ONTOPOLWA 15
Okwa popile oshigwana shaKalunga
1-3. (a) Omolwashike Ester tashi vulika a li a tila okuya komusamane gwe? (b) Omapulo geni tatu ka kundathana kombinga yaEster?
ESTER okwa kambadhala okungungumaneka omutima gwe sho a thiki pehale lyuuwa muSusa. Ihe kasha li oshipu oku shi ninga. Iinima ayihe ya pamba etungo lyuuwa oya li iitilithi notayi kumitha, okuza kiihongwathano yoontsezi dhi na omawawa, yaaumbi yomautati noonime dha takelwa momamanya gomalwaala ga yoolokathana taga adhima, oongudhi oonde dhomamanya niihongwathano iinenenene. Nokuli nopopepi noondundu dhaZagros, ndhoka hadhi kala dhi na olumi koondungu, mpoka lya tungilwa otapu tilitha. Olya li wo lya taalela omulonga Koaspes ngoka gu na omeya omayelele sheke. Ayihe mbyoka oya li ya nuninwa okudhimbulukitha omutalelipo kehe kombinga yoonkondo oonenenene dhomulumentu ngoka Ester ta yi kuye, ngoka i iyithana mwene “omukwaniilwa omunene.” Omulumentu nguka okwa li wo omusamane gwe.
2 Omusamane gwe? Ahasveros haye nando a tegelelwa a kale omusamane gwaEster. * Ahasveros ka li ha landula iiholelwa ngaashi shaAbraham, ngoka a li a taamba ko neifupipiko elombwelo lyaKalunga a pulakene komukulukadhi gwe, Sara. (Gen. 21:12) Omukwaniilwa nguka ka li nando e shi Kalunga kaEster, Jehova, nenge Ompango Ye. Ihe Ahasveros okwa li a tseya ompango yaPersia, ndjoka ya li yi indika oshinima shoka Ester a li e li pokuninga. Mbela okwa li e li pokuninga shike? Ompango yaPersia oya li tayi ti kutya kehe gumwe ngoka ta holoka koshipala shomukwaniilwa ini ithanwa ko okwa li e na okudhipagwa. Ester okwa li ta yi komukwaniilwa nonando ka li i ithanwa ko. Sho a li ta hedha popepi nehale lyomeni, moka a li ta vulu okumonika komukwaniilwa sho e li koshipangelapundi she, otashi vulika a li u uvite eso li li popepi. — Lesha Ester 4:11; 5:1.
3 Mbela omolwashike Ester a li a tula omwenyo gwe moshiponga sha tya ngaaka? Noshike tatu ilongo meitaalo lya kola lyomukiintu nguka? Tango natu tale kutya oshe ende ngiini Ester a ninge omunyekadhi muPersia.
Onakuziwa yaEster
4. Hokolola onakuziwa yaEster nonkene she ende opo a kale megumbo lyomumwayinagona Mordekai.
4 Ester okwa li othigwa. Katu shi oshindji kombinga yaavali ye mboka ya li ye mu luku Hadassa, edhina lyOshihebeli ndyoka tali ti “Omira,” oshimeno shoongala oombwanawa oontokele. Sho aavali ye ya si, omukwanezimo lye Mordekai okwe mu kutha po e ke mu putudhe. Mordekai okwa li omumwayinagona gwaEster, ihe okwa li omukuluntu kuEster kokule. Okwe mu eta megumbo lye e te mu putudha ongomwanakadhona. — Est. 2:5-7, 15.
Mordekai okwa li e na omatompelo omawanawa okunyanyukilwa Ester
5, 6. (a) Mordekai okwa li a putudha ngiini Ester? (b) Ester naMordekai oya li nonkalamwenyo ya tya ngiini muSusa?
5 Mordekai naEster oya kala muupongekwa moshilandopangelo shaPersia, moka tashi vulika ya li ye tondike omolwelongelokalunga lyawo nomolwOmpango ndjoka ya li haya kambadhala okulandula. Ester otashi vulika a kokeke ekwatathano lyopothingo nomumwayinagona sho te mu longo kombinga yaJehova, Kalunga omunahenda ngoka a kala ta hupitha oshigwana She muudhigu poompito odhindji monakuziwa nokwa li te ke shi ninga ishewe. (Lev. 26:44, 45) Osha yela kutya Ester naMordekai oya kala ye na ekwatathano lya kola.
6 Osha fa shi li ngeyi kutya, Mordekai okwa li ha longo iilonga yontumba kehale lyuuwa muSusa, a li ha kala aluhe a kuutumba pomweelo pamwe naapiya yomukwaniilwa ooyakwawo. (Est. 2:19, 21; 3:3) Ombiimbeli inayi popya sha kombinga yokuputuka kwaEster, ihe otatu vulu okudhiladhila kutya okwa li a sile oshimpwiyu nawa omumwayinagona nosho wo egumbo lye. Otashi vulika lya li moshitopolwa sha hepa, handiya yomulonga. Otashi vulika a li ha nyanyukilwa okuya kehala lyomalandithilo muSusa, hoka aahambudhi yiingoli, noyiisiliveli nosho wo aahalithi yalwe ya li haya kala taya landitha iipindi yawo. Ester ka li ta dhiladhila nokuli kutya ota ka kala nomauyamba ga tya ngaaka komeho, noka li e shi ngele onkalamwenyo ye onayi ka lunduluke.
Omukadhona “e na ondjelo ombwanawa”
7. Omolwashike Vashti a li a kanitha uuthemba wokukala omunyekadhi, noshike sha li sha ningwa po?
7 Esiku limwe muSusa omwa li mwa tukuka ombuyagano yi na ko nasha nuupyakadhi megumbo lyomukwaniilwa. Poshituthi oshinene, Ahasveros okwa li i ithana aantu ye e te ya telekele iikulya ya telekekeka e te ya pe wo omaviinu. Omukwaniilwa okwi ithana omunyekadhi gwe, Vashti, ngoka a li ta tyapula i ikalela naakiintu ooyakwawo. Ihe Vashti okwa tindi ko kuye. Oshoka okwa li a sa ohoni nokwa geya, omukwaniilwa okwa li a pula aagandjimayele ye nkene Vashti e na okugeelwa. Oshike sha ningwa po? Omukwaniilwa okwa ti kutya ita kala we omunyekadhi noku na okupingenwa po. Aapiya yomukwaniilwa oya tameke okukonga aakadhona aagundjuka aawanawa moshilando, moka omukwaniilwa ta ka vula okuhogolola omunyekadhi omupe. — Est. 1:1–2:4.
8. (a) Omolwashike Mordekai a li ti ipula naEster sho a koko? (b) Ongiini tu na okukala tu na etaloko li li pandjele lyopaMbiimbeli kombinga yuuwanawa womoshipala? (Tala wo Omayeletumbulo 31:30.)
8 Kala ando wa fa wu wete Mordekai ta tala Ester u uvite enyanyu noku uvite uuntsa sho e wete kutya Ester okwa koka nota monika nawa. Ombiimbeli otayi ti: “Ester okwa li omukadhona o opala e na ondjelo ombwanawa.” (Est. 2:7) Ombiimbeli otayi popi nawa uuwanawa womoshipala, ihe omuntu okwa pumbwa wo okukala omunandunge nomwiifupipiki. Ngele hasho, omuntu a tya ngaaka otashi vulika a ka kale e na uuntsa, einenepeko niikala yilwe iiwinayi yokomutima. (Lesha Omayeletumbulo 11:22.) Mbela shoka otashi vulu okuningwa? Mbela Ester uuwanawa we owa li tawu ke mu kwathela nenge owa li tawu ke mu ningitha a kale nuuntsa? Otatu ke shi mona.
9. (a) Oshike sha ningwa po sho aapiya yomukwaniilwa ya mono Ester, nomolwashike sha li oshidhigu kuye okutopoka naMordekai? (b) Omolwashike Mordekai a li e etha Ester a hokanwe komuntu kee shi omwiitaali? (Tala oshimpungu.)
9 Aapiya yomukwaniilwa oya li ya mono Ester. Oye mu kutha po puMordekai e taye mu fala kuuwa handiyaka yomulonga. (Est. 2:8) Oshi na okukala sha li oshidhigu kuyo ayehe yaali okutopoka, oshoka oya kala ya fa he nomwanakadhona. Otashi vulika Mordekai ka li a hala omwanakadhona ngoka a tekula a hokanwe komuntu kee shi omwiitaali, nenge oku kale nduno omukwaniilwa, ihe ka li ta vulu okuninga po sha. * Ester oku na okukala a li a pulakena nawa sho ta pewa omayele kuMordekai omanga inaa kuthwa po. Okwa li ti ipula noonkondo sho a li ta falwa kuuwa kuSusa kutya onkalamwenyo ye otayi ka kala ya tya ngiini.
Okwa li a hokiwa “kukehe ngoka e mu tsu keho”
10, 11. (a) Ester onkalamwenyo ye ompe otashi vulika ya li ye mu guma ngiini? (b) Mordekai okwa li u ulike ngiini kutya oku na ko nasha nonkalonawa yaEster?
10 Onkalamwenyo yaEster oya li ya lunduluka thiluthilu. Okwa li mokati ‘kaakadhona oyendji’ mboka ya li ya gongelwa okuza kiitopolwa yokokule yaPersia. Otashi vulika omikalondjigilile dhawo, omalaka niikala yawo ya li ya yoolokathana noonkondo. Aakadhona oya li ya tulwa metonatelo lyaHegai noya li ye na okwiifufula nawa uule womumvo naashika osha li sha kwatela mo okuthulwa nomagadhi ga nika nawa. (Est. 2:8, 12) Onkalamwenyo ya tya ngaaka otashi vulika ya li ya ningitha aagundjuka mboka ya kale owala taya gandja eitulomo keholokopo lyawo, kuufuuli nokombepo yethigathanopo. Mbela Ester okwa li a gumwa ngiini koshinima shika?
11 Kapwa li nando ogumwe hi ipula unene naEster e vule Mordekai. Ombiimbeli otayi ti esiku nesiku Mordekai okwa li he ende popepi nehale lyaanyekadhi opo u uve ngele Ester oku li nawa. (Est. 2:11) Mordekai otashi vulika a li ha kala a nyanyukwa uuna aapiya yomuuwa ye mu lombwele kutya oku li nawa. Omolwashike mbela?
12, 13. (a) Mboka ya li ya tsu Ester keho oya li yu uvite ngiini? (b) Omolwashike Mordekai a li a nyanyukwa okutseya kutya Ester ka li a popya kutya ye Omujuda?
12 Hegai okwa li e hole Ester nokwa li e mu pa aayakuli yaheyali e te mu pe ehala dhingi momuhandjo gwaanyekadhi. Ehokololo otali ti: “Ester okwa ziminwa kukehe ngoka e mu tsu keho.” (Est. 2:9, 15) Mbela aantu oya li owala ye mu hokwa omolwuuwanawa we? Aawe, hamolwuuwanawa we owala.
Ester okwa li e shi kutya eifupipiko nuunongo oya simana yi vule uuwanawa womoshipala
13 Pashiholelwa, Ombiimbeli otayi ti: “Ester ina holola kutya oye Omujuda, oshoka Mordekai okwa li e mu indike oku shi ninga.” (Est. 2:10) Mordekai okwa li a lombwela Ester kaa lombwele nando aantu kutya ye Omujuda, oshoka okwa li e shi shi kutya yamwe yomaambala yaPersia oya li ye tonde oshigwana she. Mordekai ka li tuu a nyanyukwa sho u uvu kutya Ester natango oku na oondunge nevuliko nonando ke li we puye!
14. Ongiini aagundjuka kunena taya vulu okulandula oshiholelwa shaEster?
14 Aagundjuka kunena nayo otaya vulu okunyanyudha aakuluntu yawo nosho wo mboka taye ya tekula. Nonando oye li mokati kaantu ihaaya yi oshinima muule, kaaye na omikalo naakwanyanya, ohaya yanda okulandula omikalo dhawo nonando aavali yawo kaye ya wete. Ngele oya ningi ngaashi Ester, otaya ka nyanyudha omutima gwaHe yomegulu. — Lesha Omayeletumbulo 27:11.
15, 16. (a) Omolwashike Ester a li a hokiwa komukwaniilwa? (b) Omolwashike tashi vulika sha li oshidhigu kuEster okuninga omalunduluko monkalamwenyo ye?
15 Sho olufo lwaEster lwokuya koshipala shomukwaniilwa lwa adha, okwa li a pewa uuthemba a hogolole kehe shoka a li a pumbwa, opo a gwedhe ko keopalo lye. Ester ka li a pula sha shilwe, kakele kaashoka a pewa kuHegai. (Est. 2:15) Okwa li a mona kutya uuwanawa hawo owala tawu ke mu hokitha komukwaniilwa, ihe ota ka hokiwa ngele oku na ondjele nomwiifupipiki. Mbela okwa li ngaa ta dhiladhila mondjila?
16 Ombiimbeli otayi ti: “Omukwaniilwa okwe mu hokwa unene shi vule aakiintu ayehe, nokwa li e mu opalela shi vule aakadhona ayehe. Omukwaniilwa okwe mu zaleke uulenga womunyekadhi komutse gwe e te mu ningi omunyekadhi peha lyaVashti.” (Est. 2:17) Otashi vulika sha li oshidhigu kokakadhona haka okaifupipiki Okajuda okutaamba ko onkalamwenyo ompe sho ka ningi omunyekadhi, omukadhi gwomukwaniilwa ngoka a li omunankondonkondo pethimbo mpoka. Mbela ondondo ye ompe oya li ye mu ningitha a kale e na uuntsa? Hasho nando!
17. (a) Ester okwa kala ngiini omuvuliki kuMordekai? (b) Omolwashike oshiholelwa shaEster sha simana kutse kunena?
17 Ester okwa kala omuvuliki kuMordekai ngoka e mu putudha. Ester ini iholola kutya ye Omujuda. Oshikwawo, sho Mordekai a mono kutya opwa ningwa ompangela yokudhipaga omukwaniilwa, Ester okwa vulika kuMordekai e ta londodha omukwaniilwa, naapogoli oya kwatwa. (Est. 2:20-23) Okwa li wo u ulike eitaalo lye muKalunga mokukala omwiifupipiki nomuvuliki. Osha simana tu landule oshiholelwa shaEster, oshoka aantu oyendji kunena ihaya vulika. Ihe mboka ye na eitaalo lyashili ohaya vulika ngaashi Ester.
Eitaalo lyaEster tali makelwa
18. (a) Omolwashike tashi vulika Mordekai a tindi okutsila Haman oongolo? (Tala wo enyolo lyopevi.) (b) Aalumentu naakiintu aadhiginini kunena ohaya landula ngiini oshiholelwa shaMordekai?
18 Omulumentu gwedhina Haman okwa li a pewa ondondo yopombanda mombala yaAhasveros. Omukwaniilwa okwa li e mu langeke po e li elenga ekuluntu e te mu ningi omugandjimayele gwe a simana nomutiyali mepangelo lye. Omukwaniilwa okwa li nokuli a gandja ompango kutya kehe ngoka te mu mono ne mu tsile oongolo. (Est. 3:1-4) Ompango ndjoka oya li ye etele Mordekai uupyakadhi. Okwa li ha vulika komukwaniilwa, ihe omiinima owala mbyoka itaayi teya ompango yaKalunga. Uupyakadhi owa li mpano kutya Haman ogwomoluvalo lwaAgag. Osha yela kutya okwa li omukwawo gwaAgag, omukwaniilwa gwAayamaleki, ngoka a li a dhipagwa komupolofeti gwaKalunga, Samuel. (1 Sam. 15:33) Aayamaleki oya li aakolokoshi sha pitilila noyi iningi aatondi yaJehova noshigwana she. Oshigwana shAayamaleki kasha li sha hokiwa kuKalunga. * (Deut. 25:19) Onkee ano, kapu na Omujuda omudhiginini ta tsile Omuyamaleki oongolo. NaMordekai ine shi ninga. Okwa tindi okutsila Haman oongolo. Sigo okunena, aalumentu naakiintu aadhiginini ohaya tula oomwenyo dhawo moshiponga okuvulika kekotampango ndyoka tali ti: “Otse otu na okuvulika kuKalunga, hakaantu.” — Iil. 5:29.
19. Haman okwa li a hala okuninga shike, nokwe shi ende ngiini i itaalithe omukwaniilwa?
19 Haman okwa li a thita po kondjahi. Ihe ka li e wete Mordekai oye owala e na okudhipagwa. Okwa li wo a hala okudhipaga oshigwana shaMordekai ashihe. Haman okwa li i itaalitha omukwaniilwa kutya Aajuda aantu aawinayi. Okwa li a popi, itee ya tumbula komadhina, kutya oye li oshigwana “sha halakana miitopolwa ayihe” nokaye na oshilonga shasha komukwaniilwa. Okwa li a popi nokuli kutya ihaya vulika koompango dhomukwaniilwa; onkee oya nika oshiponga. Okwa li u uvaneke kutya ota ka tula iimaliwa oyindji mompungulilo yomukwaniilwa, a fute opo Aajuda ayehe moshilongo ya dhipagwe. * Ahasveros okwa pe Haman okalinga ke koshihako, opo a hake elombwelo kehe ta nyolitha. — Est. 3:5-10.
20, 21. (a) Etumwalaka ndyoka lya gandjwa kuHaman olya li lya gumu ngiini Aajuda muPersia nosho wo Mordekai? (b) Mordekai okwa li a pula Ester a ninge shike?
20 Nziya aatumwa ya londa kuukambe oya li yi ihanene oshitopolwa ashihe, taya fala etumwalaka ndyoka tali ti kutya Aajuda oye na okudhipagwa. Dhiladhila owala kutya etumwalaka ndyoka olya li lya gumu ngiini oshihupe shAajuda muJerusalem mboka opo ya galuka muupongekwa kuBabilon noya li taya kambadhala okutungulula oshilando shoka kaasha li natango shi na omankolokuma goku shi gamena. Mordekai sho u uvu onkundana ndjoka otashi vulika a li ta dhiladhila kombinga yawo nosho wo yookuume naashiwikile mboka ye li muSusa. Okwa li a yemata noonkondo nokwa tuula oonguwo dhe e ta zala ehahi nokwi igundu omutoko momutse gwe e ta kala ta lili muule mokati koshilando. Haman okwa li owala ta nu pamwe nomukwaniilwa, ihe ka li nando e na ko nasha sho etela Aajuda nosho wo ookuume kawo oluhodhi olunene. — Lesha Ester 3:12–4:1.
21 Mordekai okwa li e shi kutya oku na okuninga po sha. Ihe mbela opu na ngaa shoka ta vulu okuninga? Ester okwa li u uvu kutya Mordekai oku li monkalo ya tya ngiini e ta tumu a faalelwe oonguwo, ihe okwa tindi okuhekelekwa. Otashi vulika a li hi ipula kutya omolwashike Kalunga ke, Jehova, e etha Ester gwe a kuthwe po puye a ka ninge omunyekadhi gwomuleli omupagani. Ngashingeyi etompelo okwa fa e li wete. Okwa tumu elaka komunyekadhi Ester a popye nomukwaniilwa e mu indile a popile “oshigwana she.” — Est. 4:4-8.
22. Omolwashike Ester a li a tila okuya komusamane gwe? (Tala wo enyolo lyopevi.)
22 Ester otashi vulika a li a lulilwa noonkondo sho a yakula etumwalaka ndyoka. Shika osha li tashi makele noonkondo eitaalo lye. Okwa li ta monika kutya okwa tila sho a yamukula Mordekai. Okwe mu dhimbulukitha ompango yomukwaniilwa kutya kehe ngoka ta holoka koshipala shomukwaniilwa ini ithanwa ko oku na okusa. Omuntu ngoka ota ka hupa owala ngele omukwaniilwa okwe mu ganeke nondhimbo ye yuukwaniilwa yoshingoli. Mbela opwa li ngaa pu na etompelo okudhiladhila kutya omukwaniilwa ote ke mu sila ohenda unene tuu sho Vashti opo a adhika a geelwa sho a tindi okuya komukwaniilwa? Ester okwa lombwele Mordekai kutya opwa pita omasiku 30 omukwaniilwa inee mu ithana kuye. Shaashi omukwaniilwa ine mu ithana omasiku agehe ngoka okwa li ti ipula ngele omukwaniilwa nguka omugeyentu okwe mu hokwa ngaa natango. * — Est. 4:9-11.
23. (a) Mordekai okwa lombwele Ester shike opo a koleke eitaalo lye? (b) Omolwashike tu na okulandula oshiholelwa shaMordekai?
23 Mordekai okwa li a yamukula Ester noohapu tadhi koleke eitaalo lye. Okwe mu lombwele kutya ngele ina katuka, nena ehupitho lyAajuda otali ka za kulwe. Ihe mbela Ester okwa li a tegelela a ka hupe sho Aajuda taya hepekwa? Mordekai okwa li tu ulike eitaalo lye muJehova, kutya Jehova ke na esiku e ethe oshigwana She shi dhimwe po nomauvaneko ge ihaga kala inaaga gwanithwa. (Jos. 23:14) Mordekai okwa li wo a pula Ester a ti: “Olye e shi tseya kutya ino ninga omunyekadhi omolwompito ndjika?” (Est. 4:12-14) Mordekai okwe tu tulila po lela oshiholelwa oshiwanawa. Okwa li i inekela thiluthilu muKalunga ke, Jehova. Mbela natse otwe mu inekela ngaa? — Omayel. 3:5, 6.
Eitaalo lye olya li lya kola, onkee ka li a tila eso
24. Ester okwa li u ulike ngiini eitaalo lye nuulaadhi we?
24 Ester okwa li e na okutokola shoka ta ka ninga. Okwa li a pula Mordekai a lombwele oshigwana nasho shi idhilike iikulya omasiku gatatu, nokwa hulitha etumwalaka lye noohapu ndhoka tadhi ulike eitaalo nuulaadhi nodhe tu guma nokunena, tadhi ti: “Ngele ote si, nandi se.” (Est. 4:15-17) Otashi vulika a li a galikana nomutima aguhe omasiku ngoka gatatu, shoka tashi vulika inaa ninga nando onale monkalamwenyo ye ayihe. Hugunina, okwi imbonzola nawa e ta zala oonguwo dhe dhuunyekadhi opo a hokiwe komukwaniilwa. Opo nduno okwa yi komukwaniilwa.
Ester okwa li a tula omwenyo gwe moshiponga a hupithe oshigwana shaKalunga
25. Hokolola shoka sha ningwa po sho Ester a holoka koshipala shomusamane gwe.
25 Ngaashi sha hokololwa petameko lyehokololo ndika, Ester okwa yi kehale lyuuwa. Dhiladhila owala kutya okwa li ta galikana a mana mo shi thike peni momutima gwe nomomadhiladhilo ge, oshoka okwa li a tila. Sho a yi mehale lyuuwa, okwa li e wete Ahasveros a kuutumba koshipangelapundi she. Otashi vulika a li ta kambadhala oku mu lesha koshipala. Ngele okwa li e na okutegelela kashona, otashi vulika a li e wete ethimbo itaali thiki a ka popye naye. Ihe ethimbo olya thiki, nomusamane gwe okwe mu mono. Omukwaniilwa okwa li shili a kumwa, ihe ka li e mu geela. Okwe mu ganeke nondhimbo yuukwaniilwa yoshingoli. — Est. 5:1, 2.
26. Omolwashike Aakriste yashili ye na okukala nuulaadhi ngaashi Ester, nomolwashike shika sha li owala etameko?
26 Omukwaniilwa okwa li e na ohokwe okupulakena kuEster. Ester okwa li omudhiginini kuKalunga nokwa tula omwenyo gwe moshiponga omolwoshigwana shaKalunga, nokwa tulila po wo aapiya yaKalunga oshiholelwa oshiwanawa sheitaalo sigo okunena. Aakriste yashili kunena oya lenga iiholelwa iiwanawa ngaashi shika. Jesus okwa li a popi kutya aalanduli ye yashili otaya ka tseyikila ohole ndjoka yeiyambo. (Lesha Johannes 13:34, 35.) Olundji okuulika ohole ndjoka ohashi pula uulaadhi wa fa waEster. Nonando Ester okwa li a popile oshigwana she esiku ndyoka, shoka osha li owala etameko. Okwa li te ke she enda ngiini i itaalithe omukwaniilwa kutya omugandjimayele gwe dhingi, Haman, omukotokeli? Okwa li ta ka kwathela a hupithe oshigwana she ngiini? Omapulo ngaka otaga ka yamukulwa montopolwa tayi landula.
^ okat. 2 Osha taambiwa ko koyendji kutya Ahasveros oye Kserkses, ngoka a li ta pangele Epangelo enankondo lyaPersia okuza momumvo 496 manga Kristus inaa valwa.
^ okat. 9 Tala oshimpungu “Omapulo kombinga yaEster,” mOntopolwa 16.
^ okat. 18 Otashi vulika Haman a li gumwe gwomAayamaleki yahugunina, oshoka mboka “ya hupile ko” oya hanagulilwe po momasiku gomukwaniilwa Hiskija. — 1 Ondjal. 4:43.
^ okat. 19 Haman okwa li a gandja oshisiliveli shiitalendi 10 000, yi thike poodola omamiliyona omathele kunena. Ngele Ahasveros oye Kserkses I, omagano ngoka okwa li e ga hokwa noonkondo, oshoka okwa li a pumbwa iimaliwa oyindji opo a hingile Greka iita mbyoka a kala nale a hala oku mu hingila. Iita mbyoka oye ke eta uupyakadhi uunene.
^ okat. 22 Kserkses I okwa li omugeyentu. Omunandjokonona Omugreka, Herodotus, okwa nyola iiholelwa yongeyo yaKserkses sho a li ta hingile Aagreka iita. Omukwaniilwa nguka okwa li a gandja elombwelo oosikepa dhi tulwe kumwe pekololo lyaHellespont opo dhi ninge ontopa. Sho oshikungulu she dhi teyagula po, Kserkses okwa li a gandja elombwelo aatungi ya tetwe omitse, nomeya gopuHellespont ga dhengwe nongola omanga taga leshelwa etumwalaka lyegeelo mokule. Piita oyo tuu mbyoka, omulumentu gumwe omuyamba sho a pula omukwaniilwa omwanamati kaa tumwe kiita, Kserkses okwa li a tete omumati ngoka pokati.
Opu na ishewe uuyelele mbuka
NATU HOLELENI EITAALO LYAWO
Ester— okwa katuka pandunge, nuupenda nonokwaaihola mwene
Ester okwa li u ulike ngiini kutya ki ihole mwene sho a katuka peha lyaJehova nolyoshigwana She?
OMAPULO GOPAMBIIMBELI TAGA YAMUKULWA
Oshike tatu vulu okwiilonga kaakiintu mboka ya popiwa mOmbiimbeli?
Tala eyooloko pokati kaakiintu yamwe mboka ye li iiholelwa iiwanawa ya popiwa mOmbiimbeli nayamwe mboka kaaye li iiholelwa iiwanawa nandonando.
EFALOMO LYOMAMBO GOMBIIMBELI
Efalomo lyembo lyaEster
Iiningwanima yi halutha mbyoka ya li ya ningwa pethimbo lyaEster otayi ku kwathele wu kale wu na uushili kutya Jehova Kalunga oku na oonkondo dhokuhupitha aapiya ye uuna ye li muudhigu kunena.
Embo lyandje lyokwiilonga Ombiimbeli
Ester ta hupitha oshigwana shawo
Nonando Ester okwa li omukwiilongo nothigwa, okwa ka ninga omunyekadhi.
