Talinhaga 18:1-24
18 An siisay man na nagsusuway kan sadiri niya naghahanap kan saiyang makasadiring mga kamawutan;Isinisikwal* niya an gabos na praktikal na kadunungan.
2 An mangmang na tawo dai ikinakaugma an pakasabot;Mas gusto pa niyang ihinahayag an nasa laog kan saiyang puso.+
3 Pag minaabot an tawong maraot, an panghahamak minaabot man,Asin kaiba kan kawaran nin onra an kasusupgan.+
4 An mga tataramon sa nguso nin tawo hararom na katubigan.+
An burabod nin kadunungan sarong sapang nagbubulak-bugak.
5 Bakong marahay na magpahiling nin pagpaurog sa sarong maraot+O ipanguri an hustisya sa sarong matanos.+
6 An pananaram kan sarong mangmang minaresulta sa mga iriwal,+Asin an nguso niya nag-aagda nin pambubugbog.*+
7 An nguso kan mangmang iyo an ikakapahamak niya,+Asin an saiyang mga ngabil siod sa buhay* niya.
8 An mga tataramon nin sarong parapakaraot siring sa masisiram na pidaso nin kakanon;*+Hinahalon an mga iyan nin diretso sa tulak.+
9 An siisay man na hugakon sa saiyang trabahoTugang kan saro na nagdadara nin danyos.+
10 An pangaran ni Jehova sarong masarig na tore.+
Diyan minadalagan an matanos asin nag-aako nin proteksiyon.*+
11 An kayamanan kan mayaman iyo an saiyang siyudad na may matibay na depensa;Siring iyan sa nagpoprotektar na pader sa imahinasyon niya.+
12 Bago an pagbagsak, may kapalangkawan nguna an puso nin sarong tawo,+Asin bago an kamurawayan igwa ngunang kapakumbabaan.+
13 Pag an siisay man minasimbag sa sarong bagay bago niya madangog an mga totoong detalye,Kamangmangan iyan asin makasusupog.+
14 An kusog nin buot* nin sarong tawo makakasustenir sa saiya sa panahon na naghihilang siya,+Pero siisay an makakahimong kayanon an runot na espiritu?*+
15 An puso kan may pakasabot nagkukua nin kaaraman,+Asin an talinga kan mga madunong naghihinguwang makahanap nin kaaraman.
16 An regalo nin sarong tawo nagbubukas nin dalan para sa saiya;+Paagi kaiyan nakakarani siya sa mga prominenteng tawo.
17 An inot na magpresentar kan saiyang lado sa kaso garo baga iyo an tama,+Sagkod na mag-abot an ibong na lado asin usisaon siya.*+
18 An burunutan nakakapapundo nin diriskutiran+Asin nagdedesisyon sa pag-ultanan nin* mga makusog na magkalaban.
19 An tugang na nagibuhan nin sala mas habong magpadaog kisa sa siyudad na may matibay na depensa,+Asin igwa nin mga iriwal na siring sa mga balagbag na pambarat nin sarong kuta.*+
20 Mapapano an tulak nin sarong tawo hali sa bunga kan mga itinataram* niya;+Mababasog siya sa mga ibinubunga kan mga ngabil niya.
21 An kagadanan asin buhay nasa kapangyarihan kan dila;+An mga gustong-gustong gamiton iyan kakakanon an bunga kaiyan.+
22 An saro na nakahanap nin marahay na agom na babayi nakakua nin sarong marahay na bagay,+Asin nag-aako siya kan pag-uyon* ni Jehova.+
23 An tawong pobre nakikimahirak pag nagtataram,Pero an tawong mayaman maisog na nagsisimbag.
24 Igwa nin magkairiba na andam na runuton an kada saro,+Pero igwa nin amigo na nagdadanay na mas dayupot pa kisa sa sarong tugang.+
Mga Nota
^ O “Hinahamak.”
^ O “paghampak.”
^ O “kalag.”
^ O “siring sa mga bagay na hinahalon nin may kapasluan.”
^ Sa literal, “asin itinataas,” na an buot sabihon, dai maabot, ligtas.
^ O “an grabeng kawaran nin paglaom?”
^ Sa literal, “An espiritu.”
^ O “siyasaton siyang marhay.”
^ Sa literal, “pinagsusuway an.”
^ O “sarong lugar na may matibay na depensa.”
^ Sa literal, “kan nguso.”
^ O “marahay na buot.”
