ကတိၤဒိ ၁၅:၁-၃၃
-
ပှၤစံးဆၢတၢ် မုာ်မုာ်န့ၣ် မၤခုၣ်လီၤ တၢ်သးဒိၣ် (၁)
-
ယဟိဝၤယွၤ အမဲာ်ချံ အိၣ်လၢ တၢ်လီၢ်ကိးပူၤဒဲး (၃)
-
ပှၤလၢအသူၣ်ဘျၢသးဘျၢ အတၢ်ထုကဖၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲ (၈)
-
တၢ်တၢၣ်ပီၣ်တၢၣ်ပီ သကိးလိာ်သး မ့ၢ်တအိၣ်ဘၣ်န့ၣ် တၢ်ရဲၣ်တၢ်ကျဲၤ တကဲထီၣ်လိၣ်ထီၣ်ဘၣ် (၂၂)
-
ဆိကမိၣ်ထံတၢ် တချုး စံးဆၢတၢ် (၂၈)
၁၅ ပှၤစံးဆၢတၢ် မုာ်မုာ်န့ၣ်* မၤခုၣ်လီၤ တၢ်သးဒိၣ်လီၤ.+
မ့မ့ၢ် တၢ်ကတိၤလၢ အဆူၣ်အကိၤန့ၣ် ထိၣ်ဟူးထိၣ်ဂဲၤထီၣ် တၢ်သးထီၣ်လီၤ.+
၂ ပှၤကူၣ်တၢ်သ့ အပျ့ၤန့ၣ် သူဝဲတၢ်သ့ၣ်ညါ ဂ့ၤဂ့ၤဘၣ်ဘၣ်,+မ့မ့ၢ် ပှၤဟးဂီၤဖိ အထးခိၣ်န့ၣ် ဒုးဖျိးထီၣ် တၢ်လၢအနါစိၤ တဖၣ်လီၤ.
၃ ယဟိဝၤယွၤ အမဲာ်ချံ အိၣ်လၢ တၢ်လီၢ်ကိးပူၤဒဲးဒီးကွၢ်ဝဲ ပှၤလၢအမၤတၢ်ဂ့ၤ ဒီးပှၤလၢအမၤတၢ်အၢလီၤ.+
၄ ပျ့ၤလၢအမၤဘျါက့ၤတၢ်န့ၣ် လီၤဂာ်ဒ်သိးဒီး သ့ၣ်တၢ်မူ,+မ့မ့ၢ် တၢ်ကတိၤလၢ အပှဲၤဒီးတၢ်လံၣ်တၢ်လီန့ၣ် မၤဆါပှၤသးလီၤ.
၅ ပှၤဟးဂီၤဖိန့ၣ် တပာ်ကဲ အပၢ်အတၢ်သိၣ်က့ၤသီက့ၤဘၣ်,+မ့မ့ၢ် ပှၤကူၣ်တၢ်သ့န့ၣ် တူၢ်လိာ် တၢ်သိၣ်ဃီၣ်လီၤ.+
၆ လၢပှၤတီပှၤလိၤ အဟံၣ်ပူၤန့ၣ် တၢ်လုၢ်ဒိၣ်ပှ့ၤဒိၣ် အိၣ်ဝဲ ဒီဒူၣ်,မ့မ့ၢ် တၢ်လၢ ပှၤအၢပှၤသီ မၤန့ၢ်ဝဲန့ၣ်* ဒုးအိၣ်ထီၣ် တၢ်ကီတၢ်ခဲ လၢအဂီၢ်လီၤ.+
၇ ပှၤကူၣ်တၢ်သ့ အထးခိၣ်န့ၣ် ရၤလီၤ တၢ်သ့ၣ်ညါ,+မ့မ့ၢ် ပှၤဟးဂီၤဖိအသးန့ၣ် တမ့ၢ်ဒ်န့ၣ်ဘၣ်.+
၈ ပှၤအၢပှၤသီ အတၢ်လုၢ်တၢ်ပာ်န့ၣ် ယဟိဝၤယွၤ သးဘၣ်အၢဝဲ,+မ့မ့ၢ် ပှၤလၢအသူၣ်ဘျၢသးဘျၢ အတၢ်ထုကဖၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.+
၉ ယဟိဝၤယွၤ သးဘၣ်အၢ ပှၤအၢ ပှၤသီအကျဲ+မ့မ့ၢ် ပှၤလၢအလူၤ တၢ်တီတၢ်လိၤန့ၣ် အဝဲအဲၣ်ဝဲလီၤ.+
၁၀ ပှၤလၢအပာ်တ့ၢ်ကွံာ် ကျဲလၢအဂ့ၤန့ၣ် တဘၣ်သူၣ်ဘၣ်သး တၢ်သိၣ်က့ၤသီက့ၤဘၣ်.+ဒီးပှၤလၢအသးဟ့ တၢ်သိၣ်ဃီၣ်န့ၣ် ကသံဝဲလီၤ.+
၁၁ ယဟိဝၤယွၤ ထံၣ်ပှၤအိၣ်လၢ တၢ်သွၣ်ခိၣ်* ဒီးတၢ်ဟးဂီၤအလီၢ် မ့ၢ်သ့ပျီပျီန့ၣ်+အဝဲထံၣ်တၢ်အိၣ်လၢ ပှၤဟီၣ်ခိၣ်ဖိအသးပူၤ သ့ဝဲသပှၢ်တၢၢ်လီၤ.+
၁၂ ပှၤဒုၣ်ဒွဲၣ်တၢ်န့ၣ် တအဲၣ်ပှၤလၢ အသိၣ်ဃီၣ်အီၤဘၣ်.+
အတဃ့ တၢ်ဟ့ၣ်ကူၣ်ဟ့ၣ်ဖးလၢ ပှၤကူၣ်တၢ်သ့ အအိၣ်ဘၣ်.+
၁၃ ပှၤမ့ၢ်သးခုန့ၣ် အမဲာ်သၣ်ပှဲၤဒီး တၢ်နံၤကမှံ,မ့မ့ၢ် တၢ်သးအုးန့ၣ် မၤဟးဂီၤ ပှၤသးအဂံၢ်အဘါလီၤ.+
၁၄ ပှၤအသးလၢ အသ့ၣ်ညါနၢ်ပၢၢ်တၢ်န့ၣ် ဃုသ့ၣ်ညါတၢ်,+မ့မ့ၢ် ပှၤဟးဂီၤဖိအထးခိၣ်န့ၣ် ဟးတဲကြီတၢ်မုာ်မးလီၤ.+
၁၅ ပှၤလၢအဘၣ်နးဘၣ်ဖှီၣ်န့ၣ်* အတၢ်အိၣ်မူပှဲၤဝဲဒီး တၢ်သူၣ်ကိၢ်သးဂီၤ ကိးနံၤဒဲးလီၤ.+
မ့မ့ၢ် ပှၤလၢအသးခုန့ၣ် အတၢ်အိၣ်မူ ပှဲၤဝဲဒီး တၢ်သူၣ်ဖှံသးညီ တနံၤဘၣ်တနံၤလီၤ.+
၁၆ ပှၤတဂၤလၢ အတၢ်အိၣ်တစဲး ဒီးပျံၤယဟိဝၤယွၤန့ၣ်+ဂ့ၤဒိၣ်န့ၢ်ဒံး ပှၤတဂၤလၢ အတၢ်အိၣ်ဒီဒူၣ်ဒီး အိၣ်ဒီးတၢ်သူၣ်ကိၢ် သးဂီၤလီၤ.+
၁၇ ပှၤအီၣ်သကိး တၢ်ဒိးတခွးလၢ တၢ်အဲၣ်တၢ်ကွံအပူၤန့ၣ်+ဂ့ၤဒိၣ်န့ၢ်ဒံး ပှၤအီၣ်သကိး တၢ်ညၣ်လၢ အဝံၣ်ကတၢၢ်* လၢတၢ်သးဟ့အပူၤလီၤ.+
၁၈ ပှၤလၢအသးထီၣ်တၢ်ချ့န့ၣ် ဒုးအိၣ်ထီၣ် တၢ်အ့ၣ်လိာ်ဆိးက့+မ့မ့ၢ် ပှၤလၢ တသးထီၣ်တၢ်ချ့ချ့ဘၣ်န့ၣ် မၤလီၤကယး တၢ်အ့ၣ်လိာ်သးလီၤ.+
၁၉ ပှၤကၢၣ်အကျဲန့ၣ် လီၤဂာ်ဒ်သိးဒီး ကရၢတၤဆှုၣ်,+မ့မ့ၢ် ပှၤလၢအသူၣ်ဘျၢသးဘျၢအကျဲန့ၣ် လီၤဂာ်ဒ်သိးဒီး ကျဲမုၢ်လၢ အပၢၤလီၤ.+
၂၀ ဖိခွါ လၢအကူၣ်တၢ်သ့န့ၣ် မၤသးခု အပၢ်အသး,+မ့မ့ၢ် ပှၤဟးဂီၤဖိန့ၣ် တပာ်ကဲ အမိၢ်ဘၣ်.+
၂၁ ပှၤလၢအသးတဆးဘၣ်န့ၣ် ထံၣ်ဝဲ တၢ်နါစိၤဒ်သိးဒီး တၢ်သးခု,+မ့မ့ၢ် ပှၤလၢအသ့ပဲာ်ထံနီၤဖးတၢ်န့ၣ် ဟးဝဲဘျၢဘျၢလီၤ.+
၂၂ တၢ်တၢၣ်ပီၣ်တၢၣ်ပီ သကိးလိာ်သး မ့ၢ်တအိၣ်ဘၣ်န့ၣ် တၢ်ရဲၣ်တၢ်ကျဲၤ တကဲထီၣ်လိၣ်ထီၣ်ဘၣ်.ဘၣ်ဆၣ် ပှၤဟ့ၣ်ကူၣ်တၢ် မ့ၢ်အိၣ်အါဂၤန့ၣ် တၢ်ကဲထီၣ်လိၣ်ထီၣ်ဝဲလီၤ.+
၂၃ ပှၤလၢအစံးဆၢက့ၤတၢ်လၢ အဘၣ်န့ၣ် ကသးခုဝဲလီၤ.+
ဒီးတၢ်ကတိၤလၢ ပှၤတဲဝဲလၢ တၢ်ဆၢကတီၢ်လၢ အကြၢးအဘၣ်န့ၣ် မုာ်ဝဲဒိၣ်မးလီၤ.+
၂၄ တၢ်မူအကျဲန့ၣ် ပာ်ထီထီၣ် ပှၤလၢအအိၣ်ဒီး တၢ်နၢ်ပၢၢ် လီၤတံၢ်လီၤဆဲး+ဒ်သိး အသုတလဲၤလီၤလၢ လာ်ခီ ဆူတၢ်သွၣ်ခိၣ် တဂ့ၤအဂီၢ်လီၤ.+
၂၅ ပှၤလၢအပာ်ကဖၢလၢအသး အဟံၣ်န့ၣ် ယဟိဝၤယွၤ ကမၤလီၤပှီၢ်ဝဲ,+မ့မ့ၢ် မုၣ်ကမဲ အဟီၣ်ခိၣ်လီၢ်အဆၢန့ၣ် အကပာ်ဂၢၢ်ပာ်ကျၢၤဝဲလီၤ.+
၂၆ ယဟိဝၤယွၤ သးဘၣ်အၢဝဲ ပှၤအၢပှၤသီတဖၣ် အတၢ်ကူၣ်အၢ,+မ့မ့ၢ် တၢ်ကတိၤလၢ အမုာ်တဖၣ်န့ၣ် ကစၢ်ယွၤထံၣ်ဝဲလၢ အကဆှီလီၤ.+
၂၇ ပှၤလၢ အမၤတၢ်တတီတလိၤ ဒ်သိးကန့ၢ်ဘၣ် တၢ်ထူးတၢ်တီၤန့ၣ် ဒုးဘၣ် အဟံၣ်ဖိဃီဖိလၢ တၢ်ကီတၢ်ခဲလီၤ.*+
မ့မ့ၢ် ပှၤလၢအသးဟ့ တၢ်ထီးကျိၣ်ထီးစ့န့ၣ် ကဆဲးမူဝဲလီၤ.+
၂၈ ပှၤတီပှၤလိၤန့ၣ် တချုးလၢ အစံးဆၢတၢ်ဒံးဘၣ်အခါ ဆိကမိၣ်ထံဝဲ,+မ့မ့ၢ် ပှၤအၢပှၤသီ အထးခိၣ်န့ၣ် တဲဖျိးထီၣ် တၢ်လၢအတဂ့ၤဘၣ်တဖၣ်လီၤ.
၂၉ ယဟိဝၤယွၤ အိၣ်ယံၤဒီး ပှၤအၢပှၤသီ,မ့မ့ၢ် ပှၤတီပှၤလိၤ အတၢ်ထုကဖၣ်န့ၣ် အနၢ်ဟူဝဲလီၤ.+
၃၀ မဲာ်လၢအပှဲၤဒီး တၢ်နံၤကမှံန့ၣ် မၤသးခုပှၤသး,မ့မ့ၢ် တၢ်ကစီၣ်လၢအဂ့ၤန့ၣ် မၤဆူၣ်ထီၣ်ပှၤသးလီၤ.+
၃၁ ပှၤလၢအဒိကနၣ် တၢ်သိၣ်ဃီၣ်လၢ အဒုးမူတၢ်န့ၣ်အိၣ်ဘၣ်လၢ ပှၤကူၣ်တၢ်သ့တဖၣ် အကျါလီၤ.+
၃၂ ပှၤလၢအတတူၢ်လိာ် တၢ်သိၣ်က့ၤသီက့ၤဘၣ်န့ၣ် တပာ်ကဲလီၤ အသးသမူဘၣ်,+မ့မ့ၢ် ပှၤလၢအတူၢ်လိာ် တၢ်သိၣ်ဃီၣ်န့ၣ် ဒိးန့ၢ်ဘၣ် တၢ်သ့ၣ်ညါ နၢ်ပၢၢ်လီၤ.+
၃၃ တၢ်ပျံၤယဟိဝၤယွၤန့ၣ် သိၣ်လိပှၤ တၢ်ကူၣ်သ့+ဒီးပှၤလၢအအိၣ်ဒီး တၢ်ဆီၣ်လီၤသးန့ၣ် ကန့ၢ်ဘၣ် တၢ်လၤကပီၤလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ကပုာ်လုး.”
^ မ့ၢ်စ့ၢ်ကီး “တၢ်ဟဲနုာ်.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ပှၤလၢအသးအုး.”
^ အခီပညီလိၤလိၤ “ကျီၢ်ဖါလၢအဘီၣ်အသိတဒု.”
^ မ့ၢ်စ့ၢ်ကီး “တၢ်မဲာ်ဆှး.”