Proverbios 15:1-33
15 Kʼachallamanta kuticheyqa rabiata thasnun,+sonqota nanachej palabrastaj runata phiñachin.+
2 Yachayniyoj runaqa parlananpaj yachayninwan sumajta yanapachikun.+
Mana yachayniyoj runaj siminmantataj wampu kaynillan llojsimun.
3 Jehová Diospa ñawisnenqa tukuynejta qhawamushan.
Payqa allinta qhawamushan sajra runasta, allin runastapis.+
4 Kʼachallamanta parlayqa sonqota oqharin.*+
Llullakuspa parlaytaj sonqota llakichin.
5 Mana yuyayniyojqa tatanpa yuyaychasqanta mana valechinchu.+
Allin yuyayniyoj runataj kʼamisqankuta japʼikun.+
6 Cheqan runaj wasinpeqa valorniyoj imas ashkha tiyan.
Sajra runatataj ima ruwasqanpis payllatataj llakiyman chayachin.+
7 Yachayniyoj runaj simenqa yachayta rejsichin,+mana yachayniyoj runaj sonqontaj mana chayta ruwanchu.+
8 Jehová Diosqa millachikun sajra runaspa ima jaywasqankutapis,+cheqan runaj oracionnintaj paypa sonqonta kusichin.+
9 Jehová Diosqa millachikun sajra runaspa sajra ñanninkuta,+cheqan kajman jina kausakoj runastataj munakun.+
10 Cheqan ñanmanta karunchakojqa kʼamisqankuta sajrapaj qhawan.+
Kʼamisqankuta chejnikoj runataj wañonqa.+
11 Sichus Sepultura* ukhupis, wañusqa cuerpos ismushanku chay lugarpis* Jehová Diospa qhawayninpi sutʼipacha kashan chayqa,+runaspa sonqonpi imachus kasqanqa aswan sutʼiraj kashan paypajqa.+
12 Burlakoj runaqa mana munakunchu payta kʼamejtaqa,+ni yachayniyoj runastapis tapurikunchu.+
13 Runaj sonqonpi kusiy kajtin uyanpis kusisqallataj,sonqo pʼakisqa kajtintaj runaqa umphuyan.+
14 Allinta tanteakoj runaqa yachayta maskʼan.+
Wampu runataj manakaj imasllata maskʼan.+
15 Llakisqa runapajqa sapa día phutiylla.+
Runaj sonqon kusisqa kajtintaj* sapa día kusisqa kausakun.*+
16 Pisi kapuyniyojlla kaspapis Jehová Diosta manchachikoyqa aswan sumaj,+tukuy imayoj kaspa llakisqalla kausanamantaqa.+
17 Munanakuy kajtenqa aswan sumaj uj plato verdurasta mikhoyqa,+chejninakuypi wira torota mikhunamantaqa.+
18 Imamantapis phiñarpakullaj runaqa maqanakusta rikhurichin.+
Pacienciayoj runataj phiñanakusta thasnuchin.+
19 Qhella runaj ñannenqa khishkaswanpis wisqʼasqa kanman jina.+
Cheqan runaj ñannintaj sumaj pichasqa ñan jina.+
20 Yachayniyoj wawaqa tatanta kusichin.+
Wampu runataj mamanta pisipaj qhawan.+
21 Mana yuyayniyoj runataqa wampu ruwaykuna kusichin.+
Tanteariyta yachaj runataj cheqanta purin mana wistʼuykuspa.+
22 Mana allinta parlarikuspa imatapis ruwayqa mana allinchu llojsin.
Ashkhaspa yuyaychayninkuwantaj imallapis allinta ruwakun.+
23 Runaqa tapusqankuman allinta kutichispa kusikun.+
Maychus tiemponpi allinta parlayqa may sumaj.+
24 Kausay ñanqa sumaj yuyayniyoj runata uramanta wicharichin,+ura Sepulturamanta* karunchachinanpaj.+
25 Jehová Diosqa runaykachajpa wasinta pampacharpanqa.+
Viudaj jallpʼasninpa linderosnintataj* respetachenqa.+
26 Jehová Diosqa millaypaj qhawan sajra runaspa yachachinakusqankuta,+kʼacha palabrastaj paypa qhawayninpeqa llimphu kanku.+
27 Pichus engañaspa qolqeta ganajqa familiallantataj llakiypi rikhurichin.*+
Llukʼichikuyta* chejnikojtaj kausallanqapuni.+
28 Cheqan runaqa niraj ni imata kutichishaspa allintaraj sonqonpi tʼukurin.*+
Sajra runaj simintaj sajra imasta parlarpallan.
29 Jehová Diosqa sajra runasmanta allin karupi kashan,cheqan runaspa mañakusqankutarí uyarin.+
30 Kusisqa uyaqa* runaj sonqonta oqharin.
Allin willaykunapis tullusta sinchʼiyachin.*+
31 Pichus kausayta qoj kʼamiyta uyarikun,chaymin yachayniyojkunawan khuska tiyakun.+
32 Kʼamisqankuta mana japʼikojqa kausayninta chejnin.+
Kʼamisqankuta japʼikojtaj aswan yachayniyoj.+
33 Jehová Diosta manchachikoyqa yachayniyoj kanapaj yanapakun.+
Kʼumuykukoj sonqo runapis jatunchasqa.+
Sutʼinchaykunasnin
^ Hebreo parlaypeqa nin, “kausay sachʼa”.
^ Chayri “sonqon allin kajtintaj”.
^ Chayri “Runaqa kusisqa, sapa diapis fiestapi kanman jina”.
^ Lindero: waj lugarespi ninku linde.
^ Chayri “pʼenqaypi rikhurichin”.
^ Llukʼiy: waj lugarespi ninku coima.
^ Chayri “imaynatachus kutichinanta allinta tʼukurin”, “niraj imata nishaspa allintaraj piensarin”.
^ Hebreo parlaypeqa nin, “Lliphipirej ñawisqa”.
^ Hebreo parlaypeqa nin, “tullusta wirayachin”.
