Johanu 6:1-71
6 To onú ehelẹ godo, Jesu dasá yì awà awetọ Ohù Galili, kavi Tibeliadi tọn ji.+
2 Gbẹtọgun daho de sọ to hihodo e,+ na yé to azọ́njiawu he e to wiwà bo to azọ̀nhẹngbọna mẹhe to azọ̀njẹ lẹ mọ wutu.+
3 Enẹwutu, Jesu hẹji yì osó de ji bo sinai hẹ devi etọn lẹ to finẹ.
4 Todin, Juwayi+ he yin hùnwhẹ Ju lẹ tọn lọ ko sẹpọ.
5 To whenue Jesu ze nukun etọn lẹ daga bo mọdọ gbẹtọgun daho de ja e dè, e dọna Filipi dọmọ: “Fie wẹ mí na mọ akla họ̀ te na omẹ ehelẹ nado dù?”+
6 Ṣigba, e to ehe dọ nado tẹ́n ẹn pọ́n wẹ, na e yọ́n nuhe e jlo na wà.
7 Filipi gblọnna ẹn dọmọ: “Akla he sọ denali* 200 nù ma na pé yé, eyin etlẹ yindọ pẹvide wẹ dopodopo yetọn na mọ.”
8 Dopo to devi etọn lẹ mẹ, yèdọ Andle nọvisunnu Simọni Pita tọn dọna ẹn dọmọ:
9 “Yọpọ sunnu de die he tindo akla balekun tọn atọ́n po whèvi flinflin awe po. Ṣigba, etẹwẹ ehelẹ na wà to mẹsusu ehelẹ ṣẹnṣẹn?”+
10 Jesu dọmọ: “Mì dike gbẹtọ lẹ ni sinai.” Na ogbé sù to filọ wutu, gbẹtọ lọ lẹ sinai to finẹ, yèdọ nudi omẹ 5000.+
11 Jesu yí akla lọ lẹ podọ to whenue e ko dopẹ́ godo, e má yé na mẹhe to aisinsin to finẹ lọ lẹ; e sọ wà nudopolọ gando whèvi flinflin lọ lẹ go, bọ dopodopo yetọn mọyi dile yé jlo do.
12 Ṣigba, to whenue yé ko dù gọ́ho, e dọna devi etọn lẹ dọmọ: “Mì bẹ dupò he pò lọ lẹ pli, na nudepope ni ma yin hinhẹngú blo.”
13 Enẹwutu, yé bẹ yé pli, dupò he pò to akla balekun tọn atọ́n he mẹhe dùnú lọ lẹ ko dupò lẹ mẹ sọ gọ́ ohà 12.
14 To whenue gbẹtọ lọ lẹ mọ ohia he e ko basi, yé jẹ didọ ji dọmọ: “Na nugbo tọn, Yẹwhegán he dona wá aihọn mẹ lọ die.”+
15 To whenẹnu, na Jesu yọnẹn dọ yé na wá bo wle e nado yí i do duahọlu wutu, e sọ vọ́ họnyi+ osó ji edeṣo.+
16 To whenue owhè ko jai, devi etọn lẹ jẹte yì ohù lọ tó,+
17 podọ whenue yé biọ tọjihun de mẹ, yé jlo na dasá ohù lọ yì Kapẹlnaumi. Todin, zinvlu ko do podọ Jesu ma ko wá yé dè kakajẹ din.+
18 Humọ, ohù lọ to adán ji, na jẹhọn sinsinyẹn de to yìnyìn wutu.+
19 Ṣigba, to whenue yé ko kùnhún na nudi kilomẹtlu atọ́n kavi ṣidopo,* yé mọ bọ Jesu to zọnlinzin to ohù ji bo to sisẹpọ tọjihun lọ; obu sọ di yé.
20 Ṣigba, ewọ dọna yé dọmọ: “Yẹn wẹ; mì dibu blo!”+
21 To whenẹnu, yé jaya nado hẹn ẹn biọ tọjihun lọ mẹ, podọ to madẹnmẹ, tọjihun lọ jẹ otò he mẹ yé jei.+
22 To aihọngbè, gbẹtọgun he tin to awà awetọ ohù lọ tọn ji mọdọ tọjihun devo de ma tin to finẹ adavo pẹvi dopo, yé sọ mọdọ Jesu ma biọ tọjihun lọ mẹ hẹ devi etọn lẹ ṣigba dọ devi etọn lẹ kẹdẹ wẹ yì.
23 Amọ́, tọjihun he sọn Tibeliadi lẹ wá fihe sẹpọ fie yé dù akla te to whenue Oklunọ ko dopẹ́ godo.
24 Enẹwutu, to whenue gbẹtọgun lọ mọdọ Jesu kavi devi etọn lẹ ma tin to finẹ, yé biọ tọjihun yetọn lẹ mẹ bo wá Kapẹlnaumi nado dín Jesu.
25 To whenue yé mọ ẹn to ohù lọ godo, yé dọna ẹn dọmọ: “Labi,+ whetẹnu wẹ hiẹ wáfi?”
26 Jesu sọ gblọnna yé dọmọ: “Nugbonugbo wẹ yẹn dọna mì dọ, mì to dindin mi, e ma yin na mì mọ ohia lẹ wutu wẹ gba, ṣigba na mì dù akla lẹ bo gọ́ho wutu.+
27 Mì wazọ́n, e ma yin na núdùdù he nọ gble gba, ṣigba na núdùdù he nọ gbọṣi aimẹ kakajẹ ogbẹ̀ madopodo,+ ehe Visunnu gbẹtọ tọn na na mì; na ewọ wẹ Otọ́ lọ, yèdọ Jiwheyẹwhe ko dohiagona nado dohia dọ emi kẹalọyi i.”+
28 To whenẹnu, yé dọna ẹn dọmọ: “Etẹwẹ mí dona wà nado wazọ́n he Jiwheyẹwhe kẹalọyi lẹ?”
29 Jesu gblọnna yé dọmọ: “Ehe wẹ azọ́n he Jiwheyẹwhe kẹalọyi, dọ mì ni do yise hia to mẹhe ewọ dohlan lọ mẹ.”+
30 To whenẹnu, yé dọna ẹn dọmọ: “Etẹwẹ hiẹ to wiwà taidi ohia de,+ ehe mí sọgan mọ bo yí we sè? Azọ́n tẹ wà wẹ a te?
31 Tọgbo mítọn lẹ dù manna to danfafa ji+ kẹdẹdile e yin kinkandai do dọmọ: ‘Ewọ na yé akla sọn olọn mẹ nado dù.’”+
32 Enẹwutu, Jesu dọna yé dọmọ: “Nugbonugbo wẹ yẹn dọna mì dọ, e ma yin Mose wẹ na mì akla sọn olọn mẹ gba, ṣigba Otọ́ ṣie wẹ na mì akla nugbo lọ sọn olọn mẹ.
33 Na akla Jiwheyẹwhe tọn lọ wẹ mẹhe jẹte sọn olọn mẹ wá bo na ogbẹ̀ aihọn lọ.”
34 To whenẹnu, yé dọna ẹn dọmọ: “Oklunọ, nọ na mí akla ehe to whepoponu.”
35 Jesu dọna yé dọmọ: “Yẹn wẹ akla ogbẹ̀ tọn. Huvẹ ma na hù mẹdepope he wá dè e gbede, podọ nugbla ma na hù mẹdepope he do yise hia to yẹn mẹ pọ́n gbede.+
36 Ṣigba, dile yẹn ko dọna mì do dọ, mìwlẹ tlẹ ko mọ mi ṣogan mì ma yise.+
37 Mẹdepope he Otọ́ na mi na wá dè e, podọ yẹn ma na yàn mẹhe wá dè e lẹ gbede;+
38 na yẹn ko jẹte sọn olọn mẹ wá,+ e ma yin nado wà ojlo ṣie titi gba, ṣigba ojlo ewọ he do mi hlan tọn.+
39 Ehe wẹ ojlo mẹhe do mi hlan tọn, dọ yẹn hẹn depope to mẹhe ewọ ko na mi lẹ mẹ bu blo, ṣigba dọ yẹn ni fọ́n yemẹpo sọnku+ to azán godo tọn gbè.
40 Na ehe wẹ ojlo Otọ́ ṣie tọn, dọ mẹdepope he yọ́n Visunnu bo do yise hia to ewọ mẹ ni tindo ogbẹ̀ madopodo,+ yẹn nasọ fọ́n ẹn sọnku+ to azán godo tọn gbè.”
41 To whenẹnu, Ju lẹ jẹ hùnhlún do e go ji, na e dọ dọ: “Yẹn wẹ akla he jẹte sọn olọn mẹ wá lọ” wutu.+
42 Yé sọ jẹ didọ ji dọmọ: “Be e ma yin Jesu visunnu Josẹfu tọn, mẹhe mí yọ́n otọ́ po onọ̀ etọn po lọ die ya?+ Naegbọn e do dọ todin dọ, ‘Yẹn jẹte sọn olọn mẹ wá’?”
43 Jesu sọ gblọnna yé dọmọ: “Mì gbọ nuhlundọ to mìdelẹ ṣẹnṣẹn.
44 Mẹdepope ma sọgan wá dè e adavo Otọ́ he do mi hlan dọ̀n ẹn,+ yẹn nasọ fọ́n ẹn sọnku to azán godo tọn gbè.+
45 E yin kinkandai to owe Yẹwhegán lẹ tọn mẹ dọmọ: ‘Yemẹpo nasọ yin pinplọn gbọn Jehovah* dali.’+ Mẹdepope he ko dotoaina Otọ́ bo ko yin pinplọn gbọn ewọ dali nọ wá dè e.
46 E ma yindọ mẹdepope ko mọ Otọ́ pọ́n wẹ gba,+ adavo yẹn mẹhe wá sọn Jiwheyẹwhe dè; yẹn kẹdẹ wẹ mọ Otọ́ pọ́n.+
47 Nugbonugbo wẹ yẹn dọna mì dọ, mẹdepope he yise tindo ogbẹ̀ madopodo.+
48 “Yẹn wẹ akla ogbẹ̀ tọn lọ.+
49 Tọgbo mìtọn lẹ dù manna to danfafa ji ṣogan bo kú.+
50 Ṣigba, mẹdepope he dù sọn akla he jẹte sọn olọn wá lọ mẹ ma na kú.
51 Yẹn wẹ akla ogbẹ̀ tọn lọ he jẹte sọn olọn wá. Eyin mẹdepope dù sọn akla ehe mẹ, ewọ na nọgbẹ̀ kakadoi; podọ na taun tọn, akla he yẹn na na lọ wẹ agbasalan ṣie na ogbẹ̀ aihọn tọn.”+
52 To whenẹnu, Ju lẹ jẹ nudọn hẹ ode awetọ ji dọmọ: “Nawẹ dawe ehe na na mí agbasalan etọn nado dù gbọn?”
53 Enẹwutu, Jesu dọna yé dọmọ: “Nugbonugbo wẹ yẹn dọna mì dọ, eyin mìwlẹ ma dù agbasalan Visunnu gbẹtọ tọn bo nù ohùn etọn, mì ma na tindo ogbẹ̀ to mìde mẹ gba.+
54 Mẹdepope he nọ dù agbasalan ṣie bo nọ nù ohùn ṣie tindo ogbẹ̀ madopodo, yẹn nasọ fọ́n ẹn sọnku+ to azán godo tọn gbè;
55 na núdùdù nugbo wẹ agbasalan ṣie, podọ núnùnù nugbo wẹ ohùn ṣie.
56 Mẹdepope he nọ dù agbasalan ṣie bo nọ nù ohùn ṣie nọ gbọṣi kọndopọ mẹ hẹ mi, podọ yẹn to kọndopọ mẹ hẹ ewọ.+
57 Kẹdẹdile Otọ́ ogbẹ̀nọ do mi hlan bọ yẹn to ogbẹ̀ na Otọ́ lọ tọn wutu do, mọdopolọ wẹ mẹhe nọ dù agbasalan ṣie lọsu na nọgbẹ̀ do niyẹn, na yẹn tọn wutu.+
58 Ehe wẹ akla lọ he jẹte sọn olọn wá. E ma yin dile tọgbo mìtọn lẹ dù ṣogan bo kú do gba. Mẹdepope he nọ dù akla ehe na nọgbẹ̀ kakadoi.”+
59 E dọ onú ehelẹ dile e to mẹplọn to sinagọgu mẹ* to Kapẹlnaumi.
60 To whenue yé sè ehe, susu to devi etọn lẹ mẹ dọmọ: “Ohó ehe hẹnmẹjọsi; mẹnu wẹ sọgan dotoaina ẹn?”
61 Ṣigba, na Jesu yọnẹn to ede mẹ dọ devi etọn lẹ to nuhlundọ gando ehe go wutu, e dọna yé dọmọ: “Ehe hẹn mì dahli wẹ?
62 To whelọnu lo, etẹwẹ na jọ eyin mì mọ Visunnu gbẹtọ tọn hẹji jei fie e te dai?+
63 Gbigbọ wẹ nọ namẹ ogbẹ̀;+ agbasalan ma yọ́n na nudepope. Ohó he yẹn dọna mì lẹ, gbigbọ po ogbẹ̀ po wẹ yé.+
64 Ṣigba, mẹdelẹ to mì mẹ bo ma yise.” Na sọn bẹjẹeji wẹ Jesu ko yọ́n mẹhe ma yise lẹ po mẹhe na de e hia lọ po.+
65 E sọ zindonukọn dọmọ: “Ehe wẹ zọ́n bọ yẹn dọna mì dọ, mẹdepope ma sọgan wá dè e, adavo e yin nina ẹn gbọn Otọ́ dali.”+
66 Na ehe wutu, susu to devi etọn lẹ mẹ lẹkọyi nuhe yé jodo lẹ kọ̀n+ bo masọ nọ zọnhẹ ẹ ba.
67 Enẹwutu, Jesu dọna Omẹ Wiawe lẹ dọmọ: “Mìlọsu lẹ ga ma jlo na yì wẹ?”
68 Simọni Pita gblọn dọmọ: “Oklunọ, mẹnu dè wẹ mí na yì?+ Hiẹ wẹ tindo ohó ogbẹ̀ madopodo tọn lẹ.+
69 Mí ko yise bo ko wá yọnẹn dọ hiẹ wẹ Omẹ Wiwe Jiwheyẹwhe tọn lọ.”+
70 Jesu gblọnna yé dọmọ: “Mì omẹ wiawe wẹ yẹn de, kavi e ma yin mọ wẹ?+ Ṣogan, dopo to mì mẹ yin mẹhẹngbletọ.”*+
71 Na nugbo tọn, e to hodọ gando Juda visunnu Simọni Iskaliọti tọn go, na ewọ wẹ na de e hia, dile etlẹ yindọ ewọ yin dopo to Omẹ Wiawe lẹ mẹ.+
