1. Sooq dron­ningip atorfilit­taa Etiopiamiu kuisik­kusup­pa?

“TAKUAT, aana imeq, suna akor­nutaas­sava kuineqar­nis­san­nut?” Kristumiut siul­liit nalaan­ni dron­ningip atorfilit­taa Etiopiamiu taama aperivoq. Kristumiumit Filipimit atilim­mit up­per­narsaavigineqaq­qam­mer­poq Jiisusi tas­saasoq Mis­siarsi neriorsuutigisaq. Ilik­kak­kani Al­lak­kaneersut kil­lin­neqaatigingaarlugit  kuisik­kusuler­poq. – Apustilit Suliaat 8:26-36.

2. Sooq kuisin­nis­sat pimoorul­lugu eq­qarsaatigisariaqar­piuk?

² Atuak­kami matumani kapitalip matuma siulii Jehovap Nalunaajaasuisa ilaan­nik peqateqarlutit atuaq­qis­saareersimaguk­kit im­maqa aam­ma il­lit misigivutit ima aperinis­san­nut piareerlutit: ‘Suna akor­nutaas­sava uanga kuisin­nis­san­nut?’ Paratiisimi inuuneq naas­saan­ngitsoq pil­lugu Biibilimi neriorsuut ilisimasaqarfigilersimavat. (Lukasi 23:43; Saq­qum­mersitat 21:3, 4) Aam­ma toqusut toqusunil­lu makititaanis­saq pil­lugit Biibilimi qanoq al­las­simasoqar­nera paasivat. (Oqaluus­sisar­tup oqaasii 9:5; Johan­nesi 5:28, 29) Aam­ma qular­nan­ngitsumik Jehovap Nalunaajaasuisa ilagiit­tut ataatsimiin­nerisa ilaan­nut najuut­tarsimas­saatit nam­minerlu takusimas­sal­lugu taak­kua up­perisaq ilumoor­toq naaper­torlugu inuunerat. (Johan­nesi 13:35) Pingaar­ner­paamil­lu: Qular­nan­ngitsumik nam­mineq Jehovamut Guutimut at­taveqar­nerit ineriar­tor­tilersimavat.

3. (a) Jiisusip ajoqersuk­kani qanoq peq­quai? (b) Imermi kuisin­neq qanoq pisar­pa?

³ Guutimut kif­far­torusun­nerit qanoq ersersis­sin­naaviuk? Malugiuk Jiisusip ajoqersuk­kaminut qanoq oqar­nera: “Aal­larlusi inuiaqatigiit tamaasa [inuit inuian­nit tamaneersut, NW] uan­nut ajoqersugan­ngor­tis­sigik kuillugit.” (Mat­thæusi 28:19) Jiisusi nam­mineq imermi kuisin­nermigut maligas­siuivoq. Imermik ser­par­tar­tiin­nan­ngilaq niaq­qumigul­luun­niit kuineqaan­nar­nani. (Mat­thæusi 3:16) Grækerit oqaasiat ‘kuisin­nermik’ nutser­neqar­tar­toq isumaqar­poq “imermut morsutsitaaneq”. Taamaat­tumik kristumiutut kuisin­neq imermut morsutsitaanik­kut pisar­poq.

4. Kuisin­nik­kut suna ersersin­neqar­tar­pa?

⁴ Imermi kuisin­neq Jehovamut at­taveqarlualis­sagaan­ni piumasaqaataavoq. Guutimut kif­far­torusun­neq kuisin­nik­kut kik­kut tamarmik tak­kuan­ni ersersin­neqar­tar­poq. Tamatumuuna Jehovap piumasaatut iliorusun­neq ersersin­neqar­tar­poq. (Tus­siaat 40:8, 9) Kuisin­nis­samul­li piuk­kun­narsiumal­luni iliuuserisariaqak­kat arlaliup­put.

5. (a) Kuisin­nis­samut piuk­kun­narsiumal­luni iliuusis­saq siul­leq suua? (b) Sooq ilagiit ataatsimiin­nerinut najuut­tar­neq pingaaruteqar­pa?

⁵ Iliuusis­saq siul­leq aal­lar­tereer­pat. Qanoq? Jehova Guuti aam­ma Jiisusi Kristusi ilisarisimaleriartorpatit, im­maqa Biibilimik atuaq­qis­saar­tar­nik­kut. (Johannesi 17:3 atuaruk). Ilin­niagas­sar­pas­suaqar­porli. Kristumiul­lu kis­saatigaat ‘Guutip piumasaa pil­lugu eq­qorluar­tumik ilisimasaqangaaler­nis­sar­tik’. (Kolos­semiut 1:9, NW) Tamatumun­nga tun­ngatil­lugu Jehovap Nalunaajaasuisa ilagiit­tut ataatsimiin­nerinut najuut­tar­neq iluaqutigingaas­savat. Ataatsimiin­ner­nut tamak­kunun­nga najuut­tar­neq pingaaruteqar­poq. (Hebræerit 10:24, 25) Ataatsimiin­ner­nut aalajangersimasumik najuut­tar­nik­kut Guuti pil­lugu ilisimasaqar­nerulersin­naavutit.

6. Kuisis­sin­naalerumal­luni Biibilimik qanoq ilisimasaqar­tigisariaqar­pa?

⁶ Soorunami kuisis­sin­naalerumal­lutit Biibilimi al­las­simasut tamaasa ilisimasariaqan­ngilatit. Dron­ningip atorfilit­taa Etiopiamiu ilisimasaqangaatsiar­poq, Al­lak­kal­li im­mik­koor­tuisa ilaat ikior­neqar­nani paasisin­naan­ngilai. (Apustilit Suliaat 8:30, 31) Aam­ma il­lit suli ilin­niagas­saqaqaatit. Ilumul­lumi Guuti pil­lugu ilin­niar­tuarsin­naavugut. Kuisis­sin­naaler­tin­nal­li Biibilimi ajoqersuutit tun­ngaviusut paasisariaqar­patit akueralugil­lu. (Hebræerit 5:12) Ajoqersuutinut tamak­kunun­nga ilaap­put toqusut pil­lugit aam­ma Guutip aq­qata naalagaaf­fiatalu pingaaruteqangaar­nerat pil­lugu ajoqersuutit.

7. Biibilimik atuaq­qis­saar­tar­neq ilin­nut qanoq sun­niuteqar­tariaqar­pa?

⁷ Ilisimasaqar­nerin­narli naam­man­ngilaq, tas­sami ‘up­persuseqar­nani Guutimit iluarisaaneq ajor­naqaaq’. (Hebræerit 11:6) Biibilimi oqalut­tuarineqar­poq itsaq Korinthimiut ilaat kristumiut tusarlius­saat tusareerlugu ‘up­per­tun­ngoramik kuisit­tut’. (Apustilit Suliaat 18:8) Taamatut­taaq Biibilimik atuaq­qis­saar­tar­nik­kut upperilluinnalertariaqarpat Biibili tas­saasoq Guutip oqaasia isumas­sarsiarititaasoq. Guutip neriorsuutaanik Jiisusil­lu pil­liutaata an­naas­sis­sutaaneranik up­perin­niler­nis­san­nut  Biibilimik atuaq­qis­saar­tar­neq iluaqutigisin­naavat. – Josva 23:14; Apustilit Suliaat 4:12; 2 Timotheusi 3:16, 17.

8. Ilik­kak­katit pil­lugit al­lanut oqalut­tuar­nis­samut suna kajumis­sis­sutigis­saviuk?

⁸ Up­per­nik­kut ineriar­tor­til­lutit ilik­kak­kavit nipangiusimaan­nar­nis­saat ajor­nakusoor­nerujar­tor­tis­savat. (Jeremia 20:9) Guuti taas­sumalu siuner­tai pil­lugit al­lanut oqalut­tuarusungaalis­saatit. – 2 Korinthimiut 4:13 atuaruk.

9, 10. (a) Tusarlius­saq Biibilimiit­toq aal­laq­qaam­mut kik­kun­nut oqalut­tuarisin­naaviuk? (b) Qanoq ilius­savit Jehovap Nalunaajaasuisa aaq­qis­sugaasumik oqaluus­sineran­nut peqataarusuleruit?

⁹ Aal­laq­qaam­mut ilaqut­tatit, ikin­ngutitit, sanilitit suleqatitil­lu tusarlius­saq Biibilimiit­toq pil­lugu periaaseril­lutit oqalut­tuus­sin­naavatit. Pif­fis­sap ingerlanerani Jehovap Nalunaajaasuisa aaq­qis­sugaasumik oqaluus­sineran­nut peqataarusulis­saatit. Peqataarusuleruit ilin­nik Biibilimik atuaq­qis­saaqatigin­nit­tar­toq taman­na pil­lugu oqaloqatigiuk. Paasinarsip­pat oqaluus­seqataanis­samut piuk­kun­narsisimasutit, taava il­lit ilin­nil­lu atuaqatigin­nit­tar­tup ilagiin­ni utoq­qaaner­tanik marlun­nik naapeqateqar­nis­sarsi isumagineqas­saaq.

¹⁰ Taamaalil­lutit utoq­qaaner­tat kristumiut, Guutip savaataanik paarsisut, ilaat ilisarisimanerulersin­naavatit. (Apustilit Suliaat 20:28; 1 Petrusi 5:2, 3) Utoq­qaaner­tat taak­kua malugisin­naagunik­ku Biibilimi ajoqersuutigineqar­tut tun­ngaviusut paasisimal­lugil­lu akuerisimagitit, Guutip najoq­qutas­siai naaper­torlugit inuusutit ilumoorlutil­lu Jehovap Nalunaajaasuinut ilan­nguk­kusut­tutit, taava ilisimatis­savaatsit oqaluus­sisar­tutut kuisiman­ngitsutut nutaarsias­samik nuan­nersumik oqaluus­seqataasin­naalersutit.

11. Oqaluus­sinermi peqataanis­samut piuk­kun­narsiumal­luni sutigut al­lan­nguisoqar­tariaqarsin­naava?

¹¹ Aam­mali imaas­sin­naavoq oqaluus­sinermi peqataasin­naalis­saguit inooriaatsin­nik ileq­quil­lu ilaan­nik al­lan­nguisariaqar­tutit. As­sersuutigalugu iliuuserisar­tagaqarsimasin­naavutit,  im­maqa iser­torsimasan­nik, taamaatit­tariaqak­kan­nik. Kuisiman­ngitsutut oqaluus­sisar­tun­ngor­nis­saq qin­nutigitin­nagu taamaatit­tariaqar­patit ingasat­tumik ajor­tulior­nerit, ilaatigut tas­saasin­naap­put kinguaas­siuutitigut inuunerlun­neq aam­ma imigas­samik ikiaroor­nar­tumil­luun­niit ator­nerluineq. – 1 Korinthimiut 6:9, 10; Galatiamiut 5:19-21 atuakkit.

12. Sooq al­lamik isumataar­nis­saq pisariaqar­pa?

¹² Kuisis­sin­naaler­tin­nak aam­ma al­lanik iliuuseqar­tariaqar­putit. Apustili Petrusi ima oqar­poq: “Al­lamik isumataaritsi saan­niarlusilu ajor­tisi piiar­neqaq­qul­lugit.” (Apustilit Suliaat 3:19) Al­lamik isumataar­neq isumaqar­poq iliuuserisimasamik ilumoorluni peq­qis­simis­sutigin­nin­neq. Paasinar­poq inuunerlus­simagaan­ni allamik isumataarnissaq naleq­qut­tuus­sasoq, aam­mali taman­na pisariaqar­poq ileq­qus­satigut torikan­nersumik inuugaluaraan­niluun­niit. Sooq? Inuit tamarmik ajor­tilium­mata Guutimit isumak­keerfigineqar­tariaqar­tut. (Romamiut 3:23; 5:12) Biibilimik atuaq­qis­saalin­ngik­kal­laravit Guutip suna piumasarineraa naluat. Taman­na pis­sutigalugu soorunami najoq­qutas­sianut Biibilimiit­tunut naaper­tuul­luin­nar­tumik inuusin­naasiman­ngilatit. Taamaat­tumik al­lamik isumataar­nis­saq pisariaqar­poq.

13. Guutimut saan­neq qanoq paasisariaqar­pa?

¹³ Al­lamik isumataareeraan­ni Guutimut saattariaqarpoq. Peq­qis­simineq naam­man­ngilaq. Inooriaaserisimasaq tunut­tariaqar­poq, maan­namiil­lu eq­qor­tulior­nis­saq aalajangiusimal­luin­nar­tariaqar­poq. Kuisis­sin­naalis­sagaan­ni al­lamik isumataar­neq Guutimul­lu saan­neq pisariaqavip­put.

14. Kuisin­ngin­nermi pingaarutilik al­la suna iliuuserisariaqar­pa?

¹⁴ Kuisin­ngin­nermi pingaarutilik al­la aam­ma iliuuserisariaqar­poq. Jehovamut Guutimut tunniulluinnartariaqarpoq.

15, 16. Guutimut tun­niul­luin­nar­neq qanoq paasisariaqar­pa, taamaalior­nis­samul­lu suna kajumis­sis­sutaasar­pa?

¹⁵ Ilumoorluni qinunik­kut Jehovamut Guutimut tun­niul­luin­nar­neq  tas­saavoq taas­sumun­nga qaqugumul­luun­niit tun­niusimal­luin­narumal­luni neriorsuineq. Sooq taama neriorsuiumasoqas­sava? As­sersuuteqariar­ta. Takorlooruk angut inuusut­toq ar­namik inuusut­tumik nuan­narin­nilersimasoq. Ar­naq ilisarisimanerujar­tor­til­lugu pis­susiilu nuan­nersut maluginialerunigit kajungerfiginerulis­savaa. Pis­susis­samisuus­saarlu kingusin­nerusuk­kut nuliarsarfigip­pagu. Aap­par­taar­neq akisus­saaf­feqar­neruler­nermik kinguneqaraluar­toq asan­nin­neq kajumis­sis­sutigalugu angut katik­kusus­saaq.

¹⁶ Jehova ilisarisimalerlugulu asaleruk­ku nangaas­suteqar­nak kif­far­torfigerusulis­savat, taamaalius­saatil­lu pal­lorfigin­nin­nerit kil­lilersor­nagu. Kinaluun­niit Guutip er­neranik, Jiisusimik Kristusimik, malin­nik­kusut­toq “im­minut isumak­kiis­saaq”. (Markusi 8:34) Im­minut isumak­kiis­saagut, tas­sa im­minut naaggaas­saagut, nam­mineq inut­tut kis­saatigisavut anguniak­kavul­lu Guutimut naalal­luin­nar­nis­satsin­nut akor­nutaatin­ngik­kutsigit. Tas­sa kuisis­sin­naalerumal­lutit Guutip piumasaatut ilior­nis­saq inuunin­ni pingaar­ner­paatit­tariaqar­pat. – 1 Petrusi 4:2 atuaruk.

17. Sooq inuit ilaat Jehovamut tun­niul­luin­nar­nis­samin­nut nangaasar­pat?

¹⁷ Inuit ilaat Jehovamut tun­niul­luin­nar­nis­samin­nut nangaasar­put taama pimoorutas­saatigisumik iliuuseqar­nis­sar­tik merserigamik­ku. Im­maqa Guutimut tun­niul­luin­narsimasutut taas­suman­nga akisus­saatin­neqar­nis­sar­tik siooragaat. Sapiuk­kamik Jehovalu pakatsisis­sasoralugu an­nilaangagamik tun­niul­luin­nar­naveersaar­put.

18. Jehovamut tun­niul­luin­nar­nis­san­nut suna kajumis­sis­sutigisin­naaviuk?

¹⁸ Jehovamik asan­nin­nerujar­tor­til­lutit taas­sumun­nga tun­niul­luin­nar­nis­san­nut taavalu tun­niul­luin­nar­nerit eq­qor­tin­niarlugu sapin­ngisan­nik iliuuseqar­nis­san­nut kajumis­suseqalis­saatit. (Oqaluus­sisar­tup oqaasii 5:3) Guutimut tun­niul­luin­nareeruit qular­nan­ngivip­poq kis­saatigis­sagit taas­suma  ‘piumasaa malil­lugu inuunis­sat, tamatigut iluarisaanik ilior­niarlutit’. (Kolos­semiut 1:10) Guutimik asan­nin­nerit pis­sutigalugu misiginavian­ngilatit taas­suma piumasaatut ilior­nis­saq saper­nar­tuusoq. Qular­nan­ngitsumik apustili Johan­nesi ima al­lat­toq isumaqatigis­savat: ‘Guutimut asan­nin­neq tas­saavoq inas­sutai maleruaratsigit, inas­sutaalu ar­tor­nar­tuun­ngil­lat.’ – 1 Johan­nesi 5:3.

19. Sooq Guutimut tun­niul­luin­nar­nis­sat merserisariaqan­ngiliuk?

¹⁹ Jehovamut tun­niul­luin­nas­sagaan­ni naam­mal­luin­nar­tuusariaqan­ngilaq. Jehovap pisin­naasat­ta kil­leqar­nerat nalun­ngilaa sapik­katsin­nil­lu piumaf­figin­ngisaan­narluta. (Tus­siaat 103:14) Kis­saatigaa ingerlal­luas­sasutit, aam­ma nakus­satsil­lutil­lu ikius­savaatit. (Esaja 41:10 atuaruk). Jehova uum­matik­kut  iluun­ngarlutit tatigiguk­ku up­peril­luin­narsin­naavat taas­suma ‘ingerlavis­satit nalim­matserumaarai’. – Us­satit 3:5, 6.

20. Sooq Jehovamut tun­niul­luin­nar­neq nam­minermuin­naq tun­ngasin­naan­ngila?

²⁰ Im­maqa kapitalimi matumani sam­meriik­katsin­nik eq­qarsaatigin­neq­qis­saar­neq iluaqutigis­savat qinunik­kut Jehovamut il­lit nam­mineq tun­niul­luin­nar­nis­san­nut. Aam­ma  kinaluun­niit Guutimik asan­nivis­soq tamanut ‘qanermik nas­suer­tariaqar­poq an­naan­neqaatis­samik’. (Romamiut 10:10) Qanoq taamaalior­toqar­tar­pa?

21, 22. Il­lit up­perisat qanoq ilil­lutit tamanut nas­suerutigisin­naaviuk?

²¹ Ilagiin­ni at­tavigisan­ni utoq­qaaner­taqatigiin­nik ataqatigiis­saarisoq oqarfigiuk kuisik­kusul­lutit. Taas­suma isumagis­savaa utoq­qaaner­tat ilaasa Biibilimi ajoqersuutigineqar­tut tun­ngaviusut pil­lugit apeq­qutinik ilin­nik sam­misaqaqatigin­nin­nis­saat. Utoq­qaaner­tat taak­kua tamarmik isumaqarunik kuisin­nis­samut piuk­kun­narsisimasutit ilisimatis­savaatsit kuisis­sin­naasutit. * Kuisit­tus­saqar­til­lugu kuisin­nerup isumaa pil­lugu oqalugiar­toqar­tar­poq. Taava oqalugiar­tup apeq­qutit akiuminar­tut marluk kuisit­tus­sanut akeq­qusar­pai. Taamaalil­lutik kuisit­tus­sat up­perisamin­nik tamanut ‘nas­suerutigin­nin­nis­samin­nut’ periarfis­saqar­tar­put.

²² Kuisin­nermi Guutimut tun­niul­luin­narsimanerit Jehovamil­lu Nalunaajaasun­ngor­nerit tamanut ersersis­savat. Tas­sa kuisit­tus­sat imermut morsutsin­neqar­tar­put Jehovamut tun­niul­luin­narsimaner­tik tamanut ersersin­niarlugu.

23. Ataatap aq­qani, Er­nerup aq­qani anersaal­lu il­ler­nar­tup aq­qani kuisin­neq qanoq paasisariaqar­pa?

²³ Jiisusi oqar­poq ajoqersuk­kani Ataatap aq­qani, Er­nerup aq­qani anersaal­lu il­ler­nar­tup aq­qani kuisis­sasut. (Mat­thæusi 28:19) Tas­sa imaap­poq, kuisit­tus­sap Jehovap Guutip aam­ma Jiisusip Kristusip oqar­tus­saas­suseqar­nerat akueraa. (Tus­siaat 83:19; Mat­thæusi 28:18) Aam­ma kuisit­tus­sap akueraa anersaap il­ler­nar­tup, tas­sa Guutip nukingata sulisup, pingaaruteqar­nera sun­niuteqar­neralu. – Galatiamiut 5:22, 23; 2 Petrusi 1:21.

24, 25. (a) Kuisin­neq sumut as­sersuutaava? (b) Apeq­qut suna suli akis­sutis­sarsin­ngilar­put?

²⁴ Kuisin­neq uf­far­nerunani pingaaruteqar­torujus­suarmut  as­sersuutaavoq. Imermut morsutsitaaneq sior­natigut inooriaaserisimasat eq­qarsaatigalugu ‘toqunin­nut’ as­sersuutaavoq. Imermul­lu morsutsitaariarlutit nuinerit as­sersuutaavoq Guutip piumasaatut ilior­niarlutit ‘uum­mar­nin­nut’. Eq­qaamajut­taaq tun­niul­luin­narfigisat tas­saasoq Jehova Guuti, tas­saanani sulif­fik, sulis­sutiginiagaq, inuk al­la imaluun­niit peqatigiif­fik. Tun­niul­luin­nar­nerit kuisin­neril­lu Guutimik qanit­tuararsuarmik ikin­nguteqaler­nin­nut aal­laq­qaataap­put. – Jaaku 4:8.

²⁵ Kuisin­neq an­naan­neqar­nis­samut qulak­keerutaan­ngilaq. Apustili Paulusi ima al­lap­poq: “An­naan­neqar­nis­sarsi noq­qaas­sutigisiuk mianerin­nil­lusi uulil­lusilu.” (Filip­pimiut 2:12) Tas­sa kuisin­neq aal­laq­qaataan­naavoq. Una apeq­qutaavoq: Qanoq ilil­luta Guutip ‘asan­nin­neraniit­tuarsin­naavugut’? (Judasi 21) Apeq­qut taan­na kapitalimi kingul­lermi akineqas­saaq.