Johanu 1:1-51
1 To bẹjẹeji wẹ Ohó lọ ko tin,+ podọ Ohó lọ ko tin po Jiwheyẹwhe po,+ Ohó lọ sọ yin yẹwhe de.*+
2 Ewọ ko tin to bẹjẹeji hẹ Jiwheyẹwhe.
3 Nulẹpo wá aimẹ gbọn ewọ gblamẹ,+ podọ matin ewọ onú dopo tata ma wá aimẹ.
Nuhe ko wá aimẹ
4 gbọn ewọ dali wẹ ogbẹ̀, podọ ogbẹ̀ lọ wẹ hinhọ́n gbẹtọ lẹ tọn.+
5 Podọ hinhọ́n lọ to wunhọ́n to zinvlu mẹ,+ ṣigba zinvlu ma dohuhlọn do e ji.
6 Dawe de wá, he yin didohlan taidi afọzedaitọ Jiwheyẹwhe tọn; oyín etọn wẹ Johanu.+
7 Dawe ehe wá taidi kunnudetọ de, yèdọ nado dekunnu gando hinhọ́n lọ go,+ na gbẹtọ wunmẹ lẹpo nido sọgan tindo yise gbọn ewọ gblamẹ.
8 Ewọ ma wẹ yin hinhọ́n lọ gba,+ ṣigba ewọ yin yiyizan nado dekunnu gando hinhọ́n lọ go.
9 Hinhọ́n nugbo lọ he nọ na hinhọ́n gbẹtọ wunmẹ lẹpo na wá aihọn mẹ to madẹnmẹ.+
10 Ewọ ko tin to aihọn lọ mẹ,+ aihọn lọ sọ wá aimẹ gbọn ewọ gblamẹ,+ ṣigba aihọn lọ ma yọ́n ewọ.
11 E wá owhé edetiti tọn gbè, amọ́ omẹ etọn titi lẹ ma kẹalọyi i.
12 Ṣigba, mẹhe kẹalọyi i lẹpo wẹ e na jlọjẹ nado lẹzun ovi Jiwheyẹwhe tọn lẹ,+ na yé do yise hia to oyín etọn mẹ wutu.+
13 Yé sọ yin jiji, e ma yin gbọn ohùn dali kavi gbọn ojlo agbasalan tọn dali kavi gbọn ojlo gbẹtọ tọn dali gba, ṣigba gbọn Jiwheyẹwhe dali.+
14 Enẹwutu, Ohó lọ lẹzun agbasalan+ bo nọ ṣẹnṣẹn mítọn, mí sọ mọ gigo etọn, yèdọ gigo he taidi ovi detọ́n dopo akàn+ de tọn sọn otọ́ de dè; ewọ sọ gọ́ na nukundagbe Jiwheyẹwhe tọn* po nugbo po.
15 (Johanu dekunnu gando ewọ go, mọwẹ, e dawhá jẹgbonu dọmọ: “Omẹ ehe wẹ mẹlọ he go yẹn dọ gando dọ, ‘Mẹlọ he ja to godo ṣie ko jẹnukọnna mi, na ewọ ko tin jẹnukọnna mi wutu.’”)+
16 Mímẹpo wẹ mọ nukundagbe majẹhẹ susugege yí sọn e dè, na ewọ gọ́ na nukundagbe majẹhẹ wutu.
17 Na Osẹ́n lọ yin nina gbọn Mose gblamẹ,+ ṣigba nukundagbe majẹhẹ+ po nugbo lọ po wá gbọn Jesu Klisti gblamẹ.+
18 Mẹdepope ma ko mọ Jiwheyẹwhe pọ́n gbede;+ yẹwhe dopo akàn+ he to apá na Otọ́ lọ*+ wẹ mẹlọ he ko do E hia.+
19 Ehe wẹ kunnudide Johanu tọn to whenue Ju lẹ do yẹwhenọ lẹ po Levinu lẹ po hlan sọn Jelusalẹm nado kanse e dọmọ: “Mẹnu wẹ hiẹ?”+
20 Podọ e yigbe bo ma mọ́n bosọ dọmọ: “E ma yin yẹn wẹ Klisti lọ.”
21 Yé sọ kanse e dọmọ: “Mẹnu wẹ hiẹ yin lo? Be hiẹ wẹ Elija ya?”+ Ewọ sọ gblọn dọmọ: “Yẹn ma wẹ.” “Be hiẹ wẹ Yẹwhegán lọ ya?”+ E sọ gblọn dọmọ: “Lala!”
22 Enẹwutu, yé dọna ẹn dọmọ: “Mẹnu wẹ hiẹ? Dọna mí, na mí nido sọgan yì dọna mẹhe do mí hlan lẹ. Etẹwẹ hiẹ dọ gando dewe go?”
23 E dọmọ: “Yẹn wẹ mẹlọ he to awhádo jẹgbonu to danfafa ji dọ, ‘Mì jlọ aliho Jehovah* tọn lọ,’+ kẹdẹdile yẹwhegán Isaia dọ do.”+
24 Todin, Falesi lẹ mẹ wẹ mẹhe yin didohlan lẹ wá sọn.
25 Enẹwutu, yé kannubiọ ẹ bo dọna ẹn dọmọ: “To whelọnu lo, naegbọn hiẹ do to omẹ lẹ baptizi eyin hiẹ ma yin Klisti kavi Elija kavi Yẹwhegán lọ?”
26 Johanu gblọnna yé dọmọ: “Yẹn yí osin do baptizi. Mẹde to ote to ṣẹnṣẹn mìtọn he mìwlẹ ma yọnẹn,
27 mẹhe ja to godo ṣie, afọpakàn mẹhe tọn yẹn ma jẹ nado tún.”+
28 Onú ehelẹ jọ to Bẹtani, to Jọdani godo, fihe Johanu to gbẹtọ lẹ baptizi te.+
29 To aihọngbè, e mọ Jesu ja e dè bọ e dọmọ: “Mì pọ́n, Lẹngbọvu+ Jiwheyẹwhe tọn lọ he ze ylando+ aihọn tọn yì!+
30 Omẹ ehe lọ go wẹ yẹn ko dọ gando dọmọ: ‘To godo ṣie dawe de ja he ko jẹnukọnna mi, na ewọ ko tin jẹnukọnna mi wutu.’+
31 Dile etlẹ yindọ yẹn ma yọ́n ewọ, whẹwhinwhẹ́n he wutu yẹn yí osin do to omẹ lẹ baptizi wẹ yindọ, na ewọ nido sọgan yin hinhẹn sọawuhia Islaeli.”+
32 Johanu lọsu dekunnu dọmọ: “Yẹn mọ gbigbọ to tejẹ taidi apoe de sọn olọn, e sọ jẹ do e ji.+
33 Dile etlẹ yindọ yẹn ma yọ́n ewọ, ṣigba Mẹlọ he do mi hlan nado yí osin do baptizi dọna mi dọmọ: ‘To whenue hiẹ mọ gbigbọ ja odò bosọ jẹ do mẹde ji,+ hiẹ ni yọnẹn dọ omẹ enẹlọ wẹ nọ yí gbigbọ wiwe do baptizi.’+
34 Podọ yẹn ko mọ ẹn, yẹn ko sọ dekunnu dọ omẹ ehe lọ wẹ Visunnu Jiwheyẹwhe tọn.”+
35 Whladopo dogọ, to aihọngbè, Johanu tin to ote to finẹ po awe to devi etọn lẹ mẹ po,
36 podọ dile e mọ bọ Jesu to zọnlinzin, e dọmọ: “Mì pọ́n, Lẹngbọvu+ Jiwheyẹwhe tọn lọ!”
37 Whenue devi awe lọ lẹ sè ehe, yé hodo Jesu.
38 To whenẹnu, Jesu lẹgodo podọ to whenue e mọdọ yé to hihodo e, e dọna yé dọmọ: “Etẹ dín wẹ mì te?” Yé dọna ẹn dọmọ: “Labi (he lẹdogbedevomẹ etọn zẹẹmẹdo, “Mẹplọntọ”), fie wẹ hiẹ nọ nọ̀?”
39 E dọna yé dọmọ: “Mì wá, mì nasọ mọ.” Enẹwutu, yé yì bo mọ fihe e nọ nọ̀, yé sọ nọhẹ ẹ to azán enẹ gbè; e yin nudi gànhiho aotọ* mẹ.
40 Andle+ nọvisunnu Simọni Pita tọn yin dopo to omẹ awe he sè nuhe Johanu dọ bosọ hodo Jesu lọ lẹ mẹ.
41 Jẹnukọn whẹ́, ewọ dín nọvisunnu etọn titi, Simọni mọ, bo dọna ẹn dọmọ: “Mí ko mọ Mẹsia lọ”+ (he lẹdogbedevomẹ etọn zẹẹmẹdo, “Klisti”),
42 e sọ plan ẹn yì Jesu dè. To whenue Jesu pọ́n ẹn, e dọmọ: “Hiẹ wẹ Simọni+ visunnu Johanu tọn; hiẹ na nọ yin yiylọdọ Kefa” (he lẹdogbedevomẹ etọn yin “Pita”).+
43 To aihọngbè, e jlo nado yì Galili. To whenẹnu, Jesu mọ Filipi+ bo dọna ẹn dọmọ: “Lẹzun hodotọ ṣie.”
44 Todin, Filipi wá sọn Bẹtsaida, sọn tòdaho Andle po Pita po tọn mẹ.
45 Filipi mọ Natanaeli+ bo dọna ẹn dọmọ: “Mí ko mọ mẹlọ he Mose, to Osẹ́n lọ mẹ po Yẹwhegán lẹ po ko kanwe gando e go: Jesu, visunnu Josẹfu tọn,+ sọn Nazalẹti.”
46 Ṣigba, Natanaeli dọna ẹn dọmọ: “Be nudagbe depope sọgan wá sọn Nazalẹti ya?” Filipi dọna ẹn dọmọ: “Wá pọ́n.”
47 Jesu mọ Natanaeli ja e dè bo dọ gando ewọ go dọmọ: “Pọ́n, Islaelivi nugbo de die, mẹhe mẹ oklọ depope ma tin te.”+
48 Natanaeli dọna ẹn dọmọ: “Nawẹ hiẹ wagbọn do yọ́n mi?” Jesu gblọnna ẹn dọmọ: “Whẹpo Filipi do ylọ we, to whenue hiẹ tin to ovòtin glọ, yẹn ko mọ we.”
49 Natanaeli gblọn dọmọ: “Labi, hiẹ wẹ Visunnu Jiwheyẹwhe tọn lọ, hiẹ wẹ Ahọlu Islaeli tọn.”+
50 Jesu gblọnna ẹn dọmọ: “Be na yẹn dọna we dọ n’mọ we to ovòtin glọ wutu wẹ hiẹ do yí mi sè ya? Hiẹ na mọ nuhe klohugan ehelẹ.”
51 Enẹgodo, e dọna ẹn dọmọ: “Nugbonugbo wẹ yẹn dọna mì dọ, mì na mọ olọn hùndonuvo bọ angẹli Jiwheyẹwhe tọn lẹ na to jihẹ bo to tejẹ wá Visunnu gbẹtọ tọn dè.”+
Nudọnamẹ Odò Tọn
^ Kavi “sọ wá sọn olọn mẹ.”
^ Kavi “nukundagbe majẹhẹ.”
^ Kavi “he to akọ́nnu Otọ́ tọn.” Ehe to alọdlẹndo otẹn nukundagbe vonọtaun tọn de.
^ Enẹ wẹ, nudi ogàn 4 whèjai tọn.
