ရိမ့ၤ ၁၄:၁-၂၃
၁၄ ပှၤလၢအတၢ်နာ် အဂံၢ်စၢ်ဘါစၢ်တဂၤန့ၣ် တူၢ်လိာ်အီၤတက့ၢ်.+ ဒီးပှၤလၢအတၢ်ထံၣ် တဒ်သိးဒီးနၤဘၣ်န့ၣ် တဘၣ်စံၣ်ညီၣ် အဝဲသ့ၣ်တဂ့ၤ.
၂ ပှၤတဂၤအတၢ်နာ်န့ၣ် ဟ့ၣ်အီၤအခွဲး လၢအကအီၣ်တၢ် ကိးမံၤဒဲးလီၤ. မ့မ့ၢ် ပှၤလၢအတၢ်နာ် အဂံၢ်စၢ်ဘါစၢ်န့ၣ် အီၣ်ဝဲထဲ တၢ်ဒိးတၢ်လၣ်တဖၣ်လီၤ.
၃ မ့ၢ်လၢ ကစၢ်ယွၤ တူၢ်လိာ်အီၤလံအဃိ ပှၤတဂၤလၢ အအီၣ်တၢ်န့ၣ် တဘၣ်ဆိကမိၣ်ဆံး ပှၤတဂၤလၢ အတအီၣ်တၢ်ဘၣ်န့ၣ်တဂ့ၤ.+ ဒီးပှၤတဂၤလၢ အတအီၣ်တၢ်ဘၣ်န့ၣ် တဘၣ်စံၣ်ညီၣ် ပှၤတဂၤလၢ အအီၣ်တၢ်န့ၣ်တဂ့ၤ.
၄ နကစံၣ်ညီၣ် ပှၤဂၤအခ့အပှၤန့ၣ် နမ့ၢ်မတဂၤလဲၣ်.+ တၢ်လၢအဝဲမၤဝဲတဖၣ်န့ၣ် မ့ၢ်အဘၣ်ဧါ အကမၣ်ဧါန့ၣ်* အကစၢ်ကဆၢတဲာ်ဝဲလီၤ.+ ဒီးမ့ၢ်လၢ ယဟိဝၤယွၤ* မၤစၢၤအီၤအဃိ အဒိးန့ၢ်ဘၣ် အတၢ်ဘၣ်သးသ့လီၤ.
၅ ပှၤတဂၤဆိကမိၣ်ဝဲလၢ မုၢ်နံၤတနံၤန့ၣ် အရ့ဒိၣ်န့ၢ်ဒံး မုၢ်နံၤအဂၤတဖၣ်လီၤ.+ မ့မ့ၢ် ပှၤအဂၤတဂၤန့ၣ် ဆိကမိၣ်ဝဲလၢ မုၢ်နံၤခဲလၢာ် မ့ၢ်တၢ်ဒ်သိးသိးလီၤ.+ မ်ပှၤတဂၤစုာ်စုာ် နာ်ဝဲသပှၢ်တၢၢ် ဒ်အနီၢ်ကစၢ် ဆိကမိၣ်ဝဲ အသိးတက့ၢ်.
၆ ပှၤတဂၤလၢ အပာ်ဒိၣ် မုၢ်နံၤတနံၤန့ၣ် ပာ်ဒိၣ်ဝဲလၢ ယဟိဝၤယွၤအဂီၢ်လီၤ. ဒီးပှၤတဂၤလၢ အအီၣ်တၢ်န့ၣ် အီၣ်ဝဲလၢ ကမၤလၤကပီၤ ယဟိဝၤယွၤအဂီၢ် မ့ၢ်လၢ အစံးဘျုးစံးဖှိၣ် ကစၢ်ယွၤလၢ+ တၢ်အီၣ်အံၤအဃိလီၤ. ဒီးပှၤတဂၤလၢ အတအီၣ်တၢ်ဘၣ်န့ၣ် တအီၣ်တၢ်ဘၣ် လၢယဟိဝၤယွၤအဂီၢ် ဘၣ်ဆၣ် အစံးဘျုးစံးဖှိၣ်ဒံး ကစၢ်ယွၤလီၤ.+
၇ ပတအိၣ်မူထဲလၢ ပနီၢ်ကစၢ်အဂီၢ် နီတဂၤဘၣ်+ ဒီးပတသံထဲလၢ ပနီၢ်ကစၢ်အဂီၢ် နီတဂၤဘၣ်.
၈ ပမ့ၢ်မူန့ၣ် ပမူလၢ ယဟိဝၤယွၤအဂီၢ်+ ဒီးပမ့ၢ်သံန့ၣ် ပသံလၢ ယဟိဝၤယွၤအဂီၢ်လီၤ. အဃိ ပသံမ့ၢ်ဂ့ၤ, ပမူမ့ၢ်ဂ့ၤ ပမ့ၢ်ယဟိဝၤယွၤ အတၢ်လီၤ.+
၉ နီၢ်ကီၢ်န့ၣ် ခရံာ်သံ ဒီးသမူထီၣ်က့ၤဝဲန့ၣ် မ့ၢ်ဒ်သိး အကကဲထီၣ် ကစၢ်လၢ ပှၤသံဒီးပှၤမူအဖီခိၣ်လီၤ.+
၁၀ ဘၣ်မနုၤအဃိ နစံၣ်ညီၣ်နဒီပုၢ်ဝဲၢ်လဲၣ်.+ ဒီးဘၣ်မနုၤအဃိ နဆိကမိၣ်ဆံး နဒီပုၢ်ဝဲၢ်လဲၣ်. ပဝဲခဲလၢာ်န့ၣ် ပကဘၣ်ဆၢထၢၣ်လၢ ကစၢ်ယွၤ အတၢ်စံၣ်ညီၣ် အလီၢ်ပစိာ်* အမဲာ်ညါလီၤ.+
၁၁ တၢ်ကွဲးအသး အိၣ်ဝဲလၢ “ယဟိဝၤယွၤ တဲဝဲလၢ ‘ဒ်ယအိၣ်မူယဲအသိး+ ပှၤခဲလၢာ် ကချံးလီၤအခီၣ်လၢ ယမဲာ်ညါ ဒီးပှၤခဲလၢာ် ကအၢၣ်လီၤတူၢ်လိာ်ဝဲ ပျီပျီလၢ ယမ့ၢ်ကစၢ်ယွၤလီၤ.’”+
၁၂ အဃိ ပဝဲတဂၤစုာ်စုာ် ပကဘၣ်ဟ့ၣ် တၢ်စံးဆၢလၢ ကစၢ်ယွၤအအိၣ်လၢ ပနီၢ်ကစၢ်လီၤ.+
၁၃ အဃိ တဘၣ်စံၣ်ညီၣ်လိာ်သုသး တဂၤဒီးတဂၤလၢၤတဂ့ၤ.+ လၢတၢ်န့ၣ်အလီၢ် သုကဘၣ် ပာ်လီၤသုသး ဂၢၢ်ဂၢၢ်ကျၢၤကျၢၤ ဒ်သိး သုသုတမၤတၢ်တမံၤမံၤလၢ ကမၤစၢ်လီၤ သုဒီပုၢ်ဝဲၢ်တဂၤဂၤ အတၢ်နာ် မ့တမ့ၢ် ဒုးအိၣ်ထီၣ် တၢ်လီၤဃံၢ်အလီၢ်လၢအဂီၢ် နီတဘျီတဂ့ၤလီၤ.+
၁၄ ဒ်ကစၢ်ယ့ၣ်ၡူး အပျဲၢ်အဘီၣ်အသိး ယသ့ၣ်ညါ ဒီးယနာ်သပှၢ်တၢၢ်လၢ တၢ်အီၣ်လၢ အတကဆှီဒၣ်အတၢ်ဒၣ်ဝဲန့ၣ် တအိၣ်နီတမံၤဘၣ်.+ ဘၣ်ဆၣ် ပှၤတဂၤ မ့ၢ်ဆိကမိၣ်လၢ တၢ်အီၣ်တမံၤမံၤ တကဆှီဘၣ် ဒီးအမ့ၢ်အီၣ်ဝဲန့ၣ် ကမၣ်ဝဲလီၤ.*
၁၅ နဒီပုၢ်ဝဲၢ်တဂၤ အသးမ့ၢ်တမုာ်ဘၣ်လၢ တၢ်လၢနအီၣ်အီၤအဃိန့ၣ် မ့ၢ်ဒၣ်နတပာ်ဖျါထီၣ် တၢ်အဲၣ်တၢ်ကွံလၢၤဘၣ်.+ ခရံာ်တူၢ်သံအသးလၢ ပှၤတဂၤန့ၣ်အဂီၢ်လီၤ. လၢနတၢ်အီၣ်အဃိ တဘၣ်မၤဟးဂီၤ ပှၤတဂၤန့ၣ်အတၢ်နာ်တဂ့ၤ.+
၁၆ အဃိ တၢ်လၢနထံၣ်လၢအဂ့ၤန့ၣ် ပှၤဂၤမ့ၢ်ကတဲအၢတဲသီနၤန့ၣ် တဘၣ်မၤအီၤတဂ့ၤ.
၁၇ ကစၢ်ယွၤအဘီမုၢ်န့ၣ် တဘၣ်ဃးဒီး တၢ်အီၣ်တၢ်အီဘၣ်.+ အဘၣ်ဃးဒီး တၢ်တီတၢ်လိၤ, တၢ်ဃူတၢ်ဖိး ဒီးတၢ်သူၣ်ခုသးခုလၢ သးစီဆှံအဃိလီၤ.
၁၈ ပှၤလၢ အကဲခရံာ်အကုၢ် ဒီးအိၣ်ဝဲဒီး တၢ်ဂ့ၤတၢ်ဝါတဖၣ်န့ၣ် ကစၢ်ယွၤတူၢ်လိာ်ဝဲ ဒီးပှၤဟီၣ်ခိၣ်ဖိ ဘၣ်သူၣ်ဘၣ်သးဝဲလီၤ.
၁၉ အဃိ မ်ပဂုာ်ကျဲးစၢး မၤတၢ်လၢ အကဒုးအိၣ်ထီၣ် တၢ်ဃူတၢ်ဖိး+ ဒီးတၢ်လၢကကဲထီၣ် တၢ်ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤတက့ၢ်.+
၂၀ တဘၣ်မၤလီၤပှီၢ် ကစၢ်ယွၤ အတၢ်မၤလၢ တၢ်အီၣ်အဃိလၢၤတဂ့ၤ.+ မ့ၢ်လံ, တၢ်ခဲလၢာ်န့ၣ် ကဆှီဝဲလီၤ. ဘၣ်ဆၣ် ပှၤတဂၤ မ့ၢ်အီၣ်တၢ်လၢအကဲထီၣ် တၢ်လီၤဃံၢ်အလီၢ်န့ၣ် မ့ၢ်တၢ်လၢ အကမၣ်လီၤ.+
၂၁ နမ့ၢ်တအီၣ် တၢ်ဖံးတၢ်ညၣ် ဒီးတအီ စပံးထံဘၣ် ဒီးနမ့ၢ်တမၤတၢ်အဂၤလၢ အကကဲထီၣ် တၢ်လီၤဃံၢ်အလီၢ်လၢ နဒီပုၢ်ဝဲၢ်အဂီၢ် နီတမံၤဘၣ်န့ၣ် မ့ၢ်တၢ်လၢ အဂ့ၤကတၢၢ်လီၤ.+
၂၂ တၢ်လၢနနာ် ဘၣ်ဃးဒီးတၢ်ဂ့ၢ်တဖၣ်အံၤန့ၣ် ပာ်အီၤဒ်အမ့ၢ်တၢ်လၢ အအိၣ်လၢနၤဒီးကစၢ်ယွၤ အဘၢၣ်စၢၤန့ၣ်တက့ၢ်. ပှၤလၢအမၤတၢ်လၢ အထံၣ်ဝဲလၢအဘၣ် ဒီးတလိၣ်တူၢ်ဘၣ်က့ၤလၢ အတၢ်ကမၣ်အိၣ်ဝဲဘၣ်န့ၣ် ကသးခုဝဲလီၤ.
၂၃ ဘၣ်ဆၣ် ပှၤတဂၤ မ့ၢ်သးဒ့ဒီလၢ အကအီၣ်တၢ်တမံၤမံၤ ဒီးအမ့ၢ်အီၣ်ဝဲန့ၣ် အတၢ်ကမၣ်အိၣ်လံ, မ့ၢ်လၢ အဝဲတအီၣ်ဝဲဒ် တၢ်နာ်အိၣ်ဝဲအသိးဘၣ် အဃိလီၤ. နီၢ်ကီၢ်န့ၣ် တၢ်တမံၤဂ့ၤ တမံၤဂ့ၤလၢ ပကမၤအီၤလၢ အတဒိးသန့ၤထီၣ်အသးလၢ တၢ်နာ်အဖီခိၣ်ဘၣ်န့ၣ် မ့ၢ်ဝဲတၢ်ဒဲးဘးလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အဝဲကဆၢထၢၣ်ဧါ ကလီၤဃံၢ်ဧါ.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ကွၢ် “ပှၤစံၣ်ညီၣ်တၢ် အလီၢ်ပစိာ်” လၢ တၢ်ကတိၤအခီပညီ.
^ အခီပညီလိၤလိၤ “တကဆှီဘၣ်.”
