AYÉ’É 5
Nsôñane Zambe ô ne ôvé mfa’a ya si?
1. Amu jé Zambe a nga té si?
Yéhôva a nga ve befam a binga si, amu é né étaba’a jap. Nde ñhe, Adam ba Ève be nji tébane na be jalé yôp. Beéngele, mbe Zambe a nga té na be tabe e yôp, sake bôt. (Job 38:4, 7) A nga toé Adam abeñe Paradis, ba loene na afup Éden. (Metata’a 2:15-17) Yéhôva a nga ve nye a mvoñe bôte jé ése nsôñane ya nyiñe nnôm éto e si va.—Lañe Besam 37:29; 115:16.
Atata’a, afup Éden étam é mbe Paradis. Adam ba Ève be mbe na, ba yiane jalé si a mvoñe bôte jap. Ane éyoñe é nga ye lôt, be nga ye jôé si se, a bo je Paradis. (Metata’a 1:28) Si j’aye ke tyamé môs éziñ. J’aye bo étaba’a môt a binam e nnôm éto.—Lañe Besam 104:5.
Yene’e vidéo a ne nlô ajô na Amu jé Yéhôva a nga té si?
2. Amu jé si é nji bo Paradis den?
Adam ba Ève be nga bo Zambe melo, a ne Yéhôva a nga titane be afup Éden. Nté a ne Paradis a nga jañ, môt éziñ a se ngule ya beta télé nye. Kalate Zambe ajô na: “Si nyô é maneya vebane mo me bôt be ne abé.”—Job 9:24.—Lañe Metata’a 3:23, 24.
Ye Yéhôva a vuaneya nsôñane wé ya atata’a mfa’a ya môte a binam? Téké’é! A ne Zambe ya ngul ése. A vo’o ke ku. (Ésaïe 45:18) Aye beta telé aval ényiñe môt a binam a nga bili atata’a.—Lañe Besam 37:11, 34.
3. Aval avé Paradis a ye beta téléban?
Paradis a ye beta téléban e si va éyoñe Yésus a ye bo njôô ya si. Yésus ba beéngele bé b’aye mane jaane bôte ba bo Zambe éngana’a, e bita ba loene na Harmaguédon. Éyoñe te nde, Yésus aye futi Satan mimbôk tañe mimbu 1 000. Ve jame da, bebo b’ésaé be Zambe b’aye nyiñe bita bite, amu Yésus aye liti be zen, a kamane be. B’aye nyiñe nnôm éto e Paradis e si va.—Lañe Nlitan 20:1-3; 21:3, 4.
4. Minjuk mi aye man éyoñ évé?
Éyoñ évé Zambe aye va abé é ne si nyi? Yésus a nga ve ndem ja liti na, asu’ulan é ntoo bebé. Mbia biyoñe bia tyélé bia minleme yôp den, bia liti na “asu’ulane ya nta’an mame wu” é ntoo bebé.—Matthieu 24:3, MN.—Lañe Matthieu 24:7-14, 21, 22.
Yésus aye jôé si a too yôp tañ mimbu toyini. Éyoñ te nje, aye mane va minjuk mise mi ne si. (Ésaïe 9:6, 7; 11:9) A ye fe bo beta prêtre, a jamé abé é ne be ba bese ba nye’e Zambe. Nalé a tinane na Zambe aye va akon, nkeane nnôm, a awu a zene ya Yésus.—Lañe Ésaïe 25:8; 33:24.
5. Za aye nyiñ e Paradis a zu?
Aba Éjôé été, wo ye tôbane bôte ba nye’e Zambe, a ba kômbô ve nye nleme mvaé
Bôte b’abo Zambe mewôk b’aye nyiñ e Paradis. (1 Jean 2:17) Yésus a nga lôme beyé’é bé na, be jeñe bôte ba kômbô tyendé minleme miap, a ye’ele be aval avé be ne ve Zambe nleme mvaé. Éyoñe ji, Yéhôva a kômesane bizu’u bi bôt, asu ényiñe ya melu m’a zu, e Paradis e si va. (Sophonie 2:3) Aba Éjôé Bengaa be Yéhôva, bôte ba yé’é bo, mbamba beyôm a mbamba b’ésaa, mbamba beyal a mbamba benyia. Bone a bebiaé ba kañe Zambe nsamba, a ba yé’é aval avé be ne yene mfi ya mbamba mefoé.—Lañe Michée 4:1-4.
