Pita Mɔɔ Limoa 2:1-25
2 Yemɔti, bɛhwe bɛ nwo bɛvi ɛtane biala+ nee mɛlɛbɛla nee nabalaba nee anyebolo nee awie mɔ anwo edwɛkɛ ɛtane ɛhehanlɛ nwo.
2 Bɛyɛ bɛ nwo kɛ mbɔdɔma la,+ bɛnyia ɛhulolɛ bɛmaa edwɛkɛ ne anu nyɛfonzule ne mɔɔ bɛtɛfonlanle nu la, amaa bɛalua zo bɛanyi bɛahɔ ngoanelielɛ nu,+
3 wɔ mekɛ mɔɔ bɛzɔ bɛnlea* kɛ Awulae le atiakunlukɛnlɛma la.
4 Na bɛrɛla ye ɛkɛ ne kɛ tease bolɛ mɔɔ menli ɛkpo ye+ noko Nyamenle ɛkpa nu ɛye ye na ɔsonle bolɛ ɔmaa ye,+
5 bɛdabɛ noko bɛle tease awolɛ mɔɔ bɛlɛfa bɛ bɛazi sunsum nu sua+ bɛamaa bɛayɛ ɛsɔfoma nwuanzanwuanza, amaa bɛalua Gyisɛse Kelaese anwo zo bɛabɔ sunsum nu afɔle+ mɔɔ sɔ Nyamenle anye la.+
6 Na Ngɛlɛlera ne ka kɛ: “Nea! Melɛfa bolɛ mɔɔ mekpa nu meye la meado Zayɔn, adiabo mgbɛnezo bolɛ mɔɔ anwo hyia, na awie biala mɔɔ kɛnyia diedi wɔ nu la bɛnrɛye ɔ rɛle bɛnrɛdo ɔ sa nu.”*+
7 Yemɔti, bɛmɛ a ɔsonle bolɛ ɔmaa bɛ a, ɔluakɛ bɛle diedima; na bɛdabɛ mɔɔ bɛnlie bɛnli la ɛdeɛ, “bolɛ ne mɔɔ suasivoma ne kpole la,+ yemɔ ala a ɛrayɛ mgbɛnezo bolɛ mɔɔ anwo hyia kpalɛ a”+
8 yɛɛ “azedolɛ bolɛ nee ɛtaneyɛlɛ bodane.”+ Bɛlɛtu bɛagua ɔluakɛ bɛandie edwɛkɛ ne. Ɛhye ala ati noko a bɛkpale bɛ a.
9 Noko bɛmɛ bɛle “abusua mɔɔ bɛkpa nu bɛye bɛ, alehelɛ ɛsɔfoma, maanle nwuanzanwuanza,+ menli mɔɔ bɛva bɛ bɛyɛ agyapadeɛ titili,+ kɛ bɛha” Ahenle mɔɔ vɛlɛle bɛ vile awozinli nu rale ye wienyi ne mɔɔ yɛ nwanwane anu la+ “nyɛleɛ kpalɛ* ne bɛhile.”+
10 Mekɛ bie ɛnee bɛnle Nyamenle menli, noko kɛkala bɛyɛ ye menli;+ mekɛ bie ɛnee bɛnze bɛ anwunvɔne, noko kɛkala bɛze bɛ anwunvɔne.+
11 Alɔvolɛ, metu bɛ folɛ kɛ nyɛvolɛ nee adendulɛma+ kɛ bɛhɔ zo bɛhwe bɛ nwo bɛvi nwonane nu atiakunluwɔzo+ mɔɔ ko tia bɛ* la anwo.+
12 Bɛbɔ ɛbɛla kpalɛ wɔ maanle maanle ne anu,+ amaa saa bɛto bɛ ɛzonle kɛ bɛyɛ ninyɛndane a, bɛalua bɛ gyima kpalɛ ne+ mɔɔ bɛdabɛ mumua ne bɛdi nwolɛ daselɛ la azo bɛawula Nyamenle anyunlunyia wɔ kenle mɔɔ ɔbaranlea kɛzi ninyɛne de la.
13 Awulae ati, bɛbɛlɛ bɛ nwo aze bɛmaa menli ngyehyɛleɛ biala,+ saa belemgbunli+ mɔɔ lɛ tumi o,
14 anzɛɛ amɛnladoma mɔɔ yezoa bɛ kɛ bɛhɔhwe ɛtanevolɛma anzo na bɛye bɛdabɛ mɔɔ bɛdi boɛ la ayɛlɛ la o.+
15 Ɔluakɛ ɔle Nyamenle ɛhulolɛdeɛ kɛ bɛbayɛ kpalɛ na bɛamaa bɛdabɛ mɔɔ bɛnlɛ adwenle na bɛtendɛ mgbane mgbane la aha bɛ nloa ado nu.*+
16 Bɛyɛ bɛ nwo kɛ bɛle alehelɛ,+ noko bɛmmafa bɛ fanwodi ne bɛkedɛheda ɛtane zo,*+ emomu kɛ bɛle Nyamenle ngɛkɛlɛ.+
17 Bɛli menli kɔsɔɔti eni,+ bɛhulo mediema muala,*+ bɛzulo Nyamenle,+ bɛli belemgbunli ne eni.+
18 Bɛmaa sonvolɛma ɛbɛlɛ bɛ nwo aze ɛmaa bɛ menle mɔ wɔ ɛzulolɛ muala anu,+ tɛ bɛdabɛ mɔɔ bɛdi boɛ na bɛlɛ ndelebɛbo la angome, emomu bɛdabɛ mɔɔ bɛ edwɛkɛ yɛ se la noko.
19 Na saa awie di nyane* na ɔnwu amaneɛ mɔɔ ɛnfɛta la ɔluakɛ ɔkpondɛ kɛ ɔnyia adwenle* mɔɔ anu te la wɔ Nyamenle anyunlu la ati a, ɔsɔ ɛnyelɛ.+
20 Saa bɛyɛ ɛtane na bɛbo bɛ na bɛgyinla ɔ nloa a, nvasoɛ boni a wɔ zo a?+ Noko saa bɛlɛyɛ kpalɛ la ati bɛnwu amaneɛ na bɛgyinla ɔ nloa a, yemɔ a sɔ Nyamenle anye a.+
21 Nɔhalɛ nu, ɛhye ati a bɛvɛlɛle bɛ a, ɔluakɛ Kelaese bɔbɔ nwunle amaneɛ maanle bɛ,+ na ɔgyakyile neazo ɔmaanle bɛ kɛ bɛli ɔ gyakɛ anzi* kpalɛ.+
22 Yeanyɛ ɛtane biala+ yɛɛ bɛannwu mɛlɛbɛla wɔ ɔ nloa anu.+
23 Mɔɔ bɛbɔ ye aholoba la,+ yeambɔ bɛ bie.+ Mɔɔ ɔnwu amaneɛ la+ yeanwunlonwunla awie, emomu ɔvale ɔ nwo ɔdole Ahenle mɔɔ bua ndɛne pɛlepɛle la+ anwo zo.
24 Ɔdaye mumua ne ɔzoale yɛ ɛtane+ wɔ ye sonlabaka ne anu wɔ baka ne azo,+ amaa yɛagyakyi* ɛtane na yɛadɛnla aze yɛamaa tenleneyɛlɛ. Na “ye nganlɛ ne mɔ azo a bɛluale bɛyɛle bɛ ayile a.”+
25 Ɔluakɛ ɛnee bɛle kɛ mboane mɔɔ ɛminli la,+ noko kɛkala bɛzia bɛra mboaneneavolɛ ne+ nee bɛ ɛkɛla* sinzavolɛ* ne ɛkɛ.
Ɔbodwɛkɛ
^ Anzɛɛ “bɛnwu ye.”
^ Giliki aneɛ nu, “anyunlu ɛnrɛgua aze ɛlɛ.”
^ Ɛhye kile, ye subane kpalɛ mɔɔ fɛta nganvolɛ la.
^ Anzɛɛ “ɛkɛla ne.”
^ Giliki aneɛ nu, “agyakyi.”
^ Anzɛɛ “bɛye bɛ nloa wɔ ɛtane nwo.”
^ Giliki aneɛ nu, “mediemayɛlɛ ne.”
^ Anzɛɛ “alɔbɔlɛ.”
^ Anzɛɛ “tiboa.”
^ Giliki aneɛ nu, “ɔ gyakɛ abo zo ne anzi.”
^ Giliki aneɛ nu, “yɛawu yɛamaa.”
^ Anzɛɛ “bɛ ngoane.”
^ Giliki aneɛ nu, “neavolɛ.”
