Ɛhɛe. Mɔɔ Gyisɛse wɔ azɛlɛ ye azo la, ngapezo dɔɔnwo mɔɔ fale “Mɛzaya, Adekilevolɛ ne” mɔɔ bayɛ “ewiade ne Ngoanedievolɛ” la rale nu wɔ ɔ nwo zo. (Daneɛle 9:25 NW; 1 Dwɔn 4:14) Wɔ Gyisɛse ewule nzi bɔbɔ, ngapezo mɔɔ bɛhanle bɛvanenle Mɛzaya ne anwo la rale nu wɔ ɔ nwo zo.​—Edwɛndolɛ 110:1; Gyima ne 2:34-​36.

•  “Mɛzaya” abo kile duzu?

•  Asoo Mɛzaya ne anwo ngapezo bahola ara nu wɔ menli dɔɔnwo anwo zo?

•  Mɛzaya ne bahola ara kenle bie ɔ?

•  Mɛzaya ne anwo ngapezo nyɛ a wɔ Baebolo ne anu a?

•  Mɛzaya ne anwo ngapezo bie mɔ mɔɔ rale nu wɔ Gyisɛse anwo zo la

 Hibulu edwɛkɛkpɔkɛ Ma·shiʹach (Mɛzaya) nee Giliki edwɛkɛkpɔkɛ Khri·stos (Kelaese) amuala abo kile “Awie Mɔɔ Bɛkpokpa Ye.” Yemɔti, “Gyisɛse Kelaese” abo kile “Gyisɛse mɔɔ bɛkpokpa ye,” anzɛɛ “Gyisɛse ne mɔɔ le Mɛzaya la.”

 Wɔ tete ne, ɛnee bɛwola nwole bɛgua menli ati zo bɛfa bɛkpokpa bɛ bɛkile kɛ, bɛmaa bɛ tumi anzɛɛ nwolɛ adenle titili bie. (Sɛlɛvolɛma 8:12; 1 Samoɛle 16:13) Nyamenle a kpale Gyisɛse kɛ ɔyɛ Mɛzaya a, na ɔle gyinlabelɛ mɔɔ tumi kpole wɔ nu. (Gyima ne 2:36) Noko bɛanva nwole a bɛkpokpale Gyisɛse a, emomu Nyamenle a vale ye sunsum nwuanzanwuanza ne kpokpale ye a.​—Mateyu 3:​16.

 Kyɛkyɛ. Kɛ mɔɔ asolo awie biala asa anu ngɛlɛlera la, zɔhane ala a Baebolo ngapezo mɔɔ fale Mɛzaya anzɛɛ Kelaese ne anwo la rale nu wɔ sonla ko pɛ anwo zo a. Noko Baebolo ne bɔ kɔkɔ kɛ, “adalɛ Kelaesema nee adalɛ ngapezoma badwazo na bɛbayɛ sɛkɛlɛneɛ mgbole nee nwanwane ninyɛne bɛava bɛabɛlɛbɛla menli, na saa bɛyɛ na ɔkɛyɛ boɛ a, bɛabɛlɛbɛla bɛdabɛ mɔɔ bɛkpa bɛ la bɔbɔ.”​—Mateyu 24:24.

 Kyɛkyɛ. Baebolo ne hanle dole ɛkɛ ne kɛ, Mɛzaya ne bayɛ Belemgbunli Devidi mɔɔ vi Yizilayɛ la abozonli. (Edwɛndolɛ 89:3, 4) Noko Dwuuma kɛlɛtokɛ mɔɔ maa bɛnwu Devidi abusua ɛlɔnwɔne ne la ɛminli, bie a bɛzɛkyele ye wɔ mekɛ mɔɔ Wulomuma honle vale Gyɛlusalɛm wɔ ɛvolɛ 70 Y.M. la. * Ɔvi mekɛ zɔhane, awie biala ɛtɛkolale ɛtɛkilele kɛ ɔvi Devidi abusua ɛlɔnwɔne ne anu. Noko ɛnee zɔhane kɛlɛtokɛ ne wɔ ɛkɛ wɔ Gyisɛse mekɛ zo, na ye agbɔvolɛ bɔbɔ angola anzu kpolera kɛ ɔnvi Devidi abusua ɛlɔnwɔne ne anu.​—Mateyu 22:41-​46.

 Yɛnrɛhola yɛnrɛha Mɛzaya ne anwo ngapezo mɔɔ wɔ Baebolo ne anu la dodo. Kɛ neazo la, wɔ Ngɛlɛlera mɔɔ ka Mɛzaya ne anwo edwɛkɛ wienyi bɔbɔ la anu, asolo kɛzi awie biala badia ngapezo edwɛkɛ ne mɔ a. Kɛ neazo la, Ayezaya 53:​2-7 ka Mɛzaya ne anwo ngapezo edwɛkɛ ngakyile dɔɔnwo. Bie mɔ badia ye kɛ ɔ muala le Mɛzaya ne anwo ngapezo edwɛkɛ ko yɛɛ bie mɔ badia edwɛkɛ ne ngoko ngoko.