2 Mose 6:1-30
6 Eye Yehowa gblɔ na Mose be: “Azɔ àkpɔ nu si mawɔ Farao.+ Nye alɔ sesẽ ana wòaɖe asi le wo ŋu, eye nye alɔ sesẽ ana wòanya wo le eƒe anyigba dzi.”+
2 Eye Mawu gagblɔ na Mose be: “Nyee nye Yehowa.
3 Nyee ɖe ɖokuinye fia Abraham, Isak kple Yakob abe Mawu Ŋusẽkatãtɔ ene,+ ke le nye ŋkɔ Yehowa+ gome ya la, nyemeɖe ɖokuinye fia wo bliboe o.+
4 Mebla nu kpli wo hã be matsɔ Kanaan-nyigba, si dzi wonye amedzro le kpɔ la, ana wo.+
5 Azɔ mese Israel-viwo, ame siwo Egiptetɔwo wɔ kluviwoe la ƒe hũɖeɖe, eye meɖo ŋku nye nubabla la dzi.+
6 “Eya ta gblɔ na Israel-viwo be: ‘Nyee nye Yehowa; maɖe mi tso Egiptetɔwo ƒe kɔkuti te, maɖe mi tso kluvinyenye me,+ madrɔ̃ ʋɔnu sesẽe, eye matsɔ alɔ si medo ɖa* aɖe mi.+
7 Maxɔ mi mianye nye dukɔ, eye manye miaƒe Mawu;+ eye miadze sii be nyee nye Yehowa mia Mawu, ame si aɖe mi tso Egiptetɔwo ƒe kɔkuti te.
8 Makplɔ mi ayi anyigba si ŋu meka atam* le be matsɔ ana Abraham, Isak kple Yakob la dzi; matsɔe ana mi wòanye mia tɔ.+ Nyee nye Yehowa.’”+
9 Emegbe Mose gblɔ nya siawo na Israel-viwo, ke womeɖo to Mose o le dziɖeleameƒo kple kluvidɔ sesẽ la ta.+
10 Eye Yehowa gblɔ na Mose be:
11 “Yi Egipte-fia Farao gbɔ nàgblɔ nɛ be wòaɖe asi le Israel-viwo ŋu woadzo le eƒe anyigba dzi.”
12 Ke Mose gblɔ na Yehowa be: “Kpɔ ɖa, Israel-viwo meɖo tom o;+ ke aleke wɔ Farao aɖo to nye ame si nu menya ƒona na o la?”*+
13 Ke Yehowa gagblɔ nya si wòle be woagblɔ na Israel-viwo kple Egipte-fia Farao, ne woakplɔ Israel-viwo adzoe le Egipte-nyigba dzi la na Mose kple Aron.
14 Wo fofowo ƒe aƒekɔwo ƒe tatɔwoe nye: Ruben, si nye Israel ƒe ŋgɔgbevi la,+ eya ƒe viwoe nye Hanok, Palu, Hezron kple Karmi.+ Ame siawoe nye Ruben ƒomeawo.
15 Simeon viwoe nye Yemuel, Yamin, Ohad, Yakin, Zohar kple Saul, ame si nye Kanaan nyɔnu aɖe ƒe vi.+ Woawoe nye Simeon ƒomeawo.
16 Lewi+ viwo ƒe ŋkɔwoe nye esi le woƒe ƒomeawo ƒe dzidzime nu: Gerson, Kohat kple Merari.+ Lewi ƒe agbenɔƒewo le ƒe alafa ɖeka blaetɔ̃ vɔ adre.
17 Gerson viwoe nye Libni kple Simei le woƒe ƒomeawo nu.+
18 Kohat viwoe nye Amram, Yizhar, Hebron kple Uziel.+ Kohat ƒe agbenɔƒewo le ƒe alafa ɖeka blaetɔ̃ vɔ etɔ̃.
19 Merari viwoe nye Mahli kple Musi.
Esiawoe nye Lewi viwo ƒe ƒomewo le woƒe ƒomeawo ƒe dzidzime nu.+
20 Ke Amram ɖe fofoa nɔvinyɔnu Yokebed.+ Eye wòdzi Aron kple Mose nɛ.+ Amram ƒe agbenɔƒewo le ƒe alafa ɖeka blaetɔ̃ vɔ adre.
21 Yizhar viwoe nye Kora,+ Nefeg kple Zikri.
22 Uziel viwoe nye Misael, Elizafan+ kple Sitri.
23 Ke Aron ɖe Aminadab vinyɔnu Eliseba, si nye Nahason+ nɔvinyɔnu. Eye wòdzi Nadab, Abihu, Eleazar kple Itamar nɛ.+
24 Kora viwoe nye Asir, Elkana kple Abiasaf.+ Esiawoe nye Kora viwo ƒe ƒomeawo.+
25 Aron viŋutsu Eleazar+ ɖe Putiel vinyɔnuwo dometɔ ɖeka. Eye wòdzi Finehas nɛ.+
Ame siawoe nye Lewi viwo ƒe tatɔ siwo le wo fofowo ƒe aƒekɔwo nu le woƒe ƒomeawo nu.+
26 Aron kple Mose siawoe Yehowa gblɔ na be: “Mikplɔ Israel dukɔa dzoe le Egipte-nyigba dzi hatsotso hatsotso.”*+
27 Woawoe ƒo nu kple Egipte-fia Farao be yewoakplɔ Israel dukɔa adzoe le Egipte. Ame siawoe nye Mose kple Aron.+
28 Eye gbe si gbe Yehowa ƒo nu kple Mose le Egipte-nyigba dzi la,
29 Yehowa gblɔ na Mose be: “Nyee nye Yehowa. Gblɔ nya siwo katã gblɔm mele na wò la na Egipte-fia Farao.”
30 Eye Mose gblɔ na Yehowa be: “Kpɔ ɖa, nu menya ƒona nam o,* aleke wɔ Farao aɖo tom?”+
Etenuŋɔŋlɔ
^ Alo, “matsɔ alɔkame sesẽ.”
^ Egɔmeɖeɖe tẽe, “mekɔ asi dzi.”
^ Egɔmeɖeɖe tẽe, “ame si ƒe nuyiwo wometso o.”
^ Egɔmeɖeɖe tẽe, “le woƒe aʋakɔwo nu.”
^ Egɔmeɖeɖe tẽe, “ame si ƒe nuyiwo wometso o.”
