Incwadzi Yekucala YaSamuweli 16:1-23
16 Ekugcineni, Jehova watsi kuSamuweli: “Kutawuze kube ngunini solo ukhalela Sawula+ ngobe ngimalile kutsi abe yinkhosi yema-Israyeli?+ Gcwalisa luphondvo lwakho ngemafutsa+ uhambe. Ngitakutfuma kuJese+ waseBhetlehema ngobe ngikhetse yinye yemadvodzana akhe kutsi ibe yinkhosi.”+
2 Kodvwa Samuweli watsi: “Ngingahamba kanjani? Sawula utangibulala nakeva ngaloku.”+ Jehova wamphendvula watsi: “Tsatsa litfokati uhambe nalo futsi utsi: ‘Ngite kutewentela Jehova umhlatjelo.’
3 Ubomema Jese kutsi ete lapho utawentela khona lomhlatjelo, ngitawubese ngiyakutjela loko lokufanele ukwente. Ubogcoba loyo lengitakulayela yena.”+
4 Samuweli wenta loko Jehova labemtfume kona. Nakefika eBhetlehema,+ emadvodza lamadzala akulelidolobha etfuka nakambona, ase atsi: “Ute ngesihle yini?”
5 Yena watsi: “Ngite ngesihle. Ngitowentela Jehova umhlatjelo. Tingcweliseni, bese nita nami lapho ngitawentela khona.” Ngemuva kwaloko wangcwelisa Jese nemadvodzana akhe, wase ubamemela kulomhlatjelo.
6 Nabefika, wabona Eliyabe+ futsi watsi: “Lona nguye kanye logcotjiwe waJehova.”
7 Kodvwa Jehova watsi kuSamuweli: “Ungabuki indlela labukeka ngayo nebudze bakhe,+ ngobe ngimalile. Indlela umuntfu labuka ngayo ayifanani neyaNkulunkulu ngobe bantfu babuka lokubonakala ngephandle, kodvwa Jehova ubona lokusenhlitiyweni.”+
8 Jese wabese ubita Abinadabi+ futsi wamendlulisa embikwaSamuweli, kepha Samuweli watsi: “Jehova akakamkhetsi nalona.”
9 Ngemuva kwaloko Jese waletsa Shama+ kodvwa Samuweli watsi: “Jehova akakamkhetsi futsi nalona.”
10 Ngako Jese wendlulisa emadvodzana akhe lasikhombisa embikwaSamuweli, kepha Samuweli watsi kuye: “Jehova akakakhetsi ngisho nayinye kuwo.”
11 Ekugcineni Samuweli watsi kuJese: “Sekaphelele yini emadvodzana akho?” Yena watsi: “Lencane kunawo onkhe+ ayikho, yeluse timvu.”+ Samuweli wabese utsi kuye: “Ayilandvwe ngobe angeke sihlale phansi sidle ingakefiki.”
12 Ngako yalandvwa yase iyangeniswa. Beyibovana ngelibala, inemehlo lamahle futsi ilikhwa.+ Jehova wabese utsi: “Sukuma, yigcobe ngobe ngiyo lengiyikhetsile!”+
13 Ngako Samuweli watsatsa loluphondvo lolunemafutsa+ wagcoba Davide embikwabomnakabo. Kusukela ngalelolanga umoya waJehova wehlela kuye.+ Ngekuhamba kwesikhatsi Samuweli wahamba waya eRama.+
14 Umoya waJehova besewuphumile kuSawula,+ futsi Jehova wavumela umoya lomubi kutsi umhluphe.+
15 Tinceku taSawula tatsi kuye: “Uyabona yini kutsi Nkulunkulu uvumele umoya lomubi kutsi ukuhluphe.
16 Siyacela nkhosi kutsi utfume tinceku takho tiyofuna indvodza lenelikhono lekudlala lihabhu.+ Nakwenteka uhlushwa ngulomoya lomubi, itakudlalela lona futsi utawuba ncono.”
17 Ngako Sawula watsi etincekwini takhe: “Ngicela ningitfolele indvodza ledlala kahle lihabhu, bese niyiletsa lapha kimi.”
18 Lenye yaletinceku yatsi: “Ngiyibonile indvodzana yaJese waseBhetlehema kutsi inelikhono lekudlala lihabhu, inesibindzi futsi ilichawe lelinemandla.+ Ikhuluma kahle, ilikhwa+ kantsi naJehova unayo.”+
19 Sawula wase utfumela titfunywa kuJese watsi: “Tfumela kimi Davide indvodzana yakho leyelusile.”+
20 Jese wase utsatsa sinkhwa, sikhwama sesikhumba lesineliwayini nelizinyane lembuti wakwetfwesa imbongolo, futsi wakutfumela naDavide indvodzana yakhe kuSawula.
21 Ngako Davide waya kuSawula wacala kumsebentela.+ Sawula wamtsandza kakhulu futsi Davide waba yinceku yakhe lemphatsela tikhali.
22 Sawula watfumela umlayeto kuJese watsi: “Ngicela Davide achubeke ayinceku yami, ngobe uyatsandzeka kimi.”
23 Nobe nini Sawula nakahlushwa ngulomoya lomubi lobewuvunyelwe nguNkulunkulu, Davide abetsatsa lihabhu amdlalele lona bese Sawula uba ncono futsi kutsi hhemu, nalomoya lomubi bewubese uyesuka kuye.+
