ຕອນທີ 5
ຈະມີສາຍສຳພັນທີ່ດີກັບຍາດພີ່ນ້ອງໄດ້ແນວໃດ
“ເອົາ . . . ຄວາມດີ [ກະລຸນາ] ຄວາມຖ່ອມຕົວລົງ ຄວາມອ່ອນຫວານ ຄວາມອົດທົນໄວ້ມາຫົ່ມຕົວໄວ້.”—ໂກໂລດ 3:12
ການແຕ່ງດອງເປັນການສ້າງຄອບຄົວໃໝ່ ດັ່ງນັ້ນ ຄູ່ຂອງທ່ານຈຶ່ງເປັນຄົນທີ່ສຳຄັນທີ່ສຸດສຳລັບທ່ານ. ຍາດພີ່ນ້ອງບາງຄົນອາດຈະຍອມຮັບເລື່ອງນີ້ໄດ້ຍາກ ເພາະທີ່ຜ່ານມາທ່ານມີຄວາມຮັກແລະຄວາມນັບຖືໃຫ້ພຽງແຕ່ພໍ່ແມ່ເທົ່ານັ້ນ. ແຕ່ຫຼັກການໃນຄຳພີໄບເບິນສາມາດຊ່ວຍທ່ານໃຫ້ປະຕິບັດຢ່າງເໝາະສົມ ໃນຂະນະທີ່ພະຍາຍາມສ້າງສາຍສຳພັນກັບຄູ່ຂອງທ່ານ ທ່ານກໍຍັງມີສາຍສຳພັນທີ່ດີກັບຍາດພີ່ນ້ອງນຳ.
1 ຮັກສາຄວາມຄິດທີ່ເໝາະສົມກ່ຽວກັບຍາດພີ່ນ້ອງ
ຄຳພີໄບເບິນແນະນຳວ່າ: “ຈົ່ງນັບຖືພໍ່ແມ່ຂອງເຈົ້າ.” (ເອເຟດ 6:2) ບໍ່ວ່າທ່ານຈະມີອາຍຸຫຼາຍເທົ່າໃດກໍຕາມ ທ່ານຕ້ອງໃຫ້ກຽດແລະນັບຖືພໍ່ແມ່. ຄູ່ຂອງທ່ານກໍຕ້ອງຍອມຮັບເລື່ອງນີ້ຄືກັນ ບໍ່ວ່າຈະເປັນລູກສາວຫຼືລູກຊາຍກໍຕ້ອງໄດ້ເອົາໃຈໃສ່ຄວາມຈຳເປັນຂອງພໍ່ແມ່. “ຄວາມຮັກບໍ່ຫຶງສາ [ອິດສາ]” ດັ່ງນັ້ນ ທ່ານບໍ່ຄວນຮູ້ສຶກບໍ່ພໍໃຈຖ້າເບິ່ງຄືວ່າຄູ່ຂອງທ່ານສະແດງຄວາມຮັກຕໍ່ພໍ່ແມ່ຂອງລາວເປັນພິເສດ.—1 ໂກລິນໂທ 13:4; ຄາລາຊີ 5:26
ຄຳແນະນຳ:
-
ໃຫ້ຫຼີກລ່ຽງຄຳເວົ້າໃນທຳນອງນີ້ “ຄອບຄົວຂອງເຈົ້າບໍ່ເຄີຍຍອມຮັບຂ້ອຍເລີຍ” ຫຼື “ຂ້ອຍເຮັດຫຍັງກໍບໍ່ເຄີຍຖືກໃຈແມ່ຂອງເຈົ້າຈັກເທື່ອ”
-
ໃຫ້ພະຍາຍາມເບິ່ງເລື່ອງຕ່າງໆຄືກັບທີ່ຄູ່ຂອງທ່ານເບິ່ງ
2 ເຮັດໜ້າທີ່ຂອງຕົນ
ຄຳພີໄບເບິນແນະນຳວ່າ: “ຜູ້ຊາຍຈະລາພໍ່ແມ່ແຫ່ງຕົນແລະຈະຕິດພັນຢູ່ກັບເມຍແຫ່ງຕົນແລະເຂົາທັງສອງຈະເປັນເນື້ອໜັງອັນດຽວກັນ.” (ຕົ້ນເດີມ 2:24) ເມື່ອທ່ານແຕ່ງດອງແລ້ວ ພໍ່ແມ່ອາດຮູ້ສຶກວ່າຍັງຕ້ອງເບິ່ງແຍງທ່ານຢູ່ ພວກເພິ່ນຈຶ່ງຢາກມີສ່ວນໃນຄອບຄົວຂອງທ່ານເຊິ່ງອາດຈະຫຼາຍເກີນໄປ.
ຜົວແລະເມຍຕ້ອງໄດ້ຕົກລົງກັນເອງວ່າຈະໃຫ້ພໍ່ແມ່ເຂົ້າມາມີສ່ວນໄດ້ຫຼາຍສ່ຳໃດ ແລ້ວເວົ້າກັບພວກເພິ່ນຢ່າງອ່ອນໂຍນ. ໂດຍໃຫ້ກຽດພໍ່ແມ່ ທ່ານສາມາດເວົ້າແບບກົງໄປກົງມາແລະເຈາະຈົງໄດ້. (ສຸພາສິດ 15:1) ຄວາມຖ່ອມ ຄວາມອ່ອນໂຍນ ແລະຄວາມອົດທົນຈະຊ່ວຍພວກທ່ານໃຫ້ມີສາຍສຳພັນທີ່ດີກັບຍາດພີ່ນ້ອງແລະເສີມສ້າງ “ກັນແລະກັນໃນຄວາມຮັກ” ຕໍ່ໆໄປ.—ເອເຟດ 4:2
ຄຳແນະນຳ:
-
ຖ້າທ່ານກັງວົນວ່າຍາດພີ່ນ້ອງຈະເຂົ້າມາມີສ່ວນຮ່ວມໃນຄອບຄົວຂອງທ່ານຫຼາຍເກີນໄປ ໃຫ້ລົມເລື່ອງນັ້ນກັບຄູ່ຂອງທ່ານເມື່ອສະພາບການສະຫງົບ
-
ໃຫ້ຜົວແລະເມຍຕົກລົງກັນເອງວ່າຈະແກ້ໄຂໃນເລື່ອງເຫຼົ່ານີ້ແນວໃດ
