Dwɔn Edwɛkpa 19:1-42
19 Akee Paelɛte maanle bɛbilale Gyisɛse empele.+
2 Na sogyama ne nwonle mbowule abotile kpolole ɔ ti na bɛvale tɛladeɛ tendenle kɔkɔlɛ nee buluwu afonla bie bɛwulale ye,+
3 na bɛrale ɔ nwo ɛkɛ ne na bɛzele ye kɛ: “Anzodwolɛ* ɛha wɔ, Dwuuma Belemgbunli!” Eza bɛbobɔle ɔ nzo nu.+
4 Paelɛte vindele alienwo bieko na ɔzele bɛ kɛ: “Bɛnlea! Mefa ye meara amaa bɛanwu kɛ meannwu nvonleɛ biala wɔ ɔ nwo.”+
5 Yemɔti Gyisɛse vindele rale na ɛnee ɔbɔ mbowule abotile ne yɛɛ ɔwula tɛladeɛ tendenle kɔkɔlɛ nee buluwu afonla ne. Na Paelɛte zele bɛ kɛ: “Bɛnlea! Nrenyia ne ɛne!”
6 Noko, mɔɔ ɛsɔfo mgbanyinli nee sinzavolɛma ne mɔ nwunle ye la, bɛdeɛdeanle nu kɛ: “Bɔ ye baka nu! Bɔ ye baka nu!”*+ Paelɛte zele bɛ kɛ: “Bɛdabɛ mumua ne bɛva ye bɛhɔhu ye,* ɔluakɛ mennwu nvonleɛ biala wɔ ɔ nwo.”+
7 Dwuuma ne buale ye kɛ: “Yɛlɛ mɛla, na mɛla ne kile kɛ ɔwɔ kɛ ɔwu,+ ɔluakɛ ɔvɛlɛle ɔ nwo Nyamenle ara.”+
8 Mɔɔ Paelɛte dele mɔɔ bɛlɛka la, akee ɛzulolɛ kpole hanle ye,
9 na ɔhɔwolole amɛnlado sua nu ɛkɛ ne bieko na ɔbizale Gyisɛse kɛ: “Ɛvi ni?” Noko Gyisɛse ambua ye.+
10 Ɔti Paelɛte zele ye kɛ: “Ɛnrɛdɛne me zo ɔ? Ɛnze kɛ melɛ tumi mekola megyakyi wɔ yɛɛ melɛ tumi meku wɔ ɔ?”*
11 Gyisɛse buale ye kɛ: “Saa bɛanva bɛanvi anwuma bɛammaa wɔ a, anrɛɛ ɛnlɛ me nwo zo tumi biala. Ɛhye ati a sonla mɔɔ yele me maanle wɔ la ɛtane le kpole la.”
12 Ɛhye ati Paelɛte bɔle mɔdenle kɛ ɔkpondɛ adenle yealua zo yeagyakyi ye, noko Dwuuma ne deɛdeanle nu kɛ: “Saa ɛgyakyi nrenyia ɛhye a ɛnee tɛ ɛ gɔnwo a le Siza. Awie biala mɔɔ kɛha kɛ ɔle belemgbunli la tendɛ* tia Siza.”+
13 Mɔɔ Paelɛte dele ɛhye la, ɔvale Gyisɛse ɔvindele, na ɔdɛnlanle ndɛnebualɛ ebia ne anu wɔ ɛleka bie mɔɔ bɛfɛlɛ ye Bolɛ Bama, na Hibulu nu bɛfɛlɛ ye Gabata la.
14 Ɛnee ɔle Akpabɛnwo ne Anwoziezielɛ kenle;+ ɛnee bɛbɔ kɛyɛ ewiazo bulu nee nwiɔ.* Na ɔzele Dwuuma ne kɛ: “Bɛnlea! Bɛ belemgbunli ne ɛne!”
15 Noko bɛdeɛdeanle nu kɛ: “Ku ye! Ku ye! Bɔ ye baka nu!”* Paelɛte zele bɛ kɛ: “Mengu bɛ belemgbunli ne ɔ?” Ɛsɔfo mgbanyinli ne mɔ buale kɛ: “Yɛnlɛ belemgbunli biala kɛ Siza.”
16 Akee ɔvale ye ɔmaanle bɛ kɛ bɛhɔbɔ ye baka nu.+
Yemɔti bɛ nee Gyisɛse hɔle.
17 Ɔdaye mumua ne ɔzoale amaneɛnwunlɛ baka* ne ɔhɔle ɛleka bie mɔɔ bɛfɛlɛ ye Etile Kanrɛlɛ,+ na bɛfɛlɛ ye Hibulu nu Gɔlogota la.+
18 Bɛbɔle ye nee menli nwiɔ baka nu wɔ ɛkɛ,+ ko wɔ ye fema zo, yɛɛ ko wɔ ye bɛne zo, yɛɛ Gyisɛse wɔ avinli.+
19 Paelɛte hɛlɛle edwɛkɛ bie noko bɔle amaneɛnwunlɛ baka* ne anwo. Ɔhɛlɛle kɛ: “Gyisɛse mɔɔ vi Nazalɛte, Dwuuma Belemgbunli ne.”+
20 Dwuuma dɔɔnwo gengale edwɛkɛ ɛhye ɔluakɛ ɛleka mɔɔ bɛbɔle Gyisɛse baka nu la bikye sua zo, na bɛhɛlɛle ye wɔ Hibulu, Latɛn yɛɛ Giliki aneɛ nu.
21 Noko, Dwuuma ɛsɔfo mgbanyinli ne mɔ zele Paelɛte kɛ: “Mmakɛlɛ kɛ, ‘Dwuuma Belemgbunli,’ emomu kɛlɛ kɛ ɔhanle kɛ, ‘Mele Dwuuma Belemgbunli.’”
22 Paelɛte buale kɛ: “Mɔɔ mehɛlɛ la a mehɛlɛ a.”
23 Mekɛ mɔɔ sogyama ne bɔle Gyisɛse baka nu la, bɛvale ye tɛladeɛ aguzo ne na bɛhyɛle nuhua nna, sogyanli biala ɛdeɛ ko, eza bɛvale ye tɛladeɛ ne mɔɔ vea ɔ bo la. Noko ɛnee tɛladeɛ ne mɔɔ vea ɔ bo la doa nuhua ko, bɛnwonle ye ɔvi anwuma badwu aze.
24 Yemɔti bɛhanle bɛhilele bɛ nwo ngoko kɛ: “Bɛmmamaa yɛtete nu, bɛmaa yɛgua nwolɛ ma* na yɛnlea mɔɔ ɔbayɛ ye ɛdeɛ la.”+ Ɛhye zile amaa ngɛlɛlera ne ara nu kɛ: “Bɛhyɛle me tɛladeɛ aguzo ne, na me tɛladeɛ ne mɔɔ vea ɔ bo la, bɛguale nwolɛ ma.”*+ Yemɔti sogyama ne yɛle ninyɛne ɛhye mɔ amgba.
25 Ɛnee Gyisɛse mame+ nee ɔ diema ne yɛɛ Mɛle mɔɔ le Kulopase aye ne nee Mɛle Magedalene+ gyi ye amaneɛnwunlɛ baka* ne anwo.
26 Yemɔti mɔɔ Gyisɛse nwunle ye mame yɛɛ ɛdoavolɛ ne mɔɔ ɔkulo ye edwɛkɛ+ kɛ bɛgyi ɛkɛ ne la, ɔzele ye mame kɛ: “Ɔmɔ, nea! Ɛ ra nrenyia ɛne!”
27 Akee ɔzele ɛdoavolɛ ne kɛ: “Nea! Wɔ mame ɛne!” Na ɔvi mekɛ zɔhane, ɛdoavolɛ ne vale ye hɔle ɔdaye mumua ne ye sua nu.
28 Ɛhye anzi, Gyisɛse nwunle kɛ yeyɛ debie biala yewie, na amaa ngɛlɛlera ne ara nu la, ɔhanle kɛ: “Nzuhɔne ɛlɛku me.”+
29 Ɛnee buakɛ bie gyi ɛkɛ mɔɔ nwanye mɔɔ nyinyia la wɔ nu, yemɔti bɛvale emiane bɛbɔle nu na bɛvale bɛzianle baka* ti na bɛvale bɛhanle ɔ nloa.+
30 Mɔɔ Gyisɛse liele nwanye ne mɔɔ nyinyia la, ɔhanle kɛ: “Yewie!”+ akee ɔzile ɔ ti aze na ɔwule.+
31 Kɛmɔ ɛnee ɔle Anwoziezielɛ kenle,+ na ɔnle kɛ avunli ne mɔ kendɛhenda amaneɛnwunlɛ mbaka ne mɔ azo+ wɔ Ɛnwomenlelielɛ kenle ne (ɔluakɛ zɔhane Ɛnwomenlelielɛ kenle ne le kenle kpole)+ la ati, Dwuuma ne zɛlɛle Paelɛte kɛ ɔmaa bɛbubu bɛ gyakɛ na bɛye avunli ne mɔ bɛvi ɛkɛ.
32 Ɔti sogyama ne rale na bɛbubule menli nwiɔ ne mɔɔ bɛbɔle bɛ nee ye baka nu la ko biala agyakɛ.
33 Noko mɔɔ bɛdwule Gyisɛse anwo ɛkɛ la, bɛnwunle kɛ yewu dɛbadɛba yemɔti bɛambubu ɔ gyakɛ.
34 Na sogyama ne mɔ ko vale atwɛ wɔle ɔ nvenle foa ko+ na ɛkɛ ne ala mogya nee nzule* hwinle guale.
35 Na ahenle mɔɔ nwunle ye la a ɛlɛdi daselɛ ɛhye a, na ye daselɛ ne le nɔhalɛ yɛɛ ɔze kɛ mɔɔ yeha la le nɔhalɛ, amaa bɛdabɛ noko bɛalie bɛali.+
36 Nɔhalɛ nu, ɛhye mɔ zile amaa ngɛlɛlera ne ara nu kɛ: “Bɛnrɛbu ye bowule ko bɔbɔ.”+
37 Ngɛlɛlera gyɛne noko ka kɛ: “Bɛbanlea ahenle mɔɔ bɛvale debie bɛwɔle ye la.”+
38 Ɛhye anzi, Dwosefi mɔɔ vi Arelematia mɔɔ ɛnee le Gyisɛse ɛdoavolɛ noko Dwuuma anwo ɛzulolɛ ti yeanye ɔ nyunlu la+ zɛlɛle Paelɛte kɛ ɔmaa ɔva Gyisɛse funli ne ɔhɔ, na Paelɛte maanle ye adenle. Ɔti ɔravale funli ne ɔhɔle.+
39 Nekɔdimɛse,+ nrenyia ne mɔɔ kenle ko nɔɔzo bie hɔle ye ɛkɛ la, noko vale alufuanlɛ nee nyile evuanlɛ ngakyile mɔɔ kɛyɛ pɔne* ɛya ko la rale.+
40 Yemɔti bɛyele Gyisɛse funli ne na bɛvale lenen mɔɔ nyile evuanlɛ wɔ nu la bɛkyekyele ye,+ kɛ mɔɔ Dwuuma yɛ bɛ funli la.
41 Ɛnee tola bie wɔ ɛleka mɔɔ bɛhunle ye la,* na ɛnee nla* fofolɛ mɔɔ bɛtɛtole sonla biala wɔ nu ɛlɛ la wɔ tola ne anu.+
42 Kɛmɔ ɛnee ɔle Dwuuma Anwoziezielɛ kenle+ na nla ne bikye ɛkɛ ne la ati, bɛdole Gyisɛse wɔ nu.
Ɔbodwɛkɛ
^ Anzɛɛ “Ayɛlɛyelɛ.”
^ Anzɛɛ “Ku ye wɔ baka zo! Ku ye wɔ baka zo!”
^ Anzɛɛ “bɛhɔhu ye wɔ baka zo.”
^ Anzɛɛ “meku wɔ wɔ baka zo ɔ?”
^ Anzɛɛ “dwazo.”
^ Giliki aneɛ nu, kɛyɛ dɔnehwele nsia ne azo.
^ Anzɛɛ “Ku ye wɔ baka zo!”
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Giliki aneɛ nu, “nyinlanyinla.” Nea Edwɛkɛbohilelɛ.
^ Anzɛɛ “mogyanzule.”
^ Anzɛɛ “bɛhunle ye wɔ baka zo la.”
^ Anzɛɛ “ngakyelɛ nla.”
