani nebangani bakhe batambalekela!+
Utsi ngisho abancenga, kube bete lomphendvulako.
8 Umuntfu lotfola kuhlakanipha utitsandza yena.+
Nobe ngubani lohlale anekucondza utawuphumelela.*+
9 Fakazi longaketsembeki utawujeziswa,Futsi loyo lohlale akhuluma emanga utawushabalala.+
10 Silima akusifaneli kuphila kamnandzi;Kanjalo nesisebenti akusifaneli kubusa tikhulu!+
11 Kucondza kwenta umuntfu angasheshi atfukutsele,+Futsi nangabe atsalalisa nakoniwa utawuhlonishwa.+
12 Intfukutselo yenkhosi ifana nekubhodla kwelibhubesi,+Kodvwa kwemukelwa ngiyo kunjengematolo lalele etjanini.
13 Indvodzana lesilima ibangela babe wayo tinkinga,+Futsi umfati lotsandza kususa lutfutfuva* ufana neluphahla loluhlale luvuta.+
14 Indlu nemcebo kulifa umuntfu lalitfola kubabe wakhe,Kodvwa umfati lohlakaniphile usipho lesivela kuJehova.+
15 Livila litsandza kulala,Futsi umuntfu longafuni kusebenta utawulamba.+
16 Umuntfu logcina umtsetfo waNkulunkulu utawuphila;+Kodvwa loyo longenandzaba netindlela letilungile utawufa.+
17 Umuntfu lowentela lophuyile umusa uboleka Jehova,+Futsi Nkulunkulu utamnika umvuzo ngenca yaloko lakwentako.+
18 Jezisa indvodzana yakho lisekhona litfuba lekutsi ingashintja,+Kuze ingafi ngenca yakho.*+
19 Umuntfu losheshe atfukutsele utawujeziswa;Nangabe wetama kumsita, kutawufuneka umsite siphelane.+
20 Ubosemukela seluleko futsi ulalele nawuyalwa,+Kuze uhlakaniphe esikhatsini lesitako.+
21 Umuntfu angaba netinhloso letinyenti enhlitiyweni yakhe,Kodvwa intsandvo yaJehova ngiyo letawuphumelela.+
22 Buhle bemuntfu kutsi atsandze* labanye bantfu;+Futsi kuncono kuba luphuya kunekuba nemanga.
23 Kwesaba Jehova kuholela ekuphileni;+Umuntfu lomesabako utawuphumula ngekuthula, futsi angeke ehlelwe ngulokubi.+
24 Livila lifaka sandla salo endishini lenekudla,Kodvwa libese liyavilapha kusimikisa emlonyeni.+
25 Mshaye umuntfu lophukutanako,+ khona loyo lote lwati atewuhlakanipha,+Myale umuntfu lonekucondza kuze abe nelwati lolunyenti.+
26 Umuntfu lophatsa kabi babe wakhe futsi acoshe make wakheUyindvodzana lelihlazo futsi ledlisana emahloni.+
27 Ndvodzana yami, nangabe uyekela kwemukela siyalo,Utawuphambuka endleleni yelwati.
28 Fakazi longasiti ngalutfo ukubukela phansi kulunga,+Futsi lababi batsandza kwenta tintfo letimbi.+
29 Bantfu labaphukutanako bahlalelwe sijeziso,+Netilima tihlalelwe kushaywa emihlane.+
Imibhalo lengentansi
^ Nobe “ngumuntfu lowephanako.”
^ NgesiHebheru kutsi, “utawutfola lokuhle.”
^ Nobe “kukhonona.”
^ Nobe “Futsi ungafisi kutsi ife.”
^ Nobe “abe nelutsandvo lolucotfo.”
