Мұсаның 2-жазбасы 32:1—35
32 Мұсаның таудан ұзақ уақыт түспей жатқанын+ көрген халық Харонның қасына жиналып, былай деді: “Кәне, бізді бастап жүретін құдай істеп бер+. Өйткені бізді Мысырдан алып шыққан анау Мұсамен не болғанын білмейміз”.
2 Харон оларға: “Әйелдерің мен ұл-қыздарыңның құлағындағы алтын сырғаларды шешіп, маған әкеліңдер+”,— деді.
3 Сонда бүкіл жұрт құлақтарынан алтын сырғаларын шешіп, Харонға әкеле бастады.
4 Ол алтынды алды да, кескіш құралмен пішінге келтіріп, бұзаудың мүсінін* жасады+. Сол кезде халық: “Уа, Исраил, сені Мысырдан алып шыққан Құдайың — осы!”— десті+.
5 Мұны көргенде, Харон мүсіннің алдына құрбандық орнын тұрғызды. Сөйтіп, ол: “Ертең Ехобаға арналған мейрам болады!”— деп жариялады.
6 Келесі күні олар ерте тұрып, түгел өртелетін құрбандықтар мен татулық құрбандықтарын ұсынды. Сосын халық отырып, ішіп-жеді. Кейін орындарынан тұрып, көңіл көтере бастады+.
7 Сонда Ехоба Мұсаға былай деді: “Төмен түс, сен Мысырдан алып шыққан халық азғындыққа салынды+.
8 Олар мен нұсқаған жолдан тез-ақ тайып кетті+. Өздеріне бұзау мүсінін жасап алып: —Уа, Исраил, сені Мысырдан алып шыққан Құдайың — осы!— деп, оған тағзым етіп, құрбандықтар шалуда”.
9 Әрі қарай Ехоба Мұсаға: “Мына халықтың тоңмойын екенін көріп тұрмын+.
10 Мені тоқтатамын деме. Қаһарымды төгіп, оларды құртып жіберейін де, сенен ұлы халық таратайын+”,— деді.
11 Сонда Мұса Ехоба Құдайын райынан қайтармақ болып+, былай деп жалбарынды: “Уа, Ехоба, өзіңнің құдіретті күшіңмен, қуатты қолыңмен Мысырдан алып шыққан халқыңа ашуланып қайтесің+?
12 Әйтпесе мысырлықтар “ол исраилдіктерді тауда қырып салып, жер бетінен жоқ қылу үшін зұлым ниетпен алып шығыпты” деп жүрмей ме+? Қаһарыңды басып, халқыңа апат жіберемін деген райыңнан қайта көр!
13 Қызметшілерің Ыбырайымды, Ысқақ пен Исраилді есіңе ала көр. Оларға: —Ұрпағыңды аспандағы жұлдыздардай көбейтемін+. Өзім уәде еткен осы жердің бәрін ұрпағыңа беремін, олар оны мәңгі иемденеді,— деп, өзіңмен ант етіп едің ғой+”,— деді.
14 Сонда Ехоба халқына апат жіберемін деген райынан қайтты+.
15 Мұса кері бұрылып, таудан түсті. Қолында екі куәлік тақташасы бар еді+. Бұл тас тақташалардың екі бетінде де жазуы болатын.
16 Сол тақташаларды жасап, беттеріндегі сөзді қашап жазған Құдайдың өзі еді+.
17 Ешуа халықтың улап-шулап жатқан даусын естіп, Мұсаға: “Қостан шайқастың даусы шығып жатыр”,— деді.
18 Бірақ Мұса былай жауап берді:
“Бұл — үлкен жеңістің қуанышты әні емес,Жеңілгендердің қайғырған зары да емес,Естіп тұрғаным — бөтен бір әннің әуені”.
19 Мұса қосқа жақындай бергенде, бұзауды+ және билеп жатқан адамдарды көріп, бойын ыза кернеді. Тау етегінде тұрған ол қолындағы тақташаларды жерге лақтырып жіберіп, күл-талқанын шығарды+.
20 Ал олардың жасаған бұзауын алып, отқа жақты+. Сосын оны ұнтақтап, су бетіне шашты да, исраилдіктерге сол судан ішкізді+.
21 Бұдан соң Мұса Хароннан: “Бұл халықты осындай ауыр күнәға батыратындай, олар саған не істеді?”— деп сұрады.
22 Сонда Харонның жауабы мынау болды: “Мырзам, маған ашулана көрме. Бұл халықтың жамандыққа бейім екенін өзің білесің ғой+.
23 Олар маған: —Бізді бастап жүретін құдай істеп бер. Өйткені бізді Мысырдан алып шыққан анау Мұсамен не болғанын білмейміз,— деді+.
24 Сонда мен оларға: —Кімде алтыны болса, шешіп, маған берсін,— дедім. Кейін оларды алып, отқа тастап едім, әлгі бұзау шыға келді”.
25 Мұса халықтың жүгенсіз болып кеткенін көрді. Харон жол бергендіктен, олар бетімен кетіп, жауларына таба болды.
26 Мұса қостың кіреберіс қақпасының алдында тұрып: “Кім Ехобаның жағында болса, сол қасыма келсін!”— деді+. Сонда оның қасына леуіліктер түгел жиналды.
27 Оларға Мұса: “Исраилдің Құдайы Ехоба сендерге былай дейді: —Әркім семсерін беліне байласын да, қосты о шеті мен бұ шетіне* дейін түгел аралап, күнәға батқан өз бауырын, көрші-қолаңы мен дос-жарандарын өлтірсін”,— деп тапсырды+.
28 Леуіліктер Мұсаның айтқанын істеді. Сол күні шамамен 3000 адам жер құшты.
29 Бұдан кейін Мұса: “Бүгін өздеріңді Ехобаға қызмет етуге бағыштаңдар, өйткені әрқайсысың ұлдарың мен бауырларыңа қарсы шықтыңдар+. Ол сендерге бүгін батасын береді+”,— деп айтты.
30 Келесі күні Мұса халыққа: “Сендер өте ауыр күнә жасадыңдар, сондықтан мен Ехобаның алдына көтерілмекпін. Мүмкін, күнәларың үшін оның кешірімін ала алармын”,— деді+.
31 Ол Ехобаның алдына қайта барып, былай деді: “Мына халық өздеріне алтыннан құдай жасап, ауыр күнәға батты ғой+!
32 Бірақ сен оларды кешіре көр+. Кешірмесең, өзің жазған кітаптан менің есімімді өшіріп таста+”.
33 Сонда Ехоба Мұсаға: “Мен кітабымнан маған қарсы күнә жасаған адамның ғана есімін өшіремін.
34 Енді бар да, халықты мен айтқан жерге алып бар. Менің періштем алдыңда жүріп отырады+. Жауапқа тартатын күн келгенде, оларды күнәсі үшін жазалаймын”,— деді.
35 Кейін Ехоба халықты бұзау жасағаны үшін, яғни Харон жасаған бұзау үшін, жазалады.
