ဧ့ၤဘြံၤ ၂:၁-၁၈
၂ လၢတၢ်န့ၣ်အဃိ ပကဘၣ်သးစၢၢ်ဆၢ တၢ်လၢပနၢ်ဟူတ့ၢ်အီၤတဖၣ်+ လီၤတံၢ်လီၤဆဲး ဒ်သိးပသုတလီၤထွံလီၤယွၤ နီတဘျီတဂ့ၤအဂီၢ်လီၤ.+
၂ တၢ်ကတိၤတဖၣ်* လၢအဘၣ်တၢ်ဟ့ၣ်လီၤအီၤ ခီဖျိလၢ မူခိၣ်ကလူးတဖၣ်+ မ့ၢ်ဂၢၢ်ကျၢၤဝဲ ဒီးပှၤလၢအမၤကမၣ်တၢ် ဒီးတဒိကနၣ်တၢ်ဘၣ်တဖၣ် မ့ၢ်ဘၣ်တၢ်စံၣ်ညီၣ်အီၤ ကိးဂၤဒဲး ဒ်တၢ်လၢအတီဝဲလိၤဝဲ အသိးန့ၣ်+
၃ ပဝဲဒၣ်အံၤ ပမ့ၢ်တဆဲးပာ်လုၢ်ပာ်ပှ့ၤ တၢ်အုၣ်က့ၤခီၣ်က့ၤလၢ အဒိၣ်ထဲထဲအံၤဘၣ်န့ၣ် ပပူၤဖျဲးကသ့ဒ်လဲၣ်.+ ပကစၢ်န့ၣ် စံၣ်တဲၤတဲလီၤ တၢ်အုၣ်က့ၤခီၣ်က့ၤအံၤအဂ့ၢ် အဆိကတၢၢ်+ ဒီးပှၤလၢအနၢ်ဟူအီၤတဖၣ်န့ၣ် ပာ်ဂၢၢ်ပာ်ကျၢၤန့ၢ်ပှၤလၢ အမ့ၢ်တၢ်မ့ၢ်တၢ်တီလီၤ.
၄ ဒီးကစၢ်ယွၤ အုၣ်ဃုာ်အသးဒီးအဝဲသ့ၣ် ခီဖျိလၢ တၢ်ပနီၣ်လီၤလး, တၢ်လီၤလး, တၢ်ဖံးတၢ်မၤ လၢအအိၣ်ဒီး အစိအကမီၤအါမံၤ+ ဒီးခီဖျိလၢ အဟ့ၣ်နီၤလီၤ သးစီဆှံအတၢ်ဟ့ၣ်တဖၣ် ဒ်အတၢ်ဘၣ်သးအသိးလီၤ.+
၅ ဟီၣ်ခိၣ်လၢအကဟဲ+ လၢပတဲအဂ့ၢ်န့ၣ် ကစၢ်ယွၤ တဒုးပၢဝဲမူခိၣ်ကလူးတဖၣ်ဘၣ်.
၆ ဘၣ်ဆၣ် တၢ်ကွဲးအသးအိၣ်ဝဲတတီၤဖဲ ပှၤအုၣ်အသးတဂၤ တဲဝဲလၢ “ပှၤဟီၣ်ခိၣ်ဖိ မ့ၢ်တၢ်မနုၤလၢ နကသ့ၣ်နီၣ်အီၤလဲၣ် ဒီးပှၤကညီဖိခွါ မ့ၢ်တၢ်မနုၤလၢ နကကွၢ်ထွဲအီၤအဂီၢ်လဲၣ်.+
၇ နဒုးကဲထီၣ်အီၤလၢ အပတီၢ်ဖုၣ်န့ၢ်ဒံး မူခိၣ်ကလူးတဖၣ်တစဲး ဒီးနဟ့ၣ်လီၤအီၤလၢ တၢ်လၤကပီၤဒီး တၢ်ကဟုကညီၢ်လီၤ. ဒီးနပာ်ထီၣ်အီၤလၢ နစုတၢ်ဘၣ်တ့တဖၣ် အဖီခိၣ်လီၤ.
၈ ဒီးနပာ်လီၤ တၢ်ခဲလၢာ်လၢ အခီၣ်အဖီလာ်လီၤ.”+ မ့ၢ်လၢ ကစၢ်ယွၤ ပာ်တၢ်ခဲလၢာ်လၢ အဖီလာ်အဃိ+ တၢ်လၢအတအိၣ်လၢ အဖီလာ်ဘၣ်န့ၣ်+ တအိၣ်နီတမံၤဘၣ်. ဘၣ်ဆၣ် ခဲအံၤန့ၣ် ပတထံၣ်ဘၣ်လၢ တၢ်ခဲလၢာ်အိၣ်လၢ ယ့ၣ်ၡူးအဖီလာ်ဒံးဘၣ်.+
၉ ဘၣ်ဆၣ် ယ့ၣ်ၡူးလၢ ကစၢ်ယွၤဒုးကဲထီၣ်အီၤလၢ အပတီၢ်ဖုၣ်န့ၢ်ဒံး မူခိၣ်ကလူးတဖၣ်တစဲး+ ဒီးဟ့ၣ်လီၤအီၤလၢ တၢ်လၤကပီၤဒီး တၢ်ကဟုကညီၢ် မ့ၢ်လၢ အဝဲတူၢ်သံအသး အဃိန့ၣ်+ ပထံၣ်အီၤလီၤ. အဝဲတူၢ်သံအသးလၢ ပှၤကိးဂၤဒဲးအဂီၢ်လၢ+ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ်အဃိလီၤ.
၁၀ တၢ်ခဲလၢာ် ဟဲအိၣ်ထီၣ် လၢကစၢ်ယွၤ အလၤကပီၤအဂီၢ် ဒီးအိၣ်ထီၣ်ဝဲ ခီဖျိလၢအီၤလီၤ. အဃိ ဒ်သိးအကဒုးလၤကပီၤ ဖိခွါအါဂၤအဂီၢ်+ ကြၢးဝဲလၢ အဒုးတုၤထီၣ်ထီၣ်ဘး တၢ်အခိၣ်တဂၤန့ၣ် လၢလၢပှဲၤပှဲၤ ခီဖျိလၢ တၢ်နးတၢ်ဖှီၣ်တဖၣ်လီၤ.+ ကစၢ်ယွၤ အုၣ်က့ၤခီၣ်က့ၤ အဝဲသ့ၣ် ခီဖျိ တၢ်အခိၣ်တဂၤန့ၣ်လီၤ.+
၁၁ ယ့ၣ်ၡူး လၢအမ့ၢ် ပှၤလၢအပာ်စီဆှံတၢ် ဒီးပှၤလၢအဘၣ် တၢ်ပာ်စီဆှံအီၤတဖၣ်န့ၣ်+ အပၢ်မ့ၢ်တဂၤဃီလီၤ.+ လၢတၢ်ဂ့ၢ်အံၤအဃိ ယ့ၣ်ၡူးတမဲာ်ဆှးလၢ အကကိးအဝဲသ့ၣ်လၢ ဒီပုၢ်ဝဲၢ်ခွါတဖၣ်ဘၣ်.+
၁၂ ဒ်အဝဲတဲဝဲအသိး “ယကဘိးဘၣ်သ့ၣ်ညါ နမံၤလၢ ယဒီပုၢ်ဝဲၢ်ခွါတဖၣ်အအိၣ် ဒီးလၢတၢ်အိၣ်ဖှိၣ်အခၢၣ်သးန့ၣ် ယကသးဝံၣ် စံးထီၣ်ပတြၢၤနၤလီၤ.”+
၁၃ တကးဒံးဘၣ် အတဲဝဲလၢ “ယကနာ်န့ၢ်အီၤလီၤ.”+ ဒီးအတဲစ့ၢ်ကီးလၢ “ယအိၣ်ဖဲအံၤဒီး ဖိသၣ်တဖၣ်လၢ ယဟိဝၤယွၤ* ဟ့ၣ်လီၤယၤလီၤ.”+
၁၄ မ့ၢ်လၢ “ဖိသၣ်တဖၣ်” မ့ၢ်သွံၣ်ထံဖံးညၣ်အဃိ အဝဲစ့ၢ်ကီးကဲထီၣ် သွံၣ်ထံဖံးညၣ်လီၤ.+ အဝဲမၤဝဲဒ်န့ၣ်န့ၣ် မ့ၢ်ဒ်သိး လၢအတၢ်သံအဃိ အကမၤဟးဂီၤ ပှၤလၢအဒုးအိၣ်ထီၣ် တၢ်သံသ့တဂၤ+ လၢအမ့ၢ် မုၣ်ကီၤလံၢ်+
၁၅ ဒီးဒ်သိး အကမၤထူၣ်ဖျဲးထီၣ်ကွံာ် ပှၤကိးဂၤဒဲးလၢ အလီၤဂာ်ဒီးကုၢ်လၢ အသးသမူဒီတစိၤ ခီဖျိလၢ အဝဲသ့ၣ်ပျံၤတၢ်သံအဃိလီၤ.+
၁၆ နီၢ်ကီၢ်န့ၣ် တမ့ၢ်လၢအဝဲမၤစၢၤ မူခိၣ်ကလူးတဖၣ်ဘၣ်, မ့ၢ်ဒၣ်အမၤစၢၤ စီၤအၤဘြၤဟၣ် အချံအသၣ်လီၤ.+
၁၇ လၢတၢ်န့ၣ်အဃိ အဝဲကဘၣ်ကဲထီၣ်ဒ်အ “ဒီပုၢ်ဝဲၢ်ခွါတဖၣ်” လၢတၢ်ခဲလၢာ်အပူၤ+ ဒ်သိး အကကဲထီၣ် ပှၤလုၢ်တၢ်ခိၣ် အဒိၣ်ကတၢၢ်လၢ အမၤကစၢ်ယွၤအတၢ်မၤ ပှဲၤဒီးတၢ်သးကညီၤ ဒီးအိၣ်ဒီးတၢ်သးတီ တကးဒံးဘၣ် ဒ်သိးအကဟ့ၣ်လုၢ်ထီၣ် တၢ်လုၢ်တၢ်ပာ်လၢ+ ပှၤဟီၣ်ခိၣ်ဖိ အတၢ်ဒဲးဘးအဂီၢ်လၢ+ အကဒုးအိၣ်ဃူအိၣ်ဖိး အဝဲသ့ၣ်ဒီးကစၢ်ယွၤလီၤ.
၁၈ မ့ၢ်လၢ အနီၢ်ကစၢ်ဒၣ်ဝဲ ဘၣ်တၢ်မၤကွၢ်အီၤ+ ဒီးတူၢ်ဘၣ် တၢ်နးတၢ်ဖှီၣ်တဖၣ်အဃိ အဝဲမၤစၢၤဝဲပှၤလၢ အဘၣ်တၢ်မၤကွၢ်အီၤတဖၣ် ဘၣ်ဝဲလီၤ.+
