Edwɛne 31:1-24
Kɔmaa edwɛndolɛma kpanyinli ne. Devidi ayɛlɛyelɛ edwɛne.
31 O Gyihova, wɔ nuhua a menriandi meravea a.+
Mmamaa me nyunlu gua aze ɛlɛ.+
Wɔ tenleneyɛlɛ ne ati, die me.+
2 Gyele ɛ nzo tie me.*
Bɛla ndɛndɛ balie me.+
Bayɛ me boka zo aranemgbole,Nee me ɛvealeka na die me.+
3 Ɔluakɛ ɛle me bodane nee me aranemgbole;+Na wɔ duma ne ati,+ ɛbali me nyunlu na wɔahile me adenle.+
4 Ɛbalie me wɔavi asawu mɔɔ bɛvea bɛgua me la anu,+Ɔluakɛ ɛle me ɛvealeka.+
5 Me ngoane* wɔ ɛ sa nu.+
O Gyihova, Nyamenle mɔɔ ka nɔhalɛ,*+ wɔlie me.
6 Mekyi bɛdabɛ mɔɔ bɛsonle ananze mɔɔ nvasoɛ ɛnle zo la,Na mame, mefa me nwo meto Gyihova anwo zo.
7 Mebali fɛlɛko kpole wɔ wɔ ɛlɔlɛ kpundii ne anu,Ɔluakɛ wɔnwu me nyanelilɛ;+Ɛze ngyegyelɛ mɔɔ mewɔ nu la.*
8 Ɛtɛyele me ɛtɛwulale kpɔvolɛ ne asa anu,Emomu, wɔva me wɔgyinla ɛleka mɔɔ banebɔlɛ wɔ* la.
9 O Gyihova, maa menyia ɛ nyunlu ɛlolɛ ɔluakɛ mewɔ anwongyelelɛ nu.
Nyanelilɛ ɛmaa me nye nee me nwonane kɔsɔɔti* ɛlɛsɛkye.+
10 Alɔbɔlɛlilɛ ɛpɛ me ngoane zo+Yɛɛ nyanelilɛ ti me ɛvolɛ andwu bie.+
Me nvonleɛ ti, me anwosesebɛ zo ɛlɛte;Me mbowule nu ɛtuto.+
11 Me kpɔvolɛma kɔsɔɔti golo me nwo,+Titili me kpalɛzoamra.
Me nwo ka menli mɔɔ ze me la ɛzulolɛ;Saa bɛnwu me wɔ gua zo a, bɛnriandi me.+
12 Mevi bɛ ahonle* nu na bɛ rɛle ɛvi me kɛ asɛɛ mewu la;Meyɛ kɛ buakɛ mɔɔ ɛbɔ la.
13 Mede kɛ menli keha me nwo edwɛkɛ ɛtane ɛtane;Ɛzulolɛ ɛbɔ me ɛyia.+
Saa bɛyia nu bɛfa me nwo adwenle a,Bɛbɔ kpɔkɛ kɛ bɛku me.+
14 Noko mefa me nwo meto ɛ nwo zo, O Gyihova.+
Meka kɛ: “Wɔmɔ a ɛle me Nyamenle a.”+
15 Me ngoane mekɛ* wɔ ɛ sa nu.
Die me fi me kpɔvolɛma nee bɛdabɛ mɔɔ bɛyɛ me kpɔdekpɔde la asa anu.+
16 Maa ɛ nyunlu ɛda wɔ sonvolɛ anwo zo.+
Wɔ ɛlɔlɛ kpundii ne ati, die me.
17 O Gyihova, saa mefɛlɛ wɔ a, mmamaa me nyunlu gua aze.+
Maa amumuyɛma anyunlu ɛgua aze;+Maa bɛyɛ koonwu wɔ Nla* ne anu.+
18 Maa ɛnloanlɛ mɔɔ bɔ adalɛ la ɛdɔ mumule,+Ɛnloanlɛ mɔɔ tendɛ anwomemaazo nee adubɛnwo nu, na ɔka mgbole ɔtia tenlenenli la.
19 Nea kɛzi wɔ kpalɛyɛlɛ ne zonle a!+
Wɔva wɔzie wɔmaa bɛdabɛ mɔɔ bɛsulo wɔ la,+Na wɔmaa menli kɔsɔɔti ɛnwu ye wɔ bɛdabɛ mɔɔ bɛnriandi bɛbafea wɔ nu la anwo.+
20 Ɛbava bɛ wɔazie wɔ feabelɛ ne wɔ ɛ nyunlu ɛkɛ+Wɔavi menli mɔɔ bɔ adwenle ɛtane la anwo;Ɛbava bɛ wɔavea wɔ ɛdanlɛsua ne anuWɔavi menli mɔɔ keha mgbole la anwo.+
21 Ayɛlɛyelɛ ɛha Gyihova,Ɔluakɛ yela ye ɛlɔlɛ kpundii ne ali yehile me+ wɔ nwanwane adenle zo wɔ suakpole mɔɔ ɛlɔne ɛbɛnga ye ɛyia la azo.+
22 Na mame, me ahonle dule na menganle kɛ:
“Mebawu meavi ɛ nye zo.”+
Noko mɔɔ menzunle menvɛlɛle wɔ kɛ ɛboa me la, ɛdiele me nzɛlɛlɛ ne.+
23 Bɛhulo Gyihova, bɛmɛ mɔɔ bɛdi nɔhalɛ bɛmaa ye la!+
Gyihova bɔ nɔhavoma anwo bane,+Noko ɔtua bɛdabɛ mɔɔ bɛmemaa bɛ nwo zo la kakɛ ɔmaa ɔbo zo.+
24 Bɛdabɛ mɔɔ bɛkendɛ Gyihova la amuala,+Bɛnyia akɛnrasesebɛ na bɛzi bɛ ahonle.*+
Ɔbodwɛkɛ
^ Anzɛɛ “Ka ɛ nwo aze na tie me.”
^ Anzɛɛ “sunsum.”
^ Anzɛɛ “nɔhavo Nyamenle.”
^ Anzɛɛ “me ɛkɛla ngyegyelɛ ne.”
^ Anzɛɛ “tɛlɛ.”
^ Anzɛɛ “me ɛkɛla nee me ko.”
^ Anzɛɛ “adwenle.”
^ Hibulu aneɛ nu, “mekɛ ne mɔ.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Hibulu aneɛ nu, “bɛmaa bɛ ahonle anwo ɛyɛ se.”
