Aprɔfɛsi mɛ aba Masiya atindó na seni ka tɛ Yezo?
Gbinya ti ya Ngbangɔ
Ĩĩ. Na ngoi mɛndó Yezo ge lɛ sese ko, a prɔfɛsi mɛ ba “Masiya mɛ wa gbɔngɔ linɔ,” nga zo mɛ “Wa songɔ azi ti lɛ sese” atindó na seni ka tɛ lo. (Danyele 9:25; 1 Yoanɛ 4:14) Na pɛ kwá tɛ lo aprɔfɛsi mɛndɛ̃ mɛ aba Masiya atindó na seni ka tɛ lo.—Nzembo 110:1; Awa Pangɔ Kwa 2:34-36.
“Masiya” lengbi na nɛ?
Tɛnɛ ti Ebre mɛ Ma·shiʹach (Masiya) nga na tɛnɛ ti Grɛki mɛ Khri·stos (Kristo) ni zu sɛ ndo fa “Zo mɛ ahĩni lo na kpɔ̃.” Na lo ni la ila mɛ, “Yezo Kristo” ndo fa “Yezo zo mɛ ahĩni lo na kpɔ̃,” bere “Yezo Masiya.”
Na ngoi ti gã se du ya ahɛ̃ zo lo gbia ko, ando sandó kpɔ̃ bɛli lo. (Balevi 8:12; 1 Samwele 16:13) Nzapa ndó la hɛ̃ Yezo kumba ti ngbondoni, dungɔ Masiya. (Awa Pangɔ Kwa 2:36) Kpɔ̃ mɛndó Nzapa sa bɛ li Yezo ko, adundó kpɔ̃ ti nyingɔ ta dundó bɛta kpɔ̃ nvɛ̃ni ma.—Matie 3:16.
Aprɔfɛsi mɛ ba Masiya alengbindó ti tingɔ na seni ka tɛ azi gba?
Ipɔ. Nga ma se mɛ nzɔlɔkɔ ti liti zo, kɔi kɔi ndo ɔngbi na tɛ fɔ̃ lo ko, aprɔfɛsi ti ya Ngbangɔ ati bo ndo na seni ka tɛ Masiya kɔi bere Kristo. Kanda Ngbangɔ ko kɛkɛ lɛ e ya “awa hangɔ lo tɛ Nzapa na nvɛ̃nɛ aga gbanda, ko zo kɔi kɔi apa gbanda ya, ni Masiya, bere ni wa pangɔ nyɔ Nzapa. Ala li gbanda akota akukuna ye na aye ti kpɛnɛ ya, se alengbi ko, ani handa azi mɛ Nzapa asara la akpã ya, ala du azi tɛ ni.”—Matie 24:24.
Ta Masiya dɛ ga wɛ ma?
Ngbangɔ piandó pa ya Masiya na dungɔ zo ti ndasewa tɛ Davidi mɛ Gbia ti Izraɛlɛ. (Nzembo 89:3, 4) Kanda mbeti mɛndó dikɔ ndasewa tɛ akotara Ayuda tee ka ndo Davidi a gerendó, alengbindó ti dungɔ na bulu ti 70 N.E na ngoi mɛndó azi ti Roma agbɛ̃ na Yeruzalɛmɛ. a Bandangɔ na ngoi niko ndó ko, atindó pɛnɔ ya zo kɔi tɛnɛ ya ni du zo ti ndasewa tɛ Davidi. Kanda mbɛti niko ndó da na ngoi tɛ Yezo, ta awa kula tɛ lo dɛndó nga kitɛ ya lo du tara Davidi ma.—Matie 22:41-46.
Aprɔfɛsi ti ya Ngbangɔ mɛ ba Masiya kɛ̃?
Ta kɔdɛ ti nɛngɔ ya a hĩnga na seni bere aprɔfɛsi mɛ ba Masiya kɛ̃ da ma. Na ndakisa akɔdɛ ti dikɔngɔ aprɔfɛsi alengbi ti ɔngbingɔ abɛse na ya avɛrsɛ mɛ atɛnɛ tɛnɛ ni yangondo. Mbɛti ti Yisaya 53:2-7 atɛnɛ tɛnɛ ti aprɔfɛsi ndɛ̃ ndɛ̃ ndɛ̃ mɛ ba Masiya. Azi mɛndɛ̃ alengbi ti dingɔ ni bo mabere prɔfɛsi kɔi, kanda ambanga azi lengbi ti hũngɔ lo kɔi kɔi mɛ atɛnɛ tɛnɛ ni so ya vɛrsɛ ni ya adu prɔfɛsi.
Ambanga aprɔfɛsi mɛ ba Masiya mɛ atindó na seni ka tɛ Yezo
Prɔfɛsi |
Kaya |
Ati na seni |
|---|---|---|
Ale tɛ Abrahama |
Matie1:1 |
|
Tara Yisaka mɛ nyi Abrahama |
||
Adũ lo ka ndasewa ti Yuda |
||
Ka ndasewa tɛ Gbia Davidi |
||
Adũ lo ka ndasewa tɛ nyi wali mɛ dɛ li lo ngbɔ̃ |
||
Adũ lo ka Bɛtɛlɛmɛ |
||
Ando ili lo ya Emanuɛlɛ b |
||
Adundó lo ka ndasewa tɛ awa yɛlɛ |
||
Na pɛ dũngɔ lo, akpɔndó ayangambi gba |
||
A ili lo ya lo lo ka Ezipito lo si |
||
Na ilingɔ lo ya wa Nazarɛtɛ c |
||
Wa pangɔ kwa na gangɔ uzu tɛ lo |
||
Ahĩ ni lo na kpɔ̃ ya lo ti Masiya na bulu ti 29 N.E. d |
||
Nzapa ye ya lo du nyi l |
||
Lo ye da tɛ Nzapa ma ya ma |
||
Wa pangɔ nzɔ̃ pa |
||
Kwa ti pangɔ nzɔ̃ pa mɛndó lo li ka Galilea a hɛ̃ndó vuru ndo |
||
Wa lingɔ kpɛ̃nɛ nga ma Moizɛ |
||
Kwɛ kɔi na Moizɛ lo na kambisangɔ dangɔ bɛ tɛ Nzapa |
||
Lo sarandó azi gba mɛ na ngã |
||
Ta lo gbɔndó lɛ azi sa tɛrɛ lo ma |
||
Lo mandó vundu tɛ azi mɛ ndo hũ penɔ |
||
Lo fandó mbilimbili tɛ Nzapa |
||
Kota wa hɛ̃ngɔ wangɔ |
||
Lo fandó tɛnɛ mɛ ba ili Yehova |
||
Lo tɛnɛndó tɛnɛ na matɔ |
||
Wa gbɔ̃ngɔ li nɔ |
||
Ta azi gba yendó lo tɛ lo ma |
||
Tɛ́nɛ́ ti tangɔ li gɛrɛ |
||
Azi kɛ̃ndó lo |
||
Azi kɛ̃ndó lo sãnga sãnga |
||
Lo lindó ka Yeruzalɛmɛ mabere Gbia na ndo punda |
||
Ayangambi gonda lo |
||
Lo gandó na ili Yehova |
||
Kwa lo ti kpɔ̃ bɛ lo tɛkɛndó lo |
||
Atɛkɛndó lo na shekele ti palata 30 e |
Matie 26:14-16; 27:3-10, NWT |
|
Akwa lo kpɛlɛ lo zu |
||
Awa nvɛ̃nɛ kara lo tɛrɛ lo |
||
Lo dundó kpɔ gbɛlɛ azi mɛ kara lo tɛrɛ lo |
||
Akundó solo tɛrɛ lo |
||
Asɔ̃ndó lo ka lɛ lo |
||
Asɔ̃ndó lo na fimbo |
||
Ta lo lindó azi mɛ sɔ̃ lo na ye ma |
||
Agbia ti guvɛrnɛma kɛ̃ndó tɛrɛ lo |
||
Agɔngɔndó ti lo na gɛrɛ lo na sɛtɛ |
||
Atondó bɔngɔ tɛ lo na zege |
||
Akpãndó lo popo tɛ awa lingɔ siɔ kpale |
||
Ae lo, aguru lo |
||
Ahɛ̃ndó lo pɛnɔ na lo tɛ awa lingɔ siɔ kpale |
||
Alindó nga ma bɛ Nzapa li na lo |
||
Abombi samba mɛ kpe ná ngu a hɛ̃ lo ya lo nyɔ |
||
Lo mandó gwɛ̃ ngu uzu ti lo kpingɔ |
||
Lo ziandó yingɔ tɛ lo ka bɛti Nzapa |
||
Lo fa bɛ lo |
||
Lo tɔ̃ azi gba na ya siɔ kpale |
||
Ta bio tɛrɛ lo akondó ma |
||
Akpɔ lo |
||
A hɔndó lo ndoni kɔi na awa ye |
||
Lo sondó ka popo tɛrɛ akinda |
||
Zo mɛndɛ̃ amu panda wa tɛkɛngɔ lo |
||
Lo du na ndo kɔti ti Nzapa |
a McClintock nga na Strong’s Cyclopedia atɛnɛ ya: “Ta kitɛ da ma ya mbɛti mɛndó adikɔ ili akotara azi ti Yuda nga na ndasewa tɛ la ndó da uzu ti nɛngɔ ya agbɛ̃ Yeruzalɛmɛ.”
b Ila ti Ebre mɛ Emanuɛlɛ ndo fa ya “Nzapa ndoni kɔi na e,” Ni ndo fanga kumba ti dungɔ Masiya mɛ Yezo na ni. Ngoi mɛndó lo ge tise na kwa mɛndó lo li ndo fa ya Nzapa ndoni kɔi na awa vɔrɔngɔ lo.—Luka 2:27-32; 7:12-16.
c Alengbi ti fangɔ ya tɛnɛ mɛ “wa Nazarɛtɛ” adu tɛnɛ ti Ebre mɛ neʹtser, ndo fa “kɛkɛ mɛ dɛ yakɛrɛ.”
d Ti nɛngɔ ya mɔ hĩnga tɛnɛ mɛndɛ̃ mɛ Ngbangɔ tɛnɛ mɛ ba bulu ti 29 N.E. ya ni la du bulu mɛ Yezo ti na ni Masiya ko, ba tɛnɛ mɛ “Ndenge oyo esakweli ya Danyele eyebisi koya ya Masiya.”
e Prɔfɛsi niko kaya mbɛti ti Zekaria, kanda wa sungɔ mbɛti ti Matie tɛnɛndó ya “prɔfɛta Yirimia ndó la tɛnɛ tɛnɛ niko.” (Matie 27:9) Alengbi ti dungɔ ya akpãndó mbɛti ti Yirimia kaya eteni ti uzu ti Ngbangɔ mɛ ndo ili ni ya “aprɔfɛta.” (Luka 24:44) Alengbi ti dungɔ ya Matie salelandó “Yirimia” ti nɛngɔ ya lo tɛnɛ tɛnɛ ti eteni ti ambɛti niko zu mɛndó nga na mbɛti ti Zekaria kaya ni.
