Maake Edwɛkpa 15:1-47
15 Aleɛbahye ne ala, ɛsɔfo mgbanyinli nee mgbanyima yɛɛ mɛla kilehilevolɛma ne mɔ, nɔhalɛ nu, Sanhedelin ne amuala bɔle kpɔkɛ na bɛkyekyele Gyisɛse bɛvale ye bɛhɔmaanle Paelɛte.+
2 Yemɔti Paelɛte bizale ye kɛ: “Wɔmɔ a ɛle Dwuuma Belemgbunli ne la ɔ?”+ Ɔbuale ye kɛ: “Yemɔ a ɛdawɔ mumua ne wɔha la.”+
3 Noko ɛnee ɛsɔfo mgbanyinli ne mɔ ɛlɛbɔ ye somolɛ wɔ ninyɛne dɔɔnwo anwo.
4 Akee Paelɛte bɔle ɔ bo bizale ye bieko kɛ: “Ɛnlɛ mualɛ biala ɔ?+ Nea kɛzi bɛlɛka edwɛkɛ dɔɔnwo bɛagua ɛ nwo zo la.”+
5 Noko Gyisɛse ambua ye bieko, yemɔti ɔzinle Paelɛte anwo.+
6 Saa ɛvoyia biala dwu zo a, ɔta ɔye pilizanli ko mɔɔ bɛkɛbiza la ɔmaa bɛ.+
7 Mekɛ ne anu ɛnee nrenyia ne mɔɔ bɛfɛlɛ ye Balabase nee atuadelɛma bie mɔɔ bɛluale atuadelɛ zo bɛhunle menli la gua efiade.
8 Yemɔti menli dɔɔnwo ne vole hɔle ɛkɛ na bɛbɔle ɔ bo bɛzɛlɛle Paelɛte kɛ ɔyɛ mɔɔ ɔta ɔyɛ ɔmaa bɛ la.
9 Ɔbizale bɛ kɛ: “Bɛkulo kɛ meye Dwuuma Belemgbunli ne memaa bɛ ɔ?”+
10 Ɔluakɛ ɛnee Paelɛte ze kɛ ɛkpɔlɛ ti a ɛsɔfo mgbanyinli ne mɔ ɛva ye ɛrɛlɛ ye a.+
11 Noko ɛsɔfo mgbanyinli ne mɔ lile wulale menli ne kɛ bɛmaa ɔye Balabase emomu ɔmaa bɛ.+
12 Paelɛte buale bɛ bieko na ɔzele bɛ kɛ: “Ɛnee kɛ menyɛ ahenle mɔɔ bɛfɛlɛ ye Dwuuma Belemgbunli ne la ɛ?”+
13 Bɛdeɛdeanle nu bieko kɛ: “Bɔ ye baka nu!”*+
14 Na Paelɛte doale zo zele bɛ kɛ: “Kɛmɔti ɛ? Ɛtane boni a yeyɛ a?” Noko bɛdeɛdeanle nu kpole kɛ: “Bɔ ye baka nu!”*+
15 Na kɛmɔ Paelɛte kulo kɛ ɔsɔ menli ne anye la ati, ɔyele Balabase ɔmaanle bɛ; ɔmaanle bɛbole Gyisɛse,+ na ɔvale ye ɔmaanle bɛ kɛ bɛhɔbɔ ye baka nu.+
16 Akee sogyama ne vale ye hɔle alienwo ɛkɛ, wɔ amɛnlado ne sua nu, na bɛvɛlɛle sogyama ne amuala bɛmaanle bɛrayiale.+
17 Na bɛvale tɛladeɛ kɔkɔlɛ nee buluwu afonla bɛwulale ye na bɛnwonle mbowule abotile bɛzoale ye;
18 na bɛbɔle ɔ bo bɛgolole ɔ nwo kɛ: “Anzodwolɛ* ɛha wɔ, Dwuuma Belemgbunli!”+
19 Eza bɛvale ndɔ baka bɛbɔle ɔ ti zo na bɛdole nyɛlɛ bɛguale ɔ nwo, na bɛhotole bɛbɔle bɛ ti aze bɛmaanle ye.
20 Mɔɔ bɛgolole ɔ nwo bɛwiele la, bɛkpolole tɛladeɛ kɔkɔlɛ nee buluwu afonla ne na bɛvale ye tɛladeɛ aguzo ne bɛwulale ye. Na bɛ nee ye hɔle kɛ bɛkabɔ ye baka nu.+
21 Eza bɛhyele awie bie mɔɔ ɛlɛpɛ nu, Saemɔn mɔɔ vi Saelini, Alɛzanda nee Wulufɛse papa, mɔɔ vi namule nu ɛlɛba sua zo la bɛmaanle ɔzoale ye amaneɛnwunlɛ baka ne.*+
22 Yemɔti bɛvale ye bɛrale ɛleka bie mɔɔ bɛfɛlɛ ye Gɔlogota, mɔɔ kile, “Etile Kanrɛlɛ Ɛleka” la.+
23 Wɔ ɛkɛ ne, bɛbɔle mɔdenle kɛ bɛmaa ye nwanye mɔɔ bɛva alufuanlɛ bɛkpoto nu la bɛamaa yeanlo,+ noko yeanno.
24 Na bɛbɔle ye baka nu na bɛguale ma* bɛvale bɛhyɛle ye tɛladeɛ aguzo ne bɛnwunle mɔɔ ɔwɔ kɛ awie biala fa la.+
25 Ɛnee ɔle kɛyɛ nwonlomɔ dɔne ngɔnla,* na bɛbɔle ye baka nu.
26 Na bɛhɛlɛle ɛzonle mɔɔ bɛdonle ye la kɛ: “Dwuuma Belemgbunli Ne.”+
27 Bieko, bɛbɔle nwule nwiɔ bie mbaka nu bɛbokale ɔ nwo, ko wɔ ye fema zo yɛɛ ko wɔ ye bɛne zo.+
28 *——
29 Na bɛdabɛ mɔɔ bɛpɛle nuhua ɛkɛ ne la wosole bɛ ti+ dendɛle tiale ye na bɛhanle kɛ: “O! Wɔmɔ mɔɔ ɛbabubu ɛzonlenlɛsua ne na wɔava kenle nsa wɔazi la,+
30 ɛvi amaneɛnwunlɛ baka ne* azo dwu aze na die ɛ nwo.”
31 Zɔhane ala a ɛsɔfo mgbanyinli nee mɛla kilehilevolɛma ne mɔ golole ɔ nwo hanle kɛ: “Ɔliele awie mɔ; noko ɔngola ɔnlie ɔ nwo!+
32 Bɛmaa Kelaese, Yizilayɛ Belemgbunli ne ɛvi amaneɛnwunlɛ baka ne* azo ɛdwu aze kɛkala, amaa yɛanwu ye na yɛalie yeali.”+ Na bɛdabɛ mɔɔ bɛbɔle bɛ mbaka nu bɛbokale ɔ nwo la noko yɛle ye aholoba.+
33 Ɔdwule kɛyɛ ewiazo bulu nee nwiɔ* la, awozinli hedale azɛlɛ ne kɔsɔɔti azo too dɔne nsa.*+
34 Bɛbɔle dɔne nsa la, Gyisɛse vale ɛnelɛ kpole deanle nu kɛ: “Eli, Eli, lama sabaketani?” mɔɔ kile kɛ: “Me Nyamenle, me Nyamenle, duzu ati a wɔkpo me a?”+
35 Na menli mɔɔ gyigyi ɛkɛ ne la bie mɔ dele la, bɛbɔle ɔ bo bɛhanle kɛ: “Nea! Ɔlɛfɛlɛ Yilaegya.”
36 Akee awie nriandile hɔvale emiane bɔle nza mɔɔ nyinyia la anu vale duale ndɔ baka ti maanle ye kɛ ɔnlo,+ na ɔhanle kɛ: “Bɛgyakyi ye! Bɛmaa yɛnlea saa Yilaegya kɛraye ye wɔ baka ne azo a.”
37 Na Gyisɛse deanle nu kpole na ɔwule.*+
38 Na ɛzonlenlɛsua ne anu mgbɛnudanlɛ ne+ anu dele sinli nwiɔ, ɔvi anwuma ɔrapenle aze.+
39 Akee mekɛ mɔɔ sogya kpanyinli ne mɔɔ gyi ɛkɛ ne na ɔ nye dua ye la nwunle kɛ yewu wɔ tɛnlabelɛ zɛhae anu la, ɔhanle kɛ: “Amgba, nrenyia ɛhye le Nyamenle Ara.”+
40 Ɛnee mraalɛ bie gyi moamoa ɛlɛnea mɔɔ ɛlɛkɔ zo la, bɛ nuhua bie mɔ a le Mɛle Magedalene nee Gyemise Ekyi ne nee Dwosɛse mame Mɛle yɛɛ Salome,+
41 mɔɔ ɛnee bɛ nee ye ta dua na bɛboa ye+ wɔ mekɛ mɔɔ ɔwɔ Galeli la, yɛɛ mraalɛ gyɛne dɔɔnwo mɔɔ nee ye vi Gyɛlusalɛm rale la.
42 Akee ɔdwule nɔsolɛ nu, na kɛmɔ ɛnee ɔle Anwoziezielɛ kenle mɔɔ aleɛ kye a ɔle Ɛnwomenlelielɛ kenle la ati,
43 Dwosefi mɔɔ vi Arelematia, Ayiama ne anu sonla mɔɔ bɛdi ye eni, mɔɔ ɔdaye noko ɔlɛkendɛ Nyamenle Belemgbunlililɛ ne la rale ɛkɛ. Ɔnyianle akɛnrasesebɛ ɔhɔle Paelɛte ɛkɛ ɔhɔzɛlɛle Gyisɛse funli ne.+
44 Noko ɛnee Paelɛte ɛngola ɛnnwu ye saa yewu dɛbadɛba a, na ɔvɛlɛle sogya kpanyinli ne ɔbizale ye ɔnleanle kɛ Gyisɛse ɛwu a.
45 Yemɔti mekɛ mɔɔ ɔdele ɔvile sogya kpanyinli ne ɛkɛ ne kɛ yewu la, ɔvale funli ne ɔmaanle Dwosefi.
46 Ɔdɔle lenen kpalɛ bie, ɔyele ye ɔvile baka ne azo na ɔvale lenen kpalɛ ne ɔkyekyele ye na ɔdole ye wɔ nla+ mɔɔ bɛpɛ ye wɔ bolɛ nu la anu; akee ɔhundole bolɛ kpole bie ɔnyinle nla* ne anloa.+
47 Noko Mɛle Magedalene nee Dwosɛse mame Mɛle hɔle zo nleanle ɛleka mɔɔ bɛva ye bɛdo la.+
Ɔbodwɛkɛ
^ Anzɛɛ “Ku ye wɔ baka zo.”
^ Anzɛɛ “Ku ye wɔ baka zo.”
^ Anzɛɛ “Ayɛlɛyelɛ.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Giliki aneɛ nu, dɔnehwele nsa ne azo.
^ Nea Edwɛkɛbohilelɛ.
^ Nea Edwɛkɛbohilelɛ.
^ Giliki aneɛ nu, dɔnehwele nsia ne azo.
^ Giliki aneɛ nu, dɔnehwele ngɔnla ne azo.
^ Anzɛɛ “na ɔgule ye ɛnwomenle mɔɔ li awieleɛ.”
^ Anzɛɛ “ngakyelɛ nla.”
