Matthieu 6:1-34
6 “Taba’ané ntyele ya bo mbamba be mam amu mia kômbô bo miñyené mise me bôt; nge nalé, yemané na Ésa wônan a ne yôp a ye bo te ya’ane mia amu mbamba be mame bete.
2 Ajô te, éyoñe mia bo mimveane ya mvam,* te mia loñe toñ avale bôte medu’ane ba bo besynagogue été a minjoñe minjoñ, mfa’a ya na bôte be ve be duma. Ma kate fo’o mia na, be maneya bi ma’ane map mese.
3 Ve wo, éyoñe wo bo mimveane ya mvam, wo wôé ya mbo ngal ô nji yiane yeme jame wo wôé ya mbo nnôme wo bo.
4 Bo’o mimveane ya mvame miôé asoé.* Ndemben Ésa wôé a yene mame ma boban asoé, a ye bulane wo mveane wôé.
5 “Nde fe éyoñe wo ye’elan, te bo ane bôte medu’ane ba bo; ba nye’e ba tebe tetele besynagogue été nge ke meku’u ya beta minjoñ, na bôte be yene be. Ma kate fo’o mia na, be maneya bi ma’ane map mese.
6 Ve éyoñe wo ye’elane Zambe, nyi’in étune nda jôé été, ô fete mbé. Éyoñ éte Ésa wôé a yene mame ma boban asoé a ye yalane wo.
7 Ve éyoñe wo ye’elane Zambe, te ba’alane mame ne ba’ala ba’alan ane bôte ya si nyu ba bo, amu ba buni na, Zambe a ye vô’ôlô be amu ba kobô abui.
8 Nde te bo ane be, amu Ésa wônan a yeme mame mese mia yi ôsusua na mia sili nye me.
9 “Mia yiane ñhe ye’elan ana:
“‘A Ésa wongan a ne yôp, jôé dôé é bo’o étyi.*
10 Éjôé jôé é za’ak. Nkômbane wôé ô boba’ane si va aval ane wo bobane yôp.*
11 Va’a bia bidi bia* yiane bia môse ya den;
12 jamé’é fe bia minseme miangan* avale bi maneya jamé bôte be nga bo bia abé.*
13 Nde fe, te bo na bi tôbane meve’ele, ve kôté’é bia* be mbia môt.’
14 “Amu, nge mia jamé bôte ba bo mia abé, Ésa wônan a ne yôp a ye fe jamé mia bikobe bienan;
15 ve nge mia bene jamé bôte ba bo mia bikop, Ésa wônan a ne yôbe fe a ye bene jamé mia bikobe bienan.
16 “Éyoñe mia tyi bidi amu Zambe, mi nji yiane vañe bo éyôé ane bôte medu’ane be wô’ô bo, ba vañe bo mimbote mesu na bôte be yeme na ba tyi bidi amu Zambe. Ma kate fo’o mia na, be maneya bi ma’ane map mese.
17 Ve wo, éyoñe wo tyi bidi amu Zambe, wo’o mbone nlô wôé, sôbe’e fe asu dôé
18 na, bôte ba yene wo be bo teke yeme na wo tyi bidi amu Zambe; ve Ésa wôé a yene mame ma boban asoé, nnye étam a yiane de yem. Ndemben Ésa wôé a yene mame ma boban asoé a ye botane wo.
19 “Te mia ke ôsu a kôan akume denan e si va, vôme si’ibem a miengele bi ne ndamane de, a vôme miñwuwube mi ne zu wube de.
20 Ve kôan akume denan e yôp, vôme si’ibem a miengele bi vo’o zu ndamane de a vôme miñwuwube mi vo’o zu wube de.
21 Amu vôm akume dôé é ne, nne fe nleme wôé wo ye bo wôé.
22 “Dis é ne lambe ya nyule môt. Nde, nge dise dôé da fombô ve jôme jia,* wôna nyule jôé ése ja ye faé.*
23 Ve nge ô bili dise minyamete,* wôna nyule jôé ése ja ye bo dibi. Nge éfufup é ne be wo é ne dibi, wôna dibi éte é vineya fo’o ne viu!
24 “Môt éziñ a vo’o saé asu bemasa bebaé ane ôlo; a ye vini wua a nye’e ke nyu mbok, nge ke na, a ye kabetane wua a biasé ke nyu mbok. Mi vo’o saé asu Zambe ba akum* éyoñe jia ane alo.
25 “Ajô te, ma jô mia na: Te mia beta tyelé minleme yôp amu ényiñe* jenan, mfa’a ya bidi mia ye di, jôme mia ye nyu; nge ke amu menyule menan, mfa’a ya biyé mia ye jaé. Nga ényiñ é ne mfi a dañe bidi? Nga nyul é ne mfi a dañe biyé?
26 Kômané fombô anone ya yôp; amu anon é ne te bé nge kôane bidi menda ba ba’ale bidi, ve Ésa wônane ya yôp a toñe de. Nga mi ne mfi a dañ anon?
27 Za ya be mia a ne kô’ôlane melu me ényiñe mé, ve mone jôm amu a tyelé nleme yôp?
28 Nde fe, amu jé mia tyelé minleme yôbe mfa’a ya biyé mia ye jaé? Tama fombané meyañe ya mefup, ma yaé teke ve ngul éziñ, me ne teke loé nge tiñe biyé;
29 ve ma kate mia na, to’o Salomon a étôtok ése a nga bi, a nji jaé biyé môs éziñ ane meyañe ya mefup.
30 Nde, nge Zambe a jalé bilo’o ya fé nalé, mbie bia faa den, akiti ki be wua bie nduan, ngumane ke mia, ye a ye bo te jalé mia biyé, a mia mi ne teke ngule mbunan?
31 Nde ñhe, te mia beta tyelé minleme yôp a sili miabebiene na: ‘Bia ye di jé?’ ‘Bia ye nyu jé?’ Nge ke na, ‘Bia ye jaé jé?’
32 Ke mame bôte ya meyoñe ba jeñ a ngul ése mme le. Ésa wônane ya yôp a yeme na, mia jembane mame mete mese.
33 “Nde, kom ése, tata’a jeñané Éjôé Zambe a zôsô wé, ndembene Zambe a ye kô’ôlane mia mame mete mese.
34 Ajô te, te mia ve’ele tyelé minleme yôp asu môse ya akiti, amu môse ya akiti wo ye bi minju’u mié. Môs ôse ya yôp ô bili abime minju’u dé.
Notes
^ Nge ke, “ve minzôzoé mi bôte biôm.” Lañe’e Atinane bifia.
^ Nge ke, “va’a bingôngole bi bôte biôme biôé asoé.”
^ Nge ke, “é bo’o mfuban; é biik ésemé.”
^ Nge ke, “Nkômbane wôé ô boba’ane si va a yôp été.”
^ Nkobô Grec, “belete ja.”
^ Nkobô Grec, “tyame’e bia memvôla mangan.”
^ Nkobô Grec, “avale bi maneya tyame memvôla bôte be bili bia.”
^ Nge ke, “kama’ane bia.”
^ Nge ke, “yene mvo’é.” Nkobô Grec, “é ne tyi’ibi.”
^ Nge ke, “bo njalan a éfufup.”
^ Nkobô Grec, “nge dise dôé é ne abé.”
^ Nge ke, “moné.”
^ Éfia Grec, psukhê. Lañe’e Atinane bifia, “Ényiñ.”
