Talinhaga 15:1-33
15 An mahuyong* simbag nakakahali nin kaanggutan,+Pero an maisog* na tataramon nakakapaanggot.+
2 An dila kan mga madunong ginagamit sa marahay na paagi an kaaraman,+Pero an nguso kan mga mangmang tulos na pigluluwas an kamangmangan.
3 An mga mata ni Jehova yaon sa gabos na lugar,Nagmamasid sa mga maraot asin sa mga marahay.+
4 An kalmadong dila* kahoy nin buhay,+Pero an biribid na pananaram nakakapawara nin paglaom.*
5 An mangmang dai iginagalang an disiplina kan saiyang ama,+Pero an tawong alisto an isip inaako an pagtatanos.*+
6 Sa harong kan matanos may abundang kayamanan,Pero an ani* kan maraot nagdadara sa saiya nin kapahamakan.+
7 An mga ngabil kan mga madunong nagpapalakop nin kaaraman,+Pero bakong arog kaiyan an puso kan mangmang.+
8 An atang kan mga maraot makababaldi ki Jehova,+Pero an pamibi kan mga matanos nakakapaugma sa Saiya.+
9 Ikinakabaldi ni Jehova an dalan kan maraot,+Pero namumutan niya an saro na nagmamaigot na gumibo nin matanos.+
10 Para sa saro na minabaya sa dalan, maraot* an disiplina,+Pero an siisay man na ikinakaungis an pagsagwi magagadan.+
11 Hiling-hiling ni Jehova an Lubungan* asin an lugar nin kalapaan.*+
Di lalo na an mga puso kan mga tawo!+
12 An paraulog-ulog dai namumuot sa saro na nagtatanos* sa saiya.+
Dai siya makonsulta sa mga madunong.+
13 An pusong maugma nakakapasinggaya sa lalawgon,*Pero an kulog sa puso nakakapalupaypay sa espiritu.+
14 An pusong may pakasabot naghahanap nin kaaraman,+Pero an nguso kan mga mangmang pigkakakan* an kamangmangan.+
15 An gabos na aldaw kan saro na nasasakitan bakong marahay,+Pero an saro na may maugmang* puso igwang dagos-dagos na kapiyestahan.+
16 Mas marahay pang igwang kakadikit pero may pagkatakot ki Jehova+Kisa sa kadakul na kayamanan na may kaibang kahaditan.*+
17 Mas marahay pa an putaheng gulay pero may pagkaminuruutan,+Kisa sa pinatabang* torong baka pero may pagkainurungisan.+
18 An tawong madaling mag-init an payo minapukaw* nin iriwal,+Pero an saro na dai tulos naaanggot nagpapahupa nin pag-iiwal.+
19 An dalan kan hugakon siring sa kudal na mga tanom na matunok,+Pero an agihan kan mga matanos siring sa patag na tinampo.+
20 An aking madunong nakakapaugma sa saiyang ama,+Pero an tawong mangmang hinahamak an saiyang ina.+
21 An kamangmangan kaugmahan para sa saro na mayo nin marahay na pagmansay,*+Pero an tawong may pakasabot naglalakaw nin diretso sa inutan.+
22 Minapalyar an mga plano pag mayo nin pag-uulay,*Pero may nahahaman pag may dakul na parakonseho.*+
23 Nag-uugma an sarong tawo pag nakakatao siya nin tamang simbag,*+Asin an tataramon na sinabi sa tamang panahon— abaang rahay nanggad!+
24 Patukad an dalan nin buhay sa saro na may pakasabot,+Tanganing mailikay siya sa Lubungan* na nasa ibaba.+
25 Gagabaon ni Jehova an harong kan mga mapalangkaw,+Pero iingatan niya an sagkudan kan daga kan babaying balo.+
26 Ikinakabaldi ni Jehova an mga pakana kan maraot,+Pero an nakakaugmang mga tataramon dalisay para sa Saiya.+
27 An saro na naggaganar sa madayang paagi nagdadara nin kapahamakan* sa pamilya niya,+Pero an saro na ikinakaungis an mga suhol magdadanay na buhay.+
28 An puso kan matanos naghuhurop-hurop bago magsimbag,*+Pero an nguso kan mga maraot tulos na minataram nin maraot na mga bagay.
29 Harayo si Jehova sa mga maraot,Pero dinadangog niya an pamibi kan mga matanos.+
30 Nagpapaugma sa puso an nagliliwanag na mga mata;*Nagpapakusog* sa mga tulang an marahay na bareta.+
31 An saro na nagdadangog sa pagsagwi na nagtataong-buhayNag-iistar sa kaibanan nin mga madunong.+
32 An siisay man na hinahabuan an disiplina ikinakabaldi an buhay* niya,+Pero an siisay man na nagdadangog sa pagsagwi nagkakamit nin pakasabot.*+
33 An pagkaigwa nin pagkatakot ki Jehova pagsasanay para magkamit nin kadunungan,+Asin bago an kamurawayan igwa ngunang kapakumbabaan.+
Mga Nota
^ O “mabuot na.”
^ O “makulog.”
^ O “An nakakapaumay na dila.”
^ Sa literal, “nakakarunot kan espiritu.”
^ O “pagsagwi.”
^ O “ginaganar.”
^ O “magabat.”
^ O “an Abadon,” na nangangahulugan “Kalaglagan.”
^ O “nagsasagwi.”
^ O “pandok.”
^ O “pighahanap.”
^ O “marahay na.”
^ O “karibarawan.”
^ Sa literal, “pinakakan sa bahugan na.”
^ O “minapagrabe.”
^ O “kulang nin marahay na pagmansay.” Sa literal, “mayong (tikapo an) puso.”
^ O “kumpidensiyal na pag-uulay.”
^ O “parataong sadol.”
^ Sa literal, “sa simbag kan saiyang nguso.”
^ O “kasusupgan.”
^ O “maingat na nag-iisip kun paano masimbag; nag-iisip nguna bago magsimbag.”
^ Sa literal, “Nagpapataba.”
^ O “an masinggayang salimbad.”
^ O “kalag.”
^ Sa literal, “puso.”
