ယၡါယၤ ၂:၁-၂၂
၂ စီၤအၤမိးအဖိခွါ စီၤယၡါယၤ အတၢ်ထံၣ်လၢညါခီ ဘၣ်ဃးဒီး ယူဒၤဘီမုၢ် ဒီးဝ့ၢ်ယရူၤၡလ့ၣ်အဂ့ၢ်န့ၣ် အိၣ်ဝဲဒ် လၢလာ်အံၤအသိးလီၤ.+
၂ ဖဲမုၢ်နံၤခံကတၢၢ်တဖၣ် အတီၢ်ပူၤယဟိဝၤယွၤ အတၢ်လုၢ်ဟံၣ် အကစၢၢ်န့ၣ်ကဘၣ်တၢ်ပာ်အီၤ ဂၢၢ်ဂၢၢ်ကျၢၤကျၢၤ ဒီးကဘၣ်တၢ်ပာ်အီၤ ထီၣ်ထီန့ၢ်ဒံး ကစၢၢ်အဂၤတဖၣ်+
ဒီးကထီန့ၢ်ဒံး တၢ်လူၢ်တဖၣ်ဒီးပှၤကလုာ်ခဲလၢာ် ကလဲၤပာ်ဖှိၣ်ထီၣ်အသးဖဲန့ၣ် ဒ်ထံကျိဖိ ယွၤလီၤဝဲအသိးလီၤ.+
၃ ပှၤအါဂၤ ကလဲၤဝဲ ဒီးကတဲဝဲလၢ“ဟဲ, ပကလဲၤထီၣ်လၢ ယဟိဝၤယွၤ အကစၢၢ်လိၤဒီးပကလဲၤလၢ စီၤယၤကိာ် အကစၢ်ယွၤ အဟံၣ်လီၤ.+
အဝဲကသိၣ်လိပှၤ ဘၣ်ဃးဒီး အတၢ်ဘျၢတဖၣ်ဒီးပကအိၣ်မူ ဒ်အတၢ်ဘၣ်သး အသိးလီၤ.”+
လၢစံယိၣ်န့ၣ် တၢ်သိၣ်တၢ်သီ* ကဟဲအိၣ်ထီၣ်ဒီးလၢဝ့ၢ်ယရူၤၡလ့ၣ်န့ၣ် ယဟိဝၤယွၤ အတၢ်ကတိၤ ကဟဲထီၣ်လီၤ.+
၄ ကစၢ်ယွၤ ကကဲစံၣ်ညီၣ်ကွီၢ်လၢ ပှၤကလုာ်တဖၣ်အဂီၢ်ဒီးအကဘှီဘၣ်ထီၣ်က့ၤ တၢ်ဂ့ၢ်ကီတဖၣ်လၢ အဝဲသ့ၣ်အကျါလီၤ.
အဝဲသ့ၣ် ကပိာ်က့ၤအနးလၢ ထဲၣ်ကနၣ်ဒီးကပိာ်က့ၤ အဘီလၢ ထါဂဲာ်လီၤ.+
ပှၤတကလုာ်ဒီး တကလုာ်န့ၣ် တကျီလိာ်အသးလၢ နးလၢၤဘၣ်.
ဒီးအဝဲသ့ၣ် တမၤလိအသး လၢ တၢ်ဒုးလၢၤဘၣ်.+
၅ အိ စီၤယၤကိာ် အစၢၤအသွဲၣ် တဖၣ်ဧၢ, ဟဲသၢၤပကလဲၤတၢ်လၢ ယဟိဝၤယွၤ အတၢ်ကပီၤအကျါလီၤ.+
၆ ကစၢ်ယွၤဧၢ, ခီဖျိလၢ နပှၤဂီၢ်မုၢ်လၢအမ့ၢ် စီၤယၤကိာ် အစၢၤ အသွဲၣ်တဖၣ်+မၤထွဲလုၢ်လၢ်လၢ အဟဲလၢမုၢ်ထီၣ်တခီ အါမံၤအဃိ နပာ်တ့ၢ်ကွံာ် အဝဲသ့ၣ်လံ.
အဝဲသ့ၣ် အူတၢ်သမူတၢ်+ ဒ်ပှၤဖလ့ၡသးဖိတဖၣ် အသိးလီၤ.
ဒီးပှၤထံဂၤကီၢ်ဂၤ အဖိအလံၤတဖၣ် အိၣ်ဝဲလၢ အဝဲသ့ၣ်အကျါ ဒီဒူၣ်လီၤ.
၇ အဝဲသ့ၣ်အကီၢ်န့ၣ် ပှဲၤဒီး စ့ညၣ် ဒီးထူဒီးအဝဲသ့ၣ် အတၢ်လုၢ်ဒိၣ်ပှ့ၤဒိၣ် အိၣ်ဝဲဒီဒူၣ်လီၤ.
အဝဲသ့ၣ်အကီၢ်န့ၣ် ပှဲၤဒီးကသ့ၣ်ဒီးအဝဲသ့ၣ် အလ့ၣ်ကဟၣ်တဖၣ် အိၣ်ဝဲဒီဒူၣ်လီၤ.+
၈ အဝဲသ့ၣ်အကီၢ်န့ၣ် ပှဲၤဒီးယွၤလၢ အဘျုးတအိၣ်ဘၣ်တဖၣ်လီၤ.+
အဝဲသ့ၣ် ဘူၣ်ထီၣ်ဘါထီၣ်ဝဲ တၢ်လၢအဝဲသ့ၣ် အနီၢ်ကစၢ် တ့ထီၣ်ဝဲဒီးတၢ်လၢအဝဲသ့ၣ် တ့ဝဲလၢအစုတဖၣ်န့ၣ်လီၤ.
၉ အဃိ အဝဲသ့ၣ် မၤဆံးလီၤစှၤလီၤ အသူးသ့ၣ်လၤကပီၤ ဒီးမၤဖုၣ်လီၤအပတီၢ်ဒီးလ့ၤတက့ၤ နပျၢ်အဝဲသ့ၣ် အတၢ်ကမၣ်တကဲဘၣ်.
၁၀ ခီဖျိလၢ ယဟိဝၤယွၤ အတၢ်သးဒိၣ်ဒီးအလၤကပီၤလၢ အလီၤကဟုကညီၢ်န့ၣ် ကလီၤပျံၤဒိၣ်မးအဃိ+လဲၤနုာ်လၢ လၢၢ်ကအိပူၤ ဒီးလဲၤအိၣ်ခူသူၣ်လၢ ဟီၣ်ခိၣ်ပူၤတက့ၢ်.
၁၁ ပှၤလၢ အပာ်ကဖၢလၢအသးန့ၣ် ကဘၣ်တၢ်မၤမဲာ်ဆှးအီၤဒီးပှၤလၢ အပာ်ထီၣ်ထီသးန့ၣ် ကဘၣ်တၢ်ဆီၣ်လီၤအီၤလီၤ.
ဖဲမုၢ်နံၤအဝဲန့ၣ် ထဲဒၣ် ယဟိဝၤယွၤတဂၤ ကဘၣ်တၢ်ပာ်ဒိၣ်ပာ်ထီအီၤ,
၁၂ မ့ၢ်လၢ တၢ်တနံၤန့ၣ် မ့ၢ်ဝဲ တၢ်သုးမုၢ်ဂီၢ်မုၢ် အကစၢ်ယဟိဝၤယွၤ အမုၢ်နံၤအဃိလီၤ.+
ဒီးပှၤလၢ အပာ်ထီၣ်ထီအသး မ့ၢ်ဂ့ၤ, ပှၤလၢ အပာ်ကဖၢလၢ အသးမ့ၢ်ဂ့ၤ,ပှၤလၢအဘၣ် တၢ်ပာ်ဒိၣ်ပာ်ထီအီၤမ့ၢ်ဂ့ၤ, ပှၤလၢအပတီၢ်ဖုၣ်မ့ၢ်ဂ့ၤ, တၢ်တနံၤန့ၣ် ကဟဲဘၣ် ပှၤကိးဂၤဒဲးလီၤ.+
၁၃ တကးဒံးဘၣ် ကဟဲဘၣ်စ့ၢ်ကီး လဘၤနိၣ် အသ့ၣ်ဆှိအ့ရ့း လၢအဘၣ် တၢ်ပာ်ဒိၣ် ပာ်ထီအီၤခဲလၢာ်,ဘၤၡၣ် အသ့ၣ်ထိးဖၣ်ခဲလၢာ်,
၁၄ ကစၢၢ် အဒိၣ်အထီခဲလၢာ်တၢ်လူၢ်လၢ အထီခဲလၢာ်,
၁၅ တၢးလၢအထီခဲလၢာ်, တၢ်ဒူၣ်လၢ အကျၢၤခဲလၢာ်,
၁၆ တၢ်ၡံၣ် အကဘီခဲလၢာ်+ဒီးချံလၢ အလုၢ်ဒိၣ်ပှ့ၤဒိၣ် ခဲလၢာ်လီၤ.
၁၇ ပှၤလၢ အပာ်ကဖၢလၢအသးန့ၣ် ကဘၣ်တၢ်မၤမဲာ်ဆှးအီၤဒီးပှၤလၢ အပာ်ထီၣ်ထီသးန့ၣ် ကဘၣ်တၢ်ဆီၣ်လီၤအီၤလီၤ.
ဖဲမုၢ်နံၤအဝဲန့ၣ် ထဲဒၣ် ယဟိဝၤယွၤတဂၤ ကဘၣ်တၢ်ပာ်ဒိၣ်ပာ်ထီ အီၤလီၤ.
၁၈ ယွၤလၢ အဘျုးတအိၣ်ဘၣ်တဖၣ်န့ၣ် ကလီၤမၢ်ကွံာ် ခဲလၢာ်လီၤ.+
၁၉ ဖဲယဟိဝၤယွၤ ဆၢထၢၣ် ဒ်သိး ကမၤဟူးဟီၣ်ခိၣ်အခါခီဖျိလၢ အတၢ်သးဒိၣ် ဒီးအလၤကပီၤလၢ အလီၤကဟုကညီၢ်န့ၣ်+ကလီၤပျံၤဒိၣ်မးအဃိပှၤဂီၢ်မုၢ် ကလဲၤနုာ်ဝဲလၢ လၢၢ်ကအိပူၤဒီးလၢဟီၣ်ခိၣ်ပူၤလီၤ.+
၂၀ ဖဲတၢ်တနံၤန့ၣ် ယွၤတဖၣ်လၢ ပှၤတ့ထီၣ်ပာ်စၢၤလၢ ထူဒီးစ့ညၣ်ဒ်သိး ကဘူၣ်ထီၣ်ဘါထီၣ်အီၤ အဂီၢ်န့ၣ် အဝဲသ့ၣ် ကလဲၤဟံးန့ၢ်ဝဲဒီးကတၢၤကွံာ်ဝဲလၢ ယုၢ်စူနါ ဒီးဘျါတဖၣ် အိၣ်ဝဲအလီၢ်လီၤ.+
၂၁ ဒီးအဝဲသ့ၣ် ကလဲၤနုာ်ဝဲလၢ လၢၢ်ကအိပူၤဒီးလၢလၢၢ်ကဆူး လ့ကဆူး အပူၤလီၤ.
ဖဲယဟိဝၤယွၤ ဆၢထၢၣ်ဒ်သိး ကမၤဟူး ဟီၣ်ခိၣ်အခါခီဖျိလၢ အတၢ်သးဒိၣ် ဒီးအလၤကပီၤလၢ အလီၤကဟုကညီၢ်န့ၣ်ကလီၤပျံၤဒိၣ်မးဃိ အဝဲသ့ၣ် ကလဲၤအိၣ်ခူသူၣ် ဖဲန့ၣ်လီၤ.
၂၂ ပှၤဟီၣ်ခိၣ်ဖိလၢ အဘၣ်ကသါ ဒ်သိးကဆဲးမူအဂီၢ်န့ၣ်တဘၣ်သန့ၤသုသး လၢအီၤ လၢၤတဂ့ၤ.
သုကဒိးန့ၢ်ဘၣ်အဘျုးလၢ ပှၤဟီၣ်ခိၣ်ဖိအအိၣ် မနုၤတမံၤလဲၣ်.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်ဟံးစုနဲၣ်ကျဲ.”