ຕອນທີ 9
ນະມັດສະການພະເຢໂຫວາເປັນຄອບຄົວ
“ຈົ່ງຂາບໄຫວ້ນະມັດສະການພະອົງຜູ້ໄດ້ສ້າງຟ້າສະຫວັນແລະແຜ່ນດິນໂລກ.”—ຄຳປາກົດ 14:7
ເມື່ອອ່ານປຶ້ມນີ້ ທ່ານຈະຮຽນຮູ້ຫຼັກການຕ່າງໆເຊິ່ງເປັນປະໂຫຍດຕໍ່ທ່ານແລະຄອບຄົວ. ພະເຢໂຫວາຕ້ອງການໃຫ້ທ່ານມີຄວາມສຸກ. ພະອົງສັນຍາວ່າຖ້າທ່ານຈັດໃຫ້ການນະມັດສະການພະອົງສຳຄັນກວ່າສິ່ງອື່ນໆແລ້ວ “ສິ່ງຂອງທັງປວງນີ້ຈະເປັນທີ່ຕື່ມໃຫ້ແກ່ທ່ານທັງຫຼາຍ.” (ມັດທາຍ 6:33) ພະອົງຕ້ອງການໃຫ້ທ່ານມາເປັນເພື່ອນກັບພະອົງ. ດັ່ງນັ້ນ ທ່ານຄວນຫາທຸກໆໂອກາດເພື່ອທີ່ຈະພັດທະນາຄວາມໃກ້ຊິດກັບພະເຈົ້າ. ນີ້ເປັນໂອກາດທີ່ດີແທ້ໆທີ່ທ່ານເອງຈະມີໄດ້.—ມັດທາຍ 22:37, 38
1 ພັດທະນາຄວາມໃກ້ຊິດກັບພະເຢໂຫວາໃຫ້ຫຼາຍຍິ່ງຂຶ້ນ
ຄຳພີໄບເບິນແນະນຳວ່າ: “ພະເຢໂຫວາບອກວ່າ ‘ເຮົາຈະເປັນພະບິດາຂອງທ່ານທັງຫຼາຍ ແລະທ່ານທັງຫຼາຍຈະເປັນລູກຊາຍລູກຍິງຂອງເຮົາ.’” (2 ໂກລິນໂທ 6:18) ພະເຈົ້າຕ້ອງການໃຫ້ທ່ານມາເປັນເພື່ອນທີ່ສະໜິດກັບພະອົງ. ການອະທິດຖານເປັນວິທີໜຶ່ງທີ່ຈະຊ່ວຍທ່ານໃຫ້ເປັນເຊັ່ນນັ້ນໄດ້. ພະເຢໂຫວາເຊີນທ່ານໃຫ້ “ອ້ອນວອນບໍ່ເຊົາບໍ່ຂາດ.” (1 ເທຊະໂລນີກ 5:17) ພະອົງຢາກຟັງສິ່ງທີ່ມາຈາກຄວາມຮູ້ສຶກເລິກໆພາຍໃນແລະສິ່ງທີ່ທ່ານກັງວົນ. (ຟີລິບ 4:6) ເມື່ອທ່ານອະທິດຖານຮ່ວມກັບຄອບຄົວ ທຸກຄົນໃນຄອບຄົວກໍຈະເຫັນໄດ້ວ່າທ່ານມີຄວາມໃກ້ຊິດກັບພະເຈົ້າຫຼາຍສ່ຳໃດ.
ຄຽງຄູ່ກັບການລົມກັບພະເຈົ້າ ທ່ານເອງກໍຕ້ອງຟັງພະອົງໂດຍການສຶກສາຄຳພີໄບເບິນແລະສັບພະໜັງສືຕ່າງໆທີ່ອາໄສຄຳພີໄບເບິນ. (ຄຳເພງ 1:1, 2) ທ່ານຕ້ອງຄຶດຕຶກຕອງໃນສິ່ງທີ່ໄດ້ຮຽນມາ. (ຄຳເພງ 77:11, 12) ນອກຈາກນັ້ນ ການເຊື່ອຟັງພະເຈົ້າຍັງລວມເຖິງການເຂົ້າຮ່ວມປະຊຸມກັບພະຍານພະເຢໂຫວາເປັນປະຈຳ.—ຄຳເພງ 122:1-4
ເພື່ອທີ່ຈະມີຄວາມໃກ້ຊິດກັບພະເຢໂຫວາ ອີກສິ່ງໜຶ່ງທີ່ສຳຄັນຫຼາຍແມ່ນການບອກຄົນອື່ນໃຫ້ຮູ້ກ່ຽວກັບພະອົງ. ເມື່ອທ່ານເຮັດສິ່ງທີ່ໄດ້ກ່າວມາແລ້ວນັ້ນຫຼາຍເທົ່າໃດ ທ່ານກໍຈະຮູ້ສຶກວ່າໃກ້ຊິດກັບພະເຢໂຫວາຫຼາຍຂຶ້ນເທົ່ານັ້ນ.—ມັດທາຍ 28:19, 20
ຄຳແນະນຳ:
-
ໃຫ້ຈັດເວລາໄວ້ທຸກໆມື້ເພື່ອອະທິດຖານແລະອ່ານຄຳພີໄບເບິນ
-
ໃນຄອບຄົວ ທ່ານຕ້ອງຈັດໃຫ້ກິດຈະກຳຕ່າງໆທີ່ກ່ຽວຂ້ອງກັບພະເຢໂຫວາມາກ່ອນຄວາມບັນເທີງແລະການພັກຜ່ອນຢ່ອນໃຈ
2 ນະມັດສະການປະຈຳຄອບຄົວຢ່າງມີຄວາມສຸກ
ຄຳພີໄບເບິນແນະນຳວ່າ: “ຈົ່ງຫຍັບເຂົ້າມາໃກ້ພະເຈົ້າແລະພະອົງຈະຫຍັບເຂົ້າມາໃກ້ທ່ານ.” (ຢາໂກໂບ 4:8) ເພື່ອຈະນະມັດສະການປະຈຳຄອບຄົວໄດ້ຢ່າງສະໝ່ຳສະເໝີທ່ານຕ້ອງຈັດເວລາແລະເຮັດຕາມນັ້ນຢ່າງຄັກແນ່. (ຕົ້ນເດີມ 18:19) ແຕ່ສິ່ງທີ່ສຳຄັນ ທ່ານຕ້ອງໃຊ້ຄຳແນະນຳຂອງພະເຢໂຫວາໃນຊີວິດປະຈຳວັນ. ທ່ານຄວນຊ່ວຍຄອບຄົວໃຫ້ໃກ້ຊິດກັບພະເຈົ້າຫຼາຍຂຶ້ນໂດຍການເວົ້າເຖິງເລື່ອງຂອງພະອົງເປັນປະຈຳ “ເມື່ອນັ່ງຢູ່ເຮືອນ ແລະເມື່ອທຽວທາງ ແລະເມື່ອນອນ ແລະເມື່ອລຸກແຕ່ນອນ.” (ພະບັນຍັດ 6:6, 7) ທ່ານຕ້ອງມີເປົ້າໝາຍຄືກັບໂຢຊວຍທີ່ເວົ້າວ່າ “ຝ່າຍຂ້ອຍກັບໄທເຮືອນຂອງຂ້ອຍກໍຈະບົວລະບັດພະເຢໂຫວາ.”—ໂຢຊວຍ 24:15
ຄຳແນະນຳ:
-
ໃຫ້ຈັດເວລາໄວ້ເປັນປະຈຳແລະໃຫ້ເລືອກເລື່ອງທີ່ເໝາະເພື່ອຈະຝຶກຄົນໃນຄອບຄົວຕາມຄວາມຈຳເປັນຂອງແຕ່ລະຄົນ
