Bia buni na, miñye’elane ya Kalate Zambe mi ne nsoé kalate wu, mia te volô wo na ô tu’a nye’e Yéhôva. Wo yiane ke ôsu a yemete nye’ane te. (1 Pierre 2:2) Ndi nlem ô bili mfa’a ya ényiñe ya nnôm éto é tii a nkeane wo ke ôsu a subu Zambe bebé, a ñyé’ane wo yé’é mejô me Zambe.​—Lañe Jean 17:3; Jude 21.

Abime ñyemane wo yeme Yéhôva wo ye nen, abime te fe mbunane wôé wo ye bo ngul abui. Mbunane wo ye volô wo na, ô ve Zambe nleme mevak. (Behébreu 11:​1, 6) Mbunane te, wo ye tindi wo na ô kôñelane nlem. Wo ye fe bo na, ô tyendé fatan ényiñe jôé asu mfi wôé.​—Lañe Mam minlôman 3:19.

D’aye kui na, wo ye kômbô kate bôte bevok mam ô nga yé’é. Bia bese bia nye’e bi kañete mbamba mefoé. Éyoñe wo ye ke ôsu a yé’é Kalate Zambe, wo ye fe yé’é aval avé ô ne belane nye. Wo ye bo ngule ya kate bôte bevok mbamba mefoé, a timine mbunan ô bili be Yéhôva.​—Lañe Beromain 10:13-15.

Abui bôte da taté na ba kañete bemvôé bap mbamba foé a nda bôte jap. Bo’o de a évôvoé nlem. É nji bo mfi na ô kate be na, ñyebe wop ô ne abé; kate be mam Zambe a ka’a bia. Ô ba’ale fe na, mimboone miôé mi ne mfi alôté mam wo jô.​—Lañe 2 Timothée 2:24, 25.

Nge wo ke ôsu a yé’é Kalate Zambe, wo ye yaé nsisim. Aval éyoñe j’aye lôte,  wo ye bi angôndô ya abeñ élat a Zambe. Éyôñe ji, ô ne bo môte wé a môte ya nda bôte jé.​—Lañe 2 Becorinthien 6:18.

Wo ye yaé nsisim nge wo ke ôsu a yé’é mejô me Zambe. (Behébreu 5:​13, 14) Sili’i mone Bengaa wua na, a zu yé’é a wo, a Kalate ba loene na Jé Kalate Zambe a ne ye’ele bia? Abime wo ye yé’é mejô me Zambe, abime te fe ényiñe jôé j’aye bo mvoé.​—Lañe Besam 1:1-3; 73:27, 28.

Kalate Zambe a bili ‘étôto’o mbamba foé ya Zambe ya mevak.’ (1 Timothée 1:11, MN) Ô ne tu’a subu Zambe bebé, nge wo ke ôsu a subu bôte bé bebé. (Behébreu 10:24, 25) Nge wo ke ôsu a ve ngule na, ô ve Zambe nleme mvaé, wo ye bi nya ényiñ: ényiñe ya nnôm éto. Nya jame wo yiane bo a ne na, ô subu Zambe bebé.​—Lañe 1 Timothée 6:19.