Johannesimit 1. 5:1-21
5 Kinaluunniit Jiisusip Kristusiuneranik upperinnittoq Guutimit erniuvoq, inuunermillu tunisisumik asannittoq taassumannga erniusumik asannippoq.
2 Guutimik asanninnitsigut inassutaanillu maleruaanitsigut Guutip qitornaanik asanninnerput naluneq ajorparput.
3 Guuti asagutsigu inassutai maleruassavagut, inassutaalu artornartuunngillat.
4 Kialuunniimmi* Guutimit erniusoq inuttut ajortutut inoorusunneq ajorpoq. Uppernerpullu iluaqutigalugu inuttut ajortutut inuunaveersaarsinnaavugut.
5 Kina inuttut ajortutut inuunaveersaarsinnaava? Tassaannginnerpa Jiisusip Guutimut erneruneranik upperinnittoq?
6 Jiisusi Kristusi imeq aallu aqqutigalugit tikiuppoq, imerlu aqqutigiinnarnagu kisianni aamma imeq aallu aqqutigalugit tikiuppoq. Anersaarlu ilumoortuugami tamanna pillugu uppernarsaavoq.
7 Uppernarsaasummi pingasuupput:
8 Anersaaq, imeq aallu. Taakkulu pingasut assigiimmik uppernarsaapput.
9 Inuit uppernarsaanerat upperisarparput, Guutilli ernermi kinaaneranik uppernarsaanera anneruvoq.
10 Guutip erneranut uppertup uppernarsaat upperisarpaa. Guutimut uppinngitsup Erneq pillugu Guutip uppernarsaataa upperinnginnamiuk Guuti sallutuunngortittarpaa.
11 Unalu pillugu uppernarsaasoqarpoq: Guutip inuunermik naassaanngitsumik tunigaatigut, inuunerlu tamanna Erneraniippoq.
12 Ernermik ataasioqateqartoq naassaanngitsumik inuuneqarpoq, Guutilli erneranik ataasioqateqanngitsoq naassaanngitsumik inuuneqanngilaq.
13 Ilissi Guutip ernerata aqqanut uppertusi, naassaanngitsumik inuuneqarlusi nalunnginniassagassiuk taama allaffigaassi.
14 Qularinngilarput* Guutip piumasaminut naapertuuttumik qinnuigigutsinni tusassagaatigut.
15 Suulluunniit pillugit qinnutigisagut tusartarai nalunnginnatsigu aamma nalunngilarput qinnutigisatsinnik tunissagaatigut.
16 Kialuunniit qatanngutini toqumik kinguneqartussaanngitsumik ajortuliortoq takuguniuk qinnutissavaa, Guutillu ajortuliortoq inuunermik tunissavaa. Toqumik kinguneqartussaanngitsumik ajortuliortunut tamanna atuuppoq. Toqumilli kinguneqartussaasumik ajortuliaqarpoq, taamaattunullu tunngatillugu qinnussisoqartarnissaa pinngilara.
17 Eqqunngitsuliornerit tamarmik ajortuliornerupput, toqumilli kinguneqartussaanngitsumik ajortuliaqarpoq.
18 Nalunngilarput Guutimit erniusoq kinaluunniit ajortuliortuarneq ajortoq. Guutimilli erniusup* nakkutigaa, Diaavulullu* pissaaneqarfiginngilaa.*
19 Nalunngilarput Guutimit siulersorneqarluta, Diaavululli* inuit allat tamaasa pissaaneqarfigai.
20 Nalunngilarpulli Guutip ernera tikiussimasoq. Guutilu ilumoortoq pillugu paasisimasaqalerniassagatta ilisimassutsimik* tunivaatigut. Aamma Erneq, Jiisusi Kristusi, aqqutigalugu Guuti ilumoortoq ataasioqatigaarput. Taanna Guutiuvoq ilumoortoq inuunermillu naassaanngitsumik tunisisoq.
21 Ikinngutikka,* guutilianut mianersoritsi.
Ilanngussat
^ Nutsiinn.: “Suulluunniimmi”.
^ Imalt.: “Qularata oqarsinnaavugut”.
^ Tassa Jiisusip Kristusip, Guutip ernera.
^ Nutsiinn.: “Ajortullu”.
^ Imalt.: “tigulluassanngilaa”.
^ Nutsiinn.: “Ajortulli”.
^ Nutsiinn.: “paasinnissinnaassutsimik; siuneqassutsimik”.
^ Nutsiinn.: “Meerannguakka”. Tamanna asannittumik oqariartaasiuvoq.
