Proverbios 17:1-28
17 Aswan allin parti chojru* tʼantata mikhuspa allinta kausayqa,+sumaj mikhunasta mikhuspa maqanakuspalla uj wasipi kausanamantaqa.+
2 Allin yuyayniyoj kamacheqa patronninpa wawanta mandonpi japʼenqa pʼenqay imasta ruwajtin,herenciatapis japʼenqa patronninpa ujnin wawanpis kanman jina.
3 Qolqe metaltaqa pʼuku platopi unuyachispa chʼuwachakun, qoritapis hornopi chʼuwachakun.+
Sonqostataj Jehová Dios allinta qhawaykurin.*+
4 Sajra runaqa sonqota nanachej palabrasta sumajta uyarin.
Llulla runataj wajkunamanta llulleriosta parlasqankuta kusiy uyarin.+
5 Wajcha runata asipayajqa, Ruwajnin Diosllata qhawarashan.+
Wajkunaj desgraciankumanta kusikojpis manapuni castigomanta ayqenqachu.+
6 Allchhisqa uj corona jina kanku awelitusninkupaj.
Wawastaj allinpaj qhawasqa kanku tatasninkurayku.*
7 Mana yuyayniyojqa manapuni cheqan kajtaqa parlanmanchu.+
Uj kamachejpajpis manapuni allinchu llulleriosta parlananqa.+
8 Regaloqa runapaj may valorniyoj rumisitu jina, runa masinwan munachikunanpaj.+
Mayman rejtinpis chay runataqa allin rin.+
9 Wajkunaj pantasqankuta perdonajqa munanakuy kananpaj yanapakun,+wajkuna pantasqankumanta parlarisqa kajtaj sumaj amigosta phiñanachin.+
10 Yachayniyoj runataqa ujta kʼamejtinkupis mayta yanapan,+wampu runatarí pachaj kutista seqʼojtinkupis qhasilla.+
11 Sajra runaqa autoridadpa contranta oqharikuyllata munan,jinapis mana khuyarikoj runata kachamonqanku payta castigananpaj.+
12 Aswan allinraj kanman uñasninta qhechusqanku jukumariwan tinkukoyqa,sonserasta ruwaj wampuwan tinkukunamanta nisqaqa.+
13 Pillapis allin kajta ruwapushajtinku sajra kajwan kutichin chayqa,desgracialla familianta qhatirenqa.*+
14 Phiñanakuta rikhuricheyqa, ashkha yakuta kachaykuy jina.
Chayrayku niraj chʼajwa qallarishajtin ripuy.+
15 Sajra runata mana juchayoj kasqanta nejqa, jinallataj cheqan runata juchachajpis+Jehová Diospa ñaupaqenpi millay kanku.
16 Wampu runajta yachayniyoj kananpaj tukuy iman kanman chaypis,qhasilla kanman yachakunanpaj mana sonqon kajtenqa.+
17 Sumaj amigoqa tukuy tiempo munakuyniyoj,+llakiy kajtintaj uj hermanopis kanman jina yanapakun.+
18 Mana yuyayniyoj runaqa qʼapirinakuspa tratota ruwarpallan.
Payqa garante sayananpaj uj testigoj ladonpi tratota ruwarpallan.+
19 Phiñanakuyllata munaj runaqa juchaman urmanqa.+
Jawa punkunta jatunta ruwaykojqa desgraciata wajyakushan.+
20 Sajra sonqoyoj runataqa mana allinchu renqa.+
Llullakuspa parlajpis mana allinman chayanqa.
21 Mana yuyayniyoj wawaqa tatanta llakiypi rikhurichin,wampu wawaj tatanpis mana kusisqachu kausakun.+
22 Kusisqa sonqoqa sumaj jampi.+
Llakisqa sonqotaj kallpata tukuchin.*+
23 Sajra runaqa pakayllapi pagachikunjusticiata qʼewinanpaj.+
24 Yachayqa tantearikoj runaj ñaupaqellanpi kashan.
Mana yuyayniyoj runaj ñawisnintaj mundoj kʼuchusnintinta qhawaykachasqanpi kashan.+
25 Wampu wawaqa tatanta waqachin,mamanpa sonqontapis nanachin.+
26 Cheqan runata castigayqa mana allinchu,*autoridadniyoj runasta seqʼoypis mana cheqan kajman jinachu.
27 Yachayniyoj runaqa mana imatapis parlarpallanchu,+allinta tantearikoj runapis mana phiñarpakullanchu.+
28 Uj runa chʼinlla kajtenqa mana yuyayniyoj kajtinpis yachayniyoj runata jina qhawanqanku,siminta mana kicharej runatapis tantearikoj runata jina qhawanqanku.
Sutʼinchaykunasnin
^ Chojru: waj lugarespi ninku chʼorqo.
^ Allinta qhawaykurin niyta munan Jehová Dios sonqosta qhawaykusqanta may jina chʼuwachus kasqankuta yachananpaj.
^ Chayri “tatamamankurayku”.
^ Chayri “desgraciaqa mana wasinmanta chinkanqachu”.
^ Chayri “tullusta chʼakichin”.
^ Chayri “multayqa mana allinchu”.
