ຕອນທີ 8
ຈະຮັບມືກັບບັນຫາຮ້າຍແຮງໄດ້ແນວໃດ
“ທ່ານທັງຫຼາຍຊົມຊື່ນຍິນດີຫຼາຍ ແມ່ນວ່າທ່ານທັງຫຼາຍຍັງມີຄວາມທຸກລຳບາກໃນບັດນີ້ສັກເວລາໜ້ອຍດ້ວຍການທົດລອງຕ່າງໆ ຖ້າຕ້ອງປະສົບຄວາມທຸກນັ້ນ.”—1 ເປໂຕ 1:6
ເຖິງວ່າທ່ານໄດ້ພະຍາຍາມເຮັດສຸດຄວາມສາມາດເພື່ອໃຫ້ຊີວິດຄູ່ແລະຄອບຄົວມີຄວາມສຸກ ແຕ່ສິ່ງທີ່ບໍ່ໄດ້ຄາດຄິດທີ່ເກີດຂຶ້ນ ອາດຈະເຮັດໃຫ້ທ່ານບໍ່ມີຄວາມຍິນດີອີກຕໍ່ໄປ. (ຜູ້ເທສະໜາປ່າວປະກາດ 9:11) ດ້ວຍຄວາມຮັກພະເຢໂຫວາຈຶ່ງຈັດກຽມໃຫ້ມີວິທີຊ່ວຍເຫຼືອເຮົາໃຫ້ຜ່ານຄວາມຫຍຸ້ງຍາກໄດ້. ຖ້າທ່ານເຮັດຕາມຫຼັກການໃນຂໍ້ພະຄຳພີທີ່ຍົກມານີ້ ທ່ານກັບຄອບຄົວກໍຈະມີວິທີຮັບມືໄດ້ເຖິງວ່າຈະຕົກໃນສະພາບການທີ່ຮ້າຍແຮງຫຼາຍປານໃດກໍຕາມ.
1 ເຊື່ອໝັ້ນໃນພະເຢໂຫວາ
ຄຳພີໄບເບິນແນະນຳວ່າ: “ຄວາມອຸກໃຈຂອງທ່ານທັງຫຼາຍທັງໝົດຈົ່ງປົງໄວ້ຢູ່ເທິງພະອົງ ເພາະວ່າພະອົງລ້ຽງຮັກສາ [ຫ່ວງໃຍ] ພວກທ່ານ.” (1 ເປໂຕ 5:7) ຢ່າລືມວ່າບັນຫາຕ່າງໆທີ່ທ່ານປະສົບນັ້ນບໍ່ໄດ້ມາຈາກພະເຈົ້າ. (ຢາໂກໂບ 1:13) ໃນຂະນະທີ່ທ່ານໃກ້ຊິດກັບພະອົງ ພະອົງຈະຊ່ວຍທ່ານໃຫ້ມີທາງອອກທີ່ດີທີ່ສຸດ. (ເອຊາອີ 41:10) ໃຫ້ທ່ານ “ຖອກໃຈອອກຕໍ່ໜ້າພະອົງ.”—ຄຳເພງ 62:8
ທ່ານຈະໄດ້ກຳລັງໃຈເມື່ອອ່ານແລະສຶກສາຄຳພີໄບເບິນທຸກໆມື້. ຜົນກໍຄື ທ່ານຈະເຫັນວິທີທີ່ພະເຢໂຫວາ “ເລົ້າໂລມ [ປອບໂຍນ] ພວກເຮົາໃນການທຸກໂສກຂອງພວກເຮົາທຸກຢ່າງ.” (2 ໂກລິນໂທ 1:3, 4; ໂລມ 15:4) ພະອົງສັນຍາວ່າຈະປະທານ “ຄວາມສຸກສຳລານແຫ່ງພະເຈົ້າອັນເຫຼືອລົ້ນທີ່ຈະເຂົ້າໃຈ” ໃຫ້ແກ່ທ່ານ.—ຟີລິບ 4:6, 7, 13
ຄຳແນະນຳ:
-
ໃຫ້ອະທິດຖານເຖິງພະເຢໂຫວາ ຂໍໃຫ້ມີຄວາມສະຫງົບໃຈແລະມີຄວາມຄິດປອດໂປ່ງ
-
ໃຫ້ທົບທວນທາງເລືອກທັງໝົດທີ່ມີຢູ່ນັ້ນແລະໃຫ້ເລືອກວິທີທີ່ດີທີ່ສຸດສຳລັບທ່ານ
2 ເບິ່ງແຍງຕົວເອງແລະຄອບຄົວ
ຄຳພີໄບເບິນແນະນຳວ່າ: “ໃຈຂອງຄົນປັນຍາໄດ້ຄວາມຮູ້ມາກຂຶ້ນ.” (ສຸພາສິດ 18:15) ໃຫ້ເກັບກຳຂໍ້ມູນຕາມສະພາບຄວາມເປັນຈິງທັງໝົດ ໃຫ້ເລືອກເຟັ້ນເບິ່ງວ່າສິ່ງໃດເໝາະກັບຄວາມຈຳເປັນຂອງທຸກຄົນໃນຄອບຄົວ. ຈາກນັ້ນ ບອກໃຫ້ເຂົາເຈົ້າຮູ້ແລະຮັບຟັງຄວາມຄິດເຫັນຂອງເຂົາເຈົ້ານຳ.—ສຸພາສິດ 20:5
ຖ້າຫາກວ່າຄົນທີ່ເຮົາຮັກເສຍຊີວິດເດ? ບໍ່ຕ້ອງອາຍທີ່ຈະໂສກເສົ້າອອກມາ. ຢ່າລືມວ່າແມ່ນແຕ່ພະເຍຊູກໍ “ໄດ້ຮ້ອງໄຫ້ນ້ຳຕາໄຫຼອອກ.” (ໂຢຮັນ 11:35; ຜູ້ເທສະໜາປ່າວປະກາດ 3:4) ສິ່ງທີ່ສຳຄັນແມ່ນຕ້ອງໄດ້ພັກຜ່ອນແລະນອນຫຼັບຢ່າງພຽງພໍ. (ຜູ້ເທສະໜາປ່າວປະກາດ 4:6) ການເຮັດເຊັ່ນນັ້ນຈະຊ່ວຍທ່ານໃຫ້ຮັບມືກັບຄວາມໂສກເສົ້າໄດ້ງ່າຍຂຶ້ນ.
ຄຳແນະນຳ:
-
ໃຫ້ລົມກັນເປັນປະຈຳພາຍໃນຄອບຄົວ ເຖິງວ່າຈະບໍ່ມີຄວາມທຸກໃດໆກໍຕາມ ເມື່ອມີບັນຫາເກີດຂຶ້ນ ເຂົາເຈົ້າຈະສະດວກໃຈທີ່ຈະເວົ້ານຳທ່ານ
-
ໃຫ້ລົມກັບຜູ້ທີ່ອາດເຄີຍປະສົບກັບສະພາບການທີ່ຄ້າຍໆກັນ
3 ຂໍການຊ່ວຍເຫຼືອທີ່ຈຳເປັນ
ຄຳພີໄບເບິນແນະນຳວ່າ: “ສ່ຽວຮັກຢູ່ທຸກເວລາແລະອ້າຍນ້ອງຜູ້ໜຶ່ງໄດ້ເກີດເພື່ອຈະຊ່ອຍໃນເວລາຂັດສົນຫຼາຍ.” (ສຸພາສິດ 17:17) ໝູ່ເພື່ອນກໍຢາກຊ່ວຍທ່ານ ແຕ່ເຂົາເຈົ້າອາດຈະບໍ່ຮູ້ວ່າຈະຊ່ວຍຫຍັງໄດ້. ດັ່ງນັ້ນ ຖ້າທ່ານມີສິ່ງທີ່ຈຳເປັນໃຫ້ເຂົາເຈົ້າຊ່ວຍກໍຢ່າເກງໃຈ. (ສຸພາສິດ 12:25) ບໍ່ພຽງແຕ່ເທົ່ານັ້ນ ໃຫ້ຂໍຄວາມຊ່ວຍເຫຼືອຈາກຜູ້ທີ່ມີຄວາມເຂົ້າໃຈໃນຂໍ້ຄຳພີໄບເບິນ ເພື່ອທ່ານຈະຮູ້ວິທີໃຊ້ຫຼັກການຕ່າງໆໃນຄຳພີໄບເບິນເຊິ່ງຈະຊ່ວຍທ່ານໃຫ້ຮັບມືກັບບັນຫາໄດ້.—ຢາໂກໂບ 5:14
ນອກຈາກນັ້ນ ທ່ານຈະໄດ້ຮັບກຳລັງໃຈເມື່ອທ່ານຄົບຫາເປັນປະຈຳກັບຜູ້ທີ່ມີຄວາມເຊື່ອແລະໄວ້ວາງໃຈໃນຄຳສັນຍາຂອງພະເຢໂຫວາ. ທ່ານເອງຍັງຈະໄດ້ການໜູນໃຈຫຼາຍເຊັ່ນກັນເມື່ອທ່ານຊ່ວຍເຫຼືອຄົນທີ່ຕ້ອງການກຳລັງໃຈໃນຍາມທີ່ເຂົາເຈົ້າທໍ້ຖອຍໃຈ. ທ່ານຕ້ອງຊ່ວຍຄົນອື່ນໃຫ້ມີຄວາມເຊື່ອໃນພະເຢໂຫວາແລະໃນຄຳສັນຍາຂອງພະອົງ. ໃຫ້ຫາແນວເຮັດຢູ່ສະເໝີໂດຍການຊ່ວຍເຫຼືອຄົນອື່ນໃນສິ່ງທີ່ເຂົາເຈົ້າຈຳເປັນ ແລະບໍ່ຕ້ອງແຍກຕົວຢູ່ຕ່າງຫາກຈາກຄົນທີ່ຮັກແລະຫ່ວງໃຍທ່ານ.—ສຸພາສິດ 18:1; 1 ໂກລິນໂທ 15:58
ຄຳແນະນຳ:
-
ໃຫ້ລົມກັບໝູ່ສະໜິດແລະຂໍໃຫ້ລາວຊ່ວຍທ່ານ
-
ໃຫ້ເວົ້າແບບເຈາະຈົງແລະບໍ່ຕ້ອງປິດບັງໃນສິ່ງທີ່ທ່ານຕ້ອງການຂໍຄວາມຊ່ວຍເຫຼືອ