ယၤကိာ် ၂:၁-၂၆
၂ ယဒီပုၢ်ဝဲၢ်သ့ၣ်ဧၢ, သုနာ်ပကစၢ် ယ့ၣ်ၡူးခရံာ် လၢအပှဲၤဝဲဒီး အလၤကပီၤ ဒီးတကတီၢ်ဃီန့ၣ် သုကွၢ်မဲာ်ပှၤကညီန့ၣ် မ့ၢ်အမ့ၢ်စ့ၢ်ကီးဧါ.+
၂ ပှၤလၢအသိး ပသံးထူတဖၣ် ဒီးကၤဝဲတၢ်ကူတၢ်ကၤလၢ အပှ့ၤဒိၣ်တဂၤ မ့ၢ်ဟဲနုာ်လၢ သုတၢ်အိၣ်ဖှိၣ်ပူၤ ဒီးပှၤဖှီၣ်ဖိယာ်ဖိလၢ အသိးဝဲတၢ်ကူတၢ်ကၤလၢ အဘၣ်အၢဘၣ်သီတဂၤ မ့ၢ်ဟဲနုာ်စ့ၢ်ကီးန့ၣ်
၃ မ့ၢ်သုကွၢ်မဲာ် ပှၤလၢအကၤဝဲ တၢ်ကူတၢ်ကၤလၢ အပှ့ၤဒိၣ်တဂၤန့ၣ်ဧါ. ဒီးမ့ၢ်သုတဲအီၤလၢ “နၤန့ၣ် ဆ့ၣ်နီၤဖဲအံၤလၢ တၢ်လီၢ်လၢအဂ့ၤ” ဒီးမ့ၢ်သုတဲဘၣ် ပှၤဖှီၣ်ဖိယာ်ဖိတဂၤလၢ “နၤန့ၣ် ဆဲးဆၢထၢၣ်” မ့တမ့ၢ် “ဟဲဆ့ၣ်နီၤဖဲအံၤလၢ ယခီၣ်ယီၢ်လီၤအလီၢ် အခီၣ်ထံး”+ န့ၣ်ဧါ.
၄ သုမ့ၢ်မၤဒ်န့ၣ်န့ၣ် မ့ၢ်ဒၣ်သုကွၢ်ဒိၣ်ဆံးအါစှၤ တၢ်လၢသုကျါကဒဲကဒဲ+ ဒီးသုကဲထီၣ် စံၣ်ညီၣ်ကွီၢ်တဖၣ်လၢ အစံၣ်ညီၣ်တၢ် အၢအၢသီသီ တမ့ၢ်ဘၣ်ဧါ.+
၅ ယဒီပုၢ်ဝဲၢ်သးဘိသ့ၣ်ဧၢ, ဒိကနၣ်တက့ၢ်. ပှၤလၢ ပှၤဟီၣ်ခိၣ်ဖိထံၣ်ဝဲလၢ အဖှီၣ်တဖၣ်န့ၣ် ကစၢ်ယွၤဃုထၢအဝဲသ့ၣ် ဒ်သိးအဝဲသ့ၣ် ကထူးထီၣ်တီၤထီၣ်လၢ တၢ်နာ်+ ဒီးန့ၢ်သါဘၣ် ဘီမုၢ်လၢအအၢၣ်လီၤ ပှၤလၢအအဲၣ်အီၤတဖၣ်န့ၣ် တမ့ၢ်ဘၣ်ဧါ.+
၆ ဘၣ်ဆၣ် မ့မ့ၢ်သုန့ၣ် သုတပာ်ကဲ ပှၤဖှီၣ်ဖိယာ်ဖိတဖၣ်ဘၣ်. ဒီးပှၤလၢ အဆီၣ်တံၢ်မၤနၢၤသု+ ဒီးလဲၤတွံၢ်သုလၢ စံၣ်ညီၣ်ကွီၢ်အရူန့ၣ် မ့ၢ်ဝဲပှၤထူးပှၤတီၤတဖၣ် တမ့ၢ်ဘၣ်ဧါ.
၇ အဝဲသ့ၣ် ကတိၤထီဒါ မံၤလၢအဂ့ၤလၢ ကစၢ်ယွၤ ဟ့ၣ်လီၤသုန့ၣ် တမ့ၢ်ဘၣ်ဧါ.
၈ ဒီးသုမ့ၢ်မၤထွဲ စီၤပၤအတၢ်သိၣ်တၢ်သီ ဒ်တၢ်ကွဲးအသးလၢ “နကဘၣ်အဲၣ်ပှၤလၢနဃၢၤ ဒ်နအဲၣ်လီၤနနီၢ်ကစၢ် အသးအသိး”+ န့ၣ်သုမၤတၢ်ဂ့ၤမးလီၤ.
၉ ဘၣ်ဆၣ် သုမ့ၢ်ဆဲးကွၢ်မဲာ် ပှၤကညီန့ၣ်+ မ့ၢ်ဒၣ်သုမၤတၢ်ဒဲးဘး ဒီးတၢ်သိၣ်တၢ်သီတခါန့ၣ် ပာ်ဖျါထီၣ်လၢ သုမ့ၢ်ပှၤမၤကမၣ်တၢ်ဖိလီၤ.+
၁၀ ပှၤတဂၤဂၤ မ့ၢ်ဒိကနၣ် စီၤမိၤၡ့ အတၢ်သိၣ်တၢ်သီ ခဲလၢာ် ဘၣ်ဆၣ် အဝဲမ့ၢ်မၤ ကမၣ်ဘၣ်ဝဲ ထဲတထံၣ်န့ၣ် အဝဲကဲထီၣ် ပှၤလၢအမၤကမၣ် တၢ်သိၣ်တၢ်သီအံၤခဲလၢာ်လီၤ.+
၁၁ ဒီးပှၤလၢအတဲဝဲလၢ “နတဘၣ် အဲၣ်ဘၢမါအဲၣ်ဘၢဝၤတဂ့ၤ”+ န့ၣ်တဲစ့ၢ်ကီးဝဲလၢ “နတဘၣ်မၤသံ ပှၤနီတဂၤတဂ့ၤ” လီၤ.+ အဃိ နမ့ၢ်တအဲၣ်ဘၢမါအဲၣ်ဘၢဝၤဘၣ် သနာ်က့ နမ့ၢ်မၤသံပှၤဂၤန့ၣ် နကဲထီၣ် ပှၤလၢအမၤကမၣ် တၢ်သိၣ်တၢ်သီလီၤ.
၁၂ ဆဲးတဲတၢ် ဒီးအိၣ်မူ ဒ်ပှၤလၢအကဘၣ် တၢ်စံၣ်ညီၣ်အီၤ ဒ်တၢ်သိၣ်တၢ်သီ လၢအဟံးစုနဲၣ်ကျဲ ပှၤလၢအပူၤဖျဲးထီၣ်တဖၣ် အိၣ်ဝဲအသိးတက့ၢ်.+
၁၃ ပှၤလၢအတညီနုၢ် ပာ်ဖျါထီၣ် တၢ်သးကညီၤဘၣ်န့ၣ် ဖဲအဘၣ်တၢ်စံၣ်ညီၣ်အီၤအခါ တၢ်တသးကညီၤအီၤဘၣ်.+ တၢ်သးကညီၤန့ၣ် မၤနၢၤတၢ်လၢ တၢ်စံၣ်ညီၣ်အဖီခိၣ်လီၤ.
၁၄ ယဒီပုၢ်ဝဲၢ်သ့ၣ်ဧၢ, ပှၤတဂၤဂၤမ့ၢ်တဲလၢ အအိၣ်ဒီးတၢ်နာ် ဘၣ်ဆၣ် အမ့ၢ်တအိၣ်ဒီးတၢ်မၤဘၣ်န့ၣ် မ့ၢ်အဘျုးကအိၣ်ဧါ.+ တၢ်နာ်အဝဲန့ၣ် အုၣ်က့ၤခီၣ်က့ၤအီၤ တသ့ဘၣ်.+
၁၅ အဒိ ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဂၤဂ့ၤ တဂၤဂ့ၤ အတၢ်ကူတၢ်ကၤ တယၢဘၣ်* ဒီးအတၢ်အီၣ်တၢ်အီ လၢတနံၤအဂီၢ် တနံၤအဂီၢ် တယၢဘၣ်.
၁၆ ဒီးပှၤလၢသုကျါတဂၤဂၤ မ့ၢ်တဲဘၣ်အီၤလၢ “က့ၤမုာ်မုာ်နီၤ, မၤကလၢၤထီၣ်နသး ဒီးအီၣ်တၢ်ဘျဲဘျဲနီၤ” ဘၣ်ဆၣ် သုမ့ၢ်တဟ့ၣ်အီၤ တၢ်လၢအလိၣ်ဘၣ်လၢ အနီၢ်ခိတခီဘၣ်န့ၣ် မ့ၢ်အဘျုးကအိၣ်ဧါ.+
၁၇ ဒ်န့ၣ်အသိး တၢ်နာ်မ့ၢ်တအိၣ်ဒီး တၢ်မၤဘၣ်န့ၣ် မ့ၢ်ဝဲတၢ်နာ်လၢအသံလီၤ.+
၁၈ ဘၣ်ဆၣ် ပှၤတဂၤဂၤကတဲလၢ “နၤန့ၣ်နအိၣ်ဒီးတၢ်နာ် မ့မ့ၢ်ယၤန့ၣ် ယအိၣ်ဒီးတၢ်မၤလီၤ. ဒုးနဲၣ်ယၤနတၢ်နာ်လၢ အတအိၣ်ဒီးတၢ်မၤသၢၤ. ဒီးယကဒုးနဲၣ်နၤ ယတၢ်နာ် ခီဖျိယတၢ်မၤလီၤ.”
၁၉ နနာ်လၢ ကစၢ်ယွၤ အိၣ်ထဲတဂၤလီၤန့ၣ် မ့ၢ်ဧါ. မ့မ့ၢ်ဒ်န့ၣ်န့ၣ် ဂ့ၤဝဲလီၤ. ဘၣ်ဆၣ် တၢ်ဝံတၢ်နါတဖၣ်စ့ၢ်ကီး နာ်ဝဲဒ်န့ၣ် ဒီးကနိးကစုာ်လၢ တၢ်ပျံၤတၢ်ဖုးအပူၤလီၤ.+
၂၀ ဘၣ်ဆၣ် ပှၤလၢအသးတဆးဘၣ်ဧၢ, တၢ်နာ်လၢအတအိၣ်ဒီး တၢ်မၤဘၣ်န့ၣ် အဘျုးတအိၣ်ဘၣ်န့ၣ် မ့ၢ်နအဲၣ်ဒိးသ့ၣ်ညါစ့ၢ်ကီးဧါ.
၂၁ ပပၢ် စီၤအၤဘြၤဟၣ်န့ၣ် ဖဲအဝဲ ဟ့ၣ်လုၢ်ထီၣ်အဖိခွါ စီၤအံၤစဲးလၢ တၢ်လုၢ်လီၢ်အဖီခိၣ် ဝံၤအလီၢ်ခံ အဘၣ်တၢ်ပာ်တီပာ်လိၤအီၤ ခီဖျိအတၢ်မၤန့ၣ် တမ့ၢ်ဘၣ်ဧါ.+
၂၂ နထံၣ်လၢအတၢ်နာ် အိၣ်ဖျါထီၣ်ခီဖျိ အတၢ်မၤတဖၣ် ဒီးအတၢ်နာ် ဘၣ်တၢ်မၤ လၢထီၣ်ပှဲၤထီၣ်အီၤ ခီဖျိလၢ အတၢ်မၤတဖၣ်အဃိလီၤ.+
၂၃ လၢတၢ်န့ၣ်အဃိ တၢ်ကွဲးအသးတဲဝဲလၢ “စီၤအၤဘြၤဟၣ် နာ်ယဟိဝၤယွၤ* အဃိ အဘၣ်တၢ်ပာ်ပနီၣ်အီၤ ဒ်ပှၤတီပှၤလိၤအသိးလီၤ.”+ ဒီးအဝဲဘၣ်တၢ်ကိးအီၤလၢ ယဟိဝၤယွၤ အတံၤသကိးလီၤ.+
၂၄ အဃိ သုထံၣ်ဘၣ်လၢ ပှၤတဂၤဂ့ၤ တဂၤဂ့ၤန့ၣ် ဘၣ်တၢ်ပာ်တီပာ်လိၤအီၤ ခီဖျိလၢ အတၢ်မၤအဃိ ဒီးတမ့ၢ်ထဲလၢ အတၢ်နာ်တခါအဃိဘၣ်.
၂၅ ဒ်န့ၣ်အသိး နီၢ်ရၤဃး လၢအမ့ၢ် ပိာ်မုၣ်လၢ အဆါလီၤအီၣ်သးန့ၣ် ဖဲအဝဲတူၢ်လိာ်ခီၣ်ဆၢ ပှၤကွၢ်ဟုၣ်တၢ်တဖၣ်ဂ့ၤဂ့ၤ ဒီးဆှၢထီၣ်အဝဲသ့ၣ်လၢ ကျဲလၢအဂၤတဘိ ဝံၤအလီၢ်ခံ အဝဲဘၣ်တၢ်ပာ်တီပာ်လိၤအီၤ ခီဖျိအတၢ်မၤန့ၣ် တမ့ၢ်ဘၣ်ဧါ.+
၂၆ မ့ၢ်လီၤ, ဒ်နီၢ်ခိလၢ အတအိၣ်ဒီးတၢ်သါဘၣ်န့ၣ်* သံဝဲအသိး+ တၢ်နာ်လၢ အတအိၣ်ဒီးတၢ်မၤဘၣ်န့ၣ် သံဝဲစ့ၢ်ကီးလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အိၣ်ဘ့ၣ်ဆ့.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “သး.”
