မးသဲ ၂၈:၁-၂၀
၂၈ ဖဲမုၢ်အိၣ်ဘှံးနံၤ ဝံၤအလီၢ်ခံ မုၢ်ခီၣ်ထံးအနံၤ ဂီၤခီဂီၤဂီၤန့ၣ် နီၢ်မၤရံ မၤကဒၤလ့ၣ် ဒီးနီၢ်မၤရံ လၢအဝဲတဂၤ လဲၤကွၢ်ဝဲ တၢ်သွၣ်ခိၣ်လီၤ.+
၂ ဒီးမ့ၢ်လၢ ယဟိဝၤယွၤ* အမူခိၣ်ကလူးတဂၤ ဟဲလီၤလၢမူခိၣ် ဒီးသုးကွံာ်ဝဲလၢၢ်လၢ တၢ်သွၣ်ခိၣ်အခိၣ်ထိး အဃိ ဟီၣ်ခိၣ်ဟူးဝဲ ဒိၣ်မး. ဒီးမူခိၣ်ကလူးတဂၤန့ၣ် ဆ့ၣ်နီၤဝဲလၢ လၢၢ်အဖီခိၣ်လီၤ.+
၃ ဒီးမူခိၣ်ကလူးတဂၤန့ၣ် ကပီၤဒ် လီဝၢ်ဒံးအသိး ဒီးအကူအသိးန့ၣ် ဝါဝဲဒ်မူခိၣ်ဖီ အသိးလီၤ.+
၄ ဒီးပှၤခိးတၢ်ဖိတဖၣ် ပျံၤအီၤအဃိ အဝဲသ့ၣ်ကနိးကစုာ်ဝဲ ဒီးအဝဲသ့ၣ်လီၤဂာ်ဒ် ပှၤသံတဖၣ်အသိးလီၤ.
၅ ဘၣ်ဆၣ် မူခိၣ်ကလူး တဲဘၣ်ပိာ်မုၣ်တဖၣ်န့ၣ်လၢ “ပျံၤတၢ်တဂ့ၤ, ယသ့ၣ်ညါလၢ သုဟဲဃု ယ့ၣ်ၡူးလၢ ပှၤမၤသံအီၤလၢ သ့ၣ်တၢၣ်အလိၤလီၤ.+
၆ အဝဲတအိၣ်ဖဲအံၤလၢၤဘၣ်. ဒ်အတဲပာ်စၢၤဝဲအသိး တၢ်မၤဂဲၤဆၢထၢၣ် သမူထီၣ်က့ၤအီၤလံ.+ ဟဲကွၢ်ဖဲ ပှၤပာ်လီၤအီၤအလီၢ်မီၤ.
၇ မ့ၢ်ဝံၤန့ၣ် လဲၤချ့ချ့ဒီးတဲဘၣ် အပျဲၢ်အဘီၣ်တဖၣ်လၢ အဝဲဂဲၤဆၢထၢၣ်သမူထီၣ်က့ၤလၢ တၢ်သံလံ. ဒီးအဝဲကလဲၤဆိလၢ သုမဲာ်ညါဆူ ကၤလံၤလါ+ ဒီးသုကထံၣ်ဘၣ်အီၤဖဲန့ၣ်လီၤ. ယဟဲဒ်သိး ယကတဲဘၣ်သု တၢ်ဂ့ၢ်အံၤလီၤ.”+
၈ ဒီးအဝဲသ့ၣ် ဟးထီၣ်ကွံာ်ဝဲလၢ တၢ်သွၣ်ခိၣ်ချ့ချ့လီၤ. လၢတၢ်ပျံၤတၢ်ဖုး ဒီးလၢတၢ်သူၣ်ခုသးခု ဖးဒိၣ်အပူၤ အဝဲသ့ၣ် လဲၤဃ့ၢ်တဲဘၣ်ဝဲ ယ့ၣ်ၡူးအပျဲၢ်အဘီၣ်တဖၣ်လီၤ.+
၉ ဒီးယ့ၣ်ၡူး ဟဲသဂၢၢ်အဝဲသ့ၣ် ဒီးတဲဝဲလၢ “ဂီၤလၢဂ့ၤ.” အဝဲသ့ၣ် လဲၤဃီၤလၢအအိၣ်, ထိၣ်လီၤပှီၤအသး လၢအမဲာ်ညါ, ဖီၣ်ဝဲအခီၣ် ဒီးယူးယီၣ်အီၤလီၤ.
၁၀ ဒီးယ့ၣ်ၡူး တဲဘၣ်အဝဲသ့ၣ်လၢ “ပျံၤတၢ်တဂ့ၤ, လဲၤတဲဘၣ် ယဒီပုၢ်ဝဲၢ်ခွါတဖၣ်* ဒ်သိး အဝဲသ့ၣ်ကလဲၤလၢ ကၤလံၤလါနီၤ. ဒီးအဝဲသ့ၣ် ကထံၣ်ဘၣ်ယၤဖဲန့ၣ်လီၤ.”
၁၁ ဖဲအဝဲသ့ၣ် လဲၤလၢကျဲအခါ ပှၤခိးတၢ်ဖိတနီၤ+ လဲၤလီၤလၢဝ့ၢ်ပူၤ ဒီးတဲဘၣ်ဝဲ ပှၤလုၢ်တၢ်ဒိၣ်အခိၣ်တဖၣ် လၢတၢ်ကဲထီၣ်အသး ခဲလၢာ်လီၤ.
၁၂ ဒီးပှၤလုၢ်တၢ်ဒိၣ်အခိၣ်တဖၣ် အိၣ်ဖှိၣ်ဒီး တၢၣ်ပီၣ်တၢၣ်ပီလိာ်အသးဒီး ပှၤသူၣ်က့သးပှၢ်တဖၣ်ဝံၤ အဝဲသ့ၣ်ဟ့ၣ်လီၤ ပှၤသုးဖိတဖၣ် လၢအမ့ၢ် ပှၤခိးတၢ်ဖိလၢ စ့ညၣ်အါမးလီၤ.
၁၃ ဒီးအဝဲသ့ၣ်တဲဝဲလၢ “သုဘၣ်တဲလၢ ‘လၢမုၢ်နၤခီ ဖဲပမံအဆၢကတီၢ်န့ၣ် အပျဲၢ်အဘီၣ်တဖၣ် ဟဲဟုၣ်န့ၢ် အစိၣ်လီၤ.’+
၁၄ ဒီးပဒိၣ်ဖးဒိၣ် မ့ၢ်နၢ်ဟူတၢ်ဂ့ၢ်တခါအံၤန့ၣ် ပကတဲနၢ်ပၢၢ်အီၤ* အဃိ သုတဘၣ်သးကိၢ်တၢ်တဂ့ၤ.”
၁၅ အဝဲသ့ၣ်ဟံးန့ၢ်စ့ညၣ် ဒီးမၤဝဲဒ် ပှၤတဲဘၣ်အဝဲသ့ၣ် အသိးလီၤ. ဒီးတၢ်ကစီၣ်အံၤန့ၣ် ဟူထီၣ်သါလီၤလၢ ပှၤယူဒၤဖိအကျါ တုၤလၢ မုၢ်မဆါတနံၤအံၤလီၤ.
၁၆ ဘၣ်ဆၣ် ယ့ၣ်ၡူးအပျဲၢ်အဘီၣ် တဆံတဂၤန့ၣ် လဲၤဝဲလၢ ကၤလံၤလါ+ ဖဲကစၢၢ်လၢယ့ၣ်ၡူး ရဲၣ်ကျဲၤဝဲလၢ အဝဲသ့ၣ် ကထံၣ်ဖှိၣ်လိာ်အသး အလီၢ်လီၤ.+
၁၇ ဖဲအဝဲသ့ၣ် ထံၣ်ယ့ၣ်ၡူးအခါန့ၣ် အဝဲသ့ၣ် ထိၣ်လီၤပှီၤအသးလၢ အမဲာ်ညါလီၤ. ဘၣ်ဆၣ် အဝဲသ့ၣ်တနီၤန့ၣ် သးဒ့ဒီဝဲလီၤ.
၁၈ ယ့ၣ်ၡူးဟဲဃီၤ ဒီးတဲဘၣ်အဝဲသ့ၣ်လၢ “ကယဲၢ်တၢ်စိတၢ်ကမီၤ လၢမူခိၣ်ဒီးဟီၣ်ခိၣ်န့ၣ် တၢ်ဟ့ၣ်လီၤယၤလံ.+
၁၉ အဃိ လဲၤဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်တက့ၢ်.+ ဒီးဒိးဘျၢ အဝဲသ့ၣ်လၢ+ ပၢ် ဒီးဖိခွါ ဒီးသးစီဆှံအမံၤအပူၤတက့ၢ်.
၂၀ သိၣ်လိအဝဲသ့ၣ် ဒ်သိးအဝဲသ့ၣ်ကမၤထွဲ တၢ်လၢယမၤလိာ်သု ခဲလၢာ်တက့ၢ်.+ ဒီးယကအိၣ်ဒီးသု ကိးမုၢ်နံၤဒဲး တုၤလီၤလၢ တၢ်အကတၢၢ်လီၤ.”*+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “ယပျဲၢ်ယဘီၣ်တဖၣ်.”
^ အခီပညီလိၤလိၤ “ကွဲန့ၢ်လွဲန့ၢ်.”
^ မ့ၢ်စ့ၢ်ကီး “တၢ်အစိၤလၢ အလီၢ်ခံကတၢၢ်.”
