Samoɛle Mɔɔ Limoa 16:1-23
16 Nzinlii, Gyihova zele Samoɛle kɛ: “Kɛkala mɔɔ mekpo Sɔɔlo kɛ ɔnle Yizilayɛ belemgbunli bieko la,+ ɛdi ɔ nwo nyane wɔahɔdwu kenlenzu?+ Fa nwole gua wɔ mɛne ne anu+ na kɔ. Mesoa wɔ wɔ Bɛtelɛhɛmenli Gyɛsi+ ɛkɛ, ɔluakɛ meye ɔ mra mrenyia ne mɔ ko kɛ ɔyɛ belemgbunli.”+
2 Noko Samoɛle hanle kɛ: “Kɛ ɔkɛyɛ na meahɔ ɛ? Saa Sɔɔlo te nwolɛ bie a, ɔbahu me.”+ Gyihova buale kɛ: “Fa ɛnlankɛ ralɛ ko kɔ na ka kɛ, ‘Mera kɛ mebabɔ afɔle meamaa Gyihova.’
3 To ɛsalɛ fɛlɛ Gyɛsi maa ɔrɛla afɔlebɔlɛ ne abo; na mebahile wɔ mɔɔ ɔwɔ kɛ ɛyɛ la. Kpokpa ahenle mɔɔ mebaye ye meamaa wɔ la maa me.”+
4 Samoɛle yɛle mɔɔ Gyihova hanle la. Mɔɔ ɔdwule Bɛtelɛhɛm la,+ sua ne azo mgbanyima ne mɔ vale anwowosolɛ hɔyiale ye na bɛhanle kɛ: “Ɛrale ye anzodwolɛ nu ɔ?”
5 Na ɔhanle kɛ: “Anzodwolɛ nu ɔ. Mera kɛ mebabɔ afɔle meamaa Gyihova. Bɛde bɛ nwo na bɛmaa yɛhɔ afɔlebɔlɛ ne abo.” Akee ɔdele Gyɛsi nee ɔ mra mrenyia ne mɔ anwo na ɔvɛlɛle bɛ kɛ bɛrɛla afɔlebɔlɛ ne abo.
6 Mɔɔ bɛrale na ɔnwunle Ɛlayabe la,+ ɔhanle kɛ: “Nɔhalɛ nu, ahenle mɔɔ Gyihova ɛkpokpa ye la a gyi ɔ nyunlu ɛke la.”
7 Noko Gyihova zele Samoɛle kɛ: “Mmanea kɛzi ɔde la nee ye tendenle ne,+ ɔluakɛ mekpo ye. Ɔboalekɛ tɛ kɛzi sonla nea debie la a Nyamenle nea a, ɔluakɛ sonla nea mɔɔ ɛnyelɛ nwu ye la, noko Gyihova ɛdeɛ, ɔnea ahonle nu.”+
8 Akee Gyɛsi vɛlɛle Abenadabe+ maanle ɔrale Samoɛle anyunlu, noko ɔhanle kɛ: “Gyihova ɛtɛyele ɛhye noko.”
9 Eza Gyɛsi maanle Hyamaa+ rale, noko ɔhanle kɛ: “Gyihova ɛtɛyele ɛhye noko.”
10 Ɔti Gyɛsi maanle ɔ mra mrenyia ne mɔ anu nsuu rale Samoɛle anyunlu, noko Samoɛle zele Gyɛsi kɛ: “Gyihova ɛtɛyele ɛhye mɔ anu biala.”
11 Akee Samoɛle zele Gyɛsi kɛ: “Ɛ mra mrenyia ne mɔ amuala a le ɛhye mɔ ɔ?” Na ɔhanle kɛ: “Ekyi kpalɛ ne+ a ɛha a; yeva mboane ne mɔ yehɔ adidi.”+ Na Samoɛle zele Gyɛsi kɛ: “Soa maa bɛhɔva ye bɛrɛla, ɔluakɛ yɛnrɛdɛnla aze yɛnrɛli aleɛ kɔkpula kɛ ɔkɛra.”
12 Yemɔti ɔzoanle ɔmaanle bɛhɔvale ye bɛrale. Ɔbolo, ɔ nye ma le ngɛnlɛma yɛɛ ɔ nwo yɛ fɛ.+ Akee Gyihova hanle kɛ: “Dwazo na kpokpa ye, ɔluakɛ ɔdaye ɔ!”+
13 Ɔti Samoɛle vale mɛne ne mɔɔ nwole ne wɔ nu la+ na ɔkpokpale ye wɔ ɔ mediema ne mɔ anyunlu ɛkɛ. Ɔvi zɔhane mekɛ ne mɔɔ kɔ la, Gyihova sunsum ne maanle Devidi anwosesebɛ.+ Nzinlii Samoɛle dwazole hɔle Releema.+
14 Gyihova sunsum ne vile Sɔɔlo anwo zo,+ na Gyihova maanle sunsum ɛtane* bie ragyegyele ye.+
15 Sɔɔlo azonvolɛ ne mɔ zele ye kɛ: “Wɔnwu kɛ Nyamenle ɛmaa sunsum ɛtane bie ɛlɛgyegye wɔ.
16 Yɛmenle yɛsɛlɛ wɔ, maa wɔ azonvolɛ ɛkpondɛ awie mɔɔ ze haape bɔ kpalɛ la.+ Mekɛ biala mɔɔ Nyamenle kɛmaa sunsum ɛtane ne kɛra ɛ nwo zo la, ɔbabɔ na ɛ nwo adɔ wɔ.”
17 Ɔti Sɔɔlo zele ye azonvolɛ ne mɔ kɛ: “Mesɛlɛ bɛ, bɛkpondɛ awie mɔɔ ze ye bɔ kpalɛ la na bɛva ye bɛrɛlɛ me.”
18 Azonvolɛ ne mɔ ko hanle kɛ: “Nea! Menwu kɛ Bɛtelɛhɛmenli Gyɛsi ara nrenyia bie ze ye bɔ kpalɛ, yɛɛ ɔlɛ akɛnrasesebɛ, ɔle konle nu katakyie.+ Ɔze tendɛ kpalɛ yɛɛ ɔ nwo yɛ fɛ,+ na Gyihova nee ye lua.”+
19 Sɔɔlo zoanle maanle bɛhɔzele Gyɛsi kɛ: “Maa ɛ ra Devidi mɔɔ nea mboane ne mɔ la ɛrɛla me nwo ɛke.”+
20 Ɔti Gyɛsi vale paano, nwanye nwoma kodoku ko yɛɛ abɔnkye ralɛ ko zoale asoaso na ɔmaanle ɔ ra Devidi vale hɔmaanle Sɔɔlo.
21 Ɔti Devidi rale Sɔɔlo ɛkɛ na ɔbɔle ɔ bo kɛ ɔsonle ye.+ Sɔɔlo hulole ye kpole kpalɛ, na ɔyɛle ye sonvolɛ mɔɔ soa ye konle ninyɛne.
22 Sɔɔlo dole Gyɛsi nrɛlaleɛ kɛ: “Mesɛlɛ wɔ, maa Devidi ɛhɔ zo ɛzonle me, ɔluakɛ yenyia me nyunlu ɛlolɛ.”
23 Mekɛ biala mɔɔ Nyamenle kɛmaa sunsum ɛtane bie kɛra Sɔɔlo anwo zo la, Devidi fa haape ne na ɔbɔ, na Sɔɔlo anwo tɔ ye na ɔ nzo nu dwo ye, na sunsum ɛtane ne fi ɔ nwo zo.+
Ɔbodwɛkɛ
^ Anzɛɛ “nzuzulɛ ɛtane.” Nyamenle maanle Sɔɔlo mumua ne adwenle gyegyele ye.
