YIGIL 4
Njee a yé Yésu Kristô?
1. Lelaa niñ i Yésu i bi bôdôl?
Bimbe bilem bi Yésu bi bé nyuge bôt i kôôge nye bebe?—MATÉÔ 11:29; MARKÔ 10:13-16.
Yésu a bé mahéñha ni bôt bape inyule a bi niñ i ngii kii añgel ilole a ngwéé hana isi. (Yôhanes 8:23) A bé hégél bisu i Djob, a hôla ki nye i heg mam momasôna. Nyetama nyen Yéhôva a bi heg ni moo mé, inyu hala nyen ba nsébél nye le “pombe” Man nu Djob. (Yôhanes 1:14) Yésu a bé Mpôdôl Djob nu bisu, inyu hala nyen a nséblana le “Bañga.”—Añ Bingéngén 8:22, 23, 30; Kôlôsé 1:15, 16.
2. Inyuki Yésu a bi lo hana isi?
Djob a bi héa man wé ngii, a ep nye hana isi. A ha niñ yé ikété libum li ngont Lôk Yuda le Maria. Ha ngéda i, Maria a bé konji. Jon Isañ Yésu a bé bé mut binam. (Lukas 1:30-35) Yésu a bi lo hana isi inyu manjom maa: (1) I niiga bés i yi Djob, (2) i unda bés lelaa di nla boñ sômbôl i Djob to ngéda di yé ikété mandutu, (3) ni ti niñ i peles kii “binoñ.”—Añ Matéô 20:28.
3. Inyuki di gwé ngôñ ni binoñ?
Inyu tohol mut a nlama nôla, bôt ba yé ba saa ngim ndamba. I ndamba yon ba nsébél le binoñ. (Manyodi 21:29, 30) Nyemb ni biuni bi bé bé ikété bitééne bi Djob i bibôdle. Lelaa di nyi hala? Djob a bi kal Adam, mut binam nu bisu, le ibale a mboñ yom Bibel i nsébél le “béba,” a ga wo yaga. Jon ibale Adam a boñ bé béba, ki a bi wo bé. (Bibôdle 2:16, 17; 5:5) Inoñnaga ni Bibel, nyemb i bi “jôp” ikété nkoñ isi ni njel Adam. Hala nyen Adam a bi lôôs bon bé béba, ni nsaa wé le nyemb. Di gwé ngôñ ni binoñ inyu pam isi kogse i nyemb di bi kôdôl ni Adam.—Añ Rôma 5:12; 6:23.
Njee a bé la saa binoñ inyu tohol bés i mog mi nyemb? Ngéda di nwo, di nsaa ndik inyu bibéba gwés. Mut nu a ta bé peles a nla bé saa inyu bibéba bi bôt bape.—Añ Tjémbi 49:8-10
4. Inyuki Yésu a bi wo?
Yésu a bé mahéñha ni bés inyule a bé peles. Jon a bé lama bé wo—inyule a bi boñ bé béba yo ki yo. Ndi, Yésu nye a bi wo inyu bibéba bi bôt bape. Djob a bi lôôha gwés nkoñ isi, jon a bi ti mpom wé man le a wo inyu yés. Yésu a bi unda bés gwéha ngéda a bi nôgôl Isañ, ndi a ti niñ yé inyu bibéba gwés.—Añ Yôhanes 3:16; Rôma 5:18, 19.
Béñge vidéô Inyuki Yésu a bi wo?
5. Kii Yésu a mboñ len ini?
Ngéda Yésu a bé hana isi, a bi mélés bakokon, a tugul bawoga, a hôla ki bôt ba bé ikété mandutu. A bi unda yom a ga boñ i dilo di nlo inyu bôt ba yé manôgla. (Matéô 15:30, 31; Yôhanes 5:28) Mbus nyemb Yésu, Djob a témbna nye i niñ kii hégél i mbuu. (1 Pétrô 3:18) Mbus hala, Yésu a bi bem i woo walôm u Djob letee Yéhôva a ti nye ngui le a énél nkoñ isi wonsôna kiki Ñane. (Lôk Héber 10:12, 13) Nano, Yésu a yé kiñe i ngii. I nkoñ isi wonsôna, banigil bé ba tjam ñañ nlam u.—Añ Daniel 7:13, 14; Matéô 24:14.
Ndég ngéda, Yésu a ga gwélél ngui yé i Kiñe inyu héa mandutu momasôna ni ba ba nlona mo. Bôt bobasôna ba ba nhémle Yésu, ba nôglak ki nye, ba ga kôhna niñ ikété paradis hana isi.—Añ Tjémbi 37:9-11.