၁ ယိၤဟၣ် ၅:၁-၂၁
၅ ပှၤကိးဂၤဒဲးလၢ အနာ်လၢ ယ့ၣ်ၡူးမ့ၢ်ခရံာ်န့ၣ် အဝဲသ့ၣ်မ့ၢ် ကစၢ်ယွၤအဖိတဖၣ်လီၤ.+ ဒီးပှၤကိးဂၤဒဲးလၢ အအဲၣ် ပၢ်ကစၢ်ယွၤန့ၣ် အဲၣ်ဝဲကစၢ်ယွၤ အဖိတဖၣ် စ့ၢ်ကီးလီၤ.
၂ ပသ့ၣ်ညါလၢ ပအဲၣ်ကစၢ်ယွၤအဖိတဖၣ်+ ခီဖျိလၢ ပအဲၣ်ကစၢ်ယွၤ ဒီးမၤထွဲ အတၢ်မၤလိာ်တဖၣ်လီၤ.
၃ တၢ်အဲၣ်ကစၢ်ယွၤ အခီပညီန့ၣ် မ့ၢ်ဝဲပမၤထွဲ အတၢ်မၤလိာ်တဖၣ်+ ဒီးအတၢ်မၤလိာ်တဖၣ်န့ၣ် တကဲထီၣ် တၢ်ဝံဃၢလၢပဂီၢ်ဘၣ်,+
၄ မ့ၢ်လၢ ပှၤကိးဂၤဒဲးလၢ အမ့ၢ် ကစၢ်ယွၤအဖိတဖၣ်န့ၣ် မၤနၢၤဟီၣ်ခိၣ်အဃိလီၤ.+ ဒီးလၢပတၢ်နာ်အဃိ+ ပမၤနၢၤဟီၣ်ခိၣ်လီၤ.
၅ မ့ၢ်မတဂၤမၤနၢၤ ဟီၣ်ခိၣ်သ့လဲၣ်.+ မ့ၢ်ပှၤလၢအနာ်ဝဲလၢ ယ့ၣ်ၡူးမ့ၢ် ကစၢ်ယွၤအဖိခွါန့ၣ် တမ့ၢ်ဘၣ်ဧါ.+
၆ ယ့ၣ်ၡူးခရံာ်မ့ၢ်ပှၤလၢ အဟဲခီဖျိ ထံဒီးတၢ်သွံၣ်လီၤ. ဒီးအဝဲတဟဲထဲလၢ ထံတခါဘၣ်.+ အဝဲဟဲလၢ ထံဒီးတၢ်သွံၣ်လီၤ.+ ဒီးသးစီဆှံ အုၣ်အသး+ မ့ၢ်လၢ သးစီဆှံန့ၣ် မ့ၢ်ဝဲ တၢ်မ့ၢ်တၢ်တီ အဃိလီၤ.
၇ တၢ်လၢအပာ်ဖျါထီၣ် တၢ်အုၣ်အသးန့ၣ် အိၣ်ဝဲသၢမံၤ လၢအမ့ၢ်
၈ သးစီဆှံ,+ ထံ+ ဒီးတၢ်သွံၣ်+ ဒီးတၢ်သၢမံၤအံၤ အတၢ်အုၣ်အသးန့ၣ် လီၤပလိာ်လိာ်အသးလီၤ.
၉ ပတူၢ်လိာ် ပှၤဟီၣ်ခိၣ်ဖိ အတၢ်အုၣ်အသး ဘၣ်ဆၣ် ကစၢ်ယွၤ အတၢ်အုၣ်အသးန့ၣ် မ့ၢ်တၢ်လၢအဂ့ၤ ဒိၣ်န့ၢ်အန့ၣ်လီၤ. တၢ်အုၣ်အသးလၢ ကစၢ်ယွၤဟ့ၣ်ဝဲန့ၣ် မ့ၢ်တၢ်အုၣ်အသးလၢ အဘၣ်ဃးဒီး အဖိခွါအဂ့ၢ်လီၤ.
၁၀ ပှၤတဂၤလၢ အနာ် ကစၢ်ယွၤအဖိခွါန့ၣ် အိၣ်ဒီးတၢ်အုၣ်အသးလၢ အနီၢ်ကစၢ် အသးပူၤလီၤ. ပှၤတဂၤလၢ အတနာ် ကစၢ်ယွၤဘၣ်န့ၣ် လီၤဂာ်လၢ အဒုးကဲထီၣ် ကစၢ်ယွၤလၢ ပှၤလံၣ်တၢ်လီတၢ်+ မ့ၢ်လၢ အတနာ်ဝဲ တၢ်အုၣ်အသးလၢ ကစၢ်ယွၤဟ့ၣ်လီၤဝဲ လၢအဘၣ်ဃးဒီး အဖိခွါဘၣ်အဃိလီၤ.
၁၁ ဒီးတၢ်အုၣ်သးန့ၣ် မ့ၢ်အအံၤ, ကစၢ်ယွၤဟ့ၣ်လီၤပှၤ တၢ်မူအထူအယိာ်+ ဒီးပဒိးန့ၢ်ဘၣ် တၢ်မူအထူအယိာ်အံၤ ခီဖျိ အဖိခွါလီၤ.+
၁၂ ပှၤလၢအတူၢ်လိာ် ဖိခွါန့ၣ် ဒိးန့ၢ်ဘၣ် တၢ်မူအထူအယိာ် ဒီးပှၤလၢအတတူၢ်လိာ် ကစၢ်ယွၤအဖိခွါဘၣ်န့ၣ် တဒိးန့ၢ်ဘၣ် တၢ်မူအထူအယိာ်ဘၣ်.+
၁၃ ယကွဲးန့ၢ်သု တၢ်ဂ့ၢ်တဖၣ်အံၤ ဒ်သိးသုဝဲလၢ အစူၢ်က့ၤနာ်က့ၤ ကစၢ်ယွၤအဖိခွါအမံၤန့ၣ်+ ကသ့ၣ်ညါလၢ သုကဒိးန့ၢ်ဘၣ် တၢ်မူအထူအယိာ်+ အဂီၢ်လီၤ.
၁၄ ဒီးပနာ်န့ၢ် ကစၢ်ယွၤလၢ+ ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ် အဝဲဒိကနၣ်ပှၤလီၤ.+
၁၅ ဒီးပသ့ၣ်ညါလၢ အဝဲဒိကနၣ် ကယဲၢ်တၢ်လၢ ပဃ့သ့ၣ်တဖၣ်လီၤ. အဃိ ပသ့ၣ်ညါလၢ ပကဒိးန့ၢ်ဘၣ် တၢ်လၢပဃ့အီၤ မ့ၢ်လၢ ပဃ့တၢ်လၢ အအိၣ်အဃိလီၤ.+
၁၆ ပှၤတဂၤဂၤ မ့ၢ်ထံၣ်ချုး အဒီပုၢ်ဝဲၢ် မၤတၢ်ဒဲးဘးလၢ အတဆှၢအီၤဆူတၢ်သံဘၣ်န့ၣ် အဝဲကဃ့တၢ်လၢအဂီၢ် ဒီးကစၢ်ယွၤ ကဟ့ၣ်အီၤလၢတၢ်မူလီၤ.+ မ့ၢ်လီၤ, ယတဲဘၣ်ဃးဒီး ပှၤလၢအမၤ တၢ်ဒဲးဘးလၢ အတဆှၢအီၤဆူတၢ်သံဘၣ် အဂ့ၢ်လီၤ. တၢ်ဒဲးဘးလၢ အဆှၢပှၤဆူတၢ်သံန့ၣ် အိၣ်ဝဲတကလုာ်လီၤ.+ ယတမၢပှၤဃ့တၢ် လၢပှၤလၢအမၤ တၢ်ဒဲးဘးတကလုာ်အံၤ အဂီၢ်ဘၣ်.
၁၇ တၢ်မၤကမၣ် တၢ်သိၣ်တၢ်သီခဲလၢာ်န့ၣ် မ့ၢ်တၢ်ဒဲးဘးလီၤ.+ ဘၣ်ဆၣ် တၢ်ဒဲးဘးလၢ အတဆှၢပှၤဆူတၢ်သံဘၣ်န့ၣ် အိၣ်ဝဲလီၤ.
၁၈ ပသ့ၣ်ညါလၢပှၤကိးဂၤဒဲးလၢ အမ့ၢ် ကစၢ်ယွၤအဖိတဖၣ်န့ၣ် တဆဲးမၤ တၢ်ဒဲးဘးဘၣ်. ဒီးမ့ၢ်လၢ ပှၤတဂၤ* လၢအမ့ၢ် ကစၢ်ယွၤအဖိခွါန့ၣ် ကွၢ်ထွဲအဝဲသ့ၣ်အဃိ မုၣ်ကီၤလံၢ်* ဖီၣ်န့ၢ်အဝဲသ့ၣ်တန့ၢ်ဘၣ်.+
၁၉ ပသ့ၣ်ညါလၢ ပဘၣ်ဃးဒီး ကစၢ်ယွၤ ဘၣ်ဆၣ် ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤလီၤ.+
၂၀ ဘၣ်ဆၣ် ပသ့ၣ်ညါလၢ ကစၢ်ယွၤအဖိခွါန့ၣ် ဟဲ+ ဟ့ၣ်ပှၤတၢ်နၢ်ပၢၢ် ဒ်သိးပကဒိးန့ၢ်ဘၣ် တၢ်သ့ၣ်ညါလၢ အဘၣ်ဃးဒီး ကစၢ်ယွၤလၢ အမ့ၢ်အတီတဂၤ အဂီၢ်လီၤ. ခီဖျိလၢ အဖိခွါ ယ့ၣ်ၡူးခရံာ်အဃိ ပလဲၤတၢ်ဒီး ကစၢ်ယွၤလၢ အမ့ၢ်အတီတဂၤအံၤလီၤ.+ အဝဲမ့ၢ် ကစၢ်ယွၤလၢ အမ့ၢ်အတီ ဒီးမ့ၢ်ဝဲ တၢ်မူအထူအယိာ်လီၤ.+
၂၁ ဖိဆံးသ့ၣ်ဧၢ, ဟးဆှဲး တၢ်ဂီၤတၢ်ဖှီၣ်တဖၣ်တက့ၢ်.+
