Ɛzoanvolɛma Gyima 4:1-37
4 Mɔɔ bɛ mu nwiɔ bɛlɛtendɛ bɛahile menli ne la, ɛsɔfo ne mɔ, ɛzonlenlɛsua ne azo neavolɛ ne, nee Sadusiima+ ne rale bɛ nwo zo.
2 Menli ɛhye mɔ vale ɛya ɔluakɛ ɛnee ɛzoanvolɛma ne ɛlɛkilehile menli ne na bɛlɛka Gyisɛse mɔɔ bɛdwazo ye bɛvi mowuamra anu la anwo edwɛkɛ wienyi.*+
3 Ɔti bɛhyele bɛ na bɛhɔguale bɛ efiade+ bɛmaanle aleɛ hyenle, ɔluakɛ ɛnee aleɛ ɛdwo.
4 Noko, bɛdabɛ mɔɔ bɛdiele edwɛkɛ ne la anu dɔɔnwo liele lile, na mrenyia ne mɔ dodo rayɛle kɛyɛ 5,000.+
5 Aleɛ hyenle la, bɛ tumivolɛma ne, mgbanyima ne mɔ yɛɛ mɛla kilehilevolɛma* ne yiale nu wɔ Gyɛlusalɛm,
6 ɛnee ɛsɔfo kpanyinli Anase,+ Keeyafase,+ Dwɔn, Alɛzanda nee ɛsɔfo kpanyinli ne anwo amra kɔsɔɔti boka nwo.
7 Bɛmaanle Pita nee Dwɔn ragyinlanle bɛ avinli na bɛbizale bɛ kɛ: “Tumi boni anzɛɛ nwane duma nu a bɛluale bɛyɛle ɛhye a?”
8 Na Pita mɔɔ ɛnee sunsum nwuanzanwuanza ne ɛyi ye tɛkɛɛ+ la zele bɛ kɛ:
“Yizilayɛ tumivolɛma nee bɛ mgbanyima,
9 saa ɛnɛ bɛlɛbizebiza yɛ debie kpalɛ mɔɔ yɛyɛ yɛmaa nrenyia abubura ye la anwo edwɛkɛ,+ na bɛkulo kɛ bɛnwu ahenle mɔɔ maanle nrenyia ɛhye dele kpɔkɛ la a,
10 ɛnee bɛ nee Yizilayɛma kɔsɔɔti ɛnwu ye kɛ ɔlua Gyisɛse Kelaese mɔɔ vi Nazalɛte+ mɔɔ bɛhunle ye wɔ baka zo+ na Nyamenle ɛdwazo ye ɛvi mowuamra anu+ la duma nu a nrenyia ɛhye ɛde kpɔkɛ na ɔgyi bɛ nyunlu ɛke a.
11 Ɛhye a le ‘bolɛ ne mɔɔ bɛmɛ suasivoma bɛbule ye kɛ nwolɛ ɛngyia noko yerayɛ mgbɛnezo bolɛ mɔɔ anwo hyia kpalɛ la.’*+
12 Bieko, ngoanelielɛ ɛnle awie gyɛne biala anu, ɔluakɛ duma gyɛne+ biala ɛnle aleɛabo mɔɔ bɛva bɛmaa menli mɔɔ yɛbalua zo yɛanyia ngoane a.”+
13 Mekɛ mɔɔ bɛnwunle akɛnrasesebɛ* mɔɔ Pita nee Dwɔn vale dendɛle, na bɛnwunle kɛ bɛnze nwoma* yɛɛ bɛnlɛ dibilɛ la,+ ɔzinle bɛ nwo. Na akee bɛnwunle kɛ ɛnee bɛ nee Gyisɛse a lua a.+
14 Mɔɔ bɛnwunle kɛ nrenyia ne mɔɔ bɛyɛ ye ayile la gyi bɛ nwo ɛkɛ ne la,+ bɛangola bɛanga nwolɛ edwɛkɛ biala.+
15 Ɔti bɛmaanle bɛvile Sanhedelin asalo ɛkɛ ne bɛvindele na bɛbɔle ɔ bo bɛzuzule mɔɔ bɛbayɛ la anwo,
16 bɛhanle kɛ: “Kɛzi ɔwɔ kɛ yɛyɛ menli ɛhye mɔ ɛ?+ Ɔluakɛ, nɔhalɛ nu, bɛyɛ nwanwane debie mɔɔ Gyɛlusalɛmma kɔsɔɔti ɛnwu ye a,+ yɛɛ yɛngola yɛnga kɛ ɔnle zɔ.
17 Amaa ɛhye angɔ zo andɛlɛ menli ne anu la, bɛmaa yɛnwunlonwunla bɛ na yɛha yɛhile bɛ kɛ bɛmmadua duma ɛhye azo bɛtendɛ bɛkile awie biala bieko.”+
18 Yemɔti bɛvɛlɛle bɛ na bɛduale bɛ kɛ bɛmmadua Gyisɛse duma nu bɛka edwɛkɛ biala anzɛɛ bɛkilehile.
19 Noko Pita nee Dwɔn buale bɛ kɛ: “Saa ɔle kpalɛ wɔ Nyamenle anyunlu kɛ yɛkɛdie bɛ na tɛ Nyamenle a, ɛnee bɛdabɛ bɛbua.
20 Na yɛmɛ, yɛnrɛhola yɛnrɛgyakyi ninyɛne mɔɔ yɛnwu ye nee mɔɔ yɛde la anwo edwɛkɛ ɛhanlɛ.”+
21 Yemɔti mɔɔ bɛnwunlonwunlanle bɛ bieko la, bɛgyakyile bɛ ɔluakɛ bɛannyia debie biala mɔɔ bɛgyinla zo bɛahwe bɛ nzo a, yɛɛ eza ɔlua menli ne ati,+ ɔluakɛ ɛnee bɛ muala bɛlɛwula Nyamenle anyunlunyia wɔ mɔɔ ɛzi la anwo.
22 Ɔluakɛ ɛnee nrenyia ne mɔɔ bɛyɛle ye ayile wɔ nwanwane* adenle zo la ɛbo ɛvolɛ 40.
23 Mekɛ mɔɔ bɛgyakyile bɛ la, bɛhɔle bɛ gɔnwo mɔ anwo ɛkɛ na bɛhanle mɔɔ ɛsɔfo mgbanyinli nee mgbanyima ne mɔ ɛha ɛhile bɛ la bɛhilele bɛ.
24 Mɔɔ bɛdele ɛhye la, bɛmaanle bɛ ne zo na bɛbɔle nu bɛzɛlɛle Nyamenle kɛ:
“Tumivolɛ Awulae, wɔmɔ a ɛbɔle anwuma nee aze* nee nyevile nee mɔɔ wɔ nu la amuala a,+
25 na ɛluale sunsum nwuanzanwuanza ne azo ɛmaanle yɛ nenyia Devidi+ mɔɔ le wɔ sonvolɛ la hanle kɛ: ‘Duzu ati a maanle maanle ne mɔ yɛ basabasa na menli dwenledwenle ninyɛne mgbane nwo ɛ?
26 Azɛlɛ ye azo arelemgbunli dwazole gyinlanle yɛɛ tumivolɛma bɔle nu yɛle ko na bɛdwazole bɛtiale Gyihova* nee ahenle mɔɔ yekpokpa ye la.’*+
27 Nɔhalɛ nu, Hɛlɔdo nee Pɔnteɛse Paelɛte+ yɛɛ maanle maanle ne anu amra nee Yizilayɛma rayiale nu wɔ suakpole ɛhye azo na bɛdwazole bɛtiale wɔ sonvolɛ nwuanzanwuanza Gyisɛse mɔɔ ɛkpokpale ye la,+
28 bɛyiale nu bɛyɛle mɔɔ ɛhanle ɛdole ɛkɛ ne la. Ɛhye mɔ zile ɔluakɛ ɛlɛ tumi yɛɛ ɔ nee wɔ ɛhulolɛdeɛ* le ko.+
29 Yemɔti Gyihova,* nea bɛ ɛnwunlonwunlanlɛ ne na maa wɔ ngɛkɛlɛ ɛhɔ zo ɛva akɛnrazilɛ ɛha wɔ edwɛkɛ ne,
30 na kile wɔ tumi wɔ ayileyɛlɛ nu na maa sɛkɛlɛneɛ nee nwanwane ninyɛne+ ɛlua wɔ sonvolɛ nwuanzanwuanza Gyisɛse duma nu ɛrɛla.”+
31 Na mɔɔ bɛyɛle nzɛlɛlɛ* ɛsesebɛ la, ɛleka mɔɔ bɛyiale la kpusule, na sunsum nwuanzanwuanza ne yile bɛ muala tetɛkɛɛ+ na bɛvale akɛnrazilɛ bɛhanle Nyamenle edwɛkɛ ne.+
32 Bieko, menli dɔɔnwo ne mɔɔ liele lile la nyianle ahonle nee adwenle* ko, na bɛ nuhua ko bɔbɔ anga kɛ ninyɛne mɔɔ ɔlɛ la le ɔ ngome ye ɛdeɛ, emomu bɛhyɛle debie biala mɔɔ bɛlɛ la.+
33 Na ɛzoanvolɛma ne vale tumi kpole hɔle zo lile Awulae Gyisɛse ewudwazo ne anwo daselɛ,+ na bɛlole bɛ kɔsɔɔti kpole kpalɛ.
34 Nɔhalɛ nu, bɛ nuhua biala angyia debie,+ ɔluakɛ bɛdabɛ mɔɔ bɛlɛ azɛlɛ anzɛɛ azua la dɔnenle bɛ na bɛvale mɔɔ bɛnyianle la bɛrale,
35 na bɛvale bɛraguale ɛzoanvolɛma ne agyakɛ abo.+ Na bɛdabɛ noko bɛhyɛle bɛmaanle awie biala nyianle bie kɛ mɔɔ ye ngyianlɛ ne de la.+
36 Ɔti Dwosefi mɔɔ eza ɛzoanvolɛma ne donle ye Baanabase+ (ɔ bo kile, “Arɛlekyekyelɛ Ralɛ”), Livaenli bie mɔɔ vi Saepelɛse la,
37 ɛnee lɛ azɛlɛ, ɔdɔnenle ye na ɔvale ezukoa ne ɔrɛlɛle ɛzoanvolɛma ne.+
Ɔbodwɛkɛ
^ Anzɛɛ “Gyisɛse ewudwazo ɛdeɛ ne.”
^ Mɔlebɛbo ne, ɛnee ɛhye le Ngɛlɛlera ne anwo kɛlɛhɛlɛvolɛ, noko wɔ Gyisɛse mekɛ zo, ɛnee ɔle awie mɔɔ ze Mɛla ne kpalɛ na ɔkilehile la.
^ Bɛfa bolɛ ɛhye bɛto bane nwiɔ ayia zo bɛmaa ɔgyinla kpundii.
^ Anzɛɛ “akɛnrazilɛ.”
^ Ɔkile kɛ, bɛangɔ relabaema sukulu ne mɔ bie; tɛ kɛ bɛnze kenga anzɛɛ kɛlɛ.
^ Anzɛɛ “sɛkɛlɛneɛ.”
^ Anzɛɛ “azɛlɛ.”
^ Anzɛɛ “ye Kelaese ne.”
^ Giliki aneɛ nu, “wɔ kpɔkɛbɔlɛ.”
^ Anzɛɛ “asɔne.”
^ Giliki aneɛ nu, “ɛkɛla.” Nea Edwɛkɛbohilelɛ.
