ຕອນທີ 6
ເມື່ອມີລູກແລ້ວຊີວິດທ່ານຈະປ່ຽນໄປ
“ລູກຊາຍ [ລູກ] ທັງຫຼາຍເປັນມູນມາແຕ່ພະເຢໂຫວາ.”—ຄຳເພງ 127:3
ຜົວແລະເມຍຮູ້ສຶກຕື່ນເຕັ້ນແລະດີໃຈຫຼາຍເມື່ອເຫັນໜ້າລູກນ້ອຍທີ່ເກີດມາ. ແຕ່ຜູ້ທີ່ຫາກໍເປັນພໍ່ເປັນແມ່ອາດບໍ່ນຶກບໍ່ຝັນວ່າຕ້ອງໃຊ້ເວລາແລະເຫື່ອແຮງທັງໝົດເພື່ອເບິ່ງແຍງລູກນ້ອຍ. ການອຶດນອນເປັນເວລາດົນໆພ້ອມກັບການປ່ຽນແປງທາງອາລົມສາມາດເຮັດໃຫ້ຄວາມສຳພັນຂອງທ່ານເຄັ່ງຕຶງໄດ້. ທ່ານກັບຄູ່ຂອງທ່ານຕ້ອງໄດ້ປັບໂຕເພື່ອຈະເບິ່ງແຍງລູກນ້ອຍແລະຮັກສາຊີວິດຄູ່ຂອງທ່ານໄວ້. ແຕ່ຄຳພີໄບເບິນມີຄຳແນະນຳທີ່ຈະຊ່ວຍທ່ານໃຫ້ຮັບມືກັບຄວາມຫຍຸ້ງຍາກເຫຼົ່ານີ້ໄດ້ແນວໃດ?
1 ເມື່ອມີລູກແລ້ວຊີວິດທ່ານຈະປ່ຽນໄປ
ຄຳພີໄບເບິນແນະນຳວ່າ: “ຄວາມຮັກກໍອົດທົນດົນນານແລະເຕັມດ້ວຍຄວາມດີ.” ນອກຈາກນັ້ນຄວາມຮັກຍັງ “ບໍ່ຊອກຫາສ່ວນຂອງຕົນເອງ ບໍ່ຮ້າຍງ່າຍ.” (1 ໂກລິນໂທ 13:4, 5) ເປັນເລື່ອງທຳມະດາທີ່ຜູ້ຫາກໍເປັນແມ່ຈະຈົດຈໍ່ຢູ່ກັບການເບິ່ງແຍງລູກນ້ອຍ. ຢ່າງໃດກໍຕາມ ຜົວຂອງທ່ານອາດຮູ້ສຶກວ່າຖືກລະເລີຍ ດັ່ງນັ້ນ ຢ່າລືມວ່າທ່ານຕ້ອງໄດ້ເບິ່ງແຍງຜົວຄືກັນ. ທ່ານຕ້ອງສະແດງຄວາມອົດທົນແລະຄວາມກະລຸນາ ເພື່ອຊ່ວຍຜົວໃຫ້ເຂົ້າໃຈວ່າຕ້ອງໄດ້ເບິ່ງແຍງລູກນ້ອຍ.
“ຜູ້ເປັນຜົວ . . . ຈົ່ງອາໄສຢູ່ກັບເມຍຕາມຄວາມຮູ້.” (1 ເປໂຕ 3:7) ຜົວຕ້ອງເຂົ້າໃຈວ່າເມຍຈະຕ້ອງໃຊ້ເວລາແລະເຫື່ອແຮງສ່ວນຫຼາຍໃນການເບິ່ງແຍງລູກ. ເມຍມີໜ້າທີ່ຮັບຜິດຊອບໃໝ່ ແລະອາດຈະເຄັ່ງຕຶງ ໝົດແຮງ ແລະຫງຸດຫງິດ. ບາງເທື່ອລາວອາດຈະໃຈຮ້າຍໃສ່ທ່ານ ແຕ່ທ່ານຕ້ອງບໍ່ໃຈຮ້າຍຕອບ ເພາະ “ຜູ້ທີ່ຊ້ານານຈະຮ້າຍກໍປະເສີດກວ່າຄົນທີ່ມີແຮງ [ອຳນາດ].” (ສຸພາສິດ 16:32) ດັ່ງນັ້ນ ທ່ານຕ້ອງມີຄວາມເຂົ້າໃຈຢ່າງເລິກເຊິ່ງແລະຊ່ວຍເຫຼືອເມຍໃນສິ່ງທີ່ລາວຈຳເປັນ.—ສຸພາສິດ 14:29
ຄຳແນະນຳ:
-
ສຳລັບຜົວ: ທ່ານຕ້ອງຊ່ວຍເມຍເບິ່ງແຍງລູກນ້ອຍ ແມ່ນແຕ່ໃນຕອນກາງຄືນ. ເພື່ອຈະມີເວລາໃຫ້ເມຍແລະລູກຫຼາຍຂຶ້ນ ທ່ານຕ້ອງເຮັດກິດຈະກຳອື່ນໆໜ້ອຍລົງ
-
ສຳລັບເມຍ: ເມື່ອຜົວຢາກຊ່ວຍທ່ານເບິ່ງແຍງລູກນ້ອຍ ກໍຕ້ອງໃຫ້ລາວຊ່ວຍ. ຖ້າລາວເບິ່ງແຍງລູກໄດ້ບໍ່ດີປານໃດ ກໍຢ່າຕຳໜິ ແຕ່ໃຫ້ບອກວິທີທີ່ລາວຄວນເຮັດດ້ວຍຄວາມກະລຸນາ.
2 ເຮັດໃຫ້ຊີວິດຄູ່ຂອງທ່ານໝັ້ນຄົງ
ຄຳພີໄບເບິນແນະນຳວ່າ: “ເຂົາທັງສອງຈະເປັນເນື້ອໜັງອັນດຽວກັນ.” (ຕົ້ນເດີມ 2:24) ເຖິງວ່າຄອບຄົວຂອງທ່ານຈະມີສະມາຊິກໃໝ່ເຂົ້າມາ ຂໍໃຫ້ຈື່ວ່າທ່ານທັງສອງຍັງເປັນ “ເນື້ອໜັງອັນດຽວກັນ.” ດັ່ງນັ້ນ ພວກທ່ານຕ້ອງພະຍາຍາມຮັກສາຊີວິດຄູ່ຂອງທ່ານໃຫ້ໝັ້ນຄົງ.
ຜູ້ເປັນເມຍ ໃຫ້ທ່ານຮູ້ຄ່າສິ່ງທີ່ຜົວໄດ້ຊ່ວຍແລະສະໜັບສະໜູນທ່ານ. ການທີ່ທ່ານສະແດງຄວາມຮູ້ຄ່າເຊັ່ນນັ້ນຈະ “ເປັນຄວາມສຳບາຍ [ປິ່ນປົວ]” ໃຈຂອງຜົວ. (ສຸພາສິດ 12:18) ຜູ້ເປັນຜົວ ທ່ານໄດ້ບອກເມຍບໍວ່າທ່ານຮັກແລະຮູ້ຄ່າລາວຫຼາຍ ຊົມເຊີຍລາວທີ່ໄດ້ເບິ່ງແຍງຄອບຄົວ.—ສຸພາສິດ 31:10, 28
“ຢ່າໃຫ້ຜູ້ໃດຫາປະໂຫຍດຂອງຕົວເອງ ແຕ່ວ່າໃຫ້ທຸກຄົນຫາປະໂຫຍດຂອງເພື່ອນບ້ານ.” (1 ໂກລິນໂທ 10:24) ທ່ານຕ້ອງເຮັດສິ່ງທີ່ດີທີ່ສຸດສຳລັບຄູ່ຂອງທ່ານ. ຜົວແລະເມຍຈະຕ້ອງຈັດເວລາໄວ້ເພື່ອລົມກັນ ສະແດງຄວາມຄິດເຫັນ ແລະຮັບຟັງກັນແລະກັນ. ໃນເລື່ອງເພດສຳພັນ ຢ່າຄິດເຖິງແຕ່ຕົວເອງ ແຕ່ໃຫ້ຄິດເຖິງຄວາມຕ້ອງການຂອງອີກຝ່າຍໜຶ່ງ. ຄຳພີໄບເບິນກ່າວວ່າ “ຢ່າໃຫ້ຢູ່ຕ່າງຫາກກັນ ເວັ້ນໄວ້ເຫັນຊອບຍອມກັນ.” (1 ໂກລິນໂທ 7:3-5) ດັ່ງນັ້ນ ໃຫ້ທ່ານທັງສອງລົມກັນໃນເລື່ອງນີ້ຢ່າງກົງໄປກົງມາ. ຄວາມອົດທົນແລະຄວາມເຂົ້າໃຈຈະເຮັດໃຫ້ຊີວິດຄູ່ຂອງທ່ານໝັ້ນຄົງ.
ຄຳແນະນຳ:
-
ໃຫ້ຈັດເວລາໄວ້ເພື່ອຢູ່ນຳກັນພຽງສອງຄົນ
-
ໃຫ້ເຮັດສິ່ງເລັກໆນ້ອຍໆເພື່ອຄູ່ຂອງທ່ານຈະຮູ້ວ່າທ່ານຮັກລາວ ເຊັ່ນວ່າ ຂຽນຂໍ້ຄວາມສັ້ນໆຫຼືໃຫ້ຂອງຂວັນເລັກໆນ້ອຍໆ
3 ການອົບຮົມສັ່ງສອນລູກນ້ອຍຂອງທ່ານ
ຄຳພີໄບເບິນແນະນຳວ່າ: “ຕັ້ງແຕ່ເປັນເດັກນ້ອຍມາທ່ານໄດ້ຮູ້ຈັກພະຄຳພີອັນບໍລິສຸດທີ່ມີອຳນາດກະທຳໃຫ້ທ່ານມີສະຕິປັນຍາສຳລັບຄວາມພົ້ນ.” (2 ຕີໂມເຕ 3:15) ທ່ານຄວນວາງແຜນວ່າຈະສອນລູກນ້ອຍໃນເລື່ອງໃດ. ລູກສາມາດຮຽນຮູ້ໄດ້ຕັ້ງແຕ່ກ່ອນເກີດ ເພາະມີຄວາມສາມາດພິເສດ. ໃນຂະນະທີ່ຢູ່ໃນທ້ອງ ລູກສາມາດຈື່ສຽງຂອງທ່ານ ແລະຕອບສະໜອງຕໍ່ອາລົມຂອງທ່ານ. ທ່ານຄວນອ່ານໜັງສືສູ່ລູກຟັງຕັ້ງແຕ່ຍັງນ້ອຍໆ ເຖິງວ່າລາວຈະຍັງບໍ່ເຂົ້າໃຈສິ່ງທີ່ທ່ານອ່ານ ແຕ່ສິ່ງນີ້ຈະຊ່ວຍລູກໃຫ້ເປັນຄົນມັກອ່ານເມື່ອໃຫຍ່ຂຶ້ນ.
ດັ່ງນັ້ນ ເປັນສິ່ງທີ່ດີຫາກທ່ານເວົ້າເລື່ອງຂອງພະເຈົ້າໃຫ້ລູກຟັງຕັ້ງແຕ່ຍັງນ້ອຍໆ. ທ່ານຄວນອະທິດຖານເຖິງພະເຢໂຫວາໂດຍໃຫ້ລູກໄດ້ຍິນນຳ. (ພະບັນຍັດ 11:19) ແມ່ນແຕ່ເມື່ອທ່ານທັງສອງອະທິດຖານນຳກັນ ຄວນເວົ້າເຖິງສິ່ງທີ່ພະເຢໂຫວາໄດ້ເຮັດ. (ຄຳເພງ 78:3, 4) ໃນຂະນະທີ່ລູກນ້ອຍໃຫຍ່ຂຶ້ນ ລາວກໍຈະຮູ້ສຶກໄດ້ເຖິງຄວາມຮັກທີ່ທ່ານເອງມີຕໍ່ພະເຢໂຫວາແລະລາວກໍຈະຮັກພະອົງຄືກັນກັບທ່ານ.
ຄຳແນະນຳ:
-
ໃຫ້ອະທິດຖານຢ່າງເຈາະຈົງ ຂໍໃຫ້ມີສະຕິປັນຍາໃນການຝຶກອົມຮົມລູກ
-
ໃຫ້ເວົ້າຊ້ຳໆໃນສິ່ງທີ່ທ່ານຕ້ອງການ ໃຫ້ລູກຮຽນຮູ້ ແລ້ວລາວກໍຈະເລີ່ມຮຽນໄດ້ໄວຂຶ້ນ
