Edwɛne 94:1-23
94 O Gyihova, nzenralɛ Nyamenle,+O nzenralɛ Nyamenle, kile wɔ anyunlunyia!
2 O azɛlɛ ye Ndɛnebuavolɛ,+ dwazo.
Tua anwomemaazoma kakɛ mɔɔ ɔfɛta bɛ la.+
3 O Gyihova, kenlenzu,Amumuyɛma memaa bɛ nwo zo ahɔdwu kenlenzu?+
4 Bɛka mgbole yɛɛ bɛtendɛ anwomemaazo nu;Ɛtanevolɛma kɔsɔɔti tu bɛ nloa anu.
5 O Gyihova, bɛkile wɔ menli ne nyane,+Yɛɛ bɛsisi wɔ agyapadeɛ ne.
6 Bɛku ahunlanvolɛ nee nyɛvolɛ,Yɛɛ bɛku nrisa.
7 Bɛka kɛ: “Gyaa ɛnnwu ye;+Gyekɔbo Nyamenle ne adwenle ɛtɛbale zo.”+
8 Bɛmɛ mɔɔ bɛnlɛ adwenle, bɛde ɛhye abo;Bɛmɛ ahoasea, kenlenzu a bɛbala nwunu ali a?+
9 Ahenle mɔɔ bɔle* ɛnzolɛ la, asoo ɔnde edwɛkɛ?
Ahenle mɔɔ yɛle ɛnyelɛ la, asoo ɔnnwu debie?+
10 Ahenle mɔɔ tenrɛdenrɛ maanle maanle ne mɔ la, asoo ɔngola ɔndwi bɛ nyunlu?+
Ɔdaye a ɔmaa menli nyia ndelebɛbo a!+
11 Gyihova ze menli adwenle,Bɛle kɛ ɛnwomenle ala la.+
12 O Gyaa, anyelielɛ a le sonla ne mɔɔ ɛtenrɛdenrɛ ye,+Na ɛfa wɔ mɛla ne ɛkilehile ye la,+
13 Kɛ ɛmaa ye anzodwolɛ wɔ munzule mekɛ nu,Kɔkpula kɛ bɛkɛdu kuma bɛkɛmaa amumuyɛnli ne la.+
14 Ɔluakɛ Gyihova ɛnrɛkpo ye menli ne,+Yɛɛ ɔnrɛgyakyi ye agyapadeɛ ne.+
15 Ɔluakɛ bɛbabua ndɛne tenlene nu bieko,Na bɛdabɛ mɔɔ bɛ ahonle nu te la amuala bali zo.
16 Nwane a badwazo atia amumuyɛma amaa me a?
Nwane a bagyinla aho atia ɛtanevolɛma amaa me a?
17 Saa Gyihova anyɛ me boavolɛ a,Anrɛɛ ɔnrɛhyɛ na me* bo zo aminli.*+
18 Mɔɔ menganle kɛ: “Me gyakɛ ɛlɛtele” la,O Gyihova, wɔ ɛlɔlɛ kpundii ne zɔle* me.+
19 Mɔɔ adwenleadwenle* bole me nwo zo* la,Ɛkyekyele me rɛle na ɛmaanle me ahonle dɔle me azule nu.*+
20 Asoo tumivolɛma* mɔɔ ɛnli nɔhalɛ la nee wɔ bayɛ koWɔ mekɛ mɔɔ bɛdua mɛla zo* bɛfa ngyegyelɛ bɛba la ɔ?+
21 Bɛteta tenlenenli* ɛsesebɛ+Na bɛbua mɔɔ anwo ɛnlɛ edwɛkɛ la ewule* fɔlɛ.+
22 Noko Gyihova bayɛ me ɛvealeka kpalɛ,*Me Nyamenle ne le me ɛvealeka bodane.+
23 Ɔbamaa bɛ amumuyɛ nyɛleɛ ne azia ara bɛ nwo zo.+
Ɔbalua bɛ amumuyɛyɛlɛ ne azo yeaye bɛ yeavi ɛkɛ.*
Gyihova yɛ Nyamenle ne baye bɛ avi ɛkɛ.*+
Ɔbodwɛkɛ
^ Hibulu aneɛ nu, “luale.”
^ Hibulu aneɛ nu, “ahɔdɛnla koonwoyɛlɛ nu.”
^ Anzɛɛ “me ɛkɛla.”
^ Anzɛɛ “boale.”
^ Anzɛɛ “ninyɛne mɔɔ gyegye adwenle.”
^ Anzɛɛ “yɛle dɔɔnwo wɔ me nu.”
^ Anzɛɛ “Wɔ arɛlekyekyelɛ ne mɔ maanle me ɛkɛla anwo dɔle ye.”
^ Anzɛɛ “ndɛnebuavolɛma.” Hibulu aneɛ nu, “belemgbunli ebia.”
^ Hibulu aneɛ nu, “mɛla duma nu.”
^ Hibulu aneɛ nu, “mogya.”
^ Anzɛɛ “tenlenenli ɛkɛla.”
^ Anzɛɛ “aranemgbole.”
^ Hibulu aneɛ nu, “yeamaa bɛaha bɛ nloa bɛado nu.”
^ Hibulu aneɛ nu, “bamaa bɛaha bɛ nloa bɛado nu.”
