ကလီးစဲ ၁:၁-၂၉
၁ ယၤ, စီၤပီလူး လၢအမ့ၢ် ယ့ၣ်ၡူးခရံာ်အတၢ်မၢဖိ ဒ်ကစၢ်ယွၤ အတၢ်ဘၣ်သးအသိး ဒီးပဒီပုၢ်ဝဲၢ် စီၤတံၤမသ့းန့ၣ်+ ဆှၢလံာ်အံၤဆူ
၂ ပှၤစီဆှံတဖၣ် လၢအမ့ၢ် ဒီပုၢ်ဝဲၢ်လၢအသးတီ ဒီးအမ့ၢ်ခရံာ်အပျဲၢ်အဘီၣ်လၢ အအိၣ်လၢ ဝ့ၢ်ကလီးစဲန့ၣ် အအိၣ်လီၤ.
မ်သုဒိးန့ၢ်ဘၣ် တၢ်သးကညီၤဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢ ပပၢ်ကစၢ်ယွၤ အအိၣ်န့ၣ်တက့ၢ်.
၃ ဖဲပဃ့ထုကဖၣ်တၢ်လၢ သုဂီၢ်အခါ ပစံးဘျုးဘၣ် ကစၢ်ယွၤ လၢအမ့ၢ် ပကစၢ် ယ့ၣ်ၡူးခရံာ်အပၢ်န့ၣ် ထီဘိလီၤ.
၄ ပစံးဘျုးကစၢ်ယွၤ မ့ၢ်လၢပနၢ်ဟူ ဘၣ်ဃးဒီး သုတၢ်နာ်ယ့ၣ်ၡူးခရံာ် ဒီးသုတၢ်အဲၣ်လၢ ပှၤစီဆှံခဲလၢာ်အဖီခိၣ်လီၤ.
၅ သုအိၣ်ဒီး တၢ်ပာ်သူၣ်ပာ်သးဒ်န့ၣ် ခီဖျိလၢ သုအိၣ်ခိးကွၢ်လၢ် တၢ်ဆိၣ်ဂ့ၤလၢ အအိၣ်ကတီၤပာ်စၢၤအသး လၢသုဂီၢ် လၢမူခိၣ်အဃိလီၤ.+ လၢအပူၤကွံာ်န့ၣ် သုနၢ်ဟူဘၣ်ဃးဒီး တၢ်ဆိၣ်ဂ့ၤအဝဲအံၤ ခီဖျိလၢ တၢ်မ့ၢ်တၢ်တီအကစီၣ် လၢအမ့ၢ် တၢ်သးခုကစီၣ်
၆ လဲၤတုၤလၢ သုအိၣ်အဃိလီၤ. ဒ်တၢ်သးခုကစီၣ် သၣ်ထီၣ်ဝဲဒီး ဒိၣ်ထီၣ်လဲၢ်ထီၣ်လၢ ဟီၣ်ခိၣ်ဒီဘ့ၣ်အသိး+ အမၤအသးဒ်န့ၣ် လၢသုကျါစ့ၢ်ကီး စးထီၣ်လၢမုၢ်တနံၤ ဖဲသုနၢ်ဟူဒီးသ့ၣ်ညါထီၣ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် လီၤတံၢ်လီၤဆဲးအခါန့ၣ်လီၤ.
၇ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အံၤ သုမၤလိဘၣ်အီၤလၢ ပဒီပုၢ်ဝဲၢ်သးဘိ စီၤအ့းပၤဖြါ+ လၢအမ့ၢ်ကုၢ်ဒ်သိးဒီး ယၤတဂၤအအိၣ်လီၤ. အဝဲမ့ၢ် ခရံာ်အခ့အပှၤလၢ အသးတီတဂၤလၢ အမၤစၢၤက့ၤတၢ်လၢပလီၢ်လီၤ.
၈ ဒီးအဝဲ ဒုးသ့ၣ်ညါစ့ၢ်ကီးပှၤလၢ သးစီဆှံ မၤစၢၤသု လၢသုကပာ်ဖျါထီၣ် တၢ်အဲၣ်တၢ်ကွံ အဂီၢ်လီၤ.
၉ အဃိ စးထီၣ်မုၢ်တနံၤဖဲ ပနၢ်ဟူဘၣ် ဒ်န့ၣ်အခါ ပဆဲးဃ့ထုကဖၣ်န့ၢ်တၢ်လၢ သုဂီၢ်ထီဘိလီၤ.+ ဒီးပဃ့လၢ သုကပှဲၤဒီး တၢ်သ့ၣ်ညါ လီၤတံၢ်လီၤဆဲး+ ဘၣ်ဃးဒီး ကစၢ်ယွၤ အတၢ်ဘၣ်သး, တၢ်ကူၣ်သ့ခဲလၢာ် ဒီးတၢ်သ့ၣ်ညါနၢ်ပၢၢ်လၢ နီၢ်သးတခီလီၤ.+
၁၀ ဒီးပဃ့လၢ သုကအိၣ်မူ ဒ်ပှၤလၢအကြၢးဝဲဘၣ်ဝဲဒီး ယဟိဝၤယွၤ,* မၤတၢ်ဘၣ်အသးလၢ တၢ်ခဲလၢာ်အပူၤ ဒီးသုကဆဲးသၣ်ထီၣ်လၢ တၢ်မၤလၢအဂ့ၤကိးမံၤဒဲး ဒီးအါထီၣ်လၢ တၢ်သ့ၣ်ညါဘၣ်ဃးဒီး ကစၢ်ယွၤအဂ့ၢ်အကျိၤ လီၤတံၢ်လီၤဆဲးလီၤ.+
၁၁ ဒ်ကစၢ်ယွၤ အိၣ်ဒီး အတၢ်စိတၢ်ကမီၤလၢ အပှဲၤဒီးအလၤကပီၤ+ အသိးန့ၣ် မ်သုန့ၢ်ဂံၢ်န့ၢ်ဘါ ပှဲၤဒီး တၢ်စိတၢ်ကမီၤခဲလၢာ် ဒ်သိး သုတူၢ်တၢ်ကိးမံၤဒဲးလၢ တၢ်ဝံသးစူၤ ဒီးတၢ်သးခုအပူၤ ကန့ၢ်အဂီၢ်တက့ၢ်.
၁၂ ဒီးစံးဘျုးစံးဖှိၣ်ပၢ်လၢ အဒုးတုၤထီၣ်ထီၣ်ဘးသု ဒ်သိး သုကန့ၢ်သါဘၣ်တၢ်ဃုာ်ဒီး ပှၤစီဆှံလၢ+ အအိၣ်လၢ တၢ်ကပီၤအပူၤ အဃိတက့ၢ်.
၁၃ ကစၢ်ယွၤ မၤပူၤဖျဲးထီၣ်ပှၤလၢတၢ်ခံး အတၢ်စိတၢ်ကမီၤအဖီလာ်+ ဒီးဆှၢပှၤလၢ အဖိခွါသးဘိ အဘီမုၢ်အပူၤလီၤ.
၁၄ ခီဖျိလၢဖိခွါအဃိ ပဘၣ်တၢ်ပှ့ၤက့ၤပှၤ ဒီးပတၢ်ဒဲးဘး ပျၢ်ကွံာ်ဝဲလီၤ.+
၁၅ ဖိခွါအံၤ မ့ၢ်ဝဲ ကစၢ်ယွၤလၢ ပှၤထံၣ်အီၤ တသ့ဘၣ်တဂၤ အက့ၢ်အဂီၤ+ ဒီးတၢ်ဘၣ်တ့ခဲလၢာ် အပှၤဝဲၢ်ကိလီၤ.+
၁၆ ခီဖျိလၢအီၤအဃိ တၢ်တ့လီၤ တၢ်အဂုၤအဂၤလၢ အအိၣ်လၢမူခိၣ် ဒီးလၢဟီၣ်ခိၣ်ခဲလၢာ်, တၢ်လၢပထံၣ်အီၤသ့, တၢ်လၢပထံၣ်အီၤတသ့ဘၣ်,+ လီၢ်ပစိာ်တဖၣ်, ကစၢ်အလီၢ်အလၤတဖၣ်, တၢ်ပၢတၢ်ပြးတဖၣ် ဒီးတၢ်စိတၢ်ကမီၤတဖၣ်လီၤ. မ့ၢ်လီၤ, တၢ်တ့လီၤ တၢ်အဂုၤအဂၤခဲလၢာ် ခီဖျိလၢအီၤ+ ဒီးမ့ၢ်ဝဲလၢအဂီၢ်လီၤ.
၁၇ အဝဲအိၣ်လၢ တၢ်အဂၤခဲလၢာ်အမဲာ်ညါ+ ဒီးခီဖျိလၢ အီၤအဃိ တၢ်အဂၤခဲလၢာ် ဟဲအိၣ်ထီၣ်ဝဲလီၤ.
၁၈ ဒီးနီၢ်ခိလၢအမ့ၢ် တၢ်အိၣ်ဖှိၣ်န့ၣ် ခရံာ်မ့ၢ်အခိၣ်လီၤ.+ အဝဲမ့ၢ် တၢ်အခီၣ်ထံးလီၤ. အဝဲမ့ၢ်ပှၤလၢ အဂဲၤဆၢထၢၣ်က့ၤလၢတၢ်သံ အပှၤဝဲၢ်ကိ+ အဃိအဝဲကဲထီၣ် နီၣ်ဂံၢ်တၢ လၢတၢ်ခဲလၢာ်အပူၤ,
၁၉ မ့ၢ်လၢ ကစၢ်ယွၤဘၣ်အသးလၢ တၢ်လၢတၢ်ပှဲၤခဲလၢာ် ကအိၣ်ဝဲလၢ အပူၤအဃိလီၤ.+
၂၀ ဒီးတၢ်အဂုၤအဂၤခဲလၢာ် လၢအမ့ၢ် တၢ်အိၣ်လၢမူခိၣ် ဒီးတၢ်အိၣ်လၢဟီၣ်ခိၣ်န့ၣ် ကစၢ်ယွၤ မၤဘၣ်လိာ်ဖိးဒ့က့ၤဝဲဒီး အနီၢ်ကစၢ်+ ခီဖျိလၢ ခရံာ်အသွံၣ်လၢ+ အလူလီၤဝဲလၢ တၢ်မၤအၢမၤနး အသ့ၣ်တၢၣ်လိၤလီၤ.*
၂၁ နီၢ်ကီၢ်န့ၣ် သုမ့ၢ်တ့ၢ် ကစၢ်ယွၤ အဒုၣ်အဒါ ဒီးပှၤလၢအအိၣ်ယံၤဒီးအီၤ မ့ၢ်လၢ သုဆိကမိၣ် တၢ်မၤလၢ အအၢအသီတဖၣ် အဃိလီၤ.
၂၂ ဘၣ်ဆၣ်ခဲအံၤန့ၣ် ကစၢ်ယွၤ မၤဘၣ်လိာ်ဖိးဒ့က့ၤတၢ် ခီဖျိ ပှၤလၢ အတူၢ်သံအသးတဂၤ အနီၢ်ခိ ဒ်သိး သုကအိၣ်ဖျါထီၣ်လၢ ကစၢ်ယွၤအမဲာ်ညါ ဒ်ပှၤလၢအစီဆှံ, ပှၤလၢအတအိၣ်ဒီး တၢ်လီၤတူာ်လီၤကာ် ဒီးပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ် အသိးလီၤ.+
၂၃ ဘၣ်ဆၣ် သုကဘၣ် အိၣ်သူၣ်လီၤသုသးကျၢၤကျၢၤ+ ဒီးဆဲးအိၣ်ဂၢၢ်ဆိးကျၢၤလၢ+ တၢ်နာ်အပူၤလီၤ.+ ဒီးသုတဘၣ် ကဒံကဒါလၢ တၢ်မုၢ်လၢ်လၢ အဘၣ်ထွဲဒီး တၢ်သးခုကစီၣ် လၢသုနၢ်ဟူဘၣ်အီၤန့ၣ်တဂ့ၤ. တၢ်သးခုကစီၣ်အံၤ ဘၣ်တၢ်စံၣ်တဲၤတဲလီၤအီၤလၢ ပှၤခဲလၢာ်အကျါ လၢဟီၣ်ခိၣ်ဒီဘ့ၣ်.+ ယၤ, စီၤပီလူးအံၤ ကဲထီၣ် ပှၤစံၣ်တဲၤတဲလီၤ တၢ်သးခုကစီၣ်အံၤ အခ့အပှၤတဂၤလီၤ.+
၂၄ ခဲအံၤယတူၢ်ဘၣ်ဒံး တၢ်နးတၢ်ဖှီၣ်တဖၣ် လၢသုဂီၢ် ဘၣ်ဆၣ် ယသူၣ်ဖှံသးညီလီၤ.+ ဒီးခရံာ် အတၢ်နးတၢ်ဖှီၣ်လၢ ယကဘၣ်တူၢ်ဒံးအီၤ လၢယနီၢ်ခိအပူၤန့ၣ် ယသးအိၣ် လဲၤခီဖျိအီၤလီၤ.+ ဒီးယတူၢ်ဘၣ်တၢ်ဒ်အံၤန့ၣ် ကကဲဘျုးလၢ ခရံာ်အနီၢ်ခိလၢအမ့ၢ် တၢ်အိၣ်ဖှိၣ်အဂီၢ်လီၤ.+
၂၅ ယကဲထီၣ် တၢ်အိၣ်ဖှိၣ်အံၤ အခ့အပှၤ ခီဖျိလၢ ကစၢ်ယွၤအးလီၤယၤ မူဒါအံၤအဃိလီၤ.+ ဒီးမူဒါအံၤ မ့ၢ်လၢ သုဘျုးအဂီၢ်လီၤ. အဃိ ယဂုာ်ကျဲးစၢး စံၣ်တဲၤတဲလီၤ ကစၢ်ယွၤ အကလုၢ်ကထါ လၢအဂ့ၤကတၢၢ်လီၤ.
၂၆ မ့ၢ်လီၤ, ယစံၣ်တဲၤတဲလီၤ တၢ်ခူသူၣ်စီဆှံလၢ+ အအိၣ်ခူသူၣ်အသးလၢ စိၤလၢညါလံၤလံၤ+ ဒီးပှၤလၢ အပူၤကွံာ်တဖၣ် တသ့ၣ်ညါဝဲဘၣ်. ဘၣ်ဆၣ် ခဲအံၤအဘၣ် တၢ်လီၣ်ဖျါထီၣ်အီၤလၢ ပှၤစီဆှံတဖၣ် အအိၣ်လီၤ.+
၂၇ ဒီးကစၢ်ယွၤ ဘၣ်အသးလၢ ကဒုးသ့ၣ်ညါ ပှၤကလုာ်တဖၣ်လၢ တၢ်ခူသူၣ်စီဆှံ လၢအပှဲၤဒီး တၢ်လၤကပီၤအံၤ ဒီးနီၢ်သး အတၢ်ထူးတၢ်တီၤတဖၣ်လီၤ. တၢ်ခူသူၣ်စီဆှံအံၤ+ မ့ၢ်ဝဲလၢ ခရံာ်အိၣ်လၢသုပူၤအဃိ သုအိၣ်ဒီးတၢ်မုၢ်လၢ်လၢ သုကန့ၢ်ဃုာ် တၢ်လၤကပီၤဒီးအီၤလီၤ.+
၂၈ ခရံာ်မ့ၢ် ပှၤတဂၤလၢ ပစံၣ်တဲၤတဲလီၤအဂ့ၢ် ဒီးပဟ့ၣ်သဆၣ်ထီၣ် ပှၤကိးဂၤဒဲးလီၤ. ဒီးပသိၣ်လိ ပှၤကိးဂၤဒဲးလၢ ခရံာ်အဂ့ၢ် ဒီးပသိၣ်လိတၢ် ပှဲၤဒီးတၢ်ကူၣ်သ့ခဲလၢာ် ဒ်သိး ပကပာ်ဖျါထီၣ် ပှၤကိးဂၤဒဲး ဒ်ခရံာ်အပျဲၢ်အဘီၣ်လၢ အဒိၣ်တုာ်ခိၣ်ပှဲၤအသိးလီၤ.+
၂၉ လၢတၢ်ဂ့ၢ်အံၤအဃိ ယမၤတၢ်ဆူၣ်ဆူၣ် ဒီးယဂုာ်ကျဲးစၢး ခီဖျိ ကစၢ်ယွၤအစိကမီၤလၢ အမၤတၢ်ဆူၣ်ဆူၣ်လၢယပူၤ အဃိလီၤ.+
